Ndima ya 12

Ndi Nga Dzula Hani Ndi Tshi Ḓifulufhela?

Ee Hai

Musi ni tshi ḓisedza kha tshivhoni, □ □

naa mbonalo yaṋu i a ni takadza?

Naa hu na vhuṅwe vhukoni vhune □ □

vhathu vha nga ni khoḓela hone?

Naa ni a kona u lwisana na □ □

mutsiko wa thangana ya murole?

Naa ni a ṱanganedza ndayo □ □

yo teaho?

Naa ni a kona u konḓelela musi vhaṅwe □ □

vha tshi ni sasaladza zwi songo tea?

Naa ni ḓipfa ni tshi funiwa? □ □

Naa ni a ṱhogomela mutakalo □ □

waṋu?

Naa ni a takala musi vhaṅwe □ □

vha tshi bvelela?

Naa ni ḓivhona ni muthu □ □

o bvelelaho?

Arali no fhindula mbudziso dzo vhalaho kha dzi re afho nṱha nga uri hai, hu nga kha ḓi vha hu uri u sa ḓifulufhela hu khou ita uri ni si vhone uri ni na pfaneleo dzavhuḓi. Heyi ndima yo itelwa u ni thusa u vhona dzenedzo pfaneleo!

 VHUNZHI ha vhaswa vha lwisana na u sa ḓifulufhela musi zwi tshi ḓa kha mbonalo yavho na vhukoni havho, nahone vha ḓivhambedza na vhaṅwe vhaswa. Naa na inwi no tou ralo? Arali zwo ralo, a ni noṱhe!

“U sa fhelela hanga hu ita uri ndi tsikeledzee. Tshifhinga tshinzhi ndi a ḓisasaladza.”—Leticia.

“Naho no naka lungafhani, ni ḓo dzula ni tshi ṱangana na vhaṅwe vho nakaho u ni fhira.”—Haley.

“A thi vhofholowi musi ndi vhukati ha vhaṅwe vhaswa. Ndi ofha uri vhathu vhoṱhe vha ḓo ndzhia ndi si wa ndeme.”—Rachel.

Arali ni tshi ḓipfa nga nḓila yo bulwaho afho nṱha, ni songo fulufhuwa. Ni nga wana thuso. Ṱhogomelani zwithu zwiraru zwine zwa ḓo ita uri ni dzule ni tshi ḓifulufhela.

Thusani Vhaṅwe

Luṅwalo lwa ndeme. “Mashudu a muṋei a fhira a muṋeiwa.”—Mishumo 20:35.

Zwine lwa amba zwone. Musi ni tshi thusa vhaṅwe, ni vha ni tshi khou ḓithusa. Nga nḓila-ḓe? Murero wa Bivhili u ri: “Mbilu ya mutondi i ḓo khwaṱha; mu-kela-vhaṅwe u ḓo kelwa-vho.” (Mirero 11:25) Ndi ngoho uri musi ni tshi thusa vhaṅwe, ni a takala! a

“Ndi a lingedza u thusa vhane vha ṱoḓa thuso tshivhidzoni. U funa vhaṅwe na u vha ṱhogomela zwi ita uri ndi ḓipfe ndi khwine.”—Breanna.

“Vhuḓinḓa ha Vhukriste vhu a vhuyedza ngauri vhu ni kombetshedza uri ni litshe u ḓihumbulela nahone ni thome u humbulela vhaṅwe vhathu.”—Javon.

Tsevho: Ni songo thusa vhaṅwe ni na ndivho ya u vhuyelwa nga zwiṅwe. (Mateo 6:2-4) A si zwavhuḓi u ṋea ni tshi khou ṱoḓa u  vhuyelwa. Kanzhi zwi a vhonala uri a ni na tshiṱuṱuwedzi tshavhuḓi!—1 Vha-Thesalonika 2:5, 6.

Zwine na nga zwi ita. Humbulani nga ha muthu we na mu thusa tshifhingani tsho fhiraho. Onoyo muthu ndi nnyi, nahone no mu itela mini?

․․․․․

No ḓipfa hani musi no no ita zwenezwo?

․․․․․

Humbulani nga ha muṅwe muthu ane na nga mu thusa, nahone ni ṅwale fhasi nḓila ine na nga mu thusa ngayo.

․․․․․

Vhumbani Vhukonani

Luṅwalo lwa ndeme. “Khonani ndi ṱhama ya maḓuvha oṱhe; ndi mukomana we a mbebelwa ḓuvha ḽa khombo.”—Mirero 17:17.

Zwine lwa amba zwone. Khonani yavhuḓi i nga ni tikedza musi wa khombo. (1 Samuele 18:1; 19:2) U ḓivha uri hu na muthu ane a ni vhilaelela zwi nga ita  uri ni ḓipfe ni khwine. (1 Vha-Korinta 16:17, 18) Ngauralo, vhumbani vhukonani na vhathu vhane vha ḓo ni ṱuṱuwedza u ita zwithu zwavhuḓi.

“Khonani dza vhukuma dzi ḓo ni ṱuṱuwedza.”—Donnell.

“Nga tshiṅwe tshifhinga u ḓivha uri hu na muthu ane a ni vhilaelela zwi tshi bva mbiluni ndi zwone zwa ndeme. Zwenezwo zwi nga ita uri ni ḓipfe ni wa ndeme.”—Heather.

Tsevho: Itani vhungoho ha uri khonani dzaṋu dzi a ni tendela ni tshi vha zwine na vha zwone—hu si u ḓishandula u itela uri dzi ni ṱanganedze. (Mirero 13:20; 18:24; 1 Vha-Korinta 15:33) U ita zwithu zwi si zwavhuḓi u itela u takadza vhathu zwi ḓo ni ita uri ni ḓipfe no nyadzea.—Vha-Roma 6:21.

Zwine na nga zwi ita. Afho fhasi, ṅwalani dzina ḽa khonani ine ya nga ita uri ni bvele phanḓa ni tshi ḓifulufhela.

․․․․․

Zwi nga vha zwavhuḓi uri ni fhedze tshifhinga na onoyo muthu we na mu ṅwala afho nṱha.—Ṱhogomelani: A si uri onoyo muthu u fanela u vha thangana yaṋu.

Ni Songo Kulea Nungo Musi No Khakha

Luṅwalo lwa ndeme. “Vho tshinya vhoṱhe, vhoṱhe vho ṱáhela vhurena ha Mudzimu.”—Vha-Roma 3:23.

Zwine lwa amba zwone. Ndi ngoho uri a ro ngo fhelela. Zwenezwo zwi amba uri hu ḓo vha na tshifhinga tshine na ḓo amba na u ita zwithu zwo khakheaho. (Vha-Roma 7:21-23; Yakobo 3:2) Naho ni sa koni u iledza u ita vhukhakhi, ni nga langa zwine na nga ita nga murahu. Bivhili i amba uri: “Ngauri muvhuya, na̗ u wa kaṱan’una-kavhili, u ḓo ḓi dovha a vuwa.”—Mirero 24:16.

 “Nga tshiṅwe tshifhinga u sa ḓifulufhela hu ḓiswa nga u vhambedza vhushayanungo hashu na vhukoni ha vhaṅwe.”—Kevin.

“Muṅwe na muṅwe u na pfaneleo dzavhuḓi na dzi si dzavhuḓi. Ri fanela u takalela zwivhuya na u lwela u khwinisa zwivhi.”—Lauren.

Tsevho: Ni songo shumisa u sa fhelela haṋu u itela u ḓiimelela u ita vhuvhi. (Vha-Galata 5:13) U ita vhukhakhi nga khole zwi ḓo ita uri Yehova Mudzimu a si tsha ni takalela!—Vha-Heberu 10:26, 27.

Zwine na nga zwi ita. Afho fhasi, ṅwalani pfaneleo ine na nga ṱoḓa u i khwinisa.

․․․․․

Ṅwalani datumu ya ṋamusi tsini na pfaneleo ye na i ṅwala. Itani ṱhoḓisiso malugana na u khwinisa yeneyo pfaneleo, nahone ni sedze mvelaphanḓa ine na ḓo vha no i ita nga murahu ha ṅwedzi.

Ndeme Yaṋu

Bivhili i amba uri ‘Mudzimu u fhira mbilu dzashu.’ (1 Yohane 3:20) Zwenezwi zwi amba uri u vhona ni wa ndeme u fhira  nḓila ine na ḓidzhia ngayo. Fhedzi naa u sa fhelela haṋu hu a shandula zwenezwo? Edzani u humbula ni na tshelede ya bammbiri i linganaho R100 yo kheruwaho zwiṱuku. Naa ni nga i laṱa kana na i dzhia i si ya ndeme ngauri yo kheruwa? Na kathihi! I kha ḓi vha na ndeme i linganaho na ya R100 i songo kheruwaho.

Zwenezwi zwi nga vhambedzwa na nḓila ine Mudzimu a ni vhona ni wa ndeme ngayo. U sa fhelela haṋu a hu iti uri a si vhone ndeme yaṋu. U a dzhiela nṱha vhukuma vhuḓidini haṋu ha u mu takadza, naho vhu tshi nga vhonala vhu si ha ndeme kha inwi! Bivhili i a ri khwaṱhisedza uri “Mudzimu ha ṱaluli; ha nga hangwi zwe na shuma na ḓi-netisa lufunoni ni tshi itela dzina ḽawe.”—Vha-Heberu 6:10.

KHA NDIMA YASHU I TEVHELAHO

Naa ni dzula no tsikeledzea? Arali zwo ralo, ni fanela u ita mini?

[Ṱhaluso i re magumoni a siaṱari]

LUṄWALO LWA NDEME

“Muthu nga a sedze mushumo wawe, ndi hone thendo a tshi ḓo i wana kha mushumo u ré wawe ene muṋe; ha tsha ḓo i wana nga u ḓi-vhambedza na muṅwe.”—Vha-Galata 6:4.

TSIVHUDZO

Ni songo ḓivhudza maipfi a nga ho ‘tshifhinga tshoṱhe ndi a kundelwa’ na ‘a hu na zwine nda zwi kona.’ Honoho u ṋaṋisa hu nga ni nyabwisa. Nṱhani hazwo, ḓivhani vhushayanungo haṋu, nahone ni ṱhogomele na vhukoni vhune na vha naho.

NAA NI A ZWI ḒIVHA URI . . . ?

Nḓila ine na ḓidzhia ngayo i kwama nḓila ine vhaṅwe vha ni dzhia ngayo . . . na u ni fara ngayo.

ZWINE NDA ḒO ZWI ITA!

Musi ndi tshi sasaladzwa nga thangana dzanga ndi ḓo ․․․․․

Musi ndi tshi ṱhogomela uri ndi vhona vhushayanungo hanga fhedzi, ndi ḓo ․․․․․

Zwine nda ṱoḓa u vhudzisa mubebi kana vhabebi vhanga nga ha enea mafhungo ndi ․․․․․

NI HUMBULA MINI?

● Ndi ngani tshifhinga tshinzhi vhaswa vha sa ḓifulufheli?

● Ndi ngani zwi zwa ndeme u ḓifulufhela?

[Maipfi o ṱumbulwaho kha siaṱari 88]

“Muthu a nga vha o naka vhukuma fhedzi a tshi ḓivhona o vhifha. Kana muthu a vha a songo tou nakesa, fhedzi a ḓivhona e ṱhase. Zwoṱhe zwi bva kha mavhonele aṋu.”—Alyssa

[Tshifanyiso kha siaṱari 90]

Ndeme ya tshelede a i fhungudzei nga ṅwambo wa uri yo kheruwa—na ndeme yaṋu phanḓa ha Mudzimu a i fhungudzei nga ṅwambo wa uri a no ngo fhelela