REBEKA o vha a tshi khou swika tshisimani, o hwala mvuvhelo khulwane. Ḓuvha ḽo vha ḽi tshi vho kovhela nahone ho vha hu tshifhinga tsha uri a ye u ka maḓi. Ho vha hu mushumo wawe wa ḓuvha na ḓuvha. Fhedzi zwazwino musi a tshi vho swika tsini, a vhona vhaṅwe vhathu vhe a vha a sa vha ḓivhi. Ho vha hu tshigwada tsha vhanna vhe na dzigamela. Naho zwo ralo, a ya tshisimani, a ḓadza mvuvhelo yawe nga maḓi.

Musi Rebeka a tshi vho humela hayani, o hwala mvuvhelo yawe ine ya khou lemela, vhaṅwe mukalaha vhe vha vha vhe kha tshenetsho tshigwada, vha ya khae vha amba nae vha ri: “Ndi khou humbela uri u nnwise maḓinyana a re mvuvheloni yau.” Rebeka o sumbedza mafunda kha vhenevho vhathu vhe a vha a sa vha ḓivhi. A ri: “Inwa muṋe wanga.” A rula mvuvhelo yawe nga u ṱavhanya, a nwisa vhenevho mukalaha maḓi u swika vha tshi pfelela.

Ho ngo guma henefho. O kela maḓi gamela dza fumi dze dza ḓa na vhenevho vhanna naho hu si na we a mu humbela. Vhenevho mukalaha vha sokou lavhelesa vho mangala, vha tshi khou vhona onoyu ṅwananyana wa u naka a tshi tsa a tshi gonya a tshi khou kela gamela maḓi u swika dzi tshi pfelela. Vha mbo ḓi mu vhudzisa uri u ṅwananyana wa nnyi na u mu vhudzisa arali vha tshi nga kona u wana vhulalo ha hawe. Rebeka a dovha a vha sumbedza mafunda. A vha vhudza uri vhulalo vhu hone na uri hu na zwiḽiwa zwinzhi zwe a vha a tshi ḓo zwi ṋea dzenedzo gamela.

Yehova ndi ene we a ita uri vhenevho vhathu vha ṱangane, fhedzi Rebeka o vha a sa zwi ḓivhi. Khamusi vhenevho mukalaha vho vha vhe Eliesere we a vha e mulanda a fhulufhedzeaho wa Abrahamu. Vhegeni dzo fhiraho, muṋe wawe Abrahamu o vha o mu humbela uri a tshimbile lwendo lulapfu uri a ye u ṱoḓela Isaka ane a vha murwa na muḽaifa wa Abrahamu, mufumakadzi. Abrahamu o vha o ombedzela uri musidzana ane a ḓo nangiwa u tea u bva kha muṱa une wa gwadamela Yehova. Ndi ngazwo Eliesere o rabela kha Yehova uri a mu thuse. O rabela a mu humbela uri musidzana ane Mudzimu a ḓo mu nanga uri a vhe mufumakadzi wa Isaka u tea u vha sumbedza mafunda. Rebeka o ita zwenezwo.

Rebeka o vha o ḓiimisela u thusa vhenevho vhanna vhe a vha a sa vha ḓivhi. Ndi ngoho uri nga tshenetsho tshifhinga zwo vha zwo leluwa u sumbedza mafunda kha vhathu vhane u sa vha ḓivhe ngauri ho vha ho tsireledzea. Fhedzi ri a zwi ḓivha uri ṋamusi vhathu vhanzhi vha ‘ita zwa dzikhakhathi nahone a vha funi zwivhuya.’ (2 Tim. 3:1, 3) Naho zwo ralo, Rebeka o vha e  tsumbo yavhuḓi na nga zwenezwo zwifhinga nahone o sumbedza tshivhindi na nga dziṅwe nḓila.

Hu si kale, Rebeka o mbo ḓi zwi pfesesa uri ndi ngani vhenevho vhanna vho ḓa vha tshi khou bva kule-kule. Bethuele khotsi a Rebeka na Labani khaladzi a Rebeka, vho ramba Eliesere uri a ḓe a ḽe navho zwiḽiwa. Fhedzi vhenevho mukalaha vho vha vha tshi khou ṱoḓa u thoma nga u vha vhudza uri ndi ngani vho ḓa. Vho vha ṱalutshedza zwe zwa itea na u vha vhudza uri Yehova o vha thusa hani uri vha wane Rebeka. Bethuele na Labani vho mbo ḓi zwi vhona uri nangoho Yehova ndi ene o vha thusaho, vha ri: “Hezwi zwi bva ha Yehova.”

Rebeka o vha a tshi ḓo ita mini? Abrahamu o vha o amba uri zwi nga itea uri musidzana we a nangiwa a si ṱoḓe u ṱuwa na Eliesere ngei Kanana. Zwi vhonala uri Rebeka o vha a tshi nga khetha u ṱuwa kana u sa ṱuwa. Nga matsheloni a tevhelaho, Eliesere a humbela u ṱuwa na Rebeka ḽeneḽo ḓuvha. Vha muṱani wa Rebeka vha vhudzisa Rebeka ene muṋe. Musi vha tshi mu vhudzisa, o vha fhindula a ri: “Ndi a ṱoḓa u ṱuwa nae.” O vha o ḓiimisela u ṱutshela haya hawe na muṱa wawe a tshi zwi ḓivha uri zwi nga itea a si tsha dovha a vha vhona. Ndi ngani o vha na tshenetsho tshivhindi? Zwi vhonala u nga na ene o vha a tshi khou zwi ḓivha uri ndi zwine Yehova a khou ṱoḓa zwi tshi itea.

Musi vho no fhedza vhege dzo vhalaho vha tshi khou tshimbila nga gamela, vho mbo ḓi swika madenndeni a Abrahamu ngei Kanana. Ḓuvha ḽi tshi vho kovhela, Rebeka a vhona muṅwe munna a tshi khou tshimbila e eṱhe mudavhini, a tshi khou elekanya. Musi a tshi vhudzwa uri ndi Isaka, a dzhia labi ḽawe a ḓifukedza ṱhoho a tshi khou sumbedza u ḓiṱukufhadza na uri u khou tenda uri Isaka a vhe munna wawe. Isaka munna a sa dini na ane a humbulela vhaṅwe we zwazwino o vha e na miṅwaha ya 40, o vha a tshi kha ḓi lilela mme awe Sara vhe vha lovha miṅwaha miraru yo fhiraho. Naa Rebeka o vha a tshi ḓo sumbedza u vha na tshivhindi, a ita zwe Yehova a vha a tshi khou ṱoḓa a tshi zwi ita? Naa o vha a tshi ḓo funa na u tikedza Isaka, a mu thusa uri a shumele Yehova sa ṱhoho ya muṱa wavho? Bivhili i sumbedza uri o zwi ita. Musi Bivhili i tshi amba nga ha nḓila ye Isaka a vha a tshi ḓipfa ngayo nga Rebeka, yo ri: “A mu funa, a pfa o khuthadzwa a si tsha lilela mme awe.”

Vhalani nga ha enea mafhungo Bivhilini:

• Genesi 24:1-67; 25:20

Khaseledzo

Rebeka o sumbedza u vha hani na tshivhindi?

 Wanani Zwo Engedzeaho

1. 1. Eliesere o vha a si tsha ḓo kona u wana mini musi Abrahamu a tshi vha na vhana, fhedzi ndi mini zwe zwa sumbedza uri ho ngo vha na vivho? (Gen. 15:2-4; 24:12; w97 1/1 30 ¶2)

   Phindulo yaṋu

2. 2. Ndi ngani Abrahamu o vha a tshi khou ṱoḓa uri mufumakadzi wa Isaka a pfulutshele Kanana nṱhani ha uri Isaka a pfulutshele hayani ha Rebeka? (w97 1/1 30 ¶3)

   Phindulo yaṋu

3. 3. Ndi ngani Rebeka na muṱa wawe vho fhiwa zwifhiwa? (it “Rebeka” ¶4-wcgr)

   Phindulo yaṋu

4. 4. Ṱalutshedzani uri lwendo lwa Rebeka u bva Harani u ya hayani ha Isaka Negebe lwo vha lu hani. (wp16. 3 15 ¶1) A

   Phindulo yaṋu

   www.LifeintheHolyLand.com

 Nḓila Ine Na Nga Zwi Shumisa Ngayo Vhutshiloni Haṋu

• Ri nga guda mini kha Abrahamu, Rebeka na Isaka nga ha u khetha mufarisi wa mbingano? (Gen. 24:2, 3; 27:46–28:1)

  Phindulo yaṋu

• Rebeka o vha e mushumi wa biko, e na mafunda nahone a tshi ṱhonifha. Vhahashu vha tshifumakadzini ṋamusi vha nga mu edzisa hani? B

  Phindulo yaṋu

• Ni nga vha hani na tshivhindi u fana na Rebeka?

  Phindulo yaṋu

Elekanyani Nga Ha Hezwi Zwithu Zwa Ndeme

• Ndi guda mini nga ha Yehova kha aya mafhungo?

  Phindulo yaṋu

• Aya mafhungo a tshimbidzana hani na tshipikwa tsha Yehova nga ha ḽifhasi na vhathu?

  Phindulo yaṋu

• Ndi nga takalela u vhudzisa mini Rebeka musi a tshi vuswa?

  Phindulo yaṋu