18 GIDIONI
O Vha Na Tshivhindi Na Vhulondi
MUTHU a re na tshivhindi u tea u dovha a vha na vhulondi. Arali a si na vhulondi a nga ḓifhulufhela nga ho kalulaho nahone a ita zwithu zwine zwa nga mu dzhenisa khomboni. Gidioni ene o vha e na tshivhindi, a tshi dovha a vha na vhulondi. O tshila nga tshifhinga tshee Vhaisiraele vha dovha vha ita zwithu zwi sa takadzi Yehova. Ngauralo, Yehova a tendela Vhamidiani vha tshi dzhena shangoni ḽa Vhaisiraele, vha vha tambudza na u vha tsikeledza. Zwenezwo zwa ita uri Vhaisiraele vha tshuwe nga maanḓa, vha ofha na u ya u shuma masimuni avho. Fhedzi Gidioni o vha na tshivhindi a bvela phanḓa a tshi shuma. Fhedzi o zwi ita nga vhulondi ngauri o vha a tshi fhula goroi fhethu he ha vha hu tshi sukelwa hone nḓirivhe, hune khamusi ha vha fhethu ho dzumbamaho huhulwane he ha bwiwa kha tombo ḽihulwane.
Vhutshilo ho vha hu tshi khou konḓa nga maanḓa, zwa ita uri Vhaisiraele vha humbele thuso kha Yehova. Yehova a vha rumela muporofita u itela u vha humbudza uri ndi ngani o vha o vha ṱutshela. Nga murahu ha zwenezwo, a rumela muruṅwa kha Gidioni u itela u mu vhudza uri ndi ene we Yehova a mu ṋanga uri a tshidze vhathu vhawe. Gidioni o mbo ḓi humbela muruṅwa tshiga tsha u sumbedza uri nangoho onoyo muruṅwa o rumiwa nga Yehova. Muruṅwa a mbo ḓi ita vhuṱolo, a ita uri hu bve mulilo kha tombo, u fhise zwiṱhavhelo zwe Gidioni a vha o vhea kha ḽeneḽo tombo. Nga murahu ha zwenezwo, muruṅwa a mbo ḓi ngalangala. Nga honovho vhusiku, Yehova a amba na Gidioni a mu vhudza uri a ye u thutha aḽeṱare ya Bali ine ya vha ya khotsi awe na thanda khethwa dzi re tsini nayo, nga murahu a fhaṱele Yehova aḽeṱare na u mu ṋekedza zwiṱhavhelo. Gidioni o vha na tshivhindi a ita zwe a vhudzwa, fhedzi nga nṱhani ha uri o vha e na vhulondi, o zwi ita vhusiku u itela uri a si vhonwe nga khotsi awe na vhanna vha wonoyo muḓi.
Nga murahu ha zwenezwo, Vhamidiani vho mbo ḓi ṱangana na Vhaamaleke na vhathu vha Vhubvaḓuvha vha ita mmbi khulwane uri vha lwe na Vhaisiraele. Vha wela govhani ḽa Yeseriele vho ḓala sa nzie. Gidioni a tshi khou thuswa nga muya mukhethwa, a mbo ḓi rumela vhaḓinḓa kha tshaka dzo vhalaho dza Vhaisiraele u itela uri vha vha humbele uri vha ḓe vha mu thuse u lwa. Samusi Gidioni o vha e na vhulondi, o mbo ḓi humbela Yehova uri a mu itele vhuṱolo vhuvhili u itela u mu khwaṱhisedza uri nangoho o vha a tshi khou mu tikedza. Yehova a sa mu fhelele mbilu, a ita zwe a humbela. Nga honoho vhusiku musi Gidioni o sia o adza nguvho ya mamvele fhethu hune ha fhefherwa hone, Yehova o ita uri ṅwando u wele yeneyo nguvho i ṋukale, fhedzi fhasi hu sale ho oma. Nga vhusiku vhu tevhelaho a ita uri nguvho ya mamvele i sale yo oma, fhedzi fhasi ho ṋukala.
Musi mmbi ya Gidioni i tshi vhambedzwa na maswina ayo, yo vha i ṱhukhu nga maanḓa, naho zwo ralo, Yehova o vhudza Gidioni uri a i fhungudze
Zwe Yehova a ita zwo ṋea Gidioni tshivhindi, zwa ita uri a dzhie mmbi yawe ya vhanna vha 32 000 vha ye u lwa na maswina avho vhe vha vha vhe 135 000. Musi Vhaisiraele vhe Tshisimani tsha Harode, Yehova o vhudza Gidioni uri mmbi yawe i na vhanna vhanzhi nga maanḓa. Ngauralo Yehova a mu vhudza uri a vhudze vhanna vhawe vhoṱhe uri ane a khou ofha a humele hayani, ha mbo ḓi sala vhanna vha 10 000. Fhedzi Yehova a dovha a amba uri vha tshe vho ḓalesa, a vhudza Gidioni uri a ṱuwe na vhanna vhawe tshisimani a sedze nḓila ine vha nwa ngayo maḓi. Vhe vha nwa maḓi vho tou gwadama vho sedza fhasi, vho mbo ḓi vhudzwa uri vha ḓiṱutshele. Fhedzi ho vha na vhaṅwe vhe vha ita zwithu zwavho nga vhulondi, vha nwa maḓi vho tou kwatama vha tshi khou kapela maḓi milomoni yavho. Zwenezwi vho zwi itela uri vha vhe vha tshi kha ḓi kona u vhona zwine zwa khou itea. Ndi vhenevha vhanna vhe vha nangiwa uri vha ye u lwa. Zwino Gidioni o vha a tshi tou vha na vhanna vha 300 fhedzi.
Naho Gidioni o vha e na mmbi ṱhukhu, o vha na tshivhindi, a ḓilugiselela u ya u vutshela maswina avho. Yehova o dovha a khwaṱhisedza Gidioni uri u khou mu tikedza. O vhudza Gidioni uri a ye madenndeni a maswina awe nga madekwana. Musi Gidioni a tshi swika, o pfa muṅwe munna a tshi khou vhudza khonani yawe zwe a ḽora. Wonoyo muḽoro, wo vha u tshi sumbedza uri Vhaisiraele vha ḓo kunda kha yeneyo nndwa. Zwenezwo zwo engedza tshivhindi tsha Gidioni, a humela kha vhanna vhawe a vha vhudza uri u itela uri vha kone u kunda kha yeneyo nndwa, vha tea u mu sedza vha tevhedza zwoṱhe zwine a ḓo zwi ita. Nga honovho vhusiku, Gidioni na vhanna vhawe vha ya vha tanga madennde a maswina avho. Vho vha vhe na mvuvhelo khulwane, mbone na dziṋanga. Musi Gidioni a tshi vha ṋea tswayo, vha mbo ḓi lidza ṋanga dzavho na u kwasha mvuvhelo nahone vha vhidzelela vha ri: “Banga ḽa Yehova na ḽa Gidioni!” Zwenezwo zwo ita uri maswina avho a humbule u nga vha khou ṱhaselwa nga mmbi khulwane, zwa vha tshuwisa na u vha ḓaḓisa vhukuma. Yehova a ita uri vha vutshelane nga tshavho na u vhulayana. Ho tou sala vhanna vha 15 000 fhedzi vhe vha tshila nahone vho mbo ḓi shavha.
Gidioni o mbo ḓi vha pandamedza. Mafheleloni a kunda Vhamidiani na u vhulaya vhavhusi vhavho. O dovha a laṱisa vhathu vhe vha hana u ṋea vhanna vhawe zwiḽiwa musi vha tshi khou lwa nndwa ya Yehova. Nga murahu ha zwenezwo, vhathu vho mbo ḓi lingedza u ita Gidioni khosi yavho. Gidioni a ḓiṱukufhadza a hana, a vha vhudza a ri: “Yehova ndi ene ane a ḓo ni vhusa.” Yehova o fhaṱutshedza onoyo munna we a vha na tshivhindi na vhulondi. Musi Gidioni a tshi khou shuma sa muhaṱuli Isiraele, a ho ngo tsha dovha ha vha na dzinndwa nahone o tshila tshifhinga tshilapfu. Musi muapostola Paulo a tshi amba nga ha vhanna na vhafumakadzi vhe vha vha na lutendo, o ita na u amba nga ha Gidioni.—Vhahev. 11:32.
Vhalani nga ha enea mafhungo Bivhilini:
Khaseledzo:
Gidioni o sumbedza hani u vha na tshivhindi?
Wanani Zwo Engedzeaho
-
1. Musi uḽa munna a tshi khou ḽora, o vhona “ḽofo ya vhurotho ya baḽi,” ndi ngani i tshi imela mmbi ya Gidioni zwavhuḓi? (Vhahaṱ. 7:13; it “Baḽi” ¶7-wcgr)
-
2. Ndi ngani phosho ye ya itwa nga ṋanga dza 300 yo tshuwisa na u ḓaḓisa Vhamidiani? (it “Lunanga” ¶3-wcgr) A
Tshifanyiso A: Vhaisiraele vho vha vha tshi shumisa ṋanga dza thutha u itela u sevha vhathu kana u vha ṋea tswayo
-
3. Gidioni na mmbi yawe vho vha vha tshi tea u ita mini u itela uri vha kone u kunda Vhamidiani? (w04 10/15 16 ¶9-10) B
Tshifanyiso B: Gidioni o gidimedza Vhamidiani khilomithara dzi ṱoḓaho u vha 80 u swika Yogobeha (nḓila ye a i dzhia a i ḓivhei)
-
4. Ndi zwifhio zwi re Bivhilini zwine zwa sumbedza uri zwenezwi zwithu zwo itea zwa vhukuma? (w05 4/15 32-wcgr)
Nḓila Ine Na Nga Zwi Shumisa Ngayo Vhutshiloni Haṋu
-
Gidioni o ranga phanḓa vhathu vha Mudzimu nahone vha kunda maswina avho. Naho zwo ralo, o dzula a tshi ḓiṱukufhadza na u ita uri hu vhe na mulalo nga u amba zwavhuḓi na vhaṅwe vhathu. (Vhahaṱ. 8:1-3) Ṱhoho dza miṱa na vhahulwane vha tshivhidzo vha nga edzisa hani Gidioni musi muṅwe muthu o sinyuswa nga zwe vha zwi ita?
-
Ndi kha vhuimo vhufhio vhune ra nga tea u vha na tshivhindi ri dovhe ri vhe na vhulondi ? C
Tshifanyiso C
-
Ni nga vha hani na tshivhindi u fana na Gidioni?
Elekanyani Nga Ha Hezwi Zwithu Zwa Ndeme
-
Ndi guda mini nga ha Yehova kha aya mafhungo?
-
Aya mafhungo a tshimbidzana hani na tshipikwa tsha Yehova nga ha ḽifhasi na vhathu?
-
Ndi nga takalela u vhudzisa mini Gidioni musi a tshi vuswa?
Gudani Zwiṅwe
Arali na wana ndugelo tshumeloni yaṋu, ni nga edzisa hani Gidioni?
“Vhuṱali Vhu Kha Vhane Vha Ḓifhima” (w00 8/1 16-18 ¶11-15)

