Vhahashu Vha Funwaho:

Kha mulaedza we Yesu a u vhudza tshivhidzo tsha Simirina, o ri: “Hu si kale u ḓo tambudzwa, fhedzi u songo ofha.” (Nzu 2:10) Yeneyi ṱhuṱhuwedzo ye a i ṋea tshenetshi tshivhidzo i a shuma na kha riṋe ṋamusi vhane ra khou tshila tshifhingani tsha “ḓuvha ḽa Murena.” (Nzu 1:10) Nangoho hezwi ndi “zwifhinga zwi lemelaho zwi konḓaho u sedzana nazwo.” Fhedzi ri a ṱuṱuwedzea vhukuma nga u vhona vhathu vha Mudzimu u mona na shango ḽoṱhe vha tshi dzula vha tshi fhulufhedzea naho vha tshi khou sedzana na thaidzo dzi lingaho lutendo lwavho na u vha havho na tshivhindi.​—2Ti 3:1-5.

Ri nga ita hani vhungoho ha uri ri dzule ro ima ro khwaṱha ri na tshivhindi, ri sa tendi u “humela murahu”? (Hev 10:39) Zwi nga si ḓo dzula zwi tshi leluwa tshifhinga tshoṱhe ngauri ri nga pikiswa na u tovholwa. Fhedzi ri tea u khetha u vha na tshivhindi uri ri kone u imelela Yehova na zwine a ri vhudza uri ndi zwone zwo teaho naho ri tshi shona kana ri tshi ofha. Ndi mini zwine zwa nga ri thusa?

Ipfi ḽa Mudzimu ḽi nga ni thusa uri ni vhe na tshivhindi. Ḽo ḓala nga tsumbo dza vhanna na vhafumakadzi vhe vha vha vhe na tshivhindi. Heyi bugu yo lugiselwa u ri thusa u ṱolisisa tsumbo dzavho na uri ri vhone uri ri nga vha edzisa hani. Musi ni tshi khou guda nga ha dzenedzi tsumbo dzi re Bivhilini, rabelani kha Yehova uri a ni thuse u vhona uri zwine na khou zwi guda zwi nga ni thusa hani vhutshiloni haṋu. A ni thuse na u vhona uri zwi nga ni thusa hani u sedzana na thaidzo dzine na vha nadzo zwino na dzine na nga vha nadzo tshifhingani tshi ḓaho. Humbulani uri Yehova a nga ni thusa hani u vha na tshivhindi. Ni humbulisise na nga ha uri tshivhindi tshe vhenevha vhanna na vhafumakadzi vha tshi sumbedza tshi nga ni thusa hani uri ni vhe na tshivhindi tsha u ita zwi tevhelaho:

U ita tshanduko. (Yak 3:17) Musi Yehova a tshi litsha u tikedza Saulo, a khetha Davida we a vha a tshi kha ḓi vha muṱuku uri hu vhe ene khosi, Yonathani o sumbedza tshivhindi na uri u a fhulufhedzea kha Yehova nga u tikedza phetho ye a i ita ya u nanga Davida uri a vhe khosi.

U ita zwine Yehova a amba hu sa londwi uri vhaṅwe vha ri mini. (Hev 11:32-34) Henania, Misaele na Asaria vho vha vho ḓiimisela u fa ṋanḓoni ya mulilo nṱhani ha u gwadamela tshifanyiso.

 U vhudza vhaṅwe ngoho. (Mat 22:16) Humbulani nga ha Saulo wa Tariso we a vhudza vhathu ngoho nga ha Kristo naho vhenevho vhathu vho vha vha tshi khou lavhelela uri a tovhole vhatevheli vha Kristo navho.

Ri rabela uri heyi khandiso i ni thuse uri ni vhe na lutendo lwo khwaṱhaho na u vha na tshivhindi nga ho engedzeaho. (Ps 27:14) U nga ri Yehova a nga ni thusa musi ni tshi khou bvela phanḓa na u thusa vha muṱa waṋu na vhahaṋu tshivhidzoni uri vha imelele Muvhuso wa Mudzimu nga tshivhindi!