Yesu o ita mushumo wawe lwa tshifhinganyana ngei Galilea ngauri o wana vhathu vhane vha ṱanganedza zwavhuḓi mulaedza wawe u fhira vha ngei Yudea. Musi a tshee Yerusalema nahone nga murahu ha u fhodza muṅwe munna nga Savhatha, “Vhayuda vho tou ṋaṋa u ṱoḓa u mu vhulaya.”​—Yohane 5:18; 7:1.

Zwino ndi tshifhefho nga 32 C.E., nahone Vhuṱambo ha Madennde Makhethwa (kana ha Mishasha) vhu tsini. Honovhu vhuṱambo vhu pembelelwa maḓuvha a sumbe, ha tevhelwa nga vhuṱambo vhukhethwa nga ḓuvha ḽa vhumalo. Vhuṱambo vhu sumbedza uri ṅwaha wa u lima wo fhela nahone ndi tshifhinga tsha u takala na u livhuwa.

Yakobo, Simoni, Yosefa na Yuda vhane vha vha vharathu vha Yesu vha mu vhudza uri: “Ṱuwa u ye Yudea.” Yerusalema ndi hone hune ha itelwa zwa vhurereli kha ḽeneḽo shango. Wonoyo muḓi u a ḓala nga tshifhinga tsha vhuṱambo vhune ha farwa luraru nga ṅwaha. Vharathu vha Yesu vha amba vha ri: “A hu na ane a nga ita zwithu tshiphirini arali a tshi ṱoḓa u ḓivhiwa. Arali u tshi ita zwenezwi zwithu, zwi ite phanḓa ha vhathu vhoṱhe.”​—Yohane 7:3, 4.

Ngoho ndi ya uri vhenevha vharathu vhawe vhaṋa “vho vha vha sa mu tendi” uri ndi Messia. Fhedzi vha khou ṱoḓa uri vhathu vho kuvhanganaho vhuṱamboni vha mu vhone a tshi ita mishumo ya maanḓa. Musi Yesu a tshi vhona uri hu ḓo vha na khombo, a ri: “A hu na zwine shango ḽa ni vhengela zwone, fhedzi nṋe ḽi a mmbenga, ngauri ndi amba uri mishumo yaḽo ndi mivhi. Inwi iyani vhuṱamboni; nṋe a thi khou ya kha hovhu vhuṱambo, ngauri tshifhinga tshanga a tshi athu u swika.”​—Yohane 7:5-8.

Nga murahu ha maḓuvha a si gathi musi vharathu vha Yesu vho no ṱuwa na tshiṅwe tshigwada, Yesu na vhafunziwa vhawe vha ṱuwa vha sa khou vhonwa nga vhathu. Vha fara nḓila i pfukaho nga Samaria, nṱhani ha u shumisa nḓila yo ḓoweleaho i re tsini na Mulambo wa Yorodane. Yesu na vhafunziwa vhawe vha ḓo ṱoḓa vhudzulo ngei Samaria, nga zwenezwo vha rumela vharumiwa hu tshee nga phanḓa uri vha ite ndugiselelo. Vhathu vha henefho vha hana u vha ṱanganedza kana u vha sumbedza vhuthu ngauri Yesu u khou ya Yerusalema u itela vhuṱambo ha Vhayuda. Yakobo na Yohane vha vhudzisa vho sinyuwa vha ri: “Murena, naa u ṱoḓa ri tshi vhidza mulilo u bvaho ṱaḓulu uri u vha fhelise?” (Luka 9:54) Yesu a vha kaidzela zwe vha zwi amba, nahone vha bvela phanḓa na lwendo.

Musi vhe nḓilani, muṅwe wa vhamaṅwalo a amba na Yesu a ri: “Mufunzi, ndi ḓo u tevhela hoṱhe hune wa ya.” Yesu a ri: “Phunguwe dzi  na milindi, na zwiṋoni zwi na zwiṱaha, fhedzi Murwa muthu ha na nnḓu.” (Mateo 8:19, 20) O vha khou amba uri onoyo wa vhamaṅwalo u ḓo sedzana na vhuleme arali a vha mutevheli wa Yesu. Zwi vhonala u nga onoyo wa vhamaṅwalo u a ḓikukumusa lune a nga si tshile nga yeneyi nḓila. Nga zwenezwo, muṅwe na muṅwe washu a nga ḓivhudzisa uri ‘Ndo ḓiimisela lungafhani u tevhela Yesu?’

Yesu a vhudza muṅwe munna a ri: “Ntevhele.” Onoyo munna a fhindula a ri: “Murena, ntendele ndi thome ndi ye u vhulunga khotsi anga.” Nge a vha a tshi ḓivha vhuimo ha onoyo munna, Yesu a ri: “Litsha vhafu vha vhulunge vhafu vhavho, hone iwe tshimbila u ḓivhadze nga ha Muvhuso wa Mudzimu fhethu hoṱhe.” (Luka 9:59, 60) Zwi vhonala u nga khotsi a onoyo munna vho vha vha sa athu u lovha. Ngauri arali khotsi awe vho lovha, o vha a sa ḓo vha e henefho a tshi khou amba na Yesu. O vha a songo ḓiimisela u vhea Muvhuso wa Mudzimu u thoma vhutshiloni hawe.

Musi vha tshi tsa na bada vha tshi ya Yerusalema, muṅwe munna a vhudza Yesu uri: “Ndi ḓo u tevhela Murena, fhedzi ntendele ndi thome u onesana na vha nnḓu yanga.” Yesu a ri: “Ane a vhea tshanḓa tshawe kha dzembe, a lavhelesa zwi re murahu, ho ngo fanelwa nga Muvhuso wa Mudzimu.”​—Luka 9:61, 62.

Vhane vha ṱoḓa u vha vhafunziwa vha Yesu vha ngoho, vha fanela u livhisa ṱhogomelo yavho kha tshumelo ya Muvhuso. Arali mulimi a sa dzuli o sedza phanḓa, foro i nga kombama. Arali a vhea dzembe fhasi u itela u sedza zwithu zwi re murahu, ha nga fhedzi u lima tsimu. Nga hu fanaho, muṅwe na muṅwe ane a sedza murahu kha ḽino shango a nga kha ḓi khukhulisea a bva nḓilani i isaho vhutshiloni vhu sa fheli.