Ndima ya 15

Ndi Nga Iledza Hani Mutsiko Wa Thangana Ya Murole?

“Musi ni tshikoloni ni sedzana na milingo minzhi—u daha, zwidzidzivhadzi, u ita zwa vhudzekani. Ni a zwi ḓivha uri zwine vhaṅwe vhana vha ṱoḓa ni tshi zwi ita zwo bva nḓilani. Fhedzi hu vha na tshifhinga tshine a ni ṱoḓi uri vha ni dzhie sa bapu.”—Eve.

NDI zwa nzulele u ṱoḓa u ṱanganedzwa nga vhaṅwe. Nga ṅwambo wa zwenezwo zwi a leluwa u tsikeledzwa nga thangana ya murole. Sa tsumbo, arali vhabebi vhaṋu vhe vhaṅwe vha Ṱhanzi dza Yehova, ni a ḓivha uri zwithu zwi ngaho u ita zwa vhudzekani nga phanḓa ha mbingano na u nwesa halwa zwo khakhea. (Vha-Galata 5:19-21) Naho zwo ralo, vhunzhi ha thangana dzaṋu vha ni ṱuṱuwedza uri ni ite zwenezwi zwithu. Naa vho thoma vha humbula nga enea mafhungo nahone vha ḓiitela phetho? Na kathihi. Kanzhi  vha ṱuṱuwedzwa nga vhaṅwe. Vha ṱoḓa u ṱanganedzwa, nga u ralo vha tendela vhaṅwe vha tshi ṱuṱuwedza mahumbulele avho. Naa ni ita nga u ralo? Kana naa ni na tshivhindi tsha u imelela zwine na zwi tenda?

Aroni mukomana wa Mushe o vhuya a tsikeledzwa—luthihi–uri a ite tshiṅwe tshithu tsho khakheaho. Musi Vhaisiraele vha tshi mu kuvhanganela, vha mu kombetshedza uri a vha itele mudzimu, o mbo ḓi tenda! (Ekisodo 32:1-4) Ni songo hangwa uri onoyu ndi munna we a amba na Farao nga tshivhindi, a mu vhudza mulaedza wa Mudzimu. (Ekisodo 7:1, 2, 16) Fhedzi musi Vhaisiraele ngae vha tshi mu tsikeledza, Aroni o ita zwine vha zwi ṱoḓa. Zwi tou vha khagala uri o wana zwi tshi mu lelutshela u amba nga tshivhindi na khosi ya Egipita u fhira u amba na thangana dzawe!

Inwi ni ḓo ita mini? Ni wana zwi tshi ni konḓela u imelela zwine na ḓivha uri ndi ngoho? Ni a ṱoḓa tshivhindi tsha u lwisana na mutsiko wa thangana ya murole? Ni nga zwi kona! Tshithu tsha ndeme ndi u vhona mutsiko hu tshee nga phanḓa na u phetha nḓila ine na ḓo u kunda ngayo. Vhukando vhuṋa vhu re afho fhasi vhu ḓo ni thusa u ita zwenezwi.

1. Vhonani zwithu hu tshee nga phanḓa. (Mirero 22:3) Kanzhi ni a kona u vhona khakhathi hu tshee nga phanḓa. Sa tsumbo, kha ri ri ni vhona tshigwada tsha vhane na dzhena navho tshikolo vhe phanḓa vha tshi khou ḓela thungo yaṋu nahone vha tshi khou daha.  Naa a zwi tou vha khagala uri vha nga ni ṋea fola? Arali na vhona vhuleme vhu tshee kule, ni ḓo kona u vhu iledza kana u vhu kunda.

2. Humbulani. (Vha-Heberu 5:14) Ni nga kha ḓi ḓivhudzisa uri, ‘Ndi ḓo ḓipfa hani nga murahu arali nda ita zwine vhaṅwe vha khou zwi ita?’ Ndi ngoho uri ni nga ṱanganedzwa nga thangana dzaṋu lwa tshifhinganyana. Fhedzi ni ḓo ḓipfa hani nga murahu musi ni na vhabebi vhaṋu kana Vhakriste nga inwi? Naa no ḓiimisela u tshinya vhuimo havhuḓi na Mudzimu u itela u takadza vhane na dzhena navho kilasini?

3. Itani phetho. (Doiteronomio 30:19) Vhashumeli vhoṱhe vha Mudzimu vha fanela u khetha u fulufhedzea na phaṱhutshedzo dzaho kana u sa fulufhedzea na mvelelo dzaho dzi vhavhaho. Vhanna vha ngaho Yosefa, Yobo na Yesu vho ita khetho yavhuḓi, hu uri Kaini, Esau, na Yudasi vho ita khetho dzi si dzavhuḓi. Na inwi ni fanela u ita phetho. Ni ḓo ita phetho-ḓe?

4. Dzhiani vhukando. Ni nga vhona u nga zwi ḓo ni konḓela vhukuma u ita nga u ralo. A zwi konḓi! Arali no no humbula nga ha mvelelo dza hone nahone no no ita phetho, zwi nga leluwa nga maanḓa nahone zwa ni vhuyedza u vhudza thangana dzaṋu zwe na zwi phetha. (Mirero 15:23) Ni songo vhilaela, a zwi vhuyi zwa ṱoḓa uri ni ṱalutshedze thangana dzaṋu zwithu zwoṱhe zwi re Bivhilini. Hu nga kha ḓi ṱoḓea uri ni hane nga tshivhindi. Kana u itela u zwi bvisela khagala uri ni nga si zwi ite zwenezwo zwithu, ni nga kha ḓi ri:

“Ni songo nkatela kha zwenezwo zwithu!”

“A thi iti zwithu zwo raloho!”

“Ni a zwi ḓivha zwavhuḓi uri a thi dzheni kha zwithu zwo raloho!”

Tshithu tsha ndeme vhukuma ndi u fhindula nga u ṱavhanya no khwaṱhisa. Arali na ita nga u ralo, ni nga kha ḓi mangadzwa nga nḓila ine thangana dzaṋu dza ḓo ṱavhanya ngayo u litsha u ni tsikeledza! Naho zwo ralo, ni ḓo ita mini arali vha ni goḓa? Ni ḓo ri mini  arali vha ri, “Mulandu ndi mini—ni tou vha bapu?” Ṱhogomelani uri zwenezwo ndi mutsiko wa thangana ya murole. Ni ḓo ita mini? Hu na zwithu zwiraru zwine na nga zwi ita.

● Ni nga kha ḓi tendelana na vhane vha khou ni goḓa. (“Ni khou amba zwone, ndi khou ofha!” Nga zwenezwo na bula tshiitisi tshaṋu nga u tou pfufhifhadza.)

● Ni nga pambusa mafhungo nga u bula vhuimo haṋu, ni sa khou vhuya na ṱaṱa khani navho.

● Ni nga ita uri na vhone vha vhe nga fhasi ha mutsiko. Ṱalutshedzani thangana dzaṋu uri ndi ngani ni tshi khou hana nahone ni vha dzhenisele maṱo. (“Ndo vha ndi tshi humbula uri no ṱalifha lune ni nga si dahe!”)

 Arali thangana dzaṋu dzi tshi bvela phanḓa na u ni goḓa, ṱuwani! Arali na sa ṱuwa, ni ḓo ḓiwana ni mutsikoni muhulwane. Naho arali na ṱuwa, ni songo hangwa uri: No kona u langa honoho vhuimo. A no ngo tendela thangana dzaṋu dzi tshi ni ita uri ni fane nadzo!

Dziṅwe thangana dzaṋu dzi nga ni goḓa nahone dza amba uri a ni koni u ḓiitela phetho. Fhedzi zwenezwo ndi mazwifhi! Zwi re zwone ndi uri Yehova u ṱoḓa ni tshi ḓivhonela uri u ita zwine a zwi funa ndi zwone zwo teaho. (Vha-Roma 12:2) Ngauralo ni songo tendela thangana dzaṋu dzi tshi ni langa. (Vha-Roma 6:16) Imelelani zwine na zwi ḓivha uri zwo luga!

Ngoho ndi ya uri ni nga si iledze mutsiko wa thangana dza murole. Fhedzi ni nga ḓivha zwine na fanela u zwi ita, u bula vhuimo haṋu na u vhu langa. Naho zwo ralo, ane a fanela u ita phetho ndi inwi!—Yoshua 24:15.

VHALANI ZWO ENGEDZEAHO NGA HA ENEA MAFHUNGO KHA VOLUMU 1, NDIMA YA 9

KHA NDIMA YASHU I TEVHELAHO

Naa ni tshila vhutshilo vhu re kavhili? Vhabebi vhaṋu vha ḓo ḓipfa hani arali vha zwi tumbula?

LUṄWALO LWA NDEME

“Mu-endelana-na-vhaṱali u a ṱalifha-vho; mu-konana-na-tsilu u ḓo tambula-vho.”—Mirero 13:20.

TSIVHUDZO

U itela u vha na tshivhindi, vhalani tshenzhelo dza vhashumeli vha Yehova vha musalauno vhe vha kona u dzula vha tshi fulufhedzea.

NAA NI A ZWI ḒIVHA URI . . . ?

A ni tsha ḓo dovha na ṱangana na vhunzhi ha vhe na dzhena navho kilasini nga murahu ha ṅwaha no no fhedza tshikolo. Vhunzhi havho zwi nga kha ḓi itea vha si tsha humbula na dzina ḽaṋu. Fhedzi muṱa wa haṋu u ḓo dzula u tshi ni funa nahone zwihuluhulu Yehova Mudzimu.—Psalme ya 37:23-25.

ZWINE NDA ḒO ZWI ITA!

Ndi nga ḓilugiselela u kunda mutsiko wa thangana ya murole nga u ․․․․․

Arali thangana dzanga dza lingedza u ntsikeledza uri ndi ite zwithu zwo khakheaho, ndi ḓo ․․․․․

Zwine nda ṱoḓa u vhudzisa mubebi kana vhabebi vhanga nga ha enea mafhungo ndi ․․․․․

NI HUMBULA MINI?

● Vhukando vhuṋa ho bulwaho kha heyi ndima vhu nga ni thusa kha zwiimo zwifhio?

● Ndi mini zwine zwa nga itea arali na tenda u ita zwine na ṱuṱuwedzwa nga thangana dzaṋu dza murole?

● Ndi dzifhio dziṅwe nḓila dzine na nga kunda ngadzo mutsiko wa thanga ya murole?

[Maipfi o ṱumbulwaho kha siaṱari 131]

“Vhatukana vhanzhi vha a zwi ḓivha uri ndi Ṱhanzi, nahone vha a nṱhonifha. Arali vha tshi khou ṱoḓa u amba zwithu zwo bvaho, vha ri, ‘Mike ri khou ṱoḓa u amba nga maṅwe mafhungo, arali ni tshi ṱoḓa u ṱuwa ni nga ṱuwa.’”—Mike

 [Tshati kha siaṱari 132, 133]

Siaṱari ḽa u Ṅwalela Mbuno

U Kunda Mutsiko Wa Thangana Ya Murole Tsumbo

1. Vhonani zwithu hu tshee nga phanḓa

Mulingo ndi ufhio? U daha fola.

Ndi ngafhi hune nda nga sedzana na wonoyo mulingo? Mabungani.

↓ ↓

Hu ḓo itea mini arali ← 2. Humbulani → Hu ḓo itea mini arali

nda tenda u daha? nda hana u daha?

Ndi ḓo ṱungufhadza Yehova na vhabebi Ndi nga kha ḓi kolelwa

vhanga. Ndi ḓo vha na luvalo kana nda seiwa. Vhaṅwe vhane

lu si na mulalo. Tshifhingani tshi nda dzhena navho tshikolo vha nga kha

ḓaho zwi ḓo nkonḓela u hana. ḓi sa ṱoḓa u konana na nṋe.

Fhedzi ndi ḓo takadza Yehova,

nahone ndi ḓo vha na tshivhindi.

↓ ↓

Arali nda tenda u daha ← 3. Itani phetho → Ndi ḓo kunda mutsiko ngauri

zwi ḓo vha zwo itiswa ngauri

a tho ngo ḓilugisela lwo eḓanaho u itela ndi a zwi ḓivha uri a zwi takadzi

u sedzana na mutsiko wa thangana ya murole. Yehova na uri u daha zwi

Ndi dzhiela nṱha u ṱanganedzwa nga thangana

tshinya mutakalo wanga.

dzanga u fhira u ṱanganedzwa nga Yehova.

↓ ↓

← 4 Dzhiani vhukando → Ndi ḓo

hana nahone nda ṱuwa henefho.

U Goḓiwa Nga Thangana Dza Murole

Arali thangana yanga ya ri: “Dzhiani fola kheḽi.

Kana ni khou ofha?”

Ndi nga fhindula nga u

Tendelana nae Pambusa mafhungo Mu vhea fhasi ha mutsiko

“Ni khou amba zwone. Ndi “Ni songo tambisa fola “Ndo livhuha. Ndo vha ndi

a ofha u daha fola. A thi ḽaṋu nga u nṋea ḽone.” tshi humbula uri no

ṱoḓi u farwa nga ṱalifha luneni nga si dahe!”

khentsara ya mafhafhu.”

ṰHOGOMELANI: Arali thangana dzaṋu dzi tshi khou bvela phanḓa dzi tshi ni tsikeledza ṱuwani henefho nga u ṱavhanya. Arali na sa ṱuwa, vha ḓo ṋaṋa u ni tsikeledza. Zwino ṅwalani phindulo dzaṋu kha siaṱari ḽi tevhelaho.

 U Kunda Mutsiko Wa Thangana Ya Murole Itani kopi ya heḽi siaṱari!

1. Vhonani zwithu hu tshee nga phanḓa

Mulingo ndi ufhio? ․․․․․

Ndi ngafhi hune nda nga sedzana na wonoyo mulingo? ․․․․․

↓ ↓

Hu ḓo itea mini ← 2. Humbulani → Hu ḓo itea mini

arali nda tenda? arali nda hana?

․․․․․ ․․․․․

↓ ↓

Arali nda tenda, zwi ← 3. Itani phetho → Ndi ḓo iledza mutsiko ngauri . . .

ḓo vha zwo itiswa ngauri . . 

․․․․․ ․․․․․

↓ ↓

← 4. Dzhiani vhukando → Ndi ḓo . . .

․․․․․ ․․․․․

U Goḓiwa Nga Thangana Dza Murole

Arali thangana yanga ya ri: ․․․․․

Ndi nga fhindula nga u . . . 

Tendelana nae Pambusa mafhungo Mu vhea fhasi ha mutsiko

․․․․․ ․․․․․ ․․․․․

Ḓiḓowedzeni zwine na nga zwi fhindula ni na mubebi kana khonani yo vhibvaho.

 

[Tshifanyiso kha siaṱari 135]

Thangana dzaṋu dzi ḓo ni langa arali na dzi tendela dzi tshi ni tsikeledza