Ndima ya Vhufumi
“Tshifhinga tsha Vhuhwavho”
1, 2. (a) Yesaya o ḓiphina nga phaṱutshedzo ifhio? (b) Ndi vhafhio vhane vha katelwa kha maipfi a vhuporofita o ṅwalwaho kha tshipiḓa tsha u thoma tsha Yesaya ndima ya 49?
NDI kale vhathu vhoṱhe vha fulufhedzeaho vha tshi ṱanganedzwa na u tsireledzwa nga Mudzimu. Fhedzi Yehova ha sumbedzi muṅwe na muṅwe vhuhwavho hawe. Muthu u fanela u fanelea yeneyo phaṱutshedzo i sa vhambedzwi na tshithu. Yesaya o vha e muṅwe we a vha a tshi fanelea. O tondwa nga Mudzimu nahone a shumiswa nga Yehova u itela u ḓivhadza vhaṅwe zwine A zwi funa. Tsumbo ya zwenezwi yo ṅwalwa kha tshipiḓa tsha u thoma tsha Yes ndima ya 49 ya vhuporofita ha Yesaya.
2 Enea maipfi o livhiswa nga lwa vhuporofita kha mbeu ya Abrahamu. Kha u ḓadzea ha u thoma, yeneyo mbeu ndi lushaka lwa Isiraele, lwo bvaho kha Abrahamu. Naho zwo ralo, vhunzhi ha maipfi o ṅwalwaho a shuma nga maanḓa kha Mbeu ya Abrahamu ye ya fulufhedziswa u bva kale, Messia o fulufhedziswaho. Maipfi o hevhedzwaho a dovha a shuma kha vharathu vha muya vha Messia, vhane vha vha tshipiḓa tsha mbeu ya Abrahamu na ya “Isiraele wa Mudzimu.” (Vha-Galata 3:7, 16, 29; 6:16) Tshenetshi tshipiḓa tsha vhuporofita ha Yesaya tshi ṱalusa nga maanḓa vhushaka ho khetheaho vhu re hone vhukati ha Yehova na Murwa wawe a funwaho, Yesu Kristo.—Yesaya 49:26.
U Vhewa na U Tsireledzwa nga Yehova
3, 4. (a) Ndi thikhedzo ifhio ine Messia a vha nayo? (b) Messia u khou amba na vhafhio?
3 Messia u ḓiphina nga vhuhwavho ha Mudzimu, kana u ṱanganedzwa ngae. Yehova u mu ṋea maanḓa na pfaneleo dzi ṱoḓeaho uri a ḓadzise mushumo wawe. Nga zwenezwo, zwo fanela, Messia wa tshifhingani tshi ḓaho u ri: “Hee inwi zwiṱangadzime, inwi dzitshakha dza kule, ipfani zwine nda amba. Yehova o mbidza tshee nda bebwa; u ḓivha dzina ḽanga tshee nda takulwa nga mme-anga.”—Yesaya 49:1.
4 Hafha Messia u livhisa mafhungo awe kha vhathu vha re “kule.” Naho hu Vhayuda vhe vha fulufhedziswa Messia, vhuḓinḓa hawe vhu ḓo fhaṱutshedza tshaka dzoṱhe. (Mateo 25:31-33) “Zwiṱangadzime” na “dzitshakha,” naho dzi songo vhofha mulanga na Yehova, dzi fanela u thetshelesa Messia wa Isiraele ngauri o rumelwa u tshidza vhathu vhoṱhe.
5. Messia o irwa hani dzina na musi a sa athu bebwa sa muthu wa ṋama?
5 Vhuporofita vhu amba uri Yehova u ḓo ira Messia dzina a sa athu bebiwa sa muthu wa ṋama. (Mateo 1:21; Luka 1:31) Kale-kale a sa athu bebwa, Yesu u vhidzwa “Mulaya-vhuṱolo, Mudzimu-Muhali, Randalamo, Ṋe-mulalo.” (Yesaya 9:5) Immanuele, ḽine zwa vhonala uri ḽo vha ḽi dzina ḽa murwa wa Yesaya na ḽone ndi dzina ḽa vhuporofita ḽa Messia. (Yesaya 7:14; Mateo 1:21-23) Na dzina ḽe Messia a vha a tshi ḓo ḓivhiwa ngaḽo—Yesu—ḽo dzula ḽo ambiwa a sa athu bebwa. (Luka 1:30, 31) Ḽeneḽi dzina ḽi bva kha ipfi ḽa Luheberu ḽine ḽa amba “Yehova Ndi U Tshidza.” Zwi khagala uri Yesu ho ngo ḓivhea vhuimoni ha u vha Kristo.
6. Mulomo wa Messia u nga pfumo ḽa vhuhali nga nḓila-ḓe, nahone o khudiswa, kana u dzumbiwa nga nḓila-ḓe?
6 Maipfi a Yesaya a vhuporofita a a bvela phanḓa: “Mulomo wanga o u ita pfumo ḽa vhuhali; o nkhudisa murunzini wa tshanḓa tshawe; o nyita musevhe wo ṱuṱulwaho, a ndonga kha dzanda ḽa misevhe yawe.” (Yesaya 49:2) Musi hu tshi swika tshifhinga tsha uri Messia wa Yehova a thome vhuḓinḓa hawe ha kha ḽifhasi nga 29 C.E., maipfi na mishumo ya Yesu vhukuma zwo nga pfumo ḽa vhuhali, zwihali zwo ṱuṱulwaho, zwine zwa kona u dzhena mbiluni dza vhathetshelesi vhawe. (Luka 4:31, 32) Maipfi awe na mishumo yawe zwo dzikusa mbiti dza swina ḽihulwane ḽa Yehova, ḽine ḽa vha Sathane, na vhatevheli vhawe. U bva tshifhingani tsha u bebwa ha Yesu, Sathane u lingedza u Mu vhulaha, fhedzi Yesu u fana na musevhe wo dzumbiwaho kha dzanda ḽa Yehova. a A nga ḓisendeka tshoṱhe nga Khotsi awe u itela u tsireledzea. (Psalme ya 91:1; Luka 1:35) Nga tshifhinga tsho vhewaho, Yesu u kumedza vhutshilo hawe a tshi itela vhathu. Fhedzi hu ḓo swika tshifhinga tshine a ḓo bva sa mudziammbi a re na maanḓa wa ṱaḓulu o ḓiṱamaho nga iṅwe nḓila, e na pfumo ḽa vhuhali ḽine ḽa bva mulomoni wawe. Nga tshenetshi tshifhinga, pfumo ḽa vhuhali ḽi imela maanḓa a Yesu a u ḓivhadza na u haṱula maswina a Yehova.—Ndzumbululo 1:16.
Vhashumeli vha Mudzimu A Vha Khou Shumela Mahandana
7. Maipfi a Yehova a re kha Yesaya 49:3 a shuma kha nnyi, nahone ndi ngani?
7 Zwino Yehova u amba maipfi a tevhelaho a vhuporofita: “U muḓinḓa wanga, henewe Isiraele, ndi ḓo ḓi-khoḓisa nga iwe.” (Yesaya 49:3) Yehova u amba uri lushaka lwa Isiraele ndi muḓinḓa wawe. (Yesaya 41:8) Fhedzi Yesu Kristo ndi Muḓinḓa a swayeaho vhukuma wa Mudzimu. (Mishumo 3:13) A hu na tshivhumbiwa na tshithihi tsha Mudzimu tshine tsha nga sumbedza u “khoḓisa” ha Yehova khwine u fhira Yesu. Nga zwenezwo, naho enea maipfi o livhiswa kha Isiraele, a shuma nga nḓila ya vhukuma kha Yesu.—Yohane 14:9; Vha-Kolosa 1:15.
8. Vhathu vha ha Messia vho mu dzhia hani, fhedzi Messia u ḓisendeka nga nnyi uri a bvelele?
8 Naho zwo ralo, naa a si ngoho uri Yesu u a nyadziwa na u landulwa nga vhunzhi ha vhathu vha hawe? Ee. Nga u tou angaredza, lushaka lwa Isiraele a lu ṱanganedzi Yesu sa Muḓinḓa o vhewaho nga Mudzimu. (Yohane 1:11) Zwoṱhe zwe Yesu a zwi khunyeledza musi a tshi kha ḓi vha kha ḽifhasi zwi nga vhonala zwi si tshithu kha vhathu vhe vha tshila nga tshenetsho tshifhinga, nahone zwi si zwa ndeme. Zwenezwi zwine zwa vhonwa zwi u kundwa ha vhuḓinḓa hawe zwi sumbedzwa nga maipfi a tevhelaho a Messia: “Ndi sokou ḓi-netisa; ndo sokou itela mahandana ndi tshi fhedza maanḓa anga.” (Yesaya 49:4a) Enea maipfi ha bulwi nga ṅwambo wa uri Messia o nyabwa. Ṱhogomelani zwine a zwi amba lu tevhelaho: “Atsina mafhungo anga a ima nga Yehova; malamba anga a na Mudzimu wanga.” (Yesaya 49:4b) U bvelela ha Messia a ho ngo ḓisendeka nga vhathu, fhedzi ho ḓisendeka nga Mudzimu.
9, 10. (a) Ndi ufhio mushumo we Messia a ṋewa nga Yehova, nahone wo vha na mvelelo dzifhio? (b) Vhakriste ṋamusi vha nga ṱuṱuwedzwa hani nga zwe Messia a zwi tshenzhela?
9 Yesu u kwamea nga maanḓa nga u ṱanganedzwa nga Mudzimu, kana u sumbedzwa vhuhwavho hawe. Kha vhuporofita, Messia u ri: “Zwino hu amba Yehova we a mbumba nda bebwa, nda vha muḓinḓa wawe wa u humisa Yakobo, uri Vha-Isiraele vha vhuthwe vha ḓe ha Ene; ngauri Yehova o wana ndí wa u huliswa, Mudzimu wanga o vha maanḓa anga.” (Yesaya 49:5) Messia u ḓa u itela u humisela mbilu dza vhana vha Isiraele ha Khotsi avho wa ṱaḓulu. Vhanzhi a vha rembuluwi, fhedzi vhaṅwe vha a rembuluwa. Naho zwo ralo, malamba awe a na Yehova Mudzimu. U bvelela hawe a hu eliwi nga maitele a vhathu, fhedzi hu elwa nga zwilinganyo zwa Yehova.
10 Ṋamusi, vhatevheli vha Yesu nga zwiṅwe zwifhinga vha nga vhona u nga vha khou shumela mahandana. Huṅwe fhethu, mvelelo dza vhuḓinḓa havho dzi nga vhonala dzi ṱhukhu musi dzi tshi vhambedzwa na mushumo na vhuḓidini vhune vha vhu ita. Naho zwo ralo, vha a konḓelela, vha tshi ṱuṱuwedzwa nga tsumbo ya Yesu. Vha dovha vha khwaṱhiswa nga maipfi a Muapostola Paulo, we a ṅwala uri: “Ndi zwone, vharathu vhanga, vhané nda vha funa, khwaṱhani ni so ngo dzinginyea, ni simese u shuma mushumo wa Mudzimu hoṱhe, ni zwi ḓivhe zwauri u ḓi-netisa haṋu a si ha fhedzi Murenani.”—1 Vha-Korinta 15:58.
“Tshedza tsha Vha-nnḓa”
11, 12. Messia o vha hani “tshedza tsha vha-nnḓa”?
11 Kha vhuporofita ha Yesaya, Yehova u ṱuṱuwedza Messia nga u mu humbudza uri u vha Muḓinḓa wa Mudzimu a si “mafhungo a sa dini.” (NW). Yesu u fanela “u vusa dzitshakha dza Yakobo fhedzi na u vhuisa masalela a Isiraele.” Yehova u bvela phanḓa a tshi ṱalutshedza: “Ndi u ita tshedza tsha vha-nnḓa uri u lamulela hanga hu swike hune shango ḽa guma.” (Yesaya 49:6) Yesu u vhonetshela hani vhathu “u swik[a] hune shango ḽa guma” ngeno vhuḓinḓa hawe vhu tshi fanela u itwa Isiraele fhedzi?
12 Mafhungo a Bivhili a sumbedza uri “tshedza tsha vha-nnḓa” tsha Mudzimu a tsho ngo dzimiwa musi Yesu a tshi ṱuwa kha ḽifhasi. Miṅwaha i ṱoḓaho u vha 15 nga murahu ha lufu lwa Yesu, Paulo na Baranaba vhe vha vha vhe vharumiwa vho redza vhuporofita ha Yesaya 49:6 nahone vha vhu shumisela kha vhafunziwa vha Yesu, vharathu na vhakomana vhawe vha muya. Vho ṱalutshedza: “Mudzimu o ri laya a ri: Ndo U vhea uri U vhe tshedza tsha vha nnḓa, uri vha tshidzwe nga iwe u swika mugumoni wa shango.” (Mishumo 13:47) A sa athu fa, Paulo o ṱhogomela uri mafhungo maḓifha a u tshidzwa ha huwelelwi kha Vhayuda fhedzi, fhedzi na kha “zwivhumbwa zwoṱhe zwa tsini ha ḽiṱaḓulu.” (Vha-Kolosa 1:6, 23) Ṋamusi, vha masalela a vharathu vha Kristo vho ḓodzwaho vha bvela phanḓa na wonoyo mushumo. Vha tshi tikedzwa nga vha “gogo ḽihulu” vha dzimilioni, vha shuma sa “tshedza tsha vha-nnḓa” mashangoni a fhiraho 230 ḽifhasini ḽoṱhe.—Ndzumbululo 7:9.
13, 14. (a) Vhathu vho aravha hani mushumo wa u huwelela wa Messia na vhatevheli vhawe? (b) Ndi u shanduka hufhio ha zwiimo he ha itea?
13 Vhukuma Yehova u tikedza Muḓinḓa wawe Messia, vharathu vha Messia vho ḓodzwaho, na vhoṱhe vha gogo ḽihulu, vhane vha bvela phanḓa u farisana navho kha u huwelela mafhungo maḓifha. I ngoho, u fana na Yesu, vhafunziwa vhawe vho goḓiwa nahone vha hanedzwa. (Yohane 15:20) Fhedzi nga tshifhinga tshawe, Yehova misi yoṱhe u shandula zwiimo u itela u vhofholola na u lambedza vhashumeli vhawe vha fulufhedzeaho. Malugana na Messia, ane a vha “munyadziwa-vhukuma,” na ‘munengwa nga vhathu,’ Yehova u a fulufhedzisa: “Mahosi a ḓo zwi vhona a ima, vhakoma vha ḓo losha, vha tshi itela dzina ḽa Yehova, nga u’ a vha Mufulufhedzei mukhethwa wa Isiraele, we a U nanga.”—Yesaya 49:7.
14 Nga murahu, muapostola Paulo o ṅwalela Vhakriste ngei Filipi nga ha honohu u shanduka ha zwiimo he ha dzula ho ambiwa. U ṱalusa Yesu sa muthu we a ṱukufhadzwa kha danda ḽa tshengedzo, fhedzi nga murahu a huliswa nga Mudzimu. Yehova o hulisa Muḓinḓa wawe “a mu tonda nga ḽone dzina ḽi fhiraho madzina oṱhe. Uri dzinani ḽa Yesu magona oṱhe a gwadame.” (Vha-Filipi 2:8-11) Na vhatevheli vha Kristo vha fulufhedzeaho vho sevhiwa uri na vhone vha ḓo tovholwa. Fhedzi u fana na Messia, vha khwaṱhisedzwa uri vha ḓo ṋewa vhuhwavho ha Yehova.—Mateo 5:10-12; 24:9-13; Marko 10:29, 30.
“Tshifhinga tsho Fanelaho Tshavhuḓi”
15. Ndi tshifhio “tshifhinga” tsho khetheaho tsho bulwaho kha vhuporofita ha Yesaya, nahone zwenezwi zwi amba mini?
15 Vhuporofita ha Yesaya vhu bvela phanḓa na mubulo wa ndeme vhukuma. Yehova u vhudza Messia: “Ndi U pfa nga tshifhinga tsha vhuhwavho; ndi U farisa nga ḓuvha ḽa u tshidza; ndi ḓo U londota nda U ita wa mulanga na vhathu.” (Yesaya 49:8a) Ho ṅwalwa vhuporofita vhu fanaho na honoho kha Psalme ya 69:13-18. Mupsalme u ambela kha “tshifhinga tsha vhuhwavho,” a tshi shumisa mubulo une wa ri “tshifhinga tsha hone.” Enea maipfi a amba uri vhuhwavho ha Yehova na tsireledzo yawe zwi sumbedzwa nga nḓila yo khetheaho, fhedzi nga ḽifhinga ḽo vhewaho nahone lwa tshifhinganyana.
16. Tshifhinga tsha vhuhwavho tsha Yehova tsho vha tshi mini Isiraele ḽa kale?
16 Tshenetsho tshifhinga tsha vhuhwavho tsho vha tshi tshi ḓo swika lini? U thomani, enea maipfi o vha a tshi tshimbidzana na vhuporofita ha u vusulusa na u vhuya he ha dzula ho ambiwa ha Vhayuda vha tshi bva vhuthubwani. Lushaka lwa Isiraele lwo vha na tshifhinga tsha vhuhwavho musi lu tshi ‘vusa ḽeneḽo shango’ nahone vha dovha vha dzula ‘marubini a mahaya avho.’ (Yesaya 49:8b) Vho vha vha si tsha vha “vho vhoxwaho” ngei Babele. Musi vhe lwendoni lwavho vha tshi khou vhuyelela hayani, Yehova o ita vhungoho ha uri vha sa pfe “nḓala” kana “ḓora,” kana u “vhaiswa nga ḓumbu na biso ḽa ḓuvha.” Vhaisiraele vho balanganywaho vho vhuyelela shangohaya ḽavho “vha tshi bva kule . . . vha bva Ḽivhuya na Vhukovhela.” (Yesaya 49:9-12) Naho honovhu vhuporofita ho ḓadzea nga nḓila i swayeaho u thomani, Bivhili i sumbedza uri vhu ḓo dovha ha ḓadzea nga dziṅwe nḓila.
17, 18. Ndi tshifhio tshifhinga tsha vhuhwavho tshee Yehova a tshi vhea kha ḽino ḓana ḽa u thoma ḽa miṅwaha?
17 Tsha u thoma, tshifhingani tsha u bebwa ha Yesu, vharuṅwa vho ḓivhadza mulalo na vhuhwavho ha Mudzimu, kana u tondiwa ha vhathu. (Luka 2:13, 14) Honovhu vhuhwavho a ho ngo sumbedzwa vhathu vhoṱhe nga u tou angaredza, fhedzi ho sumbedzwa vhe vha sumbedza lutendo kha Yesu. Nga murahu Yesu o vhalela khagala vhuporofita ha Yesaya 61:1, 2 nahone a vhu shumisela kha ene muṋe sa muḓivhadzi wa “ṅwaha u takadzaho wa [“Yehova,” NW].” (Luka 4:17-21) Muapostola Paulo o amba uri Kristo u ḓo tsireledzwa nga nḓila yo khetheaho nga Yehova musi a tshi kha ḓi vha muthu wa ṋama. (Vha-Heberu 5:7-9) Nga zwenezwo tshenetshi tshifhinga tsha vhuhwavho tshi amba u tonda ha Mudzimu Yesu musi a tshi kha ḓi tshila sa muthu wa ṋama.
18 Naho zwo ralo, honovhu vhuporofita vhu dovha ha shuma nga iṅwe nḓila. Musi o no redza maipfi a Yesaya malugana na tshifhinga tsha vhuhwavho, Paulo o bvela phanḓa u ri: “Ndi tshenetshi-ha tshifhinga tsho fanelaho tshavhuḓi, musi wa u tshidza ndi wonoyu.” (2 Vha-Korinta 6:2) Paulo o ṅwala enea maipfi miṅwaha ya 22 nga murahu ha lufu lwa Yesu. Zwi vhonala uri musi hu tshi vhumbwa tshivhidzo tsha Vhukriste nga Pentekoste ya 33 C.E., Yehova o ṱanḓavhudza ṅwaha wawe wa vhuhwavho u itela u katela vhatevheli vha Kristo vho ḓodzwaho.
19. Vhakriste vha nga vhuyelwa hani ṋamusi nga tshifhinga tsha Yehova tsha vhuhwavho?
19 Hu pfi mini nga vhatevheli vha Yesu ṋamusi vha songo ḓodzwaho uri vha vhe maḽaifa muvhusoni wa Mudzimu wa ṱaḓulu? Naa vha re na fulufhelo ḽa u tshila kha ḽifhasi vha nga vhuyelwa nga tshenetshi tshifhinga tsho fanelaho tshavhuḓi? Ee. Bugu ya Bivhili ya Ndzumbululo i sumbedza uri tshenetshi ndi tshifhinga tshine Yehova a sumbedza ngatsho vhuhwavho vha gogo ḽihulu vhane vha ḓo bva “maṱunguni mahulu” uri vha ḓiphine nga vhutshilo kha ḽifhasi ḽa paradiso. (Ndzumbululo 7:13-17) Nga zwenezwo, Vhakriste vhoṱhe vha nga shumisa ḽeneḽi ḽifhinga ḽiṱuku ḽine Yehova a sumbedza ngaḽo vhuhwavho vhathu vhawe vha songo fhelelaho.
20. Vhakriste vha nga iledza hani u xelelwa nga ndivho ya tshilidzi tshi songo ri fanelaho tsha Yehova?
20 Muapostola Paulo o thoma nḓivhadzo yawe ya tshifhinga tsha Yehova tsho fanelaho nga u bula tsevho. O fhembeledza Vhakriste ‘uri tshilidzi tsha Mudzimu vha si tshi ṱanganedze lwa fhedzi.’ (2 Vha-Korinta 6:1) Nga zwenezwo, Vhakriste vha fanela u shumisa tshibuli tshiṅwe na tshiṅwe u itela u takadza Mudzimu na u ita zwine a zwi funa. (Vha-Efesa 5:15, 16) Ndi zwavhuḓi uri vha tevhele khadeledzo ya Paulo: “Vhonani-ha, Vharathu, hu si vhe na a re na mbilu mmbi, i sá tendi, i ḽataho Mudzimu a tshilaho. Ni fhembeledzane misi yoṱhe hú kha ḓi pfi Ṋamusi, uri kha inwi hu si vhe na ane a rindidza mbilu yawe nga u fhurwa nga zwivhi.”—Vha-Heberu 3:12, 13.
21. Ndi afhio maipfi a takadzaho ane a swaledzela tshipiḓa tsha u thoma tsha Yesaya ndima ya 49?
21 Musi maipfi a vhuporofita a Yehova na Messia wawe a tshi guma, Yesaya u bula maipfi a takadzaho: “Hee Ḽiṱaḓulu, fhululedza! Hee Ḽifhasi, khaná! Hee Dzithavha, huwelelani, ngauri Yehova o fhumudza vhathu vhawe, o khathutshela zwisiwana zwawe.” (Yesaya 49:13) Ndi maipfi avhuḓi lungafhani a u khuthadza Vhaisiraele vha kale na Muḓinḓa muhulwane wa Yehova, Yesu Kristo, kathihi na vhaḓinḓa vha Yehova vho ḓodzwaho na khonani dzavho vha “dziṅwe nngu” ṋamusi!—Yohane 10:16.
Yehova Ha Hangwi Vhathu Vhawe
22. Yehova u ombedzela hani uri ha nga vhuyi a hangwa vhathu vhawe?
22 Yesaya zwino u bvela phanḓa na u vhiga milevho ya Yehova. U dzula o amba uri Vhaisiraele vha re vhuthubwani vha ḓo neta nahone vha fulufhuwa. Yesaya u ri: “Tsioni ene o vha a tshi ri: Yehova o ndaṱa; Muṋe wanga o nkhangwa.” (Yesaya 49:14) Naa izwi ndi ngoho? Naa Yehova o ṱutshela vhathu vhawe nahone a vha hangwa? Sa muambeli wa Yehova, Yesaya u a bvela phanḓa: “Naa musadzi lushie lwawe a nga vhuya a lu hangwa hani? a litsha u khathutshela mbebo ya muvhili wawe? Na misi ene á hangwá, Nṋe a thi nga U hangwi.” (Yesaya 49:15) Yeneyo ndi phindulo yavhuḓi lungafhani ya lufuno i bvaho ha Yehova! Nḓila ine Yehova a funa ngayo vhathu vhawe i fhira ine mubebi a funa ngayo ṅwana wawe. U dzula a tshi khou humbula nga ha vhathu vhawe vha fulufhedzeaho. U vha humbula zwa tou nga madzina avho o ṅwalwa zwanḓani zwawe: “Ngangoho luswayo lwau ndo lu ṅwala kha zwanḓa zwanga; ndi dzula ndó lavhelesa mitsheṱo yau.”—Yesaya 49:16.
23. Paulo u ṱuṱuwedza hani Vhakriste uri vha fulufhele Yehova nahone vha sa mu hangwe?
23 Kha vhurifhi hawe he a vhu ṅwalela Vhagalata, muapostola Paulo o khadeledza Vhakriste a ri: “Arali ri tshi ita zwivhuya ri songo dinalea, ngauri arali rí sa neti, ri ḓo kaṋa nga tshifhinga tshazwo’.” (Vha-Galata 6:9) O ṅwalela Vhaheberu maipfi a ṱuṱuwedzaho a ri: “Mudzimu ha ṱaluli; ha nga hangwi zwe na shuma na ḓi-netisa lufunoni ni tshi itela dzina ḽawe; no shumela vhakhethwa, na zwino ni khou vha shumela.” (Vha-Heberu 6:10) Ri songo vhuya ra vhona u nga Yehova o hangwa vhathu vhawe. U fana na Tsioni wa kale, Vhakriste vha na tshiitisi tshavhuḓi tsha u takala na u lindela Yehova vha sa fheli mbilu. U nambatela mulanga wawe na mafulufhedziso awe.
24. Muḓi wa Tsioni u ḓo vusuluswa nga nḓila-ḓe, nahone u ḓo ḓivhudzisa mbudziso dzifhio?
24 Yehova, a tshi shumisa Yesaya, u dovha a ṋea iṅwe khuthadzo. “Vhaphusukanyi [vha Tsioni],” vhane vha vha Vhababele kana Vhayuda vha vhagunei, a vha tsha ḓo vha na khombo. “Vhana” vha Tsioni, Vhayuda vho iswaho vhuthubwani vhane vha dzula vha tshi fulufhedzea kha Yehova, “vho tutuwa.” Vha ḓo ‘kuvhanganywa vhoṱhe.’ Musi vha tshi kha ḓi tou bva u vhuyelela Yerusalema, Vhayuda vho vhuyaho vho vha vha tshi ḓo vha zwikhavhiso zwa musanda wavho, u fana na “muselwa” o ambara “dzánga.” (Yesaya 49:17, 18) Fhethu he ha vha hu Tsioni ndi “matumba.” Edzanu humbula nḓila ine wonoyo muḓi wa ḓo akhamala ngayo musi nga kathihi fhethu u tshi ḓo vha na vhadzulapo vhanzhi lune wa sa tsha ḓo vha na vhudzulo. (Vhalani Yesaya 49:19, 20.) Nga ho ḓoweleaho, wonoyu muḓi u vhudzisa hune vhana vhawo vhoṱhe vha bva hone: “Ndi hone U tshi ḓo amba na mbilu yau wa ri: Ndi nnyi we a mbebela vhenevha? Huufha ndo vha ndo dzhielwa vhana, ndí sa tsha beba, ndó thubiwa, ndó pfuluswa! Ndi nnyi we a nyalusela vhenevha? Huufha ndó vha ndó sala ndí ndoṱhe! Vhenevha, vha bva ngafhi?” (Yesaya 49:21) Ndi vhuimo vhu takadzaho lungafhani ha muḓi wa Tsioni we u thomani wa vha u muumba!
25. Musalauno, ndi u vusuluswa hufhio he Vhaisiraele vha muya vha ḓiphina ngaho?
25 Enea maipfi o ḓadzea musalauno. Miṅwahani i konḓaho ya nndwa ya shango ya u thoma, Vhaisiraele vha muya vho dzhena ḽifhingani ḽa ndozwo na vhuthubwa. Fhedzi vho vusuluswa nahone vha vha paradisoni ya muya. (Yesaya 35:1-10) U fana na muḓi we u thomani wa tshinywa wo ṱaluswaho nga Yesaya, vho vha vho takala—musi nga lwa pfanyisedzo—vha tshi ḓiwana vho tangwa nga vhagwadameli vha Yehova vho takalaho, vha re na mafulufulu.
“Tshiphuga Tsha Dzitshakha”
26. Ndi vhulivhisi vhufhio vhune Yehova a vhu ṋea vhathu vhawe vho vhofhololwaho?
26 Nga lwa vhuporofita, zwino Yehova u ṱalutshedza Yesaya nga ha tshifhinga tsha musi vhathu Vhawe vha tshi vhofhololwa Babele. Naa vha ḓo wana vhulivhisi ha Mudzimu? Yehova u a fhindula: “Ngangoho, ndi isa tshanḓa tshanga kha vha-nnḓa; ndi sima tshiphuga tshanga vhukati ha dzitshakha. Ndi hone vha tshi ḓo ḓisa vharwa vhau vhó vha takula; vhananyana vhau vha ḓo swikiswa vhó bebiwa nga dzikhundu.” (Yesaya 49:22) Kha u ḓadzea ha u thoma, Yerusalema, we u thomani wa vha u musanda wa hulumeni na tshisima tsha thembele ya Yehova, u vha “tshiphuga” tsha Yehova. Na vhathu vha dziṅwe tshaka vha re na bvumo na maanḓa, vha ngaho “dzikhosi” na “vhafumakadzi,” vha thusa Vhaisiraele lwendoni lwavho lwa u vhuyelela murahu. (Yesaya 49:23a) Mahosi a Peresia Korese na Arithasasitha Longimanus na vha miṱani yavho ndi vhaṅwe vhe vha thusa. (Esera 5:13; 7:11-26) Nahone maipfi a Yesaya o shuma nga iṅwe nḓila.
27. (a) Kha u ḓadzea huhulwane, vhathu vha ḓo vhuthanela kha “tshiphuga” tshifhio? (b) Hu ḓo itea mini musi tshaka dzoṱhe dzi tshi kombetshedzea u ḓiṱukufhadzela vhuvhusi ha Messia?
27 Yesaya 10:11 i amba nga “tshiphuga tsha dzitshakha.” Muapostola Paulo u shumisela enea maipfi kha Kristo Yesu. (Vha-Roma 15:8-12) Nga zwenezwo, kha u ḓadzea huhulwane, Yesu na vhavhusanae vho ḓodzwaho nga muya ndi “tshiphuga” tsha Yehova tshine vhathu vha vhuthanela khatsho. (Ndzumbululo 14:1) Nga tshifhinga tsho fanelaho vhathu vhoṱhe vha ḽifhasi—na zwigwada zwa vhavhusi zwa ṋamusi—vha ḓo kombetshedzea u ḓiṱukufhadzela vhuvhusi ha Messia. (Psalme ya 2:10, 11; Daniele 2:44) Hu ḓo vha na mvelelo dzifhio? Yehova u ri: “Ndi hone U tshi ḓo ḓivha zwauri ndi Nṋe Yehova, [“vhoṱhe vhane vha ntenda a vha nga shoni, NW”].”—Yesaya 49:23b.
“Zwino U Tshidzwa hashu Ho No Sendela”
28. (a) Ndi afhio maṅwe maipfi e Yehova a a shumisa u dovha u khwaṱhisa vhathu vhawe uri vha ḓo vhofhololwa? (b) Ndi mafhungo afhio e Yehova a ḓivhofha ngao malugana na vhathu vhawe?
28 Vhaṅwe vhe vha vha vhe vhuthubwani ngei Babele vha nga vha vho ḓivhudzisa uri, ‘Naa Vhaisiraele vha ḓo vhuya vha vhofhololwa?’ Yehova u ṱhogomela yeneyo mbudziso nga vhuronwane nga u vhudzisa uri: “Naa muhali a nga dzhielwa zwe a dzhia? Mathubwa a muvhuya a nga ponyoka naa?” (Yesaya 49:24) Phindulo ndi ee. Yehova u a vha khwaṱhisa: “Na muhali u ḓo dzhielwa mathubwa; na vhe vha kumbiwa nga wa maanḓa vha ḓo ponyoka.” (Yesaya 49:25a) Ndi khwaṱhisedzo i khuthadzaho lungafhani! Zwiṅwe hafhu, vhuhwavho ha Yehova kha vhathu vhawe vhu ḓa na mbofho yo khwaṱhaho ya u vha tsireledza. A tshi amba nga ho livhaho, u ri: “Nṋe ndi ḓo lwa na maswina au; vhana vhau vha ḓo lamulelwa nga Nṋe.” (Yesaya 49:25b) Yeneyo mbofho i kha ḓi shuma. Samusi zwo ṅwalwa kha Sakaria 2:12, Yehova u vhudza vhathu vhawe uri: ‘A vhaisaho vho-inwi u a nkombodza.’ I ngoho, zwino ri ḓiphina nga ḽifhinga ḽa vhuhwavho ḽine khaḽo vhathu ḽifhasini ḽoṱhe vha vha na tshibuli tsha u vhuthanela Tsioni wa muya. Naho zwo ralo, ḽeneḽo ḽifhinga ḽa vhuhwavho ḽi ḓo fhela.
29. Ndi tshifhio tshilavhelelwa tshi ṱungufhadzaho tsha vhane vha hana u thetshelesa Yehova?
29 Hu ḓo itea mini kha vhane vha hana nga tshipimbi u thetshelesa Yehova na vhane vha tovhola vhagwadameli vhawe? U ri: “Vhe vha U ṱhupha ndi ḓo vha ḽisa ṋama ya mivhili yavho; vha ḓo nwa malofha avho vha kambiwa vhunga nga tuvhu.” (Yesaya 49:26a) Ndi tshilavhelelwa tshi ṱungufhadzaho lungafhani! Vhahanedzi vho raloho vha tshipimbi a vha na vhumatshelo. Vha ḓo fheliswa. Nga zwenezwo, nga u tshidza vhathu vhawe na nga u fhelisa maswina avho, Yehova u ḓo dzhiiwa sa Mutshidzi. “Ndi hone vhathu vhoṱhe vha tshi ḓo ḓivha zwauri Mutshidzi wau ndi Nṋe, Mulamuleli wau, Muhali wa Yakobo.”—Yesaya 49:26.
30. Ndi ifhio mishumo ya u tshidza ye Yehova a i itela vhathu vhawe, nahone u kha ḓi ḓo ita mini?
30 Eneo maipfi o thoma u shuma musi Yehova a tshi shumisa Korese uri a vhofholole vhathu Vhawe vhupulini ha Babele. O shuma nga nḓila i fanaho nga 1919 musi Yehova a tshi shumisa Murwa wawe o vhewaho khuluṋonini, Yesu Kristo, uri a vhofholole vhathu Vhawe vhupulini ha muya. Nga zwenezwo, Bivhili i amba uri Yehova na Yesu ndi vhatshidzi. (Tito 2:11-13; 3:4-6) Yehova ndi Mutshidzi washu, nahone Yesu, Messia, ndi “Muimeleli [wawe] Muhulwane.” (Mishumo 5:31, NW) Vhukuma, mishumo ya Mudzimu ya u tshidza nga Yesu Kristo i a mangadza. A tshi shumisa mafhungo maḓifha, Yehova u vhofholola vha mbilu dzavhuḓi vhupulini ha vhurereli ha mazwifhi. Nga tshiṱhavhelo tshi rengululaho, u vha vhofholola kha vhupuli ha tshivhi na lufu. Nga 1919 o vhofholola vharathu vha Yesu vhupulini ha muya. Nahone nndwani ya Haramagedo ine ya khou ḓa nga u ṱavhanya, u ḓo vhofholola vhathu vha fulufhedzeaho vha gogo ḽihulu kha ndozwo ine ya ḓo ḓela vhaitazwivhi.
31. Vhakriste vha fanela u aravha hani musi vha tshi sumbedzwa vhuhwavho ha Mudzimu?
31 Nga zwenezwo, ndi phaṱutshedzo yavhuḓi lungafhani u sumbedzwa vhuhwavho ha Mudzimu! U nga ri roṱhe ri nga shumisa tshenetshi tshifhinga tsho fanelaho nga vhuṱali. Nahone u nga ri ri nga dzhia vhukando u tendelana na u ṱavhanyiswa ha zwifhinga zwashu, ri thetshelese maipfi a Paulo o ṅwalelwaho Vharoma: “Zwi iteni ni tshi ḓivha tshifhinga, uri tshikhathi tshashu tsha u vuwa khofheni tsho swika. Ngauri zwino u tshidzwa hashu ho no sendela tsini, a hu tsha nga musi ri tshi thoma u tenda. Vhusiku ho fhela, masiari o sendela. Nga ri bvule mishumo ya swiswi, ri ambare mafumo a tshedza. Nga ri tshimbile tshidele sa vha-tshimbila-masiari. Ri songo tshimbila nga u ḽesa na nga u kambiwa, ri songo tshimbila nga vhuṱonḓolo na nga u silinga, ri songo tshimbila nga khani na nga vhuhali. Hone ambarani Murena Yesu Kristo, huno ṋama, ni tshi i vhavhalela ni songo i vhavhalela zwiné ya vhuya ya vha na dzinyemulo.”—Vha-Roma 13:11-14.
32. Vhathu vha Mudzimu vha na khwaṱhisedzo dzifhio?
32 Yehova u ḓo bvela phanḓa u tonda vhane vha thetshelesa nyeletshedzo yawe. U ḓo vha ṋea nungo na vhukoni zwi ṱoḓeaho uri vha ḓadzise u huwelelwa ha mafhungo maḓifha. (2 Vha-Korinta 4:7) Yehova u ḓo shumisa vhashumeli vhawe samusi o shumisa Yesu, Murangaphanḓa wavho. U ḓo ita uri mulomo wavho u nge “pfumo ḽa vhuhali” uri vha swikelele mbilu dza vho vuḓaho nga mulaedza wa mafhungo maḓifha. (Mateo 28:19, 20) U ḓo tsireledza vhathu vhawe “murunzini wa tshanḓa tshawe.” U fana na “musevhe wo ṱuṱulwaho,” vha ḓo dzumbiwa ‘kha dzanda ḽawe.’ Vhukuma, Yehova ha nga laṱedzi vhathu vhawe!—Psalme ya 94:14; Yesaya 49:2, 15.
[Ṱhaluso i re magumoni a siaṱari]
a “Nga hu sa timatimisi, Sathane we a vha a tshi ḓivha uri Yesu ndi Murwa wa Mudzimu na we a porofitiwa uri u ḓo mu pwasha ṱhoho (Ge 3:15), o ita zwoṱhe zwi re maanḓani awe u itela u vhulaha Yesu. Fhedzi musi a tshi ḓivhadza u vhifha muvhilini ha Maria nga Yesu, muruṅwa Gabriele o mu vhudza a ri: ‘Muya mukhethwa u ḓo ḓa kha iwe; maanḓa a Wa-Ṱaḓulu-ṱaḓulu a ḓo vha murunzi wau; ndi zwiné Mukhethwa ane a ḓo bebiwa nga iwe a ḓo pfi Murwa wa Mudzimu ngazwo’.’ (Lu 1:35) Yehova o tsireledza Murwa wawe. Vhuḓidini ha u fhelisa Yesu musi a tshee lutshetshe a ho ngo bvelela.”—Insight on the Scriptures, Volumu 2, siaṱari 868, yo gandiswaho nga Watchtower Bible and Tract Society of New York, Inc.
[Study Questions]
[Tshifanyiso kha siaṱari 139]
Messia u nga “musevhe wo ṱuṱulwaho” u re kha dzanda ḽa Yehova
[Tshifanyiso kha siaṱari 141]
Messia o vha “tshedza tsha dzitshakha”
[Tshifanyiso kha siaṱari 147]
Nḓila ine Yehova a funa ngayo vhathu vhawe i fhira ine mubebi a funa ngayo ṅwana wawe
