Ndima Ya Vhusumbe
Vhuyelelani kha Vhurabeli ha Yehova
1. Ndi afhio madzina a midzimu mivhili mihulwane ya Babele, nahone ho dzula ho ambiwa mini nga hayo?
MUSI Vhaisiraele vha tshi ya vhuthubwani ngei Babele, vha ḓo vha vha vho tangwa nga vhurabeli ha mazwifhi. Misini ya Yesaya, vhathu vha Yehova vha tshe shangoni ḽa havho, nahone vha na thembele na tshigwada tsha vhotshifhe. Naho zwo ralo, vhunzhi ha lwonolwo lushaka lwo ḓiṋekedzaho kha Mudzimu lwo ṱanganela kha u gwadamela midzimu i sili. Nga zwenezwo, ndi zwa ndeme u vha lugiselela hu tshee nga phanḓa uri vha si tshuswe nga midzimu ya mazwifhi ya Babele kana u lingwa uri vha i shumele. Nga zwenezwo, a tshi amba nga lwa vhuporofita nga ha midzimu mivhili mihulwane ya Babele, Yesaya u ri: “Beli o ganama, Nebo o wa. Yenei midzimu yavho yo hweswa mangavha na dzimbelesa. Zwenezwi zwifanyiso zwe na vha ni tshi zwi hwala zwo vha mihwalo ya zwithu zwi netaho.” (Yesaya 46:1) Beli ndi mudzimu muhulwane wa Vhakaladea. Nebo u dzhielwa nṱha sa mudzimu wa vhuṱali na pfunzo. Zwine zwa sumbedza uri vhanzhi vha hulisa yeneyi midzimu mivhili zwi vhonwa nga mbuno ya uri madzina ayo a shumiswa nga Vhababele vhanzhi—tsumbo dzi si gathi ndi Belesatsara, Nabopolassar, Nebukadanetsara, na Nebusaradani.
2. U shaya thuso ha midzimu ya Babele hu ombedzelwa hani?
2 Yesaya u amba uri Beli o “ganama” nahone Nebo o “wa.” Yeneyi midzimu ya mazwifhi i ḓo fovhedzwa. Musi Yehova a tshi haṱula Babele, yeneyi midzimu a i nga koni u thusa vhagwadameli vhayo. A i nga ḓo kona na u ḓitshidza! Beli na Nebo a i tsha ḓo dovha ya hwaliwa fhethu hu ṱhonifheaho musi hu tshi khou matshiwa, sa he ha vha hu tshi itwa tshifhingani tsha vhuṱambo ha Ḓuvha ḽa Ṅwaha Muswa ngei Babele. Nṱhani hazwo, i ḓo tou khwikhwidzwa sa muhwalo zwawo nga vhane vha i gwadamela. Nṱhani ha uri i huliswe na u gwadamelwa, i ḓo goḓwa nahone ya nyadziwa.
3. (a) Ndi mini zwine zwa ḓo akhamadza Vhababele? (b) Hu nga gudwa mini ṋamusi kha zwo iteaho kha midzimu ya Babele?
3 Vhababele vha ḓo sala vho akhamala lungafhani musi vha tshi pfa uri zwifanyiso zwa midzimu yavho ine vha i funesa zwi sokou vha muhwalo wo fanelaho u hwalwa nga zwipuka zwo netaho! Zwi ngaho zwenezwo ṋamusi, midzimu ya shango—zwithu zwine vhathu vha zwi fulufhela na zwine vha zwi shumela na u zwi fela—ndi phuramaṱo. Lupfumo, zwihali, zwithu zwa u ḓitakadza, vhavhusi, shangohaya, kana zwiga zwaḽo, na zwiṅwe zwithu zwinzhi, ndi zwone zwine zwa gwadamelwa. Midzimu yo raloho i ḓo bvukululwa ya sala i mahandana nga tshifhinga tsha Yehova tsho fanelaho.—Daniele 11:38; Mateo 6:24; Mishumo 12:22; Vha-Filipi 3:19; Vha-Kolosa 3:5; Ndzumbululo 13:14, 15.
4. Midzimu ya Babele yo “ganama” nahone yo “wa” nga muhumbulo ufhio?
4 Vhuporofita vhu tshi bvela phanḓa u ombedzela u kundwa tshoṱhe ha midzimu ya Babele, vhu ri: “Zwo ganama, zwo wa zwoṱhe. A vho ngo kona u shavhisa mihwalo; na vhone vhaṋe vho iswa vhuthubwa.” (Yesaya 46:2) Midzimu ya Babele i vhonala i tshi nga yo “ganama” nahone yo “wa” zwa nga yo tou huvhadzwa nndwani kana yo ṱahadzwa nga vhulala. A i koni na u rula muhwalo kana u tshidza zwipuka zwazwo zwe zwa i hwala. Nga zwenezwo, naa vhathu vho vhofhaho mulanga na Yehova, naho vhe mathubwa ngei Babele, vha fanela u i hulisa? Aiwa! Nga nḓila i fanaho, naho vhashumeli vha Yehova vho ḓodzwaho vho vha vhe vhuthubwani ha muya, a vho ngo hulisa midzimu ya mazwifhi ya “Babele ḽihulu,” ye ya sa kone u thivhela u wa haḽo nga 1919 nahone a i nga ḓo kona u ḽi tshidza kha dziedzi ḽine ḽa ḓo ḽi wela tshifhingani tsha “vhuṱungu vhuhulu.”—Ndzumbululo 18:2, 21; Mateo 24:21.
5. Vhakriste ṋamusi vha iledza hani u dovholola vhukhakhi ha vhagwadameli vha zwifanyiso vha Vhababele?
5 Vhakriste vha ngoho ṋamusi a vha gwadameli midzimu ya zwifanyiso ya mufuda naho u ufhio. (1 Yohane 5:21) Zwifhambano, vhulungu ha thabelo, na zwifanyiso zwa vhakhethwa a zwi iti uri vha kone u swikelela Musiki nga hu leluwaho. A zwi koni u ri ambelela. Kha ḓana ḽa u thoma ḽa miṅwaha, Yesu o funza vhafunziwa vhawe nḓila yo fanelaho ya u gwadamela Mudzimu musi a tshi ri: “Ndi nṋe nḓila na mafhungo-ngoho na vhutshilo; a huna ane a ḓa ha Khotsi, arali á sa ḓi nga nṋe. Tshiné na humbela nga dzina ḽanga, ndi ḓo tshi ita.”—Yohane 14:6, 14.
“Vhe Nda Vha Hwala Tshee Na Vha Hone”
6. Yehova o fhambana hani na midzimu ya dzitshaka?
6 Musi o no bvukulula ḽifhedzi ḽa u gwadamela midzimu ya Babele ya zwifanyiso, Yehova u vhudza vhathu vhawe uri: “Ipfani zwine nda amba, inwi vha lushaka lwa Yakobo, na inwi tsalela dza lushaka lwa Isiraele, henenwi vhe na ndemela tshee na bebwa, vhe nda vha hwala tshee na vha hone.” (Yesaya 46:3) Yehova o fhambana vhukuma na zwifanyiso zwo vhaḓiwaho zwa Babele! Midzimu ya Babele a i koni u itela tshithu vhagwadameli vhayo. Arali zwi tshi fanela u ya huṅwe fhethu, zwi hwalwa nga zwipuka. Zwo fhambanaho na zwenezwo, Yehova o vha a tshi khou ḓi hwala vhathu vhawe. O vha unḓa ‘tshee vha vha hone,’ u bva musi hu tshi vhumbiwa lwonolwo lushaka. U humbula nḓila ya lufuno ye Yehova a vha hwala ngayo zwi fanela u ṱuṱuwedza Vhayuda uri vha laṱe vhurabeli ha zwifanyiso nahone vha mu fulufhele sa Khotsi avho na Khonani yavho.
7. Nḓila ine Yehova a londa ngayo vhagwadameli vhawe nga lufuno ndi khulwane lungafhani u fhira nḓila ine vhabebi vha londa ngayo vhana vhavho?
7 Yehova u vhudza vhathu vhawe maṅwe maipfi a vhulenda: “Ni ḓo vhuya na kalaha ndi tshi ḓi ralo; ndi ḓo ḓi ni hwala na vhuya na tshena mmvi. Ndo zwi ita; ndi ḓo ḓi zwi ita, nda ni hwala nda ni hanyisa.” (Yesaya 46:4) Yehova u londa vhathu vhawe u fhira mubebi a re na vhulondi vhuhulwane vhukuma. Musi vhana vha tshi khou aluwa, vhabebi vha nga kha ḓi rula vhuḓifhinduleli vhune vha vha naho khavho nga zwiṱuku nga zwiṱuku. Musi vhabebi vha tshi vha vhalala, kanzhi vha londwa nga vhana vhavho. A zwo ngo ralo na kathihi nga Yehova. Ha litshi u londa vhana vhawe—na musi vhe vhalala. Vhagwadameli vha Mudzimu ṋamusi vha fulufhela na u funa Musiki wavho nahone vha khuthadzwa vhukuma nga enea maipfi a vhuporofita ha Yesaya. A vho ngo fanela u vhilaela nga maḓuvha o salaho kana miṅwaha ye vha i fhedza kha ano maitele a zwithu. Yehova u fulufhedzisa u “hwala” vhalala, a vha ṋea nungo dzine vha dzi ṱoḓa uri vha konḓelele nahone vha dzule vha tshi fulufhedzea. U ḓo vha hwala, a vha khwaṱhisa, nahone a vha tshidza.—Vha-Heberu 6:10.
Ḓilondeni kha Midzimu ya Zwifanyiso ya Musalauno
8. Ndi tshivhi tshifhio tshi shonisaho tshe tsha itwa nga vhaṅwe vhathu vha bvaho shangoni ḽithihi na Yesaya?
8 Edzani u humbula nḓila ine Vhababele vhe vha fulufhela midzimu yavho ya zwifanyiso vha ḓo nyabwa ngayo, samusi i sa ḓo vha thusa tshithu! Naa Vhaisiraele vho vha vha tshi fanela u tenda uri yeneyo midzimu i nga fana na Yehova? Na kathihi. Zwo fanela, Yehova u a vhudzisa: “Ni ḓo mpfanyisa na nnyi? Ni ḓo nyeḓanyisa na nnyi, ane na ri ndi nga ene?” (Yesaya 46:5) Zwi shonisa lungafhani uri vhaṅwe vhathu vha bvaho shangoni ḽithihi na Yesaya vho pambutshela kha u gwadamela zwifanyiso zwi sa koni u amba, zwi sa tshili, na zwi sa thusi tshithu! Kha lushaka lune lwa ḓivha Yehova, u ḓisendeka nga zwifanyiso zwi sa tshili, zwi sa koni u ḓilwela zwo itwaho nga zwanḓa zwa vhathu ndi vhutsilu vhuhulwane vhukuma.
9. Ṱalusani mahumbulele a si na mudzio a vhaṅwe vhagwadameli vha midzimu ya zwifanyiso.
9 Ṱhogomelani mahumbulele a si na mudzio a vhagwadameli vha midzimu ya zwifanyiso. Vhuporofita vhu a bvela phanḓa: “Vho bvisa musuku zwikwamani, vha ela maseṱha nga muelo, vha thola mutsila, a vha itela mudzimu, vha u gwadamela vha losha.” (Yesaya 46:6) Vhenevho vhagwadameli vho vha vho ḓiimisela u shumisa zwoṱhe u itela u ita mudzimu wavho, zwa vho tou nga tshifanyiso tsha mutengo wa nṱha tshi na maanḓa mahulwane a u tshidza u fhira tsho itwaho nga thanda. Naho zwo ralo, hu sa londwi vhuḓidini vhune ha itwa kana mutengo wa nṱha wa zwishumiswa, tshifanyiso tshi sa tshili tshi ḓi dzula tsho ralo.
10. Mahandana mahulwane a u gwadamela midzimu ya zwifanyiso a ṱaluswa nga nḓila-ḓe?
10 Vhu tshi bvela phanḓa u ṱalusa vhutsilu ha u gwadamela zwifanyiso, vhuporofita vhu a bvela phanḓa: “Vha u vhea kha mahaḓa, vha u hwala, vha u vhea vhudzuloni hawo, wa ima u si ṱuwe. Vhá u vhidza a u aravhi; a u tshidzi muthu musi ó khakhelwa.” (Yesaya 46:7) Ndi vhutsilu lungafhani u rabela tshifanyiso tshi sa koni u pfa kana u ita naho tshi tshini! Mupsalme u ṱalusa zwavhuḓi mahandana a zwifanyiso zwo raloho zwine zwa gwadamelwa: “Yavho midzimu ndi ya tsimbi-tseṱha na musuku, ndi zwivhumbwa zwa zwanḓa zwa vhathu. I na milomo, hone a i ambi; i na maṱo, hone a i vhoni. I na nḓevhe, hone a i pfi; i na ningo, hone a i nukhedzi. I na zwanḓa, hone a i fari; na hone a huna ipfi ḽi bvaho mikuloni yayo. Vhavhumbi vhayo vha ḓo fana nayo’, na avho vhané vha i fulufhedza.”—Psalme ya 115:4-8.
“Ni Ite Tshinna”
11. Vhane vha ṱanganyisa zwithu vha nga thuswa hani uri vha “ite tshinna”?
11 Musi o no sumbedza mahandana a u gwadamela zwifanyiso, zwino Yehova u ṋea vhathu vhawe zwiitisi zwa uri vha mu shumele: “Elekanyani zwenezwi, ni ite tshinna; nga zwi dzhene dzimbiluni dzaṋu, inwi vhadzia-u-paṱa. Elelwani zwa misi iḽa ya kale, zwauri Mudzimu ndi Nṋe, a huna muṅwe; ndi̗ Mudzimu a sí na muṅwe ngae’.” (Yesaya 46:8, 9) Vhane vha ṱanganyisa vhurabeli ha ngoho na ha zwifanyiso vha fanela u humbula ḓivhazwakale. Vha fanela u humbula zwithu zwe Yehova a zwi ita. Hezwi zwi ḓo vha thusa uri vha ite tshinna nahone vha ite zwithu zwo fanelaho. Zwi ḓo vha thusa uri vha dovhe vha gwadamele Yehova.
12, 13. Vhakriste vha nndwani dzifhio, nahone vha nga kunda hani?
12 Heyi ṱhuṱhuwedzo i kha ḓi ṱoḓea na ṋamusi. U fana na Vhaisiraele, Vhakriste vha fulufhedzeaho vha fanela u lwisana na milingo na u sa fhelela havho. (Vha-Roma 7:21-24) Zwiṅwe hafhu, vha nndwani ya muya ine vha khou tsumbudzana na swina ḽi sa vhonali, fhedzi ḽi re na maanḓa a si na vhukono. Muapostola Paulo u ri: “Ngauri nndwa yashu a si ya u lwa na ṋama na malofha, ndi ya u lwa na mivhuso, na maanḓa, na vho-ṋe-mashango vha swiswi ḽino, ndi ya u lwa na mimuya ya vhuvhi i re ṱaḓulu.”—Vha-Efesa 6:12.
13 Sathane na madimoni awe vha ḓo ita naho tshi tshini u itela u pambusa Vhakriste vhurabelini ha ngoho. Uri Vhakriste vha kunde, vha fanela u tevhela nyeletshedzo ya Yehova nahone vha ite tshinna. Hani? Muapostola Paulo u a ṱalutshedza: “Ambarani mafumo oṱhe a Mudzimu, uri ni ḓo kona u kunda maano oṱhe a Diabolo, a tshi ni dodela.” Yehova ha rumeli vhashumeli vhawe nndwani a songo vha shomedza. Mafumo avho a muya a katela “tshiṱangu tsha lutendo, tshiné [vha] ḓo kona u dzima ngatsho’ misevhe yoṱhe i dugaho ya ene muvhi.” (Vha-Efesa 6:11, 16) Vhaisiraele vho pfuka mulayo nga ṅwambo wa uri vho nyadza ndugiselelo dzoṱhe dza muya dze Yehova a vha itela dzone. Arali vho elekanya mishumo yoṱhe ya maanḓa ye Yehova a vha itela yone lunzhi-lunzhi, vho vha vha tshi ḓo vha vha songo vhuya vha pambutshela kha vhurabeli vhu nengisaho ha midzimu ya zwifanyiso. Kha ri gude kha tsumbo yavho nahone ri ḓiimisele u fhira naho hu lini u sa neta kha nndwa yashu ya u ita zwo lugaho.—1 Vha-Korinta 10:11.
14. Ndi vhukoni vhufhio vhune Yehova a amba nga hao u itela u sumbedza uri ndi ene fhedzi Mudzimu wa ngoho?
14 Yehova ndi ene ane a ri “ndo ḓi ni vhudza kale zwine zwa ḓo ḓa; ndo ni vhudza misi iḽa zwi sathu u itea. Ndi ri: Ndá elekanya, zwi a vulea; ndi ita zwoṱhe zwine nda funa.” (Yesaya 46:10) Ndi ufhio muṅwe mudzimu ane a nga fana na Yehova kha ḽeneḽi sia? U kona u bvumba vhumatshelo ndi vhuṱanzi vhu swayeaho ha Vhumudzimu ha Musiki. Naho zwo ralo, a hu ṱoḓei luvhonela fhedzi u itela u khwaṱhisedza u ḓadzea ha zwithu zwe zwa dzula zwo ambiwa. Mubulo une wa ri “ndá elekanya, zwi a vulea” u ombedzela u sa shanduka ha ndivho ya Mudzimu yo tikwaho. Samusi Yehova e na maanḓa a sa gumi, a hu na tshithu ṱaḓulu tshine tsha nga mu thivhela uri a khunyeledze zwine a zwi funa. (Daniele 4:35) Nga zwenezwo ri nga vha na vhungoho ha uri vhuporofita naho vhu vhufhio vhu sa athu ḓadzea, vhukuma vhu ḓo ḓadzea nga tshifhinga tsha Mudzimu tsho fanelaho.—Yesaya 55:11.
15. Ndi ifhio tsumbo i swayeaho ya vhukoni ha Yehova ha u dzula o amba nga ha vhumatshelo ine ra vhudzwa yone?
15 Zwino vhuporofita ha Yesaya vhu livhisa ṱhogomelo yashu kha tsumbo i swayeaho ya vhukoni ha Yehova ha u dzula o amba nga ha zwiitea zwa vhumatshelo nahone nga zwenezwo a ḓadzisa maipfi awe: “Ndi vhidza ḽiḽa ḽianga ḽi bvaho Vhubvaḓuvha shangoni ḽa kule, munna ane a ḓo vuledza zwe nda elekanya. Zwe nda amba ndi ḓo zwi ḓisa; zwe nda vhamba maano azwo ndi ḓo zwi ita.” (Yesaya 46:11) Sa ane a “ḓi ni vhudza kale zwine zwa ḓo ḓa,” Yehova Mudzimu u ḓo shandula zwiimo kha mafhungo a vhathu u itela u ḓadzisa nyeletshedzo yawe. U ḓo vhidza Korese a “bvaho Vhubvaḓuvha,” kana Peresia hune ḓuvha ḽa ṱavha hone, Pasargadae hune ha vha musanda une Korese a u funesa. Korese u ḓo nga “ḽianga,” a vutshela muḓi wa Babele nga u ṱavhanya nahone zwi songo lavhelelwa.
16. Yehova u khwaṱhisa hani vhungoho ha u bvumba hawe malugana na Babele?
16 Vhungoho ha u bvumba ha Yehova malugana na Babele vhu khwaṱhiswa nga maipfi ane a ri: “Zwe nda amba ndi ḓo zwi ḓisa.” Naho muthu a songo fhelelaho a tshi anzela u fulufhedzisa zwithu nga maṱaṱa, Musiki ha kundwi na luthihi u ḓadzisa zwe a amba. Nga ṅwambo wa uri Yehova ndi Mudzimu “a sá zwifhiho,” ri nga vha na vhungoho ha uri arali o zwi ‘vhambela maano,’ u ḓo “zwi ita.”—Tito 1:2.
Mbilu Dzi Si Na Lutendo
17, 18. Ndi vhafhio vhane vha nga ṱaluswa sa “vha dzimbilu dzo rindilaho” (a) zwifhingani zwa kale? (b) ṋamusi?
17 Yehova u dovha a livhisa ṱhogomelo yawe kha Vhababele nga lwa vhuporofita musi a tshi ri: “Ipfani zwine nda amba, inwi vha dzimbilu dzo rindilaho, ni re kule na zwivhuya.” (Yesaya 46:12) Mubulo une wa ri “inwi vha dzimbilu dzo rindilaho” u ṱalusa vha re na tshipimbi na vho ḓiimiselaho u lwisana na zwi funwaho nga Mudzimu. A zwi timatimisi uri Vhababele vha kule na Mudzimu. U vhenga havho Yehova na vhathu vhawe hu vha sudzulusela u lozwa muḓi wa Yerusalema na thembele yawo na u thuba vhadzulapo vhawo.
18 Ṋamusi, vha re na mbilu dzine dza timatima na dzi sa tendi vha hana nga tshipimbi u thetshelesa mulaedza wa Muvhuso, une wa khou huwelelwa shangoni ḽoṱhe. (Mateo 24:14) A vha ṱoḓi u tenda uri Yehova ndi ene Muvhusahoṱhe o fanelaho. (Psalme ya 83:18; Ndzumbululo 4:11) Nga ṅwambo wa uri mbilu dzavho “dzi kule na zwivhuya,” vha lwisana na zwine a zwi funa nahone vha a zwi hanedza. (2 Timotheo 3:1-5) U fana na Vhababele, vha hana u thetshelesa Yehova.
U Tshidza Ha Mudzimu A Hu Nga Lengi
19. Yehova u ḓo itela Vhaisiraele zwivhuya nga nḓila-ḓe?
19 Maipfi a u phetha a Yesaya ndima ya 46 a ombedzela masia a vhumuthu ha Yehova: ‘Zwivhuya zwanga ndo zwi sendedza tsini, a zwi tshee kule; u tshidza hanga a hu tsha ḓo lenga. U tshidza hanga ndi hu vhea muḓini wa Tsioni, vhurena hanga ndi vhu ṋea Isiraele.’ (Yesaya 46:13, vhambedzani NW.) U vhofholola ha Mudzimu Vhaisiraele hu ḓo vha musumbedzo wa zwivhuya. Ha nga tendeli vhathu vhawe vha tshi tendeleka vhuthubwani. U tshidzwa ha Tsioni hu ḓo ḓa nga tshifhinga tsho fanelaho, a hu “tsha ḓo lenga.” Musi Vhaisiraele vho no vhofhololwa vhuthubwani, vha ḓo ṱalelwa nga tshaka dzo vha tangaho. U vhofholola ha Yehova lushaka lwawe zwi ḓo vha vhuṱanzi ha maanḓa awe a u tshidza. U sa thusa tshithu ha midzimu ya Babele, ine ya vha Beli na Nebo hu ḓo bvukululwa uri hu vhonwe nga vhoṱhe, ha dzumbululwa uri a i na maanḓa.—1 Dzikhosi 18:39, 40.
20. Vhakriste vha nga vha hani na vhungoho ha uri ‘u tshidza [ha Yehova] a hu nga lengi’?
20 Nga 1919, Yehova o vhofholola vhathu vhawe vhuthubwani ha muya. O vha a songo lenga. Tshenetsho tshiitea, kathihi na zwiitea zwa zwifhingani zwa kale musi muḓi wa Babele u tshi wela zwanḓani zwa Korese, tshi a ri ṱuṱuwedza ṋamusi. Yehova o fulufhedzisa u fhelisa ano maitele mavhi a zwithu, u katela na vhurabeli hao ha mazwifhi. (Ndzumbululo 19:1, 2, 17-21) Musi vha tshi sedza zwithu nga mavhonele a vhathu, vhaṅwe Vhakriste vha nga vhona u nga u tshidzwa havho ho lenga. Naho zwo ralo, u sa fhela mbilu ha Yehova u swika nga tshifhinga tshawe tsho fanelaho tsha u ḓadzisa ḽeneḽo fulufhedziso vhukuma ndi nyito ya zwivhuya. Zwiṅwe hafhu, “[Yehova] ha funi vhaṅwe vha tshi xela, u funa vhoṱhe vha tshi ḓa vha rembuluwa.” (2 Petro 3:9) Nga zwenezwo, ivhani na vhungoho ha uri u fana na misini ya Isiraele wa kale, ‘u tshidzwa a hu nga lengi.’ Vhukuma, samusi ḓuvha ḽa u tshidzwa ḽi tshi khou sendela, nga lufuno Yehova u bvela phanḓa a tshi ramba: “Ṱoḓani Yehova á tshee wa u wanala; mu vhidzeleleni á tshee tsini. Mutshinyi nga a laṱe nḓila yawe, mudzia-zwivhi nga a laṱe ngelekanyo dzawe, a vhuyelele ha Yehova uri a mu khathutshele; a vhuyelele ha Mudzimu washu; ngauri u hangwela hawe ndi huhulu.”—Yesaya 55:6, 7.
[Mbudziso Dza Pfunzo]
[Zwifanyiso kha siaṱari 94]
Midzimu ya Babele a yo ngo u tsireledza uri u sa fheliswe
[Zwifanyiso kha siaṱari 98]
Vhakriste ṋamusi vha fanela u ḓilinda kha midzimu ya zwifanyiso ya musalauno
[Zwifanyiso kha siaṱari 101]
Ivhani na tshivhindi tsha u ita zwo lugaho
