YEHOVA o fhulufhedzisa khonani yawe Abrahamu zwiṅwe zwithu zwe zwa vha zwi tshi ḓo kwama vhumatshelo ha vhathu vhoṱhe kha ḽifhasi. O ri: “Ndi ḓo u ita lushaka luhulu.” Mudzimu o dovha a sumbedza Abrahamu shango ḽavhuḓi ḽe lwonolo lushaka lwa vha lu tshi ḓo dzula khaḽo. (Gen. 12:2; 13:14, 15) Fhedzi Saṱhane o vha o ḓiimisela u fhelisa Abrahamu u itela uri lwonolo lushaka lu si vhe hone. Diabolo o vha a tshi zwi ḓivha uri kha lwonolo lushaka hu ḓo bva “ṅwana” we a vha a tshi ḓo ita uri a si tsha vhusa na u mu fhelisa lwa tshoṱhe.​—Gen. 3:15.

Saṱhane o ṱhasela Abrahamu na muṱa wawe. Muṅwe wa vhe vha kwamea nga maanḓa ndi Loto, we a vha e murwa wa murathu wa Abrahamu. Abrahamu o vha o ṋea Loto tshibuli tsha uri a khethe u thoma uri u ṱoḓa u dzula gai Shangoni Ḽo Fhulufhedziswaho nahone Loto a ṋanga shango ḽo nonaho na u pfuma. Ḽo vha ḽi tsini na ḓorobo ya Sodoma, he vhathu vha hone vha vha vhe “vhavhi, vhe vhaitazwivhi vhahulu phanḓa ha Yehova.” (Gen. 13:8-13) Khosi ya Sodoma na maṅwe mahosi maṋa a Kanana, vho vha vha songo takala ngauri vho vha vha tshi tea u sokou dzula vha tshi badela mithelo kha khosi ya Elamu. Ngauralo vha mu vutshela. Nga nṱhani ha zwenezwo, khosi ya Elamu na maṅwe mahosi mararu a bvaho kule vha ḓa, vha lwa na eneo mahosi a Kanana, vha a kunda. Musi vho no vha kunda, vha humela hayani na zwithu zwinzhi na vhathu vhe vha vha thuba. Loto na muṱa wawe vho vha vhaṅwe vha vhathu vhe vha thubiwa.

Abrahamu o vha a tshi ḓo ita mini? O vha a tshi nga vha o humbula uri Loto o tou ḓiḓisela eneo maṱungu nga nṱhani ha phetho ye a i dzhia. Kana o vha a tshi nga vha o humbula uri arali a nga ya a tshidza Loto, zwo vha zwi tshi ḓo ita uri a lwe na eneo mahosi. Zwiṅwe hafhu, Abrahamu o vha e si muhali, o vha a tshi tou vha mulisa ane a dzula madenndeni. Zwino o vha a tshi nga kona hani u lwa na mmbi dza eneo mahosi maṋa a re na maanḓa? Iṅwe ya dzenedzo khosi, yo vha i tshi vhusa Shinari, hune Abrahamu a bva hone. O vha a tshi nga vha o humbula uri arali a nga lwa na yeneyo khosi, ḽiṅwe ḓuvha ha tsha ḓo dovha a kona u humela hayani hawe ngei Uri. Fhedzi Abrahamu ho ngo humbula nga u ralo. O vha a tshi ḓivha zwine Yehova a khou ṱoḓa a tshi zwi ita.

Nga tshenetsho tshifhinga, hu nga vha ho vha ho no vha na vhathu vha fhiraho 1 000 muṱani wa Abrahamu. A kuvhanganya vhanna vho gudiswaho vha 318, vha ḓilugiselela u ya u lwa. Vha ṱuwa vha ya u lwa na eneo mahosi vhe na vhaṅwe vhathu vhane vha khou vha tikedza. Vha tshimbila lwendo  lulapfu vha vhuya vha swika Dani, hune ha vha devhula, vha vha wana. Abrahamu a khethekanya mmbi yawe nga zwigwada vha ṱhasela yeneyo mmbi honoho vhusiku. Naho mmbi ya Abrahamu yo vha i ṱhukhu nga maanḓa u fhira iḽa iṅwe mmbi, vho vha kunda nahone vhenevho vhathu vha mbo ḓi shavha. Musi eneo mahosi maṋa na mmbi dzao vha tshi khou shavha vho livha devhula, Abrahamu a bvela phanḓa na u vha pandamedza. Musi vhe tsini na Damaseko, Abrahamu a mbo ḓi vha kunda tshoṱhe nahone a dzhiulula zwithu zwoṱhe zwe vha vha vho zwi dzhia na vhathu vhe vha vha vho vha thuba ngei Kanana. Loto na muṱa wawe na vhone vha mbo ḓi vhofhololwa.

Yehova o ḓipfa hani nga tshivhindi na lutendo zwe Abrahamu a zwi sumbedza? Zwo mbo ḓi vhonala uri o ḓipfa hani musi Abrahamu a tshi pfuka tsini na ḓorobo ya Salema. Khosi ya yeneyo ḓorobo ane a vha Melkizedeke o vha a tshi dovha a vha tshifhe wa Yehova. Melkizedeke o bva kha yeneyo ḓorobo a ya a ṱangana na Abrahamu a mu ṋea phaṱhutshedzo dzi bvaho kha Yehova. Abrahamu a ḓiṱukufhadza a ṋea Melkizedeke tshafumi kha zwoṱhe zwa khwine-khwine zwe a zwi thuba.

Zwi tou vha khagala uri yeneyo nndwa yo vha i si nndwa ya muthu, fhedzi i nndwa ya Mudzimu. Bivhili i amba nga ha “bugu ya Nndwa dza Yehova.” (Num. 21:14) Nndwa ye Abrahamu a i lwa, i nga vha yo vha i yone ya u thoma ye ya ṅwalwa kha yeneyo bugu. Nga murahu ha miṅwaha minzhi, musi vhaḓuhulu vha Abrahamu vha tshi lwa na Vhakanana vhavhi vhe vha vha vha tshi dzula kha Shango Ḽo Fhulufhedziswaho, Yehova o ita uri vha dzule vha tshi kunda.

Fhedzi musi vhenevho vhathu vha Mudzimu vha tshi mu ṱutshela, ho ngo tsha vha tsireledza. Mafheleloni, Yehova a vha laṱa musi vha songo tenda Murwa wawe, ane a vha Messia. A litsha u fhaṱutshedza lwonolo lushaka lwa Isiraele, a thoma u fhaṱutshedza Vhakriste vho ḓodzwaho vhane vha rangwa phanḓa nga Yesu. Yesu o vhudza vhatevheli vhawe uri vha songo ita zwa dzinndwa. (Mat. 26:52) Nṱhani hazwo, o vha gudisa uri vha lwe na Saṱhane na zwithu zwoṱhe zwo khakheaho zwine a zwi funza. Musi e kha ḽifhasi, o vha vhetshela tsumbo na u vha sumbedza uri zwi ṱoḓa tshivhindi u lwa yeneyo nndwa na u dzula u tshi fhulufhedzea kha Yehova.

Vhalani nga ha enea mafhungo Bivhilini:

• Genesi 14: 1-24

• Vhahevheru 7: 1-4

Khaseledzo:

Abrahamu o sumbedza hani u vha na tshivhindi nga tshenetshi tshifhinga vhutshiloni hawe?

 Wanani Zwo Engedzeaho

1. 1. Hu na vhuṱanzi vhufhio vhune ha sumbedza uri enea mafhungo ndi ngoho? (w89 7/1 5 ¶4–6 ¶1)

   Phindulo yaṋu

2. 2. Ndi vhuṱanzi vhufhio vhune ha tikedza zwine Bivhili ya zwi amba nga ha Sodoma na Gomora? (it “Lwanzhe Lwa Muṋo” ¶6-wcgr) A

   Phindulo yaṋu

   BestTravelPhotography/iStock via Getty Images Plus

3. 3. Melkizedeke o vha e tshifhe na khosi ya Salema. Salema ho vha hu ngafhi? (it “Salema”-wcgr)

   Phindulo yaṋu

4. 4. Melkizedeke o vha a tshi fanyisela Yesu nga nḓila-ḓe? (it “Tshifhe Muhulu” ¶27-28-wcgr) B

   Phindulo yaṋu

 Nḓila Ine Na Nga Zwi Shumisa Ngayo Vhutshiloni Haṋu

• Abrahamu o tendela Loto a tshi dzhia tshipiḓa tshavhuḓi tsha shango. Ri nga edzisa hani Abrahamu kha nḓila ine ra fara ngayo vha muṱani washu, Vhakriste nga riṋe na vhaṅwe vhathu? C

  Phindulo yaṋu

• Ri guda mini kha nḓila ye Abrahamu a vha o ḓiimisela ngayo u tshidza Loto?

  Phindulo yaṋu

• Ndi dzifhio dziṅwe nḓila dzine na nga sumbedza ngadzo tshivhindi tshi fanaho na tshe Abrahamu a tshi sumbedza kha aya mafhungo?

  Phindulo yaṋu

Elekanyani Nga Ha Hezwi Zwithu Zwa Ndeme

• Ndi guda mini nga ha Yehova kha aya mafhungo?

  Phindulo yaṋu

• Aya mafhungo a tshimbidzana hani na tshipikwa tsha Yehova nga ha ḽifhasi na vhathu?

  Phindulo yaṋu

• Ndi nga takalela u vhudzisa mini Abrahamu kana Loto musi vha tshi vuswa?

  Phindulo yaṋu