Ndima Ya Vhufumbilirathi
“A Huna Ane A Ḓo Ri: Ndi A Lwala”
1. Ndi ngani maipfi a Yesaya 33:24 a tshi khuthadza?
“ZWIVHUMBWA zwoṱhe na zwino zwi tsha ḓi gomela-vho, zwi tsha ḓi songwa-songwa-vho.” Zwenezwo zwo ambiwa nga muapostola Paulo. (Vha-Roma 8:22) Hu sa londwi mvelaphanḓa ya saintsi ya zwa ngalafho, vhulwadze na lufu zwi bvela phanḓa u shengedza vhathu. Nga zwenezwo-ha, ndi ḽavhuḓi lungafhani fulufhedziso ḽine ḽa ḓadzisa tshenetshi tshipiḓa tsha vhuporofita ha Yesaya! Edzani u humbula tshifhinga tshine ‘ha sa ḓo vha na ane a ri: Ndi a lwala.’ (Yesaya 33:24) Ḽeneḽi fulufhedziso ḽi ḓo ḓadzea lini nahone hani?
2, 3. (a) Lushaka lwa Isiraele lu khou lwala nga nḓila ifhio? (b) Asuri ḽi shuma hani sa “ṱhamu” ya Mudzimu ya u ṱarafa?
2 Yesaya o ṅwala nga tshifhinga tshee vhathu vhe vha vhofha mulanga na Mudzimu vha vha vha tshi khou lwala muyani. (Yesaya 1:5, 6) Vho mbwandamela kha vhugunei na u ḓifara luvhi lune vha fanela u ṱarafiwa lu vhavhaho nga Yehova Mudzimu. Asuri ḽi shuma sa “ṱhamu” ya Yehova ya u ṱarafa. (Yesaya 7:17; 10:5, 15) Tsha u thoma, muvhuso wa devhula wa tshaka dza fumi wa Isiraele u wela zwanḓani zwa Vhaasuri nga ṅwaha wa 740 B.C.E. (2 Dzikhosi 17:1-18; 18:9-11) Nga murahu ha miṅwaha i si gathi, Khosi Sanheribi wa Asuri u dzudzanya u vutshela nga ho livhaho muvhuso wa tshipembe wa Yuda. (2 Dzikhosi 18:13; Yesaya 36:1) Musi mmbi i re na maanḓa ya Asuri i tshi vutshela ḽeneḽo shango, zwo vhonala zwi tshi nga muvhuso wa Yuda u ḓo lozwiwa nga ho fhelelaho.
3 Fhedzi Asuri, ḽi tshi pfuka thendelo ye ḽa ṋewa ya u ṱarafa vhathu vha Mudzimu, zwino ḽi vho tovhola vhuhovheleli haḽo ha vhupangwa ha u ṱoḓa u kunda shango ḽoṱhe. (Yesaya 10:7-11) Naa Yehova o vha a tshi ḓo litsha u ḽi ṱarafa musi ḽi tshi fara vhathu vhawe lwa tshiṱuhu? Naa lwonolwo lushaka lu ḓo fhodzwa vhulwadze halwo ha muya? Kha Yesaya ndima ya 33, ri vhala phindulo dza Yehova dza dzenedzi mbudziso.
U Phusukanya Muphusukanyi
4, 5. (a) Ndi khombo ifhio ine ya ḓo ḓela Asuri? (b) Ndi thabelo ifhio ine Yesaya a i itela vhathu vha Yehova?
4 Vhuporofita vhu thoma nga uri: “Khombo dzi ḓo wela henewe Muphusukanyi U sáthu u phusukanywa, iwe Muṱanguli U sáthu u ṱangulwa. U ḓo ri wó fhedza u phusukanya ha vhó phusukanywa iwe; wó thuba wa fhedza, hu ḓo thubiwa iwe.” (Yesaya 33:1) Yesaya u amba nga u tou livha na Asuri, muphusukanyi. Musi lwo swika maṱhakhe-ṱhakheni a u kunda halwo, lwonolwo lushaka lu re na vhuhali lu vhonala lu sa nga kundwi. Lwo ‘phusukanya fhedzi lwa si phusukanywe,’ lwa tshinyadza miḓi ya Yuda, lwa ita na u ṱangula lupfumo lwa nnḓu ya Yehova—nahone lu tshi ita nga u ralo lu tshi tou nga lu nga si ṱarafiwe! (2 Dzikhosi 18:14-16; 2 Koronika 28:21) Naho zwo ralo, zwino zwi ḓo vha kela maṱari. Yesaya u amba nga tshivhindi uri: ‘U ḓo phusukanywa.’ Honovhu vhuporofita vhu khuthadza lungafhani vhathu vha fulufhedzeaho!
5 Nga tshenetsho tshifhinga tshi ofhisaho, vhagwadameli vha fulufhedzeaho vha Yehova vha ḓo fanela u ya khae u itela thuso. Nga zwenezwo Yesaya u a rabela: “Yehova, ri khathutshele; ro lavhelesa Iwe! U vhe tshanḓa tshashu [tsha nungo na thikhedzo] misi yoṱhe ḽí tshi tsha; U vhe mulamuleli washu misi yoṱhe ró khakhedzwa. Dzitshakha dzi ḓo shávha mubvumo wa tshikumo; vha-nnḓa vha balangana hó takuwa Iwe.” (Yesaya 33:2, 3) Zwo tea, Yesaya u rabelela uri Yehova a tshidze vhathu Vhawe samusi O zwi ita lunzhi-lunzhi zwifhingani zwo fhiraho. (Psalme ya 44:3; 68:1) Nahone musi Yesaya a tshi tou fhedza yeneyi thabelo, u amba hu tshee nga phanḓa phindulo ya Yehova ya yeneyo thabelo!
6. Hu ḓo itea mini nga ḽa Asuri, nahone ndi ngani zwenezwi zwo tea?
6 “Ndi hone hu tshi ḓo thubululwa zwe [Vhaasuri] na thuba, vhunga nzie dzi tshi kumbiwa; vha ḓo gidimelwa vhunga vhuukhula vhu tshi gidimelwa.” (Yesaya 33:4) Yuda ḽi a ḓivha nḓila ine zwa vha ngayo u vutshelwa nga zwikhokhonono zwi tshinyadzaho. Naho zwo ralo, nga tshino tshifhinga, ndi maswina a Yuda ane a ḓo lozwiwa. Asuri ḽi ḓo kundwa nga nḓila i shonisaho, nahone maswole aḽo a ḓo kombetshedzea u shavha, a sia thundu nnzhi dzine vhadzulapo vha Yuda vha ḓo dzi dzhia! Zwo tea uri Asuri, ḽine ḽa ḓivhelwa tshiṱuhu tshaḽo, ḽi phusukanywe.—Yesaya 37:36.
Muasuri wa Musalauno
7. (a) Ndi vhafhio ṋamusi vhane vha nga vhambedzwa na lushaka lwa Isiraele lwe lwa vha lu tshi khou lwala siani ḽa muya? (b) Ndi vhafhio vhane vha ḓo shuma sa “ṱhamu” ya Yehova ya u lozwa ḽa Vhudzhagane?
7 Vhuporofita ha Yesaya vhu shuma hani misini yashu? Lushaka lwa Isiraele lune lwa khou lwala siani ḽa muya lu nga vhambedzwa na ḽa Vhudzhagane ḽi sa fulufhedzei. Samusi Yehova o shumisa Asuri sa “ṱhamu” ya u ṱarafa Isiraele, ngauralo u ḓo shumisa “ṱhamu” u ṱarafa ḽa Vhudzhagane—khathihi na vhurereli hoṱhe ha mazwifhi ha shango ḽoṱhe, “Babele ḽihulu.” (Yesaya 10:5; Ndzumbululo 18:2-8) Yeneyo “ṱhamu” i ḓo vha tshaka dzine dza vha miraḓo ya Yuno—dzangano ḽine kha Ndzumbululo ḽa fanyiswa nga ḽivhanda ḽikhunwana ḽi re na ṱhoho dza sumbe na nanga dza fumi.—Ndzumbululo 17:3, 15-17.
8. (a) Ndi nnyi ṋamusi ane a nga vhambedzwa na Sanheribi? (b) Sanheribi wa musalauno u ḓo vha na tshivhindi tsha u vutshela vhafhio, nahone ha vha na mvelelo dzifhio?
8 Musi Muasuri wa musalauno a tshi vutshela vhurereli ha mazwifhi, u ḓo vhonala a tshi nga a hu na ane a nga mu imisa. E na mavhonele ane a nga a Sanheribi, Sathane Diabolo u ḓo vha na tshivhindi tsha u vutshela—hu si ndangulo dza vhagunei dzine dza fanelwa u ṱarafiwa fhedzi, fhedzi na Vhakriste vha ngoho. Khathihi na vha masalela a vhana vha Yehova vho ḓodzwaho nga muya, vha dzimilioni vhe vha bva shangoni ḽa Sathane, ḽine ḽa katela na Babele Ḽihulu, vha ḓo imela Muvhuso wa Yehova. O sinyuswa nga u hana ha Vhakriste vha ngoho u mu gwadamela, Sathane, “mudzimu wa tshino tshifhinga,” u ḓo thoma u vha vutshela nga maanḓa mahulwane. (2 Vha-Korinta 4:4; Hesekiele 38:10-16) Naho yeneyi mvutshelo ya ofhisa vhukuma, vhathu vha Yehova a vho ngo fanela u ofha. (Yesaya 10:24, 25) Vha na khwaṱhisedzo i bvaho ha Mudzimu ya uri u ḓo vha ‘mulamuleli wavho musi vho khakhedzwa.’ U ḓo dzhenelela, a lozwa Sathane na magogo awe. (Hesekiele 38:18-23) U fana na zwifhingani zwo fhiraho, vhane vha lingedza u phusukanya vhathu vha Mudzimu vha ḓo phusukanywa! (Vhambedzani Mirero 13:22b.) Dzina ḽa Yehova ḽi ḓo khethiwa, nahone vhane vha ponyoka vha ḓo lambedzwa nge vha ṱoḓa “vhuṱali na nḓivho [na] . . . u ofha Yehova.”—Vhalani Yesaya 33:5, 6.
Tsevho kha Vha Si Na Lutendo
9. (a) Ndi mini zwine “vhahali” vha Yuda na “vhaḓinḓa vha mulalo” vha ḓo zwi ita? (b) Muasuri u ḓo aravha hani vhuḓidini ha u ita mulalo ha ḽa Yuda?
9 Naho zwo ralo, vhumatshelo ha vha si na lutendo kha ḽa Yuda vhu ḓo vha vhufhio? Yesaya u ṱalusa nga nḓila i sa takadzi ya ndozwo yavho ine ya khou ḓa musi vha tshi vutshelwa nga ḽa Asuri. (Vhalani Yesaya 33:7.) “Vhahali” vha Yuda vha nndwa vha huwelela nga u ofha musi Vhaasuri vha tshi vutshela. “Vhaḓinḓa vha mulalo,” vhaimeli vho rumelwaho u amba ḽa mulalo na Vhaasuri vha funaho nndwa, vha a holedzwa na u shoniswa. Vha ḓo lila vha ongolela nge vha kundwa. (Vhambedzani Yeremia 8:15.) Asuri ḽa tshiṱuhu ḽi nga si vha pfele vhuṱungu. (Vhalani Yesaya 33:8, 9.) Ḽi ḓo nyadza nga tshiṱuhu thendelano dze ḽa dzi ita na vhadzulapo vha ḽa Yuda. (2 Dzikhosi 18:14-16) Muasuri u ḓo “vutshela miḓi” ya Yuda, a tshi i nyadza na u i sasaladza, a sa londi vhutshilo ha vhathu. Vhuimo vhu ḓo vha vhuvhi lune nga lwa pfanyisedzo, shango ḽone ḽine ḽa ṱungufhala. Libanoni, Sarona, Basani, na Karamele na one a ḓo ṱungufhalela yeneyo ndozwo.
10. (a) “Vhahali” vha ḽa Vhudzhagane vha ḓo vhonala hani uri a vha thusi tshithu? (b) Ndi nnyi ane a ḓo tsireledza Vhakriste vha ngoho nga ḓuvha ḽa mutsiko ḽa ḽa Vhudzhagane?
10 A zwi timatimisi uri hu si kale hu ḓo vha na zwiimo zwi fanaho na zwenezwo musi tshaka dzi tshi thoma u vutshela vhurereli. U fana na misini ya Hiskia, u lwa na dzenedzi mmbi dzi lozwaho zwi ḓo vha mahandana. “Vhahali” vha ḽa Vhudzhagane—vhorapolitiki vhaḽo, vhalangi vha tshelede dzaḽo, na vhaṅwe vhathu vha re na ṱhuṱhuwedzo—vha nga si kone u ḽi thusa. ‘Milanga’ ya politiki na ya dzitshelede, kana thendelano zwo itelwaho u tsireledza madzangalelo a ḽa Vhudzhagane zwi ḓo tshinyadzwa. (Yesaya 28:15-18) Ndingedzo dzoṱhe dza u thivhela yeneyi ndozwo nga dzinyambedzano dzi ḓo kundwa. Mishumo ya zwa vhuvhambadzi i ḓo ima, musi thundu na lupfumo zwa ḽa Vhudzhagane zwi tshi dzhiiwa kana u fheliswa. Muthu muṅwe na muṅwe ane a kha ḓi funa ḽa Vhudzhagane u ḓo sokou imela kule nahone a ṱungufhalela u fheliswa haḽo. (Ndzumbululo 18:9-19) Naa Vhukriste ha ngoho vhu ḓo fheliswa na ha mazwifhi? Hai, ngauri Yehova nga dzawe u ṋea heyi khwaṱhisedzo: “Zwino ndi hone Yehova a tshi ri: Ndo takuwa, zwino ndi hone ndó ima.” (Yesaya 33:10) Mafheleloni, Yehova u ḓo dzhenelela u itela vhathu vha fulufhedzeaho, vha ngaho Hiskia, nahone a imisa mvutshelo ya Asuri.—Psalme ya 12:5.
11, 12. (a) Maipfi a Yesaya 33:11-14 a ḓadzea lini nahone hani? (b) Maipfi a Yehova a ṋea tsevho ifhio ṋamusi?
11 Vhathu vha sa fulufhedzei vha nga si ḓisendeke nga yeneyi tsireledzo. Yehova u ri: “No ḓi-hwala nga hatsi; ni yo beba mathukhwi; ni ḓo ḽiwa nga mulilo wa dzimbiti dzaṋu. Dzitshakha dzi ḓo swa dza nga milora; dzi ḓo nga maṱanzu a mipfa a tshi duga. Thetshelesani inwi vha kule, ni vhudzwe zwe nda ita; inwi vha tsini, ni ḓivhe maanḓa anga. Vha-ita-zwivhi vha Tsioni vha a tshenuwa; vhadzia-swili vha vhó farwa nga u tetemela, vha ri: Ndi nnyi washu ane a nga dzula ngomu muliloni u fhisaho; ndi nnyi washu ane a nga dzula ngomu ṋanḓoni ya mulilo wa lini na lini?” (Yesaya 33:11-14) Zwi vhonala uri enea maipfi a amba nga ha tshifhinga tshee Yuda ḽa vha ḽo sedzana na swina ḽiswa, Babele. Musi Hiskia o no fa, Yuda ḽo vhuyelela kha nḓila dzaḽo mmbi. Mahumini a miṅwaha e a tevhela, zwiimo ngei Yuda zwo tshinyala u swika he lushaka lwoṱhe lwa fhiswa nga mulilo wa mbiti dza Mudzimu.—Doiteronomio 32:22.
12 Maano mavhi o vhambiwaho nga vhathu vha sa thetshelesi a u pambusa khaṱulo ya Mudzimu ho ngo vhuya a bvelela. Zwi re zwone ndi uri muya wa u ḓikukumusa, wa vhushandukwa wa lwonolwo lushaka u ḓo ḓisa zwiitea zwine zwa ita uri lu lozwiwe. (Yeremia 52:3-11) Vhavhi vha ḓo tou nga “milora”—vha ḓo fheliswa tshoṱhe! Musi vha tshi elekanya nga ha yeneyi khaṱulo ine ya khou ḓa, vhadzulapo vha Yuda vha mashandukwa vha a tshuwa zwihulu. Maipfi e Yehova a a vhudza Vhayuda vha sa fulufhedzei a sumbedza vhuimo ha miraḓo ya ḽa Vhudzhagane ṋamusi. Arali vha sa thetshelesa tsevho ya Mudzimu, vha ḓo vha na vhumatshelo vhu konḓaho.
‘U Fara Nḓila ya Zwivhuya’
13. Ane a “fara nḓila ya zwivhuya” u fulufhedziswa mini, nahone zwo ḓadzea hani kha Yeremia?
13 A tshi amba zwo fhambanaho, Yehova amba zwi tevhelaho: “Ane a fara nḓila ya zwivhuya, wa u amba a u luga, wa u hana bindu ḽa mavemu, a nyadzaho tshanḓa tshí nguvhoni, a sá funi u pfa phungo dza malofha, a sá funi u vhona zwivhi, onoyo u ḓo fhaṱa kha thavha, vhushavhelo hawe ndi bako ḽa tomboni; vhuswa hawe u ḓo fhiwa, maḓi awe ha nga xi.” (Yesaya 33:15, 16) Samusi muapostola Petro a tshi zwi bula nga murahu: “[“Yehova,” NW] u a zwi ḓivha u ponyokisa mulingoni vha mu ofhaho, na u vha ó vhea khothoni vha songo lugaho, hu vhuye hu swike ḓuvha ḽa tsengo.” (2 Petro 2:9) Yeremia o tshidzwa nga nḓila yo raloho. Musi Babele ḽi tshi govhela, vhathu vho vha vho fanela u “ḽa vhuswa ha u tou eḓanyisedzwa ha dzinyofhoni.” (Hesekiele 4:16) Vhaṅwe vhafumakadzi vho ita na u ḽa ṋama ya vhana vhavho. (Zwililo 2:20) Naho zwo ralo, Yehova o ita vhungoho ha uri Yeremia a tsireledzwe.
14. Vhakriste ṋamusi vha nga dzula hani vho “fara nḓila ya zwivhuya”?
14 Na Vhakriste ṋamusi vha fanela u “fara nḓila ya zwivhuya,” vha tevhele zwilinganyo zwa Yehova ḓuvha ḽiṅwe na ḽiṅwe. (Psalme ya 15:1-5) Vha fanela “u amba a u luga” nahone vha landule u zwifha na zwi si ngoho. (Mirero 3:32) Vhufhura na tshanḓanguvhoni zwi nga vha zwo ḓowelea mashangoni manzhi, fhedzi zwi a nengisa kha we a “fara nḓila ya zwivhuya.” Hafhu Vhakriste vha fanela u vha na ‘mvalo dzo ṱambaho’ kha tshumisano dza mabindu, nga vhuronwane vha tshi iledza mabindu a soliseaho kana a vhufhura. (Vha-Heberu 13:18; 1 Timotheo 6:9, 10) Nahone “a sá funi u pfa phungo dza malofha, a sá funi u vhona zwivhi” u ḓo khetha nga vhuronwane muzika na u ḓimvumvusa zwine a ḓihomolosa ngazwo. (Psalme ya 119:37) Nga ḓuvha ḽawe ḽa khaṱulo, Yehova u ḓo tsireledza na u tikedza vhagwadameli vhawe, vhane vha tshila nga zwenezwi zwilinganyo.—Tsefanya 2:3.
U Vhona Khosi Yavho
15. Ndi fulufhedziso ḽifhio ḽe ḽa khwaṱhisa mathubwa a Vhayuda a fulufhedzeaho?
15 Lu tevhelaho Yesaya u amba nga vhumatshelo vhu nyanyulaho: “Maṱo au a ḓo vhona Khosi u nakani hayo; U ḓo vhona shango ḽó aṱama. Mbilu yau i ḓo elelwa zwa mulovha, ya ri: U ngafhi uḽa mu-ṅwala-vhathu, uḽa muthelisi, uḽa we a vhala dzinnḓu dza mitsheṱo? Vhaḽa vhathu vha u ṱhupha a U tsha ḓo vha vhona, vhathu vha luambo lu sa pfali, lu sili, vha lulimi lu sa ṱalukanyei.” (Yesaya 33:17-19) Fulufhedziso ḽa Khosi ya Vhumessia i ḓaho na Muvhuso wawe ḽo khwaṱhisa Vhayuda vha fulufhedzeaho mahumi manzhi a miṅwaha a vhuthubwa ngei Babele, naho vha tshi nga vhona uri wonoyo Muvhuso u tshee kule. (Vha-Heberu 11:13) Musi Messia a tshi vho vhusa zwa vhukuma, muvhuso u kandeledzaho wa Babele a u tsha ḓo humbulwa. Vhane vha ponyoka u vutshela ha Muasuri vha ḓo vhudzisa nga dakalo uri: “Vha ngafhi vhashumeli vha mukandeledzi, we a ri thelisa, a ri badelisa, a dzhia nduvho dzashu?”—Yesaya 33:18, Moffatt.
16. Vhathu vha Mudzimu vho kona u “vhona” Khosi ya Vhumessia u bva lini, nahone ha vha na mvelelo ifhio?
16 Naho maipfi a Yesaya a tshi khwaṱhisa u vusuluswa vhuthubwani ha Babele, mathubwa a Vhayuda a ḓo fanela u lindela mvuwo ya vhafu uri a ḓiphine nga u ḓadzea ho fhelelaho ha hetshi tshipiḓa tsha vhuporofita. Hu pfi mini nga vhashumeli vha Mudzimu ṋamusi? U bva nga 1914, vhathu vha Yehova vho kona u “vhona,” kana u ṱalukanya, Khosi ya Vhumessia, Yesu Kristo, kha vhuḓi hawe hoṱhe ha lwa muya. (Psalme ya 45:2; 118:22-26) Nga ṅwambo wa zwenezwo, vho vhofhololwa kha u kandeledzwa na u langiwa nga maitele mavhi a Sathane. Nga fhasi ha Tsioni, musanda wa Muvhuso wa Mudzimu, vha ḓiphina nga u tsireledzea ha ngoho muyani.
17. (a) Ndi mafulufhedziso afhio ane a itwa malugana na Tsioni? (b) Mafulufhedziso a Yehova malugana na Tsioni a ḓadzea hani kha Muvhuso wa Vhumessia na vhatikedzi vhawo kha ḽifhasi?
17 Yesaya u a bvela phanḓa: “Edzou vhona Tsioni, muḓi wa zwivhidzo zwashu! Maṱo au a ḓo vhona Yerusalema ú muḓi wa lukuna, u nnḓu i sá fuḓiwi, i sá ṱomolwi phuphu dzayo, i sá ṱhaṱhamuwi luvhalelo lwayo. Ngauri henefhano Yehova u ḓo vha na riṋe, Ene wa vhugala; hu ḓo vha fhethu ha milambwana na milambo yo aṱamaho i sá welei na nga magungwa mahulu.” (Yesaya 33:20, 21) Yesaya u a ri khwaṱhisedza uri Muvhuso wa Mudzimu wa Vhumessia u nga si wiswe kana u fheliswa. Zwiṅwe hafhu, yeneyi tsireledzo i waniwa na nga vhatikedzi vha fulufhedzeaho vha Muvhuso vha re kha ḽifhasi ṋamusi. Naho arali vhathu vhanzhi vha tshi lingwa lu vhavhaho, vhavhusiwa vha Muvhuso wa Mudzimu vha khwaṱhisedzwa uri a hu na vhuḓidini ha u vha lozwa sa tshivhidzo vhune ha nga bvelela. (Yesaya 54:17) Yehova u ḓo tsireledza vhathu vhawe nga nḓila ine musele kana mugero zwa tsireledza ngayo muḓi. Swina naho ḽi ḽifhio ḽi vha vutshelaho—na ḽi re na maanḓa u fana na “mushinzhi wa magungwa a nndwa,” (NW) kana “magungwa mahulu”—ḽi ḓo fheliswa!
18. Ndi vhuḓifhinduleli vhufhio vhune Yehova a vhu ṱanganedza?
18 Naho zwo ralo, ndi ngani vhafuni vha Muvhuso wa Mudzimu vha tshi nga ḓipfa vha tshi fulufhela tsireledzo ya Mudzimu? Yesaya u a ṱalutshedza: “Muvhusi washu ndi Yehova, Mulai washu ndi Yehova, Khosi yashu ndí Yehova, ndi Ene Mulamuleli washu.” (Yesaya 33:22) Yehova u a ṱanganedza vhuḓifhinduleli ha u tsireledza na u livhisa vhathu vhawe, vhane vha ṱhogomela vhuimo hawe sa Muvhusahoṱhe Muhulwane. Vhenevha vha ḓiṱukufhadzela vhuvhusi hawe a tshi shumisa Khosi yawe ya Vhumessia, vha tshi ṱhogomela uri Yehova u na maanḓa a u vhea milayo na u ita uri i tevhelwe. Naho zwo ralo, nga ṅwambo wa uri Yehova ndi mufuni wa u luga na khaṱulokwayo, vhuvhusi hawe, a tshi shumisa Murwa wawe, a si muhwalo kha vhagwadameli vhawe. Nṱhani hazwo, vha ‘a ḓivhuyedza’ nga u ḓiṱukufhadzela vhuvhusi hawe. (Yesaya 48:17, vhambedzani NW.) A nga si vhuye a ṱutshela vhathu vhawe vha fulufhedzeaho.—Psalme ya 37:28.
19. Yesaya u ṱalusa hani u kundwa ha maswina a vhathu vha Yehova vha fulufhedzeaho?
19 Yesaya u vhudza maswina a vhathu vha Mudzimu vha fulufhedzeaho zwi tevhelaho: “Dzithambo dzau dzo rembeḓa, a dzo ngo tsha vhofha thikho ya pango gungwani ḽa u ṱharamudza phapha dzaḽo. Ndi hone hu tshi ḓo kovhiwa thundu nzhi ye ya thubwa; na vha zwihole vha ḓo thuba.” (Yesaya 33:23) Swina naho ḽi ḽifhio ḽine ḽa ḓa ḽi ḓo kundwa na u shaya nungo phanḓa ha Yehova u fana na gungwa ḽe mapango a ḽo a rembeḓa, nahone ḽi si na seila. Ndozwo ya maswina a Mudzimu i ḓo ita uri hu vhe na thundu nnzhi i thubiwaho lune na zwihole zwi ḓo kona u i dzhia. Nga zwenezwo, ri nga vha na vhungoho ha uri a tshi shumisa Khosi Yesu Kristo, Yehova u ḓo kunda maswina awe “maṱunguni mahulu” ane a khou ḓa.—Ndzumbululo 7:14.
U Fhodzwa
20. Vhathu vha Mudzimu vha ḓo tshenzhela u fhodzwa hufhio, nahone lini?
20 Hetshi tshipiḓa tsha vhuporofita ha Yesaya tshi phetha nga fulufhedziso ḽi takadzaho: “Kha vho dzulaho fhano a huna ane a ḓo ri: Ndi a lwala; ngauri vhathu vha dzulaho fhano vho hangwelwa zwivhi.” (Yesaya 33:24) Zwihuluhulu Yesaya u khou amba nga vhulwadze ha muya, ngauri vhu tshimbidzana na vhukhakhi kana “zwivhi.” Musi enea maipfi a tshi shumiswa lwa u thoma, Yehova o fulufhedzisa uri musi lwo no vhofhololwa vhuthubwani ha Babele, lwonolwo lushaka lwo vha lu tshi ḓo fhodzwa muyani. (Yesaya 35:5, 6; Yeremia 33:6, vhambedzani Psalme ya 103:1-5.) Samusi vho hangwelwa zwivhi zwavho zwa kale, Vhayuda vhane vha vhuyelela vho vha vha tshi ḓo dovha vha vusulusa vhurabeli ho kunaho Yerusalema.
21. Vhagwadameli vha Yehova ṋamusi vha tshenzhela u fhodzwa muyani nga nḓila dzifhio?
21 Naho zwo ralo, vhuporofita ha Yesaya vhu a ḓadzea musalauno. Na vhathu vha Yehova ṋamusi vho ḓiphina nga u fhodzwa muyani. Vho vhofhololwa kha pfunzo dza mazwifhi dzi ngaho u sa fa ha muya-tshivhili, Vhuraruthihi, na mulilo wa hele. Vha wana vhulivhisi kha matshilele, vhune ha ita uri vha si ḓifare luvhi nahone ha vha thusa uri vha ite phetho dzavhuḓi. Nahone nga ṅwambo wa tshiṱhavhelo tshi rengululaho tsha Yesu Kristo, vho kuna phanḓa ha Mudzimu nahone vha na luvalo lwo ṱambaho. (Vha-Kolosa 1:13, 14; 1 Petro 2:24; 1 Yohane 4:10) Honohu u fhodzwa muyani hu a vhuyedza ṋamani. Sa tsumbo, u iledza u ḓifara luvhi ha zwa u ṱangana nga dzimbeu na fola zwi tsireledza Vhakriste kha malwadze a fhiriselwaho nga zwa u ṱangana nga dzimbeu na miṅwe mifuda ya khentsara.—1 Vha-Korinta 6:18; 2 Vha-Korinta 7:1.
22, 23. (a) Ndi u ḓadzea hufhio huhulwane hune Yesaya 33:24 ya ḓo vha naho tshifhingani tshi ḓaho? (b) Vhagwadameli vha ngoho ṋamusi vho ḓiimisela u ita mini?
22 Zwiṅwe hafhu, hu ḓo vha na u ḓadzea huhulwane ha maipfi a Yesaya 33:24 nga murahu ha Haramagedo, shangoni ḽiswa ḽa Mudzimu. Nga fhasi ha vhuvhusi ha Muvhuso wa Vhumessia, vhathu vha ḓo fhodzwa ṋamani khathihi na muyani. (Ndzumbululo 21:3, 4) Nga murahunyana ha ndozwo ya maitele a zwithu a Sathane, a zwi timatimisi uri khunguluni yoṱhe hu ḓo itea vhuṱolo vhu fanaho na he Yesu a vhu ita a tshee kha ḽifhasi. Mabofu a ḓo vhona, madzinganḓevhe a ḓo pfa, zwihole zwi ḓo tshimbila! (Yesaya 35:5, 6) Hezwi zwi ḓo ita uri vhoṱhe vho ponyokaho maṱungu mahulu vha ṱanganele kha mushumo muhulwane wa u ita uri ḽifhasi ḽi vhe paradiso.
23 Nga murahu, musi mvuwo ya vhafu i tshi thoma, a zwi timatimisi uri vhane vha vuswa vha ḓo vha vhe na mutakalo wavhuḓi. Fhedzi musi ndeme ya tshiṱhavhelo tshi rengululaho i tshi shuma nga ho engedzeaho, hu ḓo vha na phaṱutshedzo dzo engedzeaho dza ṋamani, u swika vhathu vha tshi fhelela. Nga zwenezwo, vho lugaho vha ḓo “tshila” nga vhuḓalo. (Ndzumbululo 20:5, 6) Nga tshenetsho tshifhinga, nga nḓila ya muya na ya ṋama, “A huna ane a ḓo ri: Ndi a lwala.” Ndi fulufhedziso ḽi nyanyulaho lungafhani! U nga ri vhagwadameli vhoṱhe vha ngoho ṋamusi vha nga ḓiimisela u vha vhaṅwe vhane vha ḓo vhona u ḓadzea haḽo!
[Mbudziso Dza Pfunzo]
[Tshifanyiso kha siaṱari 344]
Yesaya u rabela Yehova nga tshivhindi
[Zwifanyiso kha siaṱari 353]
Nga ṅwambo wa tshiṱhavhelo tshi rengululaho, vhathu vha Yehova vha na vhuimo ho kunaho phanḓa hawe
[Tshifanyiso kha siaṱari 354]
Shangoni ḽiswa, vhathu vha ḓo fhodzwa ṋamani
