Tsumbo Yavhuḓi​—Ruthe

Ruthe wa tshilikadzi ndi tsumbo yavhuḓi ya u fulufhedzea. O khetha u dzula na Naomi mazwale wawe nṱhani ha u vhuyelela muḓihayani wa hawe u itela u tshila vhutshilo ha u ḓigeḓa. Naho zwenezwi zwi tshi ita uri zwi songo mu lelutshela uri a wane mufarisi, Ruthe ha ḓihumbuleli e eṱhe. Nḓila ine a funa Naomi ngayo na u tama u vha na vhathu vha Yehova ndi zwa ndeme khae u fhira u ṱavhanyela u fusha lutamo lwawe lwa u vhingwa.—Ruthe 1:8-17.

Naa ni khou humbula nga mbingano? Nga zwenezwo, edzisani Ruthe. Ni songo humbula nga maḓipfele aṋu fhedzi, nahone ni ḓivhudzise uri ndi pfaneleo dzifhio dzavhuḓi dzine na ḓo dzi sumbedza muthu ane a ḓo vha mufarisi waṋu. Sa tsumbo, naa ni a fulufhedzea na u ḓikumedza? Naa ni a tevhela maitele a Mudzimu, naho ṋama yaṋu i songo fhelelaho i tshi ṱoḓa uri ni si a tevhele? Ruthe ho ngo gidimela u vhingwa. Naho zwo ralo, nga u ya ha tshifhinga o mbo ḓi wana munna o vhibvaho we a vha e na pfaneleo dzi fanaho na dzawe—zwihuluhulu, we a vha a tshi funa Mudzimu. Na inwi ni nga tshenzhela zwithu zwi fanaho.