42 MARIA
O Vha Na Tshivhindi A Tenda
NDI ufhio mushumo wo khetheaho vhukuma we Yehova a vhuya a u ṋea muthu, we wa vha u sa athu ṋewa na muthu na muthihi? Kha ri ambe nga ha muṅwe musidzana wa Muyuda ane a pfi Maria. Ḽiṅwe ḓuvha musi e hayani ha hawe ngei Nazaretha kha ḽa Galilea, o mbo ḓi dalelwa nga muṅwe mueni a songo ḓoweleaho. Ho vha hu muruṅwa Gabriele.
Muruṅwa a ri: “Ri a vusa, iwe a takalelwaho, Yehova u na iwe.” Musi Maria a tshi pfa zwenezwo, “a mangala.” O pfa a songo tea u khoḓwa nga u ralo. Muruṅwa Gabriele a mu khuthadza, a mu vhudza uri: “Mudzimu o u tonda.” Nga murahu, a mu vhudza uri Yehova o vha a tshi khou mu ṋea mushumo wo khetheaho. O ri: “U ḓo vhifha muvhilini wa beba murwa.” O dovha a ri: “Onoyo murwa u ḓo vha muhulwane, a vhidzwa Murwa wa Wa-Ṱaḓulu-ṱaḓulu.” Yehova o vha a tshi ḓo ṋea onoyo murwa khuluṋoni ya Davida khotsi awe nahone o vha a tshi ḓo vhusa sa Khosi.
Maria o vha o fhulufhedziswa u vhingwa, fhedzi o vha a sa athu vhingwa zwine zwa amba uri o vha a sa athu ita zwa vhudzekani. Ngauralo, a vhudzisa muruṅwa uri: “Izwo zwi ḓo itea hani?” Muruṅwa Gabriele a mu ṱalutshedza uri Yehova u ḓo shumisa muya wawe mukhethwa une wa “ḓo ḓa kha[e],” wa ita uri a vhifhe muvhilini. Nga murahu u ḓo beba ṅwana a si na tshivhi ane a ḓo vhidzwa “mukhethwa, Murwa wa Mudzimu.” O dovha a mu vhudza zwe Yehova a itela shaka ḽawe Elisabetha. Zwenezwo zwa khwaṱhisedza Maria, a ri: “Tshukhwi! Nṋe mulanda wa Yehova! Zwe wa amba kha zwi itee.” Maria o vha a tshi dzhia Yehova sa Muṋe wawe a re na lufuno nahone ene muṋe a tshi ḓidzhia sa mulanda a thetshelesaho Muṋe wawe. O vha a tshi fhulufhela uri arali a ita zwine Yehova a ṱoḓa, Yehova u ḓo dzula a tshi mu thusa na u mu tsireledza. U humbula nga u ralo zwo ita uri Maria a vhe na tshivhindi, a ṱanganedze wonoyo mushumo wa ndeme vhukuma.
Musi muruṅwa o no ṱuwa, Maria o ya a dalela Elisabetha. Maria na Elisabetha vho khwaṱhisana u itela vhuḓifhinduleli vhune vha ḓo vha naho. Maria o ṱalutshedza Elisabetha nḓila ine a ḓipfa ngayo nga ha Yehova. Kha zwe a zwi amba, ri kona u vhona uri ndi ngani o vha e na tshivhindi nga u rali. Kha eneo maipfi awe a si gathi, o shumisa maipfi a bvaho kha Maṅwalo a Tshihevheru lu fhiraho 20. Maria o vha e na lutendo luhulu nahone o vha a tshi humbulisisa nga ha Ipfi ḽa Mudzimu nga ho dzikaho. Ndi ngazwo o vha a tshi ḓivha Yehova zwavhuḓi nahone a tshi ḓivha uri a nga fhulufhela zwine a zwi fhulufhedzisa. Maria o dzula na Elisabetha miṅwedzi i ṱoḓaho u vha miraru a sa athu humela hayani. O vha a tshi tea u vha na tshivhindi vhukuma uri a ṱalutshedze Yosefa uri o vhifha muvhilini na uri zwo itea hani. Musi a tshi mu vhudza, Yosefa ho ngo mu fhulufhela, fhedzi muruṅwa wa Yehova a thusa Yosefa uri a pfesese uri Maria u khou amba ngoho.
Musi Maria na Yosefa vho no vhingana, tshifhinga tsha uri Maria a bebe tsho vha tshi tshi khou sendela. Naho zwo ralo, Yosefa o ṱuwa nae vha ya Betlehema ngauri Kesare o vha o vhea mulayo wa uri vhathu vhoṱhe vha tea u ṅwaliswa. Nga nṱhani ha uri Maria o vha e tsini na u beba, u tshimbila lwendo lu ṱoḓaho u vha khiḽomithara dza 150 o ṋamela donngi zwi tea u vha zwo vha zwi tshi khou konḓa vhukuma, fhedzi o ya. A fhedzisela o bebela fhethu hune zwifuwo zwa dzula hone nahone a ladza ṅwana wawe kha mukungwa we zwifuwo zwa vha zwi tshi shelelwa zwiḽiwa khawo. Fhedzi o dzula e na tshivhindi. O vha o ḓiimisela u ita zwoṱhe zwine a nga kona nga zwine a vha nazwo u itela u ṱhogomela onoyo murwa o khetheaho.
Muruṅwa o ṋea Maria mushumo wo khetheaho vhukuma we Mudzimu a vha a sa athu vhuya a u ṋea na muthu na muthihi
Kha maḓuvha na miṅwaha i tevhelaho, Maria o vha a tshi ḓo tea u vha na tshivhindi. O tea u vha na tshivhindi musi ene na Yosefa na Yesu we a vha a tshi kha ḓi vha muṱuku-ṱuku vha tshi tea u shavhela Egipita nga nṱhani ha uri Khosi Herode o vha a tshi khou ṱoḓa u vhulaya Yesu. O dovha a tea u vha na tshivhindi musi ene na Yosefa vha tshi tea u alusa vhana vhavho vha rathi kana u fhira naho vho vha vha tshi shaya. O tea u vha na tshivhindi musi a tshi lovhelwa nga munna wawe Yosefa ane a mu funa vhukuma, zwine khamusi zwo itea Yesu a sa athu vha Messia. O dovha a tea u vha na tshivhindi musi Yesu a tshi ṱuwa hayani u itela u ita mushumo wawe. Zwihuluhulu, o tea u vha na tshivhindi musi Yesu a tshi pomokwa zwi songo tea, a farwa nahone a vhulawa. Mafheleloni, o tea u vha na tshivhindi uri a vhe muṅwe wa vhatevheli vha Yesu samusi Vhayuda vho vha vha tshi vha vhenga.
Nangoho Maria o vha e na mushumo wo khetheaho vhukuma. O kona hani u vha na tshivhindi tsha u u ita? Bivhili i sumbedza uri musi Maria a tshi pfa zwiṅwe zwithu zwine zwa khwaṱhisa lutendo lwawe, o vha a tshi zwi vhulunga mbiluni yawe. Nga nṱhani ha zwenezwo, o vha e na zwithu zwinzhi zwavhuḓi zwine a nga dzula a tshi humbula nga hazwo. Zwiṅwe zwazwo o zwi wana Ipfini ḽa Mudzimu, zwiṅwe kha muruṅwa, zwiṅwe o zwi wana kha vhashumeli vha Yehova nahone zwiṅwe o zwi wana kha murwa wawe. U dzula a tshi humbulisisa nga ha zwenezwi zwithu zwo mu thusa uri a kone u sedzana na milingo ye a ṱangana nayo lwa vhutshilo hawe hoṱhe.
Vhalani nga ha enea mafhungo Bivhilini:
Khaseledzo:
Maria o sumbedza hani u vha na tshivhindi?
Wanani Zwo Engedzeaho
-
1. Hu na vhuṱanzi vhufhio vhu tikedzaho zwo ṅwalwaho kha Luka 2:1-3? (g 4/11 11 ¶4-5-wcgr) A
British Library, London, UK, from the British Library archive/Bridgeman Images
Tshifanyiso A: Mulayo u bvaho kha muvhusi wa Roma we a vha a tshi vhusa Egipita, 104 C.E.
-
2. Ndi ngani lwendo lwa u ya Betlehema lu tshi nga vha lwo konḓela Maria? (ia 153-155 ¶4-7)
-
3. Musi Yesu a tshee lushie, Maria o vhudzwa uri: “A vha iwe u ḓo ṱhavhiwa nga banga.” Zwenezwo zwo itea hani? (Luka 2:35; w08 3/15 31 ¶1)
-
4. Ndi ngani ri tshi nga amba uri Maria u ṱaḓulu zwa zwino? (w18.07 10 ¶14) B
Tshifanyiso B: Maria na vharwa vhawe vho vha vhe Yerusalema maḓuvhani a musi Pentekoste ya 33 C.E. i tsini
Nḓila Ine Na Nga Zwi Shumisa Ngayo Vhutshiloni Haṋu
-
Musi Maria a tshi khou ṱoḓa u khuthadzwa na u khwaṱhiswa, o ya kha Elisabetha. (Luka 1:39, 40) Ndi ngani ri tshi tea u humbela thuso musi ri tshi khou sedzana na mulingo kana ri tshi khou konḓelwa nga mushumo we ra ṋewa wone? C
Tshifanyiso C
-
Naho Maria o vha o fhulufhedziswa u vhingwa nga Yosefa, Yehova o rumela muruṅwa kha Maria u thoma. Zwenezwi zwi ri gudisa mini nga ha nḓila ine Yehova a dzhia ngayo vhafumakadzi vha fhulufhedzeaho?
-
Ni nga vha hani na tshivhindi u fana na Maria?
Elekanyani Nga Ha Hezwi Zwithu Zwa Ndeme
-
Ndi guda mini nga ha Yehova kha aya mafhungo?
-
Aya mafhungo a tshimbidzana hani na tshipikwa tsha Yehova nga ha ḽifhasi na vhathu?
-
Ndi ngani ni tshi livhuwa uri Maria a nga vha o nangiwa uri a ye u vhusa na Kristo ṱaḓulu?
Gudani Zwiṅwe
Vhonani nḓila ye Maria a shuma ngayo nga maanḓa u itela u ṱhogomela vhana vhawe.
“Zwine Tsumbo Ya Maria Ya Ri Gudisa Zwone” (w09 1/1 5 ¶5–6 ¶2-wcgr)
Ni vhona u nga Maria o ḓipfa hani musi Gabriele a tshi mu vhudza uri Yehova o mu nanga uri a ite mushumo wo khetheaho vhukuma?
You May Also Like
NGA HA RIṊE
Iyani holoni ya Ṱhanzi dza Yehova
Vhalani mafhungo a ambaho nga ha miṱangano yashu. Wanani hune miṱangano wa farelwa hone hu re tsini na hune na dzula hone.
