NAOMI o sedzana na makhaulambilu a tshi tou tevhekana. Musi hu na nḓala khulu ngei Isiraele, munna wawe o mbo ḓi pfulusa muṱa u bva Betlehema vha ya shangoni ḽa Moaba. Ḽiṅwe ḓuvha, munna wa Naomi a lovha, a mu sia e eṱhe na vharwa vhawe vhavhili shangoni ḽi si ḽa havho. Nga murahu, vharwa vhawe vha mala vhasidzana vha Moaba vha sa gwadameli Yehova. Ho no fhela miṅwaha ya fumi, ha dovha ha itea zwiṅwe zwithu zwi ṱungufhadzaho. Vharwa vhawe vhoṱhe vha lovha. Vhoṱhe vho lovha vha si na vhana. Ngauralo, Naomi o vha o xelelwa nga munna wawe na vhana vhawe nahone o vha e si na fhulufhelo ḽa uri u ḓo vha na vhaḓuhulu.

Naomi o vhona uri ndi khwiṋe a humele hayani Betlehema ngauri o vhona uri a hu na tshiitisi tsha uri a dzule henefho Moaba. Lwo vha lu lwendo lwe lwa vha lu tshi nga dzhia vhege. Ruṱe na Oripa, vho mazwale wawe, vha fara lwonolwo lwendo nae. Naomi o vha a sa ṱoḓi uri vha ṱutshele kule na shango ḽa havho na mashaka avho. Khamusi o vha a tshi vhona uri a si zwavhuḓi uri vha ṱuwe nae Betlehema ngei Isiraele ngauri vha nga kha ḓi sa vhingwa nahone vha sa vhe na vhana. O vha humbela uri vha ye mahayani avho ngauri o vha a tshi vha humbulela. Naomi o vha e na tshivhindi, o vha o ḓiimisela u tshimbila lwonolwo lwendo e eṱhe. Oripa na Ruṱe vha mbo ḓi lila. Oripa a humela murahu, fhedzi Ruṱe a si tende u huma, a ṱuwa na Naomi.

Ruṱe o vhudza Naomi uri: “U songo nkombetshedza uri ndi u ṱutshele, . . . ngauri hune wa ya na nṋe ndi ḓo ya, hune wa ḓo eḓela hone na nṋe ndi ḓo eḓela hone. Vhathu vha hau vha ḓo vha vhathu vhanga na Mudzimu wau u ḓo vha Mudzimu wanga. Hune wa fa na nṋe ndi ḓo fela hone, henefho ndi hune nda ḓo vhulungwa hone.”

Onoyu mufumakadzi a fhulufhedzeaho a re na tshivhindi, o vha o ḓiimisela u gwadamela Mudzimu wa Naomi, Yehova. Ngauralo, Ruṱe o mbo ḓi ṱuwa na Naomi vha ya Isiraele. O vha a tshi khou sia muṱa wa hawe, mvelele yawe na midzimu ya hawe ya Moaba. Musi vhenevha vhafumakadzi vhavhili vha tshi swika Betlehema, vhaṅwe vhafumakadzi vho mangala vha tshi vhona nḓila ye Naomi a vha o shanduka ngayo. Naomi a vha fhindula o tou ṱungufhala a vha vhudza uri o tsikeledzea zwihulu ngauri Yehova o mu dzhiela zwithu zwoṱhe, o sala e si na na tshithu. Zwe Naomi a amba zwi nga vha zwo vhaisa Ruṱe ngauri o ṱutshela zwithu zwinzhi u itela u vha na Naomi fhedzi Bivhili a i sumbedzi uri eneo maipfi o vhaisa kana u ṱungufhadza Ruṱe. Nṱhani hazwo, Ruṱe o mbo ḓi ṱuwa a ya a ṱala ṱhalane kha masimu e a vha e tsini  henefho u itela uri ene na Naomi vha kone u wana zwa u ḽa.

Muṅwe munna o pfumaho, a re na tsimu ane a pfi Boasi, ṅwana wa Rahaba, o vhona Ruṱe a tshi khou shuma nga maanḓa henefho masimuni. Onoyo munna ane a fhulufhedzea kha Yehova a vhudzisa nga ha Ruṱe. O wanulusa uri Ruṱe o shuma nga maanḓa u itela u thusa Naomi. A khoḓa Ruṱe nge a fhulufhela uri Yehova Mudzimu u ḓo mu ṱhogomela na Naomi. A ita na vhungoho ha uri hu songo vha na muṱhannga na muthihi henefho tsimuni ane a ḓo mu dina.

Nga eneo madekwana, Ruṱe o mbo ḓi vhudza Naomi nḓila ye Boasi a mu sumbedza vhuthu ngayo nahone zwenezwo zwa takadza Naomi nga maanḓa. Naa Boasi o vha a tshi nga kona u vhinga Ruṱe? Boasi o vha e shaka ḽa munna wa Naomi nahone u ya nga Mulayo Wa Mudzimu, arali mufumakadzi a vha tshilikadzi a tshi kha ḓi kona u beba vhana, o vha a tshi nga khetha u vhingwa nga shaka ḽa tsini ḽa munna wawe o lovhaho. Nga yeneyo nḓila, o vha a tshi ḓo kona u vha na ṅwana ane a ḓo dzhiiwa sa muḽaifa wa munna wawe o lovhaho nahone dzina ḽa mufu ḽi si fe. (Dot 25:5, 6) Nga murahunyana, Naomi a mbo ḓi vhudza Ruṱe zwe a vha a tshi tea u zwi ita.

Ruṱe a tenda u ita zwe Naomi a mu vhudza zwone naho zwo vha zwi tshi vhonala zwi sa pfali nahone zwi tshi tshuwisa. A bva vhusiku, a ya fhethu he ha vha hu tshi fhefherwa hone he vhanna vho vha vha tshi anzela u eḓela hone kha thulwi dza thoro dze vha dzi kaṋa. A ṋangavhedza a ya tsini na milenzhe ya Boasi, a i fukula nahone a eḓela henefho. Musi Boasi a tshi vuwa, Ruṱe a amba nae nga u ḓiṱukufhadza, a mu humbela arali o vha a tshi nga ḓiimisela u mu rengulula. Onoyo munna a re na vhuthu a nga vha o zwi ṱhogomela uri Ruṱe o vha o tshuwa. A takadzwa vhukuma nga tshivhindi tshawe na nḓila ine a funa ngayo Yehova na Naomi. A mu vhudza uri a nga takalela u mu vhinga fhedzi u ṱoḓa u thoma a vhona arali zwi tshi nga konadzea.

Nga ḓuvha ḽi tevhelaho, Boasi o mbo ḓi ya kha vhahulwane vha Betlehema a dzudzanya zwithu zwoṱhe u ya nga mulayo wa Mudzimu. A mbo ḓi vhinga Ruṱe. Nga u ya ha tshifhinga, Ruṱe a beba murwa ane a vha Obede. Naomi o vha a tshi funa nga maanḓa onoyo muḓuhulu wawe. Khosi Davida o bva kha lushaka lwa onoyo ṅwana u katela na Messia we a vha hone ho no fhela miṅwaha i fhiraho 1 000. (Mat 1:5, 6, 16) Yehova o fhaṱutshedza Ruṱe na Naomi nge vha sumbedza u vha na tshivhindi.

Vhalani nga ha enea mafhungo Bivhilini:

• Ruṱe 1:1–4:22

Khaseledzo:

Naomi na Ruṱe vho sumbedza hani u vha na tshivhindi?

1. 2. Ri zwi ḓivha hani uri vhuḽa vhusiku he Ruṱe a ya kha Boasi, o vha a songo ya u itela u ita zwa vhudzekani nae? (ia 47 ¶17-18)

   Phindulo yaṋu

2. 3. Boasi o vhidza Ruṱe “ṅwananyana wanga” kana “ṅwananga.” Zwenezwi zwi ri gudisa mini nga hae? (Ruṱe 2:8; w16.11 3)

   Phindulo yaṋu

3. 4. U fhambana na munna a vhidzwaho Mugede, Boasi o sumbedza hani u humbulela musi a tshi tenda u vhinga Ruṱe? (w23.03 14) B

   Phindulo yaṋu

 Nḓila Ine Na Nga Zwi Shumisa Ngayo Vhutshiloni Haṋu

• Tsumbo ya Ruṱe ya u vha mushumi wa biko na u vha muthu ane a livhuwa i nga ri thusa hani musi ri tshi khou sedzana na thaidzo dza masheleni? C

  Phindulo yaṋu

• Musi Naomi o ṱungufhala zwihulu, Ruṱe o mu thusa uri a kone u konḓelela. Ri guda mini kha Naomi nga ha u ḓiṱukufhadza ra tenda u thuswa nga vhaṅwe? Ri guda mini kha Ruṱe nga ha u ṱuṱuwedza vhaṅwe?

  Phindulo yaṋu

• Ndi dzifhio dziṅwe nḓila dzine na nga sumbedza ngadzo tshivhindi tshi fanaho na tshe Naomi na Ruṱe vha tshi sumbedza?

  Phindulo yaṋu

Elekanyani Nga Ha Hezwi Zwithu Zwa Ndeme

• Ndi guda mini nga ha Yehova kha aya mafhungo?

  Phindulo yaṋu

• Aya mafhungo a tshimbidzana hani na tshipikwa tsha Yehova nga ha ḽifhasi na vhathu?

  Phindulo yaṋu

• Ndi nga takalela u vhudzisa mini Naomi na Ruṱe musi vha tshi vuswa?

  Phindulo yaṋu