Ndima Ya Vhufumi
Muvhuso “Une Wa Sa Ḓo Tshinyala Lini Na Lini”
1. Ndi ifhio mbuno ye ya khwaṱhisedzwa nga zwiitea zwa shango kha ḓivhazwakale yoṱhe ya vhathu?
ZWIITEA zwine zwa khou itea shangoni ḓuvha ḽiṅwe na ḽiṅwe zwi khwaṱhisedza mbuno ya uri vhathu a vho ngo wana dakalo nga u hana vhuvhusahoṱhe ha Yehova na u lingedza u ḓivhusa. A huna maitele a muvhuso e a ḓisela vhathu zwivhuya. Naho vhathu vhe na nḓivho khulwane vhukuma ya zwa saintsi, a vho ngo kona u kunda malwadze kana u fhelisa lufu, naho hu kha muthu muthihi zwawe. Vhuvhusi ha vhathu a vhu athu fhelisa nndwa, vhuvemu, vhuvhava, vhutshinyi, kana vhushai. Mivhuso i tsikeledzaho i kha ḓi bvela phanḓa u kandeledza vhathu mashangoni manzhi. (Muhuweleli 8:9) Thekinolodzhi, vhupangwa, na u sa londa ndi zwone zwine zwa tshikafhadza shango, maḓi, na muya. U sa shumiswa zwavhuḓi ha masheleni nga vhavhusi ndi zwone zwine zwa ita uri vhathu vhanzhi vha sa wane zwithu zwine vha zwi shaya vhutshiloni. Miṅwaha ya zwigidi yo fhelaho yo ita uri heyi mbuno i pfale zwavhuḓi: “Muthu dzinḓila dzawe ha dzi vhusi; munna hune a ya ha ḓi-isi na̗ u̗ kanda a khwaṱhisa.”—Yeremia 10:23.
2. Ndi tshifhio tshipiringululi tshithihi fhedzi tsha vhuleme ha vhathu?
2 Tshipiringululi ndi tshifhio? Ndi Muvhuso wa Mudzimu, we Yesu a vhudza vhatevheli vhawe uri vha u rabelele: “Muvhuso wau u ḓe; zwiné wa funa nga zwi itwe fhano fhasi vhunga zwi tshi itwa ngei ṱaḓulu.” (Mateo 6:9, 10) Muvhuso wa Mudzimu wa ṱaḓulu wo ṱaluswa kha 2 Petro 3:13 sa “maṱaḓulu maswa,” u ḓo vhusa “ḽifhasi ḽiswa,” zwine zwa amba vhathu vho lugaho. Muvhuso wa Mudzimu wa ṱaḓulu ndi wa ndeme lwe Yesu a u ita tshiṱoho tshihulwane tsha u huwelela hawe. (Mateo 4:17) O sumbedza ndeme ine wa fanela u vha nayo kha riṋe, a ri ṱuṱuwedza a ri: “Tsha phanḓa ṱoḓani muvhuso wa Mudzimu na u luga hawe.”—Mateo 6:33.
3. Ndi ngani u guda nga ha Muvhuso wa Mudzimu zwo ṱavhanyiswa zwino?
3 Zwo ṱavhanyiswa vhukuma u guda nga ha Muvhuso wa Mudzimu zwino, ngauri hu si kale wonoyo Muvhuso u ḓo dzhia vhukando uri u shandule tshoṱhe vhuvhusi ha ḽino ḽifhasi. Daniele 2:44 yo dzula yo amba: “Misi ya eneo mahosi [hulumeni dzine dza khou vhusa zwino], ndi hone Mudzimu wa ṱaḓulu a tshi ḓo vusa muvhuso [ngei ṱaḓulu] une wa sa ḓo tshinyala lini na lini, une vhuhosi hawo ha sa ḓo wetshela kha luṅwe lushaka [vhathu a vha tsha ḓo vhuya vha vhusa ḽifhasi]. Wonoyo u do pwashakanya mivhuso yoṱhe [ya zwino] wa i lozwa; wone uṋe wa ima lini na lini.” Nga zwenezwo, ano maḓuvha a vhufhelo a ḓo swika vhufheloni hao musi wonoyo Muvhuso u tshi fhelisa ano maitele mavhi oṱhe a zwithu. Muvhuso wa ṱaḓulu a u nga thithiswi musi u tshi vhusa ḽifhasi. Edzani u vhona nḓila ine ra fanela u takala ngayo nga u ḓivha uri mbofholowo i tsini!
4. Malugana na Muvhuso, ho itea mini ṱaḓulu nga 1914, nahone ndi ngani zwenezwo zwi zwa ndeme kha riṋe?
4 Nga 1914, Kristo Yesu o vhewa uri a vhe Khosi nahone a tendelwa u “vhusa vhukati ha maswina [awe].” (Psalme ya 110:1, 2) Hafhu, nga wonoyo ṅwaha ho thoma ‘maḓuvha a vhufhelo’ a ano maitele mavhi a zwithu. (2 Timotheo 3:1-5, 13) Zwiṅwe hafhu, zwiitea zwe Daniele a zwi vhona kha bono ḽa vhuporofita zwo itea ṱaḓulu. “Wa-Kale Wa-Maḓuvha” Yehova Mudzimu, o ṋea Murwa-muthu, Yesu Kristo, “maanḓa, na vhurena, na vhuhosi; vha dzoṱhe dzitshakha na mirafho na dzindimi vha vha vhalanda vhawe.” A tshi vhiga nga ha ḽeneḽo bono, Daniele o ṅwala: “Vhuhosi hawe ndi ha lini na lini; muvhuso wawe a u nga tshinyali.” (Daniele 7:13, 14) A tshi shumisa wonoyu Muvhuso wa ṱaḓulu u re zwanḓani zwa Kristo Yesu, Mudzimu u ḓo ita uri vhathu vhane vha funa zwo lugaho vha ḓiphine nga zwithu zwinzhi zwavhuḓi zwe zwa vha zwi ndivho yawe musi a tshi vhea vhabebi vhashu vha u thoma Paradisoni.
5. Ndi zwidodombedzwa zwifhio nga ha Muvhuso zwine zwa ri takadza vhukuma, nahone ndi ngani?
5 Naa a ni tami u vha a fulufhedzeaho nga fhasi ha wonoyo Muvhuso? Arali zwo ralo, ni ḓo takalela nḓila ine wonoyu muvhuso wa ṱaḓulu wa ḓo vha wo dzudzanywa ngayo na nḓila ine wa ḓo shuma ngayo. Ni ḓo ṱoḓa u ḓivha zwine wa khou zwi ita zwino, na zwine wa ḓo zwi ita tshifhingani tshi ḓaho, na zwine na fanela u zwi ita. Musi ni tshi guda zwo engedzeaho nga ha Muvhuso, ni ḓo bvela phanḓa ni tshi u funa. Arali na ḓivhea nga fhasi ha vhuvhusi hawo, ni ḓo kona u vhudza vhaṅwe nga ha zwithu zwavhuḓi zwine Muvhuso wa Mudzimu wa ḓo zwi itela vhathu vha thetshelesaho.—Psalme ya 48:12, 13.
Vhavhusi Vha Muvhuso Wa Mudzimu
6. (a) Maṅwalo a sumbedza hani uri ndi vhuvhusi ha nnyi vhune ha khou sumbedzwa nga Muvhuso wa Vhumessia? (b) Ri fanela u kwamea hani nga zwine ra zwi guda nga ha Muvhuso?
6 Tshiṅwe tshithu tshine na ḓo tshi ṱhogomela kha yeneyo ṱhoḓisiso ndi uri wonoyu Muvhuso wa Vhumessia ndi musumbedzo wa vhuvhusahoṱhe ha Yehova. Ndi Yehova we a ṋea Murwa wawe “maanḓa, na vhurena, na vhuhosi.” Musi Murwa wa Mudzimu o no ṋewa maanḓa uri a thome u vhusa sa Khosi, maipfi a bvaho ṱaḓulu o amba zwo tea a ri: “Vhuhosi ha shango ho no vha ha Muṋe washu [Yehova Mudzimu] na Muḓodzwa wawe, [Yehova] u ḓo vha Khosi na lini na lini!” (Ndzumbululo 11:15) Nga zwenezwo, zwoṱhe zwine ra zwi ṱhogomela nga ha wonoyu Muvhuso na zwine wa zwi khunyeledza zwi nga ri sendedza tsini-tsini na Yehova nga dzawe. Zwine ra zwi guda zwi fanela u ri ita uri ri ḓivhee nga fhasi ha vhuvhusahoṱhe hawe nga hu sa fheli.
7. Ndi ngani zwi zwa ndeme kha riṋe uri Yesu Kristo ndi Muvhusi ane a vha Muthusi wa Yehova?
7 Hafhu, ṱhogomelani mbuno ya uri Yehova o vhea Yesu Kristo kha khuluṋoni uri a vhe Muvhusi ane a vha Muthusi wawe. Samusi e Mushumi-Makone we Mudzimu a mu shumisa u ita ḽifhasi na vhathu, Yesu u ḓivha zwishaiwa zwashu u fhira roṱhe. Zwiṅwe hafhu, u bva tshee vhathu vha sikiwa, o sumbedza uri u “takalela vhana vha vhathu.” (Mirero 8:30, 31; Vha-Kolosa 1:15-17) O vha a tshi funesa vhathu lwe a ḓa nga tshavhukoma kha ḽifhasi nahone a kumedza vhutshilo hawe uri vhu vhe tshirengululi tshashu. (Yohane 3:16) Nga zwenezwo o ri vhofholola kha tshivhi na lufu nahone a ri ṋea tshibuli tsha u wana vhutshilo vhu sa fheli.—Mateo 20:28
8. (a) U fhambana na vhuvhusi ha vhathu, ndi ngani muvhuso wa Mudzimu u tshi ḓo vha hone lwa tshoṱhe? (b) Ndi vhushaka vhufhio vhu re hone vhukati ha “mukoma a fulufhedzeaho na wa vhuṱali” na hulumeni wa ṱaḓulu?
8 Muvhuso wa Mudzimu ndi hulumeni a sa shanduki, wa tshoṱhe. U vha hone hawo lwa tshoṱhe zwi khwaṱhisedzwa nga mbuno ya uri Yehova ha fi. (Habakuku 1:12) Yesu Kristo, we Mudzimu a mu ṋea vhuhosi o fhambana na mahosi a vhathu ngauri na ene ha fi. (Vha-Roma 6:9; 1 Timotheo 6:15, 16) Vhane vha ḓo vhusa na Kristo kha khuluṋoni dza ṱaḓulu ndi vha 144 000, vhane vha vha vhashumeli vha fulufhedzeaho vha Mudzimu vhane vha bva kha ‘tshaka dzoṱhe na ndimi dzoṱhe, vhahau na vhatsinda vhoṱhe.’ Na vhenevha a vha tsha ḓo fa. (Ndzumbululo 5:9, 10; 14:1-4; 1 Vha-Korinta 15:42-44, 53) Vhunzhi havho vho no vha ṱaḓulu, nahone masalela avho ane a kha ḓi vha kha ḽifhasi zwino a vhumba “mukoma a fulufhedzeaho na wa vhuṱali,” ane a tikedza nga u fulufhedzea na madzangalelo a wonoyo Muvhuso fhano kha ḽifhasi.—Mateo 24:45-47.
9, 10. (a) Ndi ṱhuṱhuwedzo dzifhio dzine dza fhandekanya na dzine dza tshinya, dzine dza ḓo fheliswa nga Muvhuso? (b) Arali ri sa ṱoḓi u vha maswina a Muvhuso wa Mudzimu, ndi zwikwekwe zwifhio zwine ra fanela u zwi iledza?
9 Hu si kale, nga tshifhinga tshee a tshi vhea, Yehova u ḓo rumela mmbi dzawe dzi lozwaho uri dzi kunakise ḽifhasi. Dzi ḓo fhelisa tshoṱhe vhathu vhane vha hana nga khole u ṱhonifha vhuvhusahoṱhe hawe na vhane vha nyadza ndugiselelo dzawe dza lufuno dzine a dzi ita nga Yesu Kristo. (2 Vha-Thesalonika 1:6-9) Ḽeneḽo ḽi ḓo vha ḓuvha ḽa Yehova, ḽe ḽa lindelwa u bva kale u itela uri a lwelwe sa Muvhusahoṱhe. “Hee, ḓuvha ḽa Yehova ḽi khou ḓa, ḽa tshiṱuhu, ḽa dzimbiti, ḽa u duga ha vhuhali . . . uri vhavhi vha re khaḽo’ vha lovhe.” (Yesaya 13:9) “Ḓuvha iḽo ḽi ḓo vha ḓuvha ḽa dzimbiti, ḓuvha ḽa u tshinywa na ḽa u tshinyala tshoṱhe, ḓuvha ḽa swiswi ḽine ḽa tou ‘nzwii,’ ḓuvha ḽa gole ḽa dunzi ḽi sá vhonadzi.”—Tsefanya 1:15.
10 Vhurereli hoṱhe ha mazwifhi na mivhuso yoṱhe ya vhathu na mmbi dzavho, zwe zwa shumiswa luvhi nga muvhusi muvhi a sa vhonali wa ḽino shango, zwi ḓo fheliswa tshoṱhe. Vhoṱhe vhane vha ḓikonanya na ḽino shango nga u tshila nga nḓila ya tseḓa, nga u sa fulufhedzea, nga u ḓifara luvhi vha ḓo fheliswa. Sathane na madimoni awe vha ḓo valelwa miṅwaha ya tshigidi uri vha sa tsha ṱuṱuwedza vhathu kha ḽifhasi. Nga zwenezwo, Muvhuso wa Mudzimu u ḓo langa mafhungo oṱhe a kha ḽifhasi. I ḓo vha mbofholowo yavhuḓi lungafhani kha vhoṱhe vhane vha funa u luga!— Ndzumbululo 18:21, 24; 19:11-16, 19-21; 20:1, 2.
Nḓila Ya U Swikelela Ndivho Dza Muvhuso
11. (a) Muvhuso wa Vhumessia u ḓo khunyeledza hani ndivho ya Yehova nga ḽifhasi? (b) U vhusa ha Muvhuso zwi ḓo amba mini kha vhathu vhane vha ḓo vha vha tshi khou tshila kha ḽifhasi nga tshenetsho tshifhinga?
11 Muvhuso wa Vhumessia u ḓo khunyeledza tshoṱhe ndivho ya u thoma ya Mudzimu nga ḽifhasi. (Genesi 1:28; 2:8, 9, 15) U swika na ṋamusi, vhathu vho kundwa u tikedza yeneyo ndivho. Naho zwo ralo, ‘shango ḽiswa ḽine ḽa khou ḓa’ ḽi ḓo vha nga fhasi ha Yesu Kristo, Murwa-muthu. Vhoṱhe vhane vha ḓo ponyoka musi Yehova a tshi fhelisa ano maitele a kale vha ḓo shuma nga vhuthihi nga fhasi ha Kristo ane a vha Khosi, vha ḓo takalela u ita tshiṅwe na tshiṅwe tshine a vha laedza tshone, u itela uri ḽifhasi ḽoṱhe ḽi vhe paradiso. (Vha-Heberu 2:5-9) Vhathu vhoṱhe vha ḓo takalela mushumo wa zwanḓa zwavho nahone vha vhuyelwa vhukuma nga zwithu zwinzhi zwine zwa ḓo bveledzwa nga ḽifhasi.—Psalme ya 72:1, 7, 8, 16-19; Yesaya 65:21, 22.
12. Vhane vha ḓo vhusiwa nga Muvhuso vha ḓo fhelela hani muhumbuloni na muvhilini?
12 Musi Adamu na Eva vha tshi sikiwa, vho vha vho fhelela, nahone yo vha i ndivho ya Mudzimu uri ḽifhasi ḽi ḓale nga vhana vhavho, vhoṱhe vho vha vhe na muhumbulo na muvhili wo fhelelaho. Yeneyo ndivho i ḓo ḓadzea nga ho fhelelaho nga fhasi ha Muvhuso. Hezwi zwi ṱoḓa uri hu bviswe mvelelo dzoṱhe dza tshivhi nahone u itela uri yeneyo ndivho i ḓadzee, Kristo u ḓo vha Khosi na Tshifhe Muhulu. A sa fheli mbilu, u ḓo thusa vhavhusiwa vhawe vha thetshelesaho uri vha vhuyelwe nga ndeme ya tshiṱhavhelo tsha u hangwela zwivhi tsha vhutshilo hawe ha muthu.
13. Ndi tshanduko dzifhio dzine vhathu vha ḓo dzi vhona muvhilini nga fhasi ha vhuvhusi ha Muvhuso?
13 Nga fhasi ha vhuvhusi ha Muvhuso, vhadzulapo vha kha ḽifhasi vha ḓo vhona tshanduko i swayeaho muvhilini wavho. “Ndi hone hu tshi ḓo bonyolowa maṱo a mabofu; ndi hone hu tshi ḓo thivhululwa dzinḓevhe dza madzinga-nḓevhe. Ndi hone wa tshihole a tshi ḓo fhufha vhunga phala; lulimi lwa tshimuma lu ḓo fhululedza.” (Yesaya 35:5, 6) Lukanda lwo tshinyiwaho nga vhulala kana vhulwadze lu ḓo dovha lwa vha luswa u fhira lwa ṅwana, nahone malwadze a sa fholi a ḓo dzhielwa vhudzulo nga mutakalo wavhuḓi. “Ndi hone ṋama yawe i tshi ḓo dovha ya khwaṱha ya fhira ya ḓafu, a vhuyelela maḓuvhani a vhutuka.” (Yobo 33:25) Hu ḓo ḓa ḓuvha ḽine ha sa ḓo vha na ane a ri “Ndi a lwala.” Ndi ngani? Nga ṅwambo wa uri vhathu vha ofhaho Mudzimu vha ḓo vhofhololwa kha muhwalo wa tshivhi na mvelelo dzatsho mmbi. (Yesaya 33:24; Luka 13:11-13) Ee, Mudzimu “u ḓo fhuluṱa maṱodzi oṱhe maṱoni avho, lufu a lu tsha ḓo vha hone, na vhuṱungu na zwililo na tshengelo a zwi tsha ḓo vha hone, ngauri zwa kale zwo fhela.”—Ndzumbululo 21:4.
14. Uri vhathu vha fhelele hu ṱoḓea mini?
14 Naho zwo ralo, u vha vho fhelelaho a zwi kateli u vha na muvhili na muhumbulo wo fhelelaho fhedzi. Zwi katela u sumbedza nga ho teaho pfaneleo dza Yehova, samusi ro itwa ‘nga tshifanyiso tsha Mudzimu, ra nga ene.’ (Genesi 1:26) Uri ri kone u swikelela zwenezwo, ri fanela u guda zwinzhi. Shangoni ḽiswa, ‘hu ḓo vha na u luga.’ Nga zwenezwo, samusi Yesaya o dzula o amba “vhathu mashangoni oṱhe vha ḓo funziwa zwivhuya.” (2 Petro 3:13; Yesaya 26:9) Yeneyi pfaneleo i tshimbidzana na mulalo—vhukati ha vhathu vha matsinde oṱhe, vhukati ha khonani khulwane, muṱani wau, nahone zwihuluhulu na Mudzimu. (Psalme ya 85:10-13; Yesaya 32:17) Vhane vha guda u luga vha ḓo bvela phanḓa vha tshi gudiswa u ita zwine Mudzimu a zwi funa. Musi zwine Mudzimu a zwi funa zwi tshi nwelela mbiluni dzavho, vha ḓo tevhela nḓila dzawe kha masia oṱhe a vhutshilo havho. Vha ḓo kona u amba maipfi a fanaho na a Yesu musi a tshi ri, “ndi dzula ndi tshi ita zwi mu takadzaho.” (Yohane 8:29) Vhutshilo vhu ḓo takadza lungafhani musi zwenezwo zwi tshi itea kha vhathu vhoṱhe!
Zwithu Zwo Ḓadzeaho Zwine Ra Vho Zwi Vhona
15. Ni tshi shumisa mbudziso dzi re kha ino phara, ombedzelani zwithu zwo khunyeledzwaho nga Muvhuso nahone ni sumbedze zwine ra fanela u zwi ita zwino.
15 Ri a kona u zwi vhona zwithu zwi takadzaho zwe zwa khunyeledzwa nga Muvhuso wa Mudzimu na vhane vha ḓo vhuswa ngawo. Mbudziso na maṅwalo a tevhelaho zwi ḓo ni humbudza nga ha zwiṅwe zwa zwithu zwo khunyeledzwaho, kathihi na zwithu zwine vhoṱhe vhane vha ḓo vhuswa nga Muvhuso vha nga zwi ita nahone vha fanela u zwi ita zwino.
Ndi vhafhio vhe Muvhuso wa vha dzhiela vhukando, nahone ha vha na mvelelo dzifhio? (Ndzumbululo 12:7-10, 12)
Ndi u kuvhanganywa ha masalela a tshigwada tshifhio he ha itwa u bva tshee Kristo a vhewa kha khuluṋoni? (Ndzumbululo 14:1-3)
Ndi mushumo ufhio we Yesu a dzula o amba uri u ḓo u ita nga murahu ha vhuṱungu vhuhulu, samusi zwo ṅwaliwa kha Mateo 25:31-33?
Ndi ufhio mushumo wa ndeme une wa khou itwa ṋamusi? Ndi vhafhio vhane vha khou ṱanganela khawo? (Psalme ya 110:3; Mateo 24:14; Ndzumbululo 14:6, 7)
Ndi ngani vhahanedzi vha politiki na vha vhurereli vha songo kona u thivhela mushumo wa u huwelela? (Sakaria 4:6; Mishumo 5:38, 39)
Ndi tshanduko dzifhio dzo iteaho kha vhe vha ḓivhea nga fhasi ha vhuvhusi ha Muvhuso? (Yesaya 2:4; 1 Vha-Korinta 6:9-11)
Muvhuso Wa Miṅwaha Ya Tshigidi
16. (a) Vhuvhusi ha Kristo vhu ḓo fhedza tshifhinga tshingafhani? (b) Ndi zwifhio zwithu zwavhuḓi zwine zwa ḓo itwa nga tshenetsho tshifhinga na nga murahu?
16 Musi Sathane na madimoni awe vho no valelwa mugodini, Yesu Kristo na maḽaifa nae a 144 000 vha ḓo vhusa nae sa mahosi na vhotshifhe miṅwaha ya tshigidi. (Ndzumbululo 20:6) Nga tshenetsho tshifhinga, vhathu vha ḓo itwa uri vha fhelele, tshivhi na lufu zwo ḓiswaho nga Adamu zwi ḓo fheliswa tshoṱhe. Mafheloni a Vhuvhusi ha Miṅwaha ya Tshigidi, musi Yesu o ita mushumo wawe sa Messia ane a vha Khosi na Tshifhe, u ḓo “kumedza vhuhosi” kha Khotsi awe, “uri Mudzimu a vhe ene tshoṱhe kha vhoṱhe.” (1 Vha-Korinta 15:24-28) Nga tshenetsho tshifhinga, Sathane u ḓo vhofhololwa lwa tshifhinganyana uri a linge vhathu vho rengululwaho u itela u vhona arali vha tshi ḓo tikedza vhuvhusahoṱhe ha Yehova. Nga murahu ha wonoyo mulingo wa u fhedza, Yehova u ḓo fhelisa Sathane na mashandukwa e a ima nae. (Ndzumbululo 20:7-10) Vhe vha tikedza vhuvhusahoṱhe ha Yehova—ndugelo yawe ya u vhusa—vha ḓo vha vho sumbedza nga vhuḓalo u fulufhedzea havho. Nga zwenezwo vha ḓo vha na vhushaka havhuḓi na Yehova, a vha ṱanganedza sa vharwa na vhananyana vhawe, a vha ṋea vhutshilo vhu sa fheli.—Vha-Roma 8:21.
17. (a) Hu ḓo itea mini kha Muvhuso vhufheloni ha miṅwaha ya tshigidi? (b) Muvhuso ‘a u nga tshinyali lini na lini’ nga muhumbulo ufhio?
17 Nga zwenezwo, mushumo wa Yesu na wa vha 144 000 u ḓo shanduka fhano kha ḽifhasi. Mushumo wavho wa tshifhingani tshi ḓaho u ḓo vha ufhio? Bivhili a i ri vhudzi. Fhedzi arali ra tikedza vhuvhusahoṱhe ha Yehova nga u fulufhedzea, ri ḓo vha ri tshi kha ḓi tshila vhufheloni ha Vhuvhusi ha Miṅwaha ya Tshigidi u itela u vhona zwe Yehova a zwi dzudzanyela vhone kathihi na fhethu hoṱhe hu mangadzaho. Naho zwo ralo, vhuvhusi ha Kristo ha miṅwaha ya tshigidi vhu ḓo vha “ha lini na lini” nahone Muvhuso wawe “a u nga tshinyali.” (Daniele 7:14) Nga muhumbulo ufhio? Ngauri honovhu vhuvhusi a vhu nga ṋewi vhaṅwe vhathu vha re na ndivho dzo fhambanaho, samusi Yehova a tshi ḓo vha e Muvhusi. Hafhu, wonoyo Muvhuso ‘a u nga tshinyali lini na lini’ ngauri zwine wa ḓo zwi khunyeledza zwi ḓo vha hone nga hu sa fheli. (Daniele 2:44) Nahone Messia ane a vha Khosi na Tshifhe na khonani dzawe dzine dza vha mahosi na vhotshifhe dzi ḓo huliswa lwa tshoṱhe nga ṅwambo wa u shumela Yehova nga u fulufhedzea.
Mvusuluso
• Ndi ngani Muvhuso wa Mudzimu u tshone tshipiringululi tshi tshoṱhe tsha vhuleme ha vhathu? Khosi ya Muvhuso wa Mudzimu yo thoma lini u vhusa?
• Ndi mini zwine zwa ni takadza vhukuma nga ha Muvhuso wa Mudzimu na zwine wa ḓo zwi khunyeledza?
• Ndi zwifhio zwithu zwo khunyeledzwaho nga Muvhuso zwine ra vho zwi vhona zwino, nahone ri na mukovhe ufhio kha zwenezwi?
[Mbudziso Dza Pfunzo]
[Tshifanyiso kha siaṱari 92, 93]
Nga fhasi ha Muvhuso wa Mudzimu, vhathu vhoṱhe vha ḓo guda u luga
