NGUDO 10
Ni Nga Vhuyelwa Hani Nga U Ya Tshivhidzoni Tsha Ṱhanzi Dza Yehova?
Naa no no vhuya na ya tshivhidzoni tsha Ṱhanzi dza Yehova? Arali ni sa athu u vhuya na ya, khamusi ni nga pfa ni tshi ofha u ya lwa u tou thoma. Ni nga ḓivhudzisa uri: ‘Hu itea mini henefho tshivhidzoni? Ndi ngani zwi zwa ndeme u ya tshivhidzoni? Ndi ngani ndi tshi tea u ya?’ Kha ino ngudo, ni ḓo guda uri zwi nga ni thusa hani u kuvhangana na vhaṅwe tshivhidzoni na uri zwi nga ita hani uri ni vhe khonani ya Mudzimu ya tsini.
1. Ndi ngani Ṱhanzi dza Yehova vha tshi kuvhangana vhoṱhe?
Ṱhogomelani uri muṅwe muṅwali wa Bivhili o sumbedza hani nḓila ine zwa vha zwa ndeme ngayo u kuvhangana na vhaṅwe. O ri: “Ndi ḓo renda Yehova ndi tshivhidzoni tshihulwane.” (Phisalema 26:12) Nga hu fanaho ṋamusi, Ṱhanzi dza Yehova vha a ḓiphina nga u kuvhangana vhoṱhe. U mona na shango ḽoṱhe, vha kuvhangana vhege iṅwe na iṅwe u itela u renda Mudzimu, u imba na u rabela. Zwifhinga zwi si gathi ṅwaha muṅwe na muṅwe, vha dovha vha kuvhangana u itela u gwadamela Yehova vhe vhanzhi.
2. Ni ḓo guda mini tshivhidzoni tsha Ṱhanzi dza Yehova?
Musi ri tshivhidzoni, ri vha ri tshi khou guda Ipfi ḽa Mudzimu, u ḽi “ṱalutshedza zwavhuḓi” na u ita uri ḽi “pfale.” (Vhalani Nehemia 8:8.) Musi ni tshi ḓa tshivhidzoni, ni ḓo guda nga ha Yehova na zwine a vha zwone. Musi ni tshi pfesesa khwine nḓila ine a ni funa ngayo, zwi ḓo ita uri ni vhe khonani yawe ya tsini. Ni ḓo dovha na guda uri a nga ni thusa hani uri ni tshile vhutshilo vhu takadzaho.—Yesaya 48:17, 18.
3. Vhathu vhane na ḓo ṱangana navho tshivhidzoni vha nga ni thusa hani?
Yehova u ri vhudza uri: “Ri ḓivhane khwine uri ri kone u funana nga ho engedzeaho na u ita mishumo mivhuya, ri songo litsha u kuvhangana nga tshashu.” (Vhahevheru 10:24, 25) Tshivhidzoni tshashu ni ḓo ṱangana na vhathu vhane vha funana zwa vhukuma, vhane na vhone vha takalela u guda zwo engedzeaho nga ha Mudzimu u fana na inwi. Ni ḓo pfa vha tshi amba nga ha zwithu zwi ṱuṱuwedzaho zwi bvaho Ipfini ḽa Mudzimu. (Vhalani Vharoma 1:11, 12.) Ni ḓo ḓivha na vhaṅwe vha siho mbinganoni na vha re mbinganoni. Vhenevho vhathu vho takala naho vhe na thaidzo! Zwenezwi ndi zwiṅwe zwa zwithu zwine zwa ita uri Yehova a ṱoḓe ri tshi vha hone tshivhidzoni tshifhinga tshoṱhe!
GUDANI ZWO ENGEDZEAHO
Gudani nga ha uri hu itea mini tshivhidzoni tsha Ṱhanzi dza Yehova na uri ndi ngani zwi zwa ndeme uri ri ite zwoṱhe zwine ra nga kona uri ri vhe hone tshivhidzoni.
4. Hu itwa mini tshivhidzoni tsha Ṱhanzi dza Yehova?
Ḓanani ḽa u thoma ḽa miṅwaha, Vhakriste vho vha vha tshi kuvhangana tshifhinga tshoṱhe u itela u gwadamela Yehova. (Vharoma 16:3-5) Vhalani Vhakolosa 3:16, ni kone u fhindula mbudziso i tevhelaho:
-
Vhakriste vha tshifhingani tsha kale vho vha vha tshi gwadamela hani Yehova?
Ṋamusi Ṱhanzi dza Yehova vha a kuvhangana tshifhinga tshoṱhe. Uri ni kone u vhona zwine zwa itwa tshivhidzoni tsha Ṱhanzi dza Yehova, ṱalelani VIDIO. Nga murahu ni sedze tshifanyiso tsha musi vhathu vhe tshivhidzoni, ni kone u fhindula mbudziso dzi tevhelaho.
-
Zwe na zwi vhona kha vidio zwi tshimbidzana hani na zwe na zwi vhala kha Vhakolosa 3:16?
-
Kha vidio kana kha tshifanyiso tshi sumbedzaho zwine zwa itwa tshivhidzoni, naa hu na zwine na zwi takalela?
Vhalani 2 Vhakorinta 9:7, ni kone u fhindula mbudziso i tevhelaho:
-
Ndi ngani tshivhidzoni tsha Ṱhanzi dza Yehova hu sa itwi koḽeke?
Haseledzani na mugudisi waṋu zwine zwa ḓo haseledzwa tshivhidzoni nga yeneyo vhege.
-
Kha zwe na zwi haseledza na mugudisi waṋu, ndi zwifhio zwe na zwi takalela kana zwine na vhona u nga zwi ḓo ni thusa?
Naa no vha ni tshi zwi ḓivha?
Kha jw.org, website ya jw.org, ni nga kona u vhona uri Ṱhanzi dza Yehova u mona na shango ḽoṱhe vha kuvhangana lini nahone ngafhi.
-
Tshivhidzoni hu haseledzwa mafhungo a re Bivhilini, hu ṱalelwa dzividio nahone ri gudiswa nḓila ya u funza. Ri vula na u vala nga luimbo na thabelo
-
Musi ri tshivhidzoni, hu a vha na tshifhinga tshine ra humbelwa uri ri fhindule mbudziso
-
Vhathu vhoṱhe vho ṱanganedzwa, miṱa, vha siho mbinganoni, vhaaluwa na vhana
-
Hu dzhenwa mahala. Ṱhanzi dza Yehova a vha iti koḽeke
5. Hu ṱoḓea uri ri ite zwoṱhe zwine ra nga kona u vha hone tshivhidzoni
Ṱhogomelani tsumbo ya muṱa we Yesu a alutshela khawo. Ṅwaha muṅwe na muṅwe vho vha vha tshi tea u tshimbila maḓuvha a si gathi u bva Nazaretha vha tshi ya Yerusalema. Vho vha vha tshi tshimbila fhethu hu re na zwikwara. Vhalani Luka 2:39-42, ni kone u fhindula mbudziso dzi tevhelaho:
-
Naa ni vhona u nga zwo vha zwo leluwa u ya Yerusalema?
-
Ndi ngani zwi tshi nga ṱoḓea uri ni lingedze u ita zwoṱhe zwine na nga kona uri ni vhe hone tshivhidzoni?
-
Naa ni vhona u nga zwi ḓo ni vhuyedza u ya tshivhidzoni naho zwi songo leluwa? Ndi ngani ni tshi ralo?
Bivhili i amba uri ndi zwa ndeme nga maanḓa u kuvhangana u itela u gwadamela Yehova. Vhalani Vhahevheru 10:24, 25, ni kone u fhindula mbudziso i tevhelaho:
-
Ndi ngani ri tshi fanela u ya tshivhidzoni tshifhinga tshoṱhe?
VHAṄWE VHATHU VHA AMBA URI: “A zwi ṱoḓei uri ni kuvhangane na vhaṅwe. Zwo eḓana u guda Bivhili ni hayani.”
-
Ndi ifhio vese kana tsumbo i re Bivhilini ine ya bvisela khagala zwine Yehova a zwi ṱoḓa?
NO GUDA MINI?
U ya tshivhidzoni zwi ḓo ni thusa uri ni gude zwo engedzeaho nga ha Yehova, zwi ḓo khwaṱhisa vhukonani haṋu nae na u ita ri ni kone u mu gwadamela ni na vhaṅwe.
Ni Kha Ḓi Zwi Humbula?
-
Ndi ngani Yehova a tshi ri ṱuṱuwedza uri ri kuvhangane na vhaṅwe?
-
Ni ḓo guda mini tshivhidzoni tsha Ṱhanzi dza Yehova?
-
Naa ni vhona u nga u ya tshivhidzoni zwi nga ni thusa nga dziṅwe nḓila?
WANANI ZWO ENGEDZEAHO
Hu pfi mini arali ni tshi ofha u ya tshivhidzoni? Vhonani uri ndi mini zwo itaho uri muṅwe munna we a vha a tshi ḓipfa nga yeneyo nḓila a thome u takalela u ya tshivhidzoni.
Ri Nga Si Vhuye Ra Hangwa Nḓila Ye Ra Ṱanganedzwa Ngayo (4:16)
Vhonani uri muṅwe muṱhannga o ḓiphiṋa hani nga u vha tshivhidzoni na zwe a zwi ita uri a dzule a tshi vha hone.
Gudani uri vhaṅwe vha ḓipfa hani nga u ya tshivhidzoni.
“Ndi Ngani Ri Tshi Fanela U Ya Miṱanganoni Holoni Ya Ṱhanzi Dza Yehova?” (Thero i re kha jw.org)
Vhonani uri vhutshilo ha muṅwe munna we a vha e kha tshigwada tsha mavemu ho shanduka hani musi o no ya tshivhidzoni tsha Ṱhanzi dza Yehova.
“Ndo Vha Ndi Sa Tshimbili Ndi Si Na Tshigidi Tshanga” (Tshiingamo, 1 September 2014)
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
