Yesu o vhofhiwa sa ḽivemu ḽo ḓoweleaho, a iswa ha Anasi we a vha e tshifhe muhulu musi Yesu a tshi mangadza vhafunzi ngei thembeleni a tshee muṱuku. (Luka 2:42, 47) Nga murahu vhaṅwe vha vharwa vha Anasi vho shuma sa vhotshifhe vhahulu nahone zwino Kayafa ane a vha mukwasha wawe ndi tshifhe.

Musi Anasi a tshi khou vhudzisa Yesu, Kayafa o shumisa tshenetsho tshifhinga u kuvhangana vha Sanihedrini. Yeneyo khothe i re na miraḓo ya 71 i katela tshifhe muhulu na vhaṅwe vhe vha vhuya vha vha vhotshifhe vhahulu.

Anasi a vhudzisa Yesu “nga ha vhafunziwa vhawe na nga ha zwe a zwi funzwa.” Yesu a fhindula a ri: “Ndo amba vhathu vhoṱhe vha tshi zwi pfa. Ndo vha ndi tshi dzula ndi tshi funza sinagogoni na thembeleni, hune Vhayuda vhoṱhe vha kuvhangana hone, a hu na zwe nda zwi amba tshiphirini. Ndi ngani u tshi mmbudzisa? Vhudzisa vhe vha pfa zwe nda vha vhudza zwone. Ndi vhone vha ḓivhaho zwe nda amba.”​—Yohane 18:19-21.

Mulangammbi we a vha o ima henefho a rwa Yesu kha tshifhaṱuwo, a mu kaidza a ri: “Naa yeneyi ndi nḓila ine wa fhindula ngayo muhulwane wa vhotshifhe?” Fhedzi ngauri Yesu o vha a tshi ḓivha uri a hu na tshithu tsho khakheaho tshe a tshi ita, a fhindula a ri: “Arali ndo amba zwo khakheaho, mmbudze zwe nda khakha; fhedzi arali ndo amba zwone, ndi ngani u tshi nthwa?” (Yohane  18:22, 23) Anasi a ri Yesu a iswe kha mukwasha wawe Kayafa.

Zwino vha Sanihedrini, vhane vha katela tshifhe muhulu, vhahulwane vha vhathu na vhamaṅwalo vha kuvhangana. Vho kuvhangana muḓini wa Kayafa. Zwo vha zwi siho mulayoni uri muthu a sengiswe nga vhusiku ha Paseka, fhedzi zwenezwo a zwo ngo vha thivhela uri vha khunyeledze maano avho mavhi.

Tshenetshi ndi tshigwada tshi re na tshiṱalula. Musi Yesu o no vusa Lazaro, Sanihedrini yo mbo ḓi humbula u vhulaya Yesu. (Yohane 11:47-53) Maḓuvha a si gathi o fhiraho, vharangaphanḓa vha vhurereli vho kuvhangana u itela u fara Yesu uri vha mu vhulaye. (Mateo 26:3, 4) Zwi tou pfala uri u ya nga mavhonele avho, Yesu o vha o fanelwa nga u fa naho a sa athu u sengiswa.

Nga nnḓa ha muṱangano u siho mulayoni, vhahulwane vha vhotshifhe na miṅwe miraḓo ya Sanihedrini vha khou lingedza u wana vhathu vhane vha ḓo ṋea vhuṱanzi ha mazwifhi u itela u vhona Yesu mulandu. Vho wana vhanzhi, fhedzi vhuṱanzi havho ho vha hu tshi hanedzana. Mafheleloni, ha ḓa vhavhili vha ri: “Ro mu pfa a tshi ri, ‘Ndi ḓo thutha thembele ye ya fhaṱwa nga zwanḓa, nda fhaṱa iṅwe i songo fhaṱwaho nga zwanḓa nga maḓuvha mararu.’” (Marko 14:58) Naho zwo ralo, na vhuṱanzi ha vhenevha vhanna vhavhili a vhu khou tendelana.

Kayafa a vhudzisa Yesu a ri: “Naa a u fhinduli? Naa a u pfi zwine avha vhathu vha khou u pomoka zwone?” (Marko 14:60) Yesu ho ngo fhindula tshithu musi dzenedzi ṱhanzi dzi tshi mu pomoka mazwifhi na vhuṱanzi havho vhu sa tendelani. Zwino Tshifhe Muhulu Kayafa a luka maṅwe maano.

Kayafa o vha a tshi zwi ḓivha uri Vhayuda vha sinyutshela muṅwe na muṅwe ane a amba uri u Murwa wa Mudzimu. Mathomoni musi Yesu a tshi amba uri Mudzimu ndi Khotsi awe, Vhayuda vho vha vha tshi ṱoḓa u mu vhulaya ngauri vho vha vha tshi ri u khou “ḓiita u nga u lingana na Mudzimu.” (Yohane 5:17, 18; 10:31-39) Nge Kayafa a vha a tshi ḓivha nga ha enea mafhungo, a amba na Yesu a ri: “Ndi a u anisa nga Mudzimu a tshilaho, ri vhudze arali u Kristo Murwa wa Mudzimu.” (Mateo 26:63) Yesu a tenda uri u Murwa wa Mudzimu. (Yohane 3:18; 5:25; 11:4) Arali a vhe a songo ita nga u ralo, vhaṅwe vho vha vha tshi ḓo humbula uri u khou landula uri u Kristo na u ri u Murwa wa Mudzimu. Ndi ngazwo Yesu o fhindula a ri: “Ndi nṋe; ni ḓo vhona Murwa muthu o dzula thungo ya tshanḓa tsha u ḽa tsha Wa maanḓa a tshi ḓa e kha makole a ṱaḓulu.”​—Marko 14:62.

Kayafa a kherula zwiambaro zwawe, a ri: “O sema Mudzimu! Ri kha ḓi ṱoḓa dziṅwe ṱhanzi dza mini? No mu pfa a tshi khou semana. Inwi ni ri mini?” Vha Sanihedrini vha haṱula nga nḓila i songo teaho, vha ri: “O tewa nga u fa.”​—Mateo 26:65, 66.

Nga murahu ha zwenezwo, vha thoma u goḓa Yesu na u mu rwa nga mavili. Vhaṅwe vha mu rwa khofheni nahone vhaṅwe vha mu pfela nga mare. Nga murahu vha mu thivha tshifhaṱuwo tshoṱhe na u mu rwa, vha mu goḓa vha ri: “Porofita! Wo rwiwa nga nnyi?” (Luka 22:64) Hoyu ndi Murwa wa Mudzimu ane a khou farwa nga nḓila ya tshiṱuhu na u sengiswa zwi siho mulayoni vhusiku.