Ndima Ya Vhufumbilinthihi
Ndivho Ya Yehova I Bvelela Nga Nḓila I Mangadzaho
1, 2. (a) Ndi ifhio ndivho ya Yehova malugana na zwivhumbiwa zwawe zwo ṱalifhaho? (b) Ndi vhafhio vhe vha vha vho katelwa kha muṱa u re na vhuthihi wa vhagwadameli vha Mudzimu?
NDIVHO ya Yehova ya lufuno ndi ya uri zwivhumbiwa zwoṱhe zwo ṱalifhaho zwi gwadamele Mudzimu wa ngoho fhedzi nga vhuthihi nahone zwoṱhe zwi ḓiphine nga mbofholowo yavhuḓi sa vhana vha Mudzimu. Hafhu, zwenezwi ndi zwe vhafuni vha zwivhuya vha zwi lindela nga maṱo matswuku.
2 Yehova o thoma u ḓadzisa ndivho yawe khulwane musi a tshi thoma mishumo yawe ya tsiko. O thoma nga u sika Murwa, ‘ane a vha tshifanyiso tsha u ri Mudzimu ndi munzani’ u bva tshee a vuswa vhafuni. (Vha-Heberu 1:1-3) Onoyu Murwa o vha o khethea, ngauri o sikwa nga Mudzimu e eṱhe. Nga murahu, vhaṅwe vhathu vhoṱhe vho vha vha tshi ḓo sikwa nga onoyu Murwa: u thoma nga vharuṅwa vha ṱaḓulu, nga murahu ha tevhela vhathu kha ḽifhasi. (Yobo 38:7; Luka 3:38) Vhenevha vhoṱhe vho vhumba muṱa muthihi fhethu hoṱhe. Khavho vhoṱhe, Yehova o vha Mudzimu, Muvhusahoṱhe, na Khotsi avho wa lufuno.
3. (a) Roṱhe ro mamela mini kha vhabebi vhashu vha u thoma? (b) Yehova o itela vhana vha Adamu ndugiselelo ifhio ya lufuno?
3 Musi vhabebi vhashu vha u thoma vha tshi haṱulelwa lufu nge vha ita tshivhi nga khole, vho pandelwa Edeni nahone vha laṱwa nga Mudzimu. A vho ngo tsha vha tshipiḓa tsha muṱa wawe wa fhethu hoṱhe. (Genesi 3:22-24; Doiteronomio 32:4, 5) Roṱhe ri vhana vhavho, nga u ralo ro bebwa ri na nḓowelo dza tshivhi. Fhedzi Yehova o vha a tshi zwi ḓivha uri vhaṅwe vhukati ha vhana vha Adamu na Eva vha ḓo funa zwo lugaho. Ngauralo O ita ndugiselelo ya lufuno ine vhenevha vha ḓo kona u wana ‘mbofholowo ya vhugala ya vhana vha Mudzimu.’—Vha-Roma 8:20, 21.
Isiraele Ḽi Xelelwa Nga Vhuimo Havhuḓi
4. Ndi ndugelo ifhio ye Yehova a i ṋea Vhaisiraele vha kale?
4 Nga murahu ha miṅwaha i ṱoḓaho u vha 2 500 Adamu o no sikwa, Yehova o ṋea vhaṅwe vhathu ndugelo ya u vha na vhushaka ho khetheaho Nae. O khetha Vhaisiraele vha kale uri uri vhe vhathu vhawe nahone a vha ṋea Mulayo wawe. (Genesi 12:1, 2) O vha vhumba vha vha lushaka nahone a vha shumisa u tendelana na ndivho yawe. (Doiteronomio 14:1, 2; Yesaya 43:1) Naho zwo ralo, vho vha vha tshi kha ḓi vha vhupulini ha tshivhi na lufu, nga ṅwambo wa zwenezwo a vho ngo ḓiphina nga mbofholowo yavhuḓi ye Adamu na Eva vha vha vhe nayo u thomani.
5. Vhaisiraele vho xelelwa hani nga vhuimo havho ho khetheaho na Mudzimu?
5 Naho zwo ralo, Vhaisiraele vho vha vhe na vhuimo havhuḓi na Mudzimu. Hafhu vho vha vhe na vhuḓifhinduleli ha u ṱhonifha Yehova sa Khotsi avho na u shuma u tendelana na ndivho yawe. Yesu o ombedzela ndeme ya u ḓadzisa havho honoho vhuḓifhinduleli. (Mateo 5:43-48) Naho zwo ralo, lushaka lwa Isiraele lwo kundwa u ita zwenezwi. Musi vhenevho Vhayuda vho amba uri “ri na khotsi-ashu, muthihi, ndi Mudzimu,” Yesu o amba uri mishumo yavho na muya we vha u sumbedza zwi hanedzana na zwine vha zwi amba. (Yohane 8:41, 44, 47) Nga 33 C.E., Mudzimu o fhelisa Mulayo, nahone vhushaka ho khetheaho ha Isiraele nae ha pfuvha. Fhedzi naa zwenezwi zwo vha zwi tshi amba uri vhathu vha nga si tsha ḓo vhuya vha ḓiphina nga vhushaka havhuḓi na Mudzimu?
U Kuvhanganya “Zwoṱhe Zwa Ṱaḓulu”
6. Ndi ifhio ndivho ya “maitele” o bulwaho nga Paulo kha Vha-Efesa 1:9, 10?
6 Muapostola Paulo o sumbedza uri vhaṅwe vhukati ha vhathu vha nga ḓiphina nga vhushaka ho khetheaho na Mudzimu. Sa tsumbo, malugana na ndugiselelo ya Yehova ine vhane vha vha na lutendo vha ḓo vha miraḓo ya muṱa Wawe, Paulo o ṅwala a ri: “[Mudzimu] a ri ḓivhadza tshiphiri tsha zwe a funa zwi tshi vha hone, nga u tama hawe ene muṋe, he a dzula ó hu elekanya nga ngomu hawe. A tshi ri maitele a musi zwifhinga zwó khunyelela a ḓo vha a u dovha u vhutheledza zwoṱhe zwa vha tsini ha ṱhóho nthihi, kha Kristo, zwoṱhe zwa ṱaḓulu na zwa fhasi zwa vha kha ene.” (Vha-Efesa 1:9, 10) Enea “maitele” o thewa kha Yesu Kristo. Nga khae, vhathu vha vha na vhuimo vhu ṱanganedzeaho phanḓa ha Mudzimu. Tshivhalo tshavho tshiṱuku tshi na tshilavhelelwa tsha u tshila ṱaḓulu. Tshivhalo tshihulwane tshi ḓo tshila kha ḽifhasi nga hu sa fheli.
7. “Zwoṱhe zwa ṱaḓulu” ndi vhafhio?
7 U thoma nga Pentekoste ya 33 C.E., ṱhogomelo yo thoma u livhiswa kha “zwoṱhe zwa ṱaḓulu,” vhane vha ḓo vha maḽaifa na Kristo Muvhusoni wa ṱaḓulu. Nga u vha havho na lutendo kha ndeme ya tshiṱhavhelo tsha Yesu, vho itwa vho lugaho nga Mudzimu. (Vha-Roma 5:1, 2) Nga u ya ha tshifhinga, Vhayuda na Vhannḓa vho katelwa, nahone “zwoṱhe zwa ṱaḓulu” zwi ḓo vha 144 000. (Vha-Galata 3:26-29; Ndzumbululo 14:1) Kha ḽifhasi hu tshee na masalela avho fhedzi.
U Kuvhanganya “Zwa Fhasi”
8. Ndi vhafhio vhane vha vha “zwa fhasi,” nahone vha na vhushaka vhufhio na Yehova?
8 Eneo maitele a khou kuvhanganya “zwa fhasi.” Zwino vhathu vha dzimilioni vha khou kuvhanganywa vhe na tshilavhelelwa tsha u tshila kha ḽifhasi nga hu sa fheli. Vho ṱangana na masalela a maḽaifa a Muvhuso, vha hulisa dzina ḽa Yehova na vhurabeli hawe. (Yesaya 2:2, 3; Tsefanya 3:9) Vha dovha vha vhidza Yehova vha ri “Khotsi” nga ṅwambo wa uri vha mu dzhia e tshisima tsha vhutshilo. Nahone vha a ṱanganedzea phanḓa hawe nga u vha havho na lutendo kha malofha a Yesu o shululwaho. (Ndzumbululo 7:9, 14) Samusi vha tshee vhathu vha songo fhelelaho, vha ḓo vha vhana vha Mudzimu nga vhuḓalo tshifhingani tshi ḓaho.
9. Ndi fulufhedziso ḽifhio ḽine Vha-Roma 8:21 ya ḽi fulufhedzisa vhathu?
9 Vhenevha vha re na fulufhelo ḽa u tshila kha ḽifhasi zwino vho lindela nga maṱo matswuku tshifhinga tshine vhathu vha ḓo ‘vhofhololwa, vha bva kha vhupuli ha u pfi vha ḓo sina.’ (Vha-Roma 8:21) Honoho u vhofhololwa hu ḓo thoma musi Kristo na mavhuthu awe a ṱaḓulu vho no fhelisa maṱungu mahulu nga Haramagedo. Hezwi zwi ḓo amba u fheliswa ha maitele oṱhe mavhi a zwithu a Sathane, ha tevhela phaṱutshedzo dza Vhuvhusi ha Kristo ha Miṅwaha ya Tshigidi maanḓani a Muvhuso.—Ndzumbululo 19:17-21; 20:6.
10. Vhashumeli vha Yehova vha ḓo imba luimbo lufhio lwa thendo?
10 Zwi ḓo takadza vhukuma musi vhashumeli vha Yehova vha re kha ḽifhasi vha tshi kuvhangana u itela u dovholola maipfi a vhashumeli vhawe vha ṱaḓulu, vhe vha huwelela nga dakalo vha ri: “Mishumo yau ndi mihulu, i a mangadza, Murena, Mudzimu, Muvhusa-hoṱhe. Dzinḓila dzau a dzi khakhi, a dzi xedzi, Iwe Khosi ya dzitshakha! A nga vha nnyi ané a si U ofhe, Murena, ané a si rende dzina ḽau, ngauri ndi’we ḽigala Ú woṱhe. Ngauri tshakha dzoṱhe dzi ḓo ḓa dza U gwadamela, ngauri u lulamisa hau ho vhonala.” (Ndzumbululo 15:3, 4) Ee, vhashumeli vhoṱhe vha Yehova vha ḓo gwadamela nga vhuthihi Mudzimu wa ngoho fhedzi. Na vhafu vha ḓo vuswa nahone vha ṋewa tshibuli tsha u ṱanganela kha u renda Yehova.—Mishumo 24:15.
Mbofholowo I Mangadzaho I Tsini
11. Ndi mbofholowo ifhio yavhuḓi ine vho ponyokaho maṱungu mahulu vha ḓo ḓiphina ngayo?
11 Nga murahu ha maṱungu mahulu, musi Haramagedo yo no kunakisa vhuvhi kha ḽifhasi, Sathane Diabolo ha tsha ḓo vha “mudzimu wa tshino tshifhinga.” Vhagwadameli vha Yehova a vha tsha ḓo lwisana na ṱhuṱhuwedzo mmbi ya Sathane. (2 Vha-Korinta 4:4; Ndzumbululo 20:1, 2) Vhurereli ha mazwifhi a vhu tsha ḓo tshinya dzina ḽa Yehova na u ita uri vhathu vha si tsha vha na vhuthihi. Vhashumeli vha Mudzimu wa ngoho a vha tsha ḓo sedzana na u shayea ha khaṱulokwayo na u farwa luvhi nga vhavhusi vha vhathu. Ndi mbofholowo yavhuḓi lungafhani ine vha ḓo ḓiphina ngayo!
12. Vhathu vhoṱhe vha ḓo vhofhololwa hani kha tshivhi na mvelelo yatsho?
12 Samusi e “Ngwana ya Mudzimu yo hwalaho zwivhi zwa shango,” Yesu u ḓo shumisa ndeme ya tshiṱhavhelo tshawe u itela u fhelisa zwivhi zwa vhathu. (Yohane 1:29) Musi Yesu e kha ḽifhasi nahone a tshi hangwela muthu zwivhi, o vha a tshi mu fhodza u sumbedza uri o mu hangwela. (Mateo 9:1-7; 15:30, 31) Nga nḓila i fanaho, Kristo Yesu, sa Khosi ya ṱaḓulu ya Muvhuso wa Mudzimu, u ḓo fhodza nga lwa vhuṱolo vho pofulaho, vha sa koni u amba, vho dzingaho nḓevhe, vho holefhalaho, vho tsikeledzeaho muhumbuloni, na vha re na maṅwe malwadze. (Ndzumbululo 21:3, 4) “Mulayo wa zwivhi” u ḓo fheliswa kha vhoṱhe vha thetshelesaho u itela uri mihumbulo na mishumo yavho zwi vhe zwi takadzaho, kha vhone vhaṋe na kha Mudzimu. (Vha-Roma 7:21-23) Mafheloni a Miṅwaha ya Tshigidi, vha ḓo vha vho no itwa uri vha fhelele, vhe “tshifanyiso” tsha Mudzimu wa ngoho fhedzi.—Genesi 1:26.
13. Mafheloni a Vhuvhusi ha Miṅwaha ya Tshigidi, Kristo u ḓo dzhia vhukando vhufhio, nahone ha vha na mvelelo ifhio?
13 Musi Kristo o no ita uri vhathu vha fhelele, nga zwenezwo u ḓo humisela kha Khotsi awe maanḓa e a ṋewa uri a ite hoyu mushumo: “Musi a tshi ḓo kumedza vhuhosi Mudzimu a ré Khotsi, ó no kunda mivhuso yoṱhe, na vhadzia-maanḓa vhoṱhe na vhadzia-nungo. Ngauri tshawe ndi u vhusa, maswina awe oṱhe a vhuya a vhewa tsini ha milenzhe yawe.” (1 Vha-Korinta 15:24, 25) Vhuvhusi ha Miṅwaha ya Tshigidi ya Muvhuso vhu ḓo vha ho no khunyeledza nga vhuḓalo ndivho yaho; ngauralo a hu tsha ḓo ṱoḓea uri hu vhe na muṅwe muvhuso vhukati ha Yehova na vhathu. Nahone samusi tshivhi na lufu zwi tshi ḓo vha zwo fheliswa tshoṱhe na vhathu vho rengululwa, a zwi tsha ḓo ṱoḓea uri Yesu a vhe Murengululi. Bivhili i a ṱalutshedza: ‘Ene Murwa u ḓo khótha uḽa we a ri zwoṱhe nga zwi mu khóthe uri Mudzimu a vhe ene tshoṱhe kha vhoṱhe.’—1 Vha-Korinta 15:28.
14. Vhathu vhoṱhe vho fhelelaho vha ḓo kumedzelwa kha mini, nahone ndi ngani?
14 Nga murahu ha zwenezwi, vhathu vho fhelelaho vha ḓo ṋewa tshibuli tsha u sumbedza uri phetho yavho ndi ya u shumela Mudzimu wa ngoho fhedzi nga hu sa fheli. Ngauralo, musi a sa athu vha ṱanganedza tshoṱhe sa vhana vhawe, Yehova u ḓo kumedzela vhenevho vhathu vhoṱhe vho fhelelaho kha mulingo wa u fhedza. Sathane na madimoni awe vha ḓo vhofhololwa mugodini. Zwenezwi a zwi nga ḓo ita uri vhane ngangoho vha funa Yehova vha vhaisale lwa tshoṱhe. Fhedzi vhane nga u sa fulufhedzea, vha ḓo tenda u pambuswa uri vha sa thetshelese Yehova vha ḓo fheliswa tshoṱhe, u katela na ḽishandukwa ḽa u thoma na madimoni aḽo.—Ndzumbululo 20:7-10.
15. Ndi vhuimo vhufhio vhune ha ḓo dovha ha vha hone vhukati ha zwivhumbwa zwoṱhe zwa Yehova zwo ṱalifhaho?
15 Nga zwenezwo Yehova u ḓo ṱanganedza sa vhana vhawe vhathu vhoṱhe vho fhelelaho, vhane vha ḓo vha vho tikedza vhuvhusahoṱhe ha Mudzimu kha wonoyo mulingo wa u fhedza. U bva nga tshenetsho tshifhinga, vha ḓo ṱanganela nga vhuḓalo kha mbofholowo yavhuḓi ya u vha vhana vha Mudzimu sa tshipiḓa tsha muṱa wa Mudzimu wa fhethu hoṱhe. Zwivhumbwa zwoṱhe zwo ṱalifhaho zwi re ṱaḓulu na kha ḽifhasi zwi ḓo dovha zwa kuvhangana u itela u mu gwadamela samusi e Mudzimu wa ngoho fhedzi. Ndivho ya Yehova i ḓo vha yo ḓadzea nga nḓila i mangadzaho! Naa ni a ṱoḓa u vha muraḓo wa wonoyo muṱa wo takalaho, wa lini na lini, wa fhethu hoṱhe? Arali zwo ralo, ri ni ṱuṱuwedza uri ni thetshelese zwine Bivhili ya zwi amba kha 1 Yohane 2:17, i ri: “Shango ḽi a lovha na nyemulo dzaḽo, huno ane a ita zwiné Khotsi a zwi funa u ḓi dzula e hone na lini na lini.”
Mvusuluso
• Musi hu sa athu vha na vhushandukwa ngei Edeni, vhagwadameli vhoṱhe vha Yehova vho vha vhe na vhushaka vhufhio nae?
• Vhashumeli vha Mudzimu vha na vhuḓifhinduleli vhufhio?
• Ndi vhafhio vhane vha kha ḓi fanela u vha vhana vha Mudzimu, nahone zwenezwi zwi tshimbidzana hani na ndivho ya Yehova malugana na u gwadamela nga vhuthihi?
[Mbudziso Dza Pfunzo]
[Tshifanyiso kha siaṱari 190]
Vhathu vha thetshelesaho vha ḓo ḓiphina nga vhutshilo paradisoni shangoni ḽoṱhe
