Ndima ya 35

Ndi Nga Vha Hani Khonani Ya Mudzimu?

Jeremy o ṱhogomela uri ndi zwa ndeme u vha na vhukonani na Mudzimu nga murahu ha u sedzana na vhuimo vhu ṱungufhadzaho. U ri: “Musi ndi na miṅwaha ya 12, khotsi anga vho mbo ḓi ṱuwa vha ri sia. Nga vhuṅwe vhusiku nda rabela Yehova, nda mu humbela uri a ite uri khotsi anga vha vhuye.”

Nga tshenetsho tshifhinga tsha u hanganea, Jeremy a thoma u vhala Bivhili. O ṱuṱuwedzwa nga maanḓa nga Psalme ya 10:14. Yeneyo ndimana i amba zwi tevhelaho nga ha Yehova, i ri: “Tshanḓa tshau tshi ḓo shuma zwiné vhaheḓana vha U kumedzela. Mu-lwela-tsiwana ndi Iwe.” Jeremy u ri: “Ndo pfa u nga Yehova o vha a tshi khou amba na nṋe na u nnḓivhadza uri ndi ene ane a ḓo nthusa; na uri ndi Khotsi anga. A hu na khotsi ane a fana nae.”

 NAHO khamusi ni si kha vhuimo vhu fanaho na ha Jeremy, Bivhili i sumbedza uri Yehova u ṱoḓa ni tshi vha khonani yawe. Zwi re zwone ndi uri Bivhili i ri: “Sendelani tsini ha Mudzimu, na ene a sendele tsini haṋu.” (Yakobo 4:8) Eneo maipfi ndi a ndeme vhukuma: Naho ni sa nga kone u vhona Yehova Mudzimu, u khou ni ramba uri ni vhe khonani yawe naho e muhulwane vhukuma kha inwi!

Fhedzi u fhaṱa vhukonani na Mudzimu zwi ṱoḓa uri ni ite vhuḓidini. Sa tsumbo: Arali ni na luvha, ni a zwi ḓivha uri ḽi nga si hule nga ḽoṱhe. U itela uri ḽi hule, ni fanela u ḽi sheledza tshifhinga tshoṱhe nahone ni ḽi vhee fhethu hune ḽa ḓo kona u hula zwavhuḓi. Hu ṱoḓea vhuḓidini vhu fanaho u itela u vha khonani ya Mudzimu. Ni nga ita mini uri honoho vhukonani vhu khwaṱhe?

U Guda Bivhili Ndi Zwa Ndeme

Vhathu vhavhili vhane vha vha dzikhonani vha a davhidzana—musi muṅwe a tshi amba, muṅwe u a thetshelesa. Zwo tou ralo na nga vhukonani hashu na Mudzimu. U vhala na u  guda Bivhili ndi nḓila ya u thetshelesa zwine Mudzimu a khou ri vhudza zwone.—Psalme ya 1:2, 3.

Khamusi ni nga kha ḓi vha ni sa takaleli u vhala. Vhaswa vhanzhi vha takalela u ṱalela thelevishini, u tamba mitambo kana u ṱwa na dzikhonani. Fhedzi arali ni tshi ṱoḓa u ṱahulela vhukonani na Mudzimu, ni fanela u guda. Ni fanela u mu thetshelesa nga u guda Ipfi ḽawe.

Naho zwo ralo, ni songo vhilaela. U guda Bivhili a si muhwalo. Ni nga guda u zwi takalela naho ni tshi ḓidzhia ni muthu ane nga lwa nzulele na sa fune u guda. Tsha u thoma, ni fanela u ḓivhetshela tshifhinga tsha u guda Bivhili. Muṅwe musidzana ane a pfi Lais u ri: “Ndi na mbekanyo. Ndi vhala ndima nthihi ya Bivhili matsheloni maṅwe na maṅwe.” Maria ane a vha na miṅwaha ya 15 u na mbekanyo yo fhambanaho na yeneyo. U ri: “Ndi vhala ndimana dzi si gathi dza Bivhili ndi sa athu eḓela.”

U itela u ni thusa u thoma mbekanyo yaṋu ya u guda, sedzani  bogisi ḽi re kha siaṱari 292. Ṅwalani afho fhasi uri ndi lini hune na nga kona u fhedza mimunithi i ṱoḓaho u vha 30 ni tshi khou guda Ipfi ḽa Mudzimu.

․․․․․

U ḓivhetshela tshifhinga tsha u guda ndi vhukando ha u thoma. Musi no no thoma u guda, ni nga wana uri nga zwiṅwe  zwifhinga zwi a konḓa u vhala Bivhili. Ni nga tendelana na Jezreel a re na miṅwaha ya 11 we a ri, “Dziṅwe ndimana dza Bivhili dzi ṱoḓa uri ni tou futelela tshoṱhe u itela uri ni pfesese nahone a dzi tou takadza-vho lini.” Arali ni tshi ḓipfa nga yeneyo nḓila, ni songo litsha. Tshifhinga tshoṱhe musi ni tshi guda Bivhili zwi dzhieni hu tshifhinga tsha u thetshelesa Yehova Mudzimu, ane a vha khonani yaṋu. Nga u ya ha tshifhinga musi ni tshi ita vhuḓidini, u guda Bivhili zwi ḓo ni takadza na u ni vhuyedza!

Thabelo Ndi Ya Ndeme

Thabelo ndi nḓila ya u amba na Mudzimu. Ndi tshifhiwa tshavhuḓi lungafhani! Ni amba na Yehova Mudzimu tshifhinga tshiṅwe na tshiṅwe. U dzula o ḓiimisela u ni thetshelesa. Zwiṅwe hafhu ndi uri u ṱoḓa u pfa zwine na ṱoḓa u zwi amba. Ndi ngazwo Bivhili i tshi ni ṱuṱuwedza uri: “Zwoṱhe zwiné na zwi tama ni ḓivhadze Mudzimuni nga thabelo na nga u humbela hu re na u livhuha.”—Vha-Filipi 4:6, maḽeḓeretsendama ndi ashu.

Samusi lwonolwo luṅwalo lwo zwi sumbedza, hu na zwithu zwinzhi zwine na nga zwi vhudza Yehova. Ni nga mu vhudza na vhuleme haṋu na mbilaelo dzaṋu. Zwi nga kha ḓi dovha zwa katela na zwine na khou zwi livhuha. Hafhu ni a livhuha khonani dzaṋu nge dza ni itela zwithu zwavhuḓi. Ni nga livhuha na Yehova, we a ni itela zwithu zwinzhi zwine zwa fhira zwe zwa itwa nga khonani yaṋu.—Psalme ya 106:1.

Ṅwalani afho fhasi zwithu zwine na livhuha uri Yehova o ni itela zwone.

․․․․․

 A zwi timatimisi uri nga zwiṅwe zwifhinga ni a tsikeledzwa nga zwithu zwine na zwi ofha na zwine zwa ni vhilaedzisa. Psalme ya 55:22 i ri: “Kumedzela Yehova zwi U lemelaho, u ḓo U ṱhaḓula; ha nga litshi muvhuya a tshi dzula ó khakhelwa.”

 Kha mitaladzi i tevhelaho, ṅwalani mbilaelo dzine na ṱoḓa u dzi katela kha thabelo dzaṋu.

․․․․․

Zwe A Zwi Tshenzhela

Hu na ḽiṅwe sia ḽa vhukonani haṋu na Mudzimu ḽine na si fanele u ḽi dzhiela fhasi. Mupsalme Davida o ṅwala u ri: “Thetshelani ni vhone vhuthu ha Yehova.” (Psalme ya 34:8) Musi Davida a tshi ṅwala Psalme ya vhu-34, o vha a tshi kha ḓi tou bva u tshenzhela zwithu zwi ofhisaho. O vha a tshi khou shavha Khosi Saulo we a vha a tshi khou ṱoḓa u mu vhulaha—zwine zwa vha zwithu zwi ofhisaho nga maanḓa. Fhedzi a kombetshedzea u shavhela kha maswina awe a Vhafilisita. Musi o sedzana na lufu, Davida o mbo ḓi ḓiita mpengo nahone a kona u shavha.—1 Samuele 21:10-15.

Davida ho ngo zwi dzhia uri o ponyoka kha honoho vhuimo ndi nga ṅwambo wa vhuṱali hawe. Nṱhani hazwo, o amba uri o thusiwa nga Yehova. Kha psalme yo buliwaho afho nṱha, o ṅwala uri: “Zwiḽa ndi tshi mu ṱoḓa o ṋyaravha, a ntshidza kha  nyofho dzanga dzoṱhe.” (Psalme ya 34:4) Kha zwe a zwi tshenzhela, Davida o ṱuṱuwedza vhaṅwe uri vha ‘thetshele vha vhone vhuthu ha Yehova.’ a

Naa hu na zwe na zwi tshenzhela zwe zwa sumbedza uri Yehova u a ni ṱhogomela? Arali zwo ralo, zwi ṅwaleni afho fhasi. Tsivhudzo: A zwi vhuyi zwa ṱoḓa uri zwi vhe zwi zwithu zwi swayeaho. Lingedzani u humbula nga ha zwithu zwi takadzaho zwine zwa itea ḓuvha ḽiṅwe na ḽiṅwe, zwine nga tshiṅwe tshifhinga zwa dzhielwa fhasi.

․․․․․

Khamusi vhabebi vhaṋu vho ni gudisa Bivhili. Arali zwo ralo, yeneyo ndi phaṱutshedzo i takadzaho. Zwiṅwe hafhu, ni fanela u vhumba vhukonani ha tsini-tsini na Mudzimu. Arali ni sa athu zwi ita zwenezwo, ni nga shumisa mafhungo a re kha yeneyi ndima uri a ni thuse u thoma. Yehova u ḓo fhaṱutshedza vhuḓidini haṋu. Bivhili i ri: “Humbelani, ndi hone ni tshi ḓo fhiwa; ṱoḓani, ndi hone ni tshi ḓo wana.”—Mateo 7:7.

VHALANI ZWO ENGEDZEAHO NGA HA ENEA MAFHUNGO KHA VOLUMU 1, NDIMA YA 38 NA 39

KHA NDIMA YASHU I TEVHELAHO

Naa ni wana zwi tshi ni konḓela u vhudza vhaṅwe nga ha Mudzimu? Gudani nḓila ine na nga imelela ngayo zwine na zwi tenda.

[Ṱhaluso i re magumoni a siaṱari]

LUṄWALO LWA NDEME

“Mashudu, vhaheḓana muyani.”—Mateo 5:3.

TSIVHUDZO

Vhalani masiaṱari maṋa fhedzi a Bivhili ḓuvha ḽiṅwe na ḽiṅwe, nahone ni ḓo i fhedza nga ṅwaha.

NAA NI A ZWI ḒIVHA URI . . . ?

U vhala haṋu yeneyi bugu na u tevhela vhulivhisi ho thewaho Bivhilini zwi sumbedza uri Yehova u a ni funa.—Yohane 6:44.

ZWINE NDA ḒO ZWI ITA!

U itela u vhuyelwa musi ndi tshi guda Bivhili, ndi ḓo ․․․․․

U itela uri ndi rabele tshifhinga tshoṱhe, ndi ḓo ․․․․․

Zwine nda ṱoḓa u vhudzisa mubebi kana vhabebi vhanga nga ha enea mafhungo ndi ․․․․․

NI HUMBULA MINI?

● Ni nga ita mini uri ni takalele u guda Bivhili?

● Ndi ngani Yehova a tshi ṱoḓa u thetshelesa thabelo dza vhathu vha songo fhelelaho?

● Ni nga khwinisa hani nḓila ine na rabela ngayo?

[Maipfi o ṱumbulwaho kha siaṱari 291]

“Musi ndi tshi kha ḓi vha muṱuku, ndo vha ndi tshi dovholola maipfi musi ndi tshi rabela. Zwino ndi lingedza u rabelela zwithu zwavhuḓi na zwi si zwavhuḓi zwe zwa itea kha nṋe nga ḽeneḽo ḓuvha. Samusi maḓuvha a sa fani, zwenezwi zwi ita uri ndi sa dovholole tshithu tshithihi lunzhi-lunzhi musi ndi tshi rabela.”—Eve

 [Bogisi/Tshifanyiso kha siaṱari 292]

 Ṱolisisani Bivhili Yaṋu

1. Khethani maṅwe mafhungo a re Bivhilini ane na ṱoḓa u a vhala. Rabelelani vhuṱali uri ni kone u pfesesa eneo mafhungo.

2. Vhalani eneo mafhungo nga vhuronwane. Ni a vhale zwavhuḓi no ḓigeḓa. Musi ni tshi khou vhala, vhonani eneo mafhungo nga maṱo a muhumbulo. Ḓivhoneni ni henefho fhethu: Lingedzani u vhona zwine zwa khou itea, u pfa zwine vhabvumbedzwa vha khou zwi amba, u pfa lumuya lune lwa khou vhudzula, u thetshela zwiḽiwa na zwiṅwe-vho. Lingedzani u vha na bono ḽa zwine zwa khou itea!

3. Humbulani nga ha zwine na kha ḓi tou bva u zwi vhala. Ḓivhudziseni mbudziso dzi tevhelaho:

● Ndi ngani Yehova o katela enea mafhungo Ipfini ḽawe?

● Ndi vhabvumbedzwa vhafhio vhane nda fanela u vha edzisa nahone ndi vhafhio vhane vha vha tsumbo dzi sevhaho?

● Ndi guda mini kha enea mafhungo?

● Eneo mafhungo a ngudisa mini nga ha Yehova na nḓila ine a ita ngayo zwithu?

4. Itani thabelo pfufhi kha Yehova. Mu vhudzeni zwe na zwi guda musi ni tshi khou vhala Bivhili na nḓila ye na dzudzanya ngayo u shumisa enea mafhungo vhutshiloni haṋu. Tshifhinga tshoṱhe ni livhuhe Yehova nga tshifhiwa tshe a ni ṋea tshone—Ipfi ḽawe, Bivhili Khethwa!

[Tshifanyiso]

“Fhungo ḽau ndi ḓenzhe ḽa milenzhe yanga, ndi tshedza tsha nḓila yanga.”—Psalme ya 119:105.

[Bogisi/Tshifanyiso kha siaṱari 294]

Thomani Nga Zwithu Zwa Ndeme

Naa no farakanea lune a ni na tshifhinga tsha u rabela na tsha u guda Bivhili? Kanzhi zwi itiswa nga u rangisa zwithu zwi si zwa ndeme.

Lingedzani u ita zwithu zwi tevhelaho: Dzhiani bakete nahone ni dzhenise matombo mahulwane o vhalaho nga ngomu. Nga murahu ni shele muṱavha u swikela ḽi tshi ḓala. Ḽeneḽo bakete ḽi ḓo vha ḽo ḓala nga matombo na muṱavha.

Zwino shululani zwi re ngomu, fhedzi ni songo zwi laṱa. Dovhani ni ite zwi fanaho, fhedzi ni thome nga muṱavha: Ḓadzani bakete nga muṱavha nahone ni lingedze u dzhenisa matombo ngomu baketeni. Matombo ha fheleli. Ndi nga ṅwambo wa uri no thoma nga u shela muṱavha kha bakete.

Ni guda mini kha zwenezwi? Bivhili i ri: “Ni nanganye [zwa ndeme vhukuma, NW]. (Vha-Filipi 1:9, 10) Arali na rangisa zwithu zwiṱuku zwi ngaho u ḓimvumvusa vhutshiloni haṋu, a ni nga ḓo vhuya na vha na tshifhinga tsha zwithu zwa ndeme—zwithu zwa muya. Fhedzi arali na thetshelesa nyeletshedzo ya Bivhili, ni ḓo vha na tshifhinga tsha u ita zwithu zwa ndeme khathihi na tsha u ḓimvumvusa ho linganelaho. Zwoṱhe zwi ḓitika nga zwine na thoma u zwi dzhenisa kha bakete ḽaṋu!

[Tshifanyiso kha siaṱari 290]

U fana na luvha, u vha khonani ya Mudzimu zwi ṱoḓa u ṱahulelwa u itela uri honoho vhukonani vhu khwaṱhe