Ndima Ya Vhufumbili
Dzulani No Lindela Ḓuvha Ḽa Yehova
1. Musi ni tshi thoma u guda uri u vhofhololwa kha vhuṱungu ha ano maitele a kale hu tsini, no ḓipfa hani?
TSHIṄWE tsha zwithu zwa ndeme tshe na tshi guda Bivhilini yaṋu ndi uri ndivho ya Yehova ndi u ita uri ḽifhasi ḽoṱhe ḽi vhe paradiso. Kha ḽeneḽo shango ḽiswa, a hu tsha ḓo vha na nndwa, vhuvemu, vhushai, vhulwadze, tshengelo, na lufu. Na vhafu vha ḓo dovha vha tshila. Ndi zwilavhelelwa zwavhuḓi lungafhani zwenezwo! Uri zwenezwo zwi tsini vhukuma, zwi khwaṱhisedzwa nga vhuṱanzi ha uri u vha hone ha Kristo hu sa vhonali sa Khosi i vhusaho ho thoma nga 1914 nahone u bva tsheetsho ro vha ri tshi khou tshila maḓuvhani a vhufhelo ha ḽino shango ḽivhi. Musi ano maḓuvha a vhufhelo a tshi fhela, Yehova u ḓo fhelisa ano maitele a zwithu nahone a ḓisa shango ḽiswa ḽo fulufhedziswaho!
2. “Ḓuvha ḽa Yehova” ndi mini?
2 Bivhili i vhidza tshenetshi tshifhinga tsha ndozwo ine ya khou ḓa uri ndi “ḓuvha ḽa Yehova.” (2 Petro 3:10, NW) Ndi “ḓuvha ḽa mbiti dza Yehova” dzine dza ḓo ḓela shango ḽoṱhe ḽa Sathane. (Tsefanya 2:3) Ḽi ḓo khunyeledzwa nga “nndwa ya ḽone ḓuvha ḽihulu ḽa Mudzimu, Mu-vhusa-hoṱhe. . . . huné nga Tshi-Heberu ha pfi: Haramagedo,” ine khayo “mahosi a ḽifhasi ḽoṱhe” a ḓo fheliswa. (Ndzumbululo 16:14, 16) Naa nḓila ine na tshila ngayo i a sumbedza uri ni a tenda uri ḽeneḽi “ḓuvha ḽa Yehova” ḽi tsini?—Tsefanya 1:14-18; Yeremia 25:33.
3. (a) Ḓuvha ḽa Yehova ḽi ḓo ḓa lini? (b) U sa dzumbulula ha Yehova “ḓuvha iḽo na tshone tshikhathi” zwi vhuyedza hani?
3 Bivhili a i ri vhudzi nga ho livhaho ḓuvha ḽine Yesu Kristo a ḓo ḓa ngaḽo sa Muhaṱuli o rumiwaho nga Yehova uri a fhelise maitele a zwithu a Sathane. Yesu o ri: “Ḽone ḓuvha iḽo na tshone tshikhathi a huna a zwi ḓivhaho, na vharuṅwa vha ngei ṱaḓulu na ene Murwa a vha zwi ḓivhi; a zwi ḓivhaho ndi Khotsi é eṱhe.” (Marko 13:32) Vhathu naho vhe vhafhio vhane vhukuma vha sa fune Yehova, vha ḓo ḓivhudza uri ḓuvha ḽawe ḽi tshee kule nahone vha thoma u tovhola zwithu zwa shango. Fhedzi vhane ngangoho vha funa Yehova vha ḓo mu shumela nga mbilu yoṱhe, hu sa londwi uri vhufhelo ha ano maitele a zwithu vhu ḓo ḓa lini.—Psalme ya 37:4; 1 Yohane 5:3.
4. Ndi tsevho ifhio ye Yesu a i ṋea?
4 Musi a tshi sevha vhane vha funa Yehova, Yesu u ri: “Lavhelani ni karuwe, ngauri a ni ḓivhi uri tshifhinga tshazwo ndi tsha lini.” (Marko 13:33-37) U ri ṱuṱuwedza uri ri sa tendele u ḽa na u nwa kana u “vhilaelela vhutshilo” zwi tshi ri langa vhukuma lune ra kundwa u vhona vhuvhi ha misini yashu.—Luka 21:34-36; Mateo 24:37-42.
5. Samusi Petro o ṱalutshedza, ḓuvha ḽa Yehova ḽi ḓo ḓisa mini?
5 Na Petro u ri ṋea nyeletshedzo i fanaho ya u dzula ro lindela “u ḓa ha ḓuvha ḽa Murena, [r]i tshi rumeledza uri ḽi ṱavhanye. Ndi musi uné maṱaḓulu a ḓo duga ngawo’ a fhelela, dzithikho dza swa dza ṋoka.” Mivhuso yoṱhe ya vhathu—“maṱaḓulu”—i ḓo fheliswa, u katela na vhathu vhavhi nga u tou angaredza—“ḽifhasi”—na “dzithikho” dzaḽo, mihumbulo na mishumo ya ḽino shango ḽivhi, i ngaho mavhonele aḽo a u ḓivhofholola kha Mudzimu na vhuaḓa haḽo na matshilele a u funa zwithu zwi vhonalaho. Zwenezwi zwi ḓo dzhielwa vhudzulo nga “maṱaḓulu maswa [Muvhuso wa Mudzimu wa ṱaḓulu] na ḽifhasi ḽiswa [vhathu vhane vha ḓo tshila kha ḽifhasi ḽiswa]” zwine “u luga ha fhaṱa khazwo’.” (2 Petro 3:10-13) Zwenezwi zwiitea zwa shango zwi ofhisaho zwi ḓo itea nga kathihi nahone nga ḓuvha na tshikhathi zwi songo lavhelelwaho.—Mateo 24:44.
Dzulani No Fhaṱutshela Tshiga
6. (a) Phindulo ya Yesu kha mbudziso ya vhafunziwa vhawe yo ḓadzea kha maitele a Tshiyuda u swika kha vhuimo vhufhio? (b) Ndi zwifhio zwipiḓa zwa phindulo ya Yesu zwine zwa amba nga zwiitea na mavhonele e a thoma nga 1914 u ya phanḓa?
6 Nga ṅwambo wa zwifhinga zwine ra khou tshila khazwo, ri fanela u ḓivha zwavhuḓi zwidodombedzwa zwa tshiga tshine tsha katela zwithu zwinzhi tshi ṱalulaho maḓuvha a vhufhelo—“vhufhelo ha maitele a zwithu.” (NW) Humbulani uri musi Yesu a tshi fhindula mbudziso ya vhafunziwa vhawe, yo ṅwalwaho kha Mateo 24:3, zwiṅwe zwa zwithu zwe a zwi ṱalusa kha dzindimana 4 u ya kha 22 zwo ḓadzeanyana kha maitele a Tshiyuda vhukati ha 33 na 70 C.E. Fhedzi honoho vhuporofita ho ḓadzea nga nḓila khulwane u bva nga 1914, tshifhingani tsha “u vha hone [ha Kristo] na tsha vhufhelo ha maitele a zwithu.” (NW) Mateo 24:23-28 i amba nga zwine zwa ḓo itea u bva nga 70 C.E. u swika kha tshifhinga tsha u vha hone ha Kristo. Zwiitea zwo ṱaluswaho kha Mateo 24:29–25:46 zwi ḓo itea tshifhingani tsha vhufhelo.
7. (a) Ndi ngani ri tshi fanela u fhaṱutshela nḓila ine zwiimo zwa zwino zwa ḓadzisa ngayo tshiga? (b) Fhindulani mbudziso dzi re magumoni a heyi phara, ni sumbedze nḓila ye tshiga tsha ḓadzea ngayo u bva nga 1914.
7 Ri fanela u fhaṱutshela zwiitea na mavhonele ane a ḓadzisa tshiga. U ṱumanya zwenezwi zwithu na vhuporofita ha Bivhili zwi ḓo ri thusa uri ri dzule ro lindela ḓuvha ḽa Yehova. Zwi ḓo dovha zwa ita uri ri kone u ṱuṱuwedza musi ri tshi sevha vhaṅwe uri ḽeneḽo ḓuvha ḽi tsini vhukuma. (Yesaya 61:1, 2) Ri na zwenezwi zwipikwa muhumbuloni, kha ri vusuluse mbudziso dzi tevhelaho dzine dza ombedzela zwipiḓa zwa tshiga, samusi zwo ṅwaliwa kha Mateo 24:7 na kha Luka 21:10, 11.
Maipfi ane a ri ‘lushaka lu ḓo vutshela lushaka na muvhuso u ḓo vutshela muvhuso’ o ḓadzea hani nga nḓila i swayeaho u bva nga 1914? Malugana na nndwa, ndi mini zwo iteaho u bva tsheetsho?
Nga 1918, ndi vhulwadze vhufhio ho vhulayaho vhathu vhanzhi u fhira Nndwa ya Shango ya U Thoma? Hu sa londwi nḓivho ya vhathu ya zwa ngalafho, ndi malwadze afhio ane a kha ḓi vhulaha vhathu vha dzimilioni?
U ṱahela ha zwiḽiwa ho kwama ḽifhasi u swika kha vhuimo vhufhio hu sa londwi u bvelela ha zwa saintsi kha ḓana ḽa miṅwaha ḽo fhiraho?
Ndi mini zwine zwa ita uri ni tende uri 2 Timotheo 3:1-5, 13 a i khou ṱalusa nḓila ye vhutshilo ha vha vhu ngayo, fhedzi i khou ṱalusa nḓila ye vhuimo ha ṋaṋa ngayo musi ri tshi khou ḓi sendela maḓuvhani a vhufhelo?
U Khethekanywa Ha Vhathu
8. (a) Ndi zwifhio zwiṅwe zwo ṱaluswaho kha Mateo 13:24-30, 36-43, zwe Yesu a zwi ṱumanya na vhufhelo ha maitele a zwithu? (b) Tshifanyiso tsha Yesu tshi amba mini?
8 Hu na dziṅwe mvelelo dza ndeme dze Yesu a dzi ṱumanya na vhufhelo ha maitele a zwithu. Iṅwe yadzo ndi u khethekanywa ha “vhana vha muvhuso” kha “vhana vha vhuvhi.” Yesu o amba nga ha zwenezwi kha tshifanyiso tshawe nga ha tsimu ya mavhele ye khayo swina ḽa zwala mufhunga. Kha tshifanyiso tshawe, “mavhele” a imela Vhakriste vha ngoho vho ḓodzwaho. “Mufhunga” ndi vhane vha ḓiamba uri vha Vhakriste, fhedzi vha ḓisumbedza uri ndi “vhana vha vhuvhi” nga ṅwambo wa u kwambatela shango ḽine Diabolo a vha muvhusi waḽo. Vhenevha vha khethekanywa kha “vhana vha muvhuso [wa Mudzimu]” nahone vho swayelwa u lozwiwa. (Mateo 13:24-30, 36-43) Naa honohu u khethekanywa ho no itea zwa vhukuma?
9. (a) Nga murahu ha Nndwa ya Shango ya U Thoma, ndi u khethekanywa hufhio huhulwane he ha itea kha vhoṱhe vhane vha ḓiamba uri vha Vhakriste? (b) Vhakriste vho ḓodzwaho vho sumbedza hani uri vho vha vhe vhashumeli vha ngoho vha Muvhuso?
9 Nga murahu ha Nndwa ya Shango ya u Thoma, ho khethekanywa vhoṱhe vhane vha ḓiamba uri vha Vhakriste, vha vha zwigwada zwivhili: (1) Vhafunzi vha ḽa Vhudzhagane na vhatevheli vhavho, vhe vha tikedza nga maanḓa Ndangano ya Dzitshaka (ine zwino ya vha Yuno) ngeno vha tshi kha ḓi tikedza vhukuma tshaka dzavho, na (2) Vhakriste vha ngoho vha nga murahu ha nndwa, vhe vha tikedza tshoṱhe Muvhuso wa Mudzimu wa Vhumessia, hu si tshaka dza ḽino shango. (Yohane 17:16) Vhenevha vho ḓisumbedza uri ndi vhashumeli vha ngoho vha Muvhuso wa Mudzimu nga u huwelela “mafhungo-maḓifha aya a muvhuso wa ṱaḓulu” ḽifhasini ḽoṱhe. (Mateo 24:14) Ha vha na mvelelo dzifhio?
10. Ndi ifhio mvelelo ya u thoma ya mushumo wa u huwelela nga ha Muvhuso?
10 U thomani, ho kuvhanganywa masalela a vho ḓodzwaho nga muya wa Mudzimu, vhane vha vha na fulufhelo ḽa u vha na Kristo Muvhusoni wa ṱaḓulu. Naho vhenevho vhathu vho vha vho balangana na dzitshaka, vho kuvhanganyelwa ndanguloni i re na vhuthihi. U swaiwa ha vhenevha vhaḓodzwa hu tsini na u fhela.—Ndzumbululo 7:3, 4.
11. (a) Ndi ufhio mushumo wa u kuvhanganya une wa kha ḓi bvela phanḓa, nahone u tendelana na vhuporofita vhufhio? (b) U ḓadzea ha honovhu vhuporofita zwi sumbedza mini?
11 Nga murahu ha zwenezwo, nga fhasi ha vhulivhisi ha Kristo, ho thoma u kuvhanganywa “gogo ḽihulu . . . ḽa tshakha na khoro, na mbeu na ndimi dzoṱhe.” Vhenevha vha vhumba vha “dziṅwe nngu” vhane vha ḓo ponyoka ‘maṱungu mahulu’ vha dzhena shangoni ḽiswa ḽa Mudzimu. (Ndzumbululo 7:9, 14; Yohane 10:16) Wonoyu mushumo wa u huwelela Muvhuso wa Mudzimu vhufhelo vhu sa athu ḓa u kha ḓi bvela phanḓa na zwino. Nga u fulufhedzea, vha gogo ḽihulu ḽa dziṅwe nngu, vhane zwino tshivhalo tshavho tsha vha dzimilioni, vha thusa vha masalela o ḓodzwaho u huwelela mulaedza wa ndeme wa Muvhuso. Wonoyu mulaedza u khou pfiwa kha tshaka dzoṱhe.
Hu Ḓo Itea Mini Tshifhingani Tshi Ḓaho?
12. Ndi mushumo mungafhani wa u huwelela une wa fanela u itwa ḓuvha ḽa Yehova ḽi sa athu swika?
12 Zwoṱhe zwe ra amba ngazwo afho nṱha zwi sumbedza uri ri tsini na vhufhelo ha maḓuvha a vhufhelo na uri ḓuvha ḽa Yehova ḽi tsini. Fhedzi naa hu kha ḓi vha na vhuporofita vhune ha fanela u ḓadzea ḓuvha ḽi ofhisaho ḽi sa athu thoma? Ee. Zwi re zwone ndi uri u fhambanywa ha vhathu malugana na mafhungo a Muvhuso, a hu athu fhela. Huṅwe fhethu he vhahashu vha tovholwa vhukuma miṅwaha minzhi, zwino ndi hone hu tshi khou vha na nyengedzeo ya vhafunziwa vhaswa. Na fhethu hune vhathu vha hana mafhungo maḓifha, tshilidzi tsha Yehova tshi khou sumbedzwa nga u ṱanziela hashu. Ngauralo, bvelani phanḓa ni tshi huwelela! Yesu u ri khwaṱhisedza uri musi mushumo u tshi fhela, vhufhelo vhu ḓo ḓa.
13. Samusi zwo ṅwaliwa kha 1 Vha-Thesalonika 5:2, 3, ndi tshiitea tshifhio tshi swayeaho tshine tsha kha ḓi ḓo itea, nahone zwi ḓo amba mini kha riṋe?
13 Vhuṅwe vhuporofita ha Bivhili ha ndeme vhukuma vhu amba hu tshee nga phanḓa u ri: “Arali hu tshi pfi: Ḽo lala, hó navhiwa, ndi hone ka-thihi fhedzi vha tshi ḓo ḓelwa nga tshínyalo, sa vhuṱungu vhu tshi wela musadzi we tshifhinga tshawe tsha swika; na hone a vha nga ponyoki na ka-thihi.” (1 Vha-Thesalonika 5:2, 3) Ri kha ḓi ḓo vhona nḓila ine nḓivhadzo ine ya ri “ḽo lala, hó navhiwa” ya ḓo itwa ngayo. Fhedzi a zwi nga ambi uri ngangoho vharangaphanḓa vha shango vha ḓo vha vho piringulula vhuleme ha vhathu. Vhane vha dzula vho lindela ḓuvha ḽa Yehova vha nga si xedzwe nga yeneyo nḓivhadzo. Vha a zwi ḓivha uri nga murahunyana ha zwenezwo, hu ḓo ḓa ndozwo nga u ṱavhanya.
14. Ndi zwiitea zwifhio zwine zwa ḓo itea tshifhingani tsha maṱungu mahulu, nahone nga nḓila-ḓe?
14 Mathomoni a maṱungu mahulu, vhavhusi vha ḓo vutshela Babele Ḽihulu, vhurereli ha mazwifhi ha shango ḽoṱhe, nahone vha ḽi lozwa. (Mateo 24:21; Ndzumbululo 17:15, 16) Nga murahu ha zwenezwo, tshaka dzi ḓo lwa na vhane vha tikedza vhuvhusahoṱhe ha Yehova, dza ita uri Yehova a halifhele mivhuso ya politiki na vhatikedzi vhayo, zwa ita uri a vha fhelise tshoṱhe. Zwenezwo zwi ḓo vha u fhela ha maṱungu mahulu nga Haramagedo. Nga zwenezwo, Sathane na madimoni awe vha ḓo valelwa mugodini, vha si tsha kona u vha na ṱhuṱhuwedzo kha vhathu. Zwenezwi zwi ḓo vha u fhela ha ḓuvha ḽa Yehova musi dzina ḽawe ḽi tshi khethiwa.—Hesekiele 38:18, 22, 23; Ndzumbululo 19:11–20:3.
15. Ndi ngani hu tshi ḓo vha hu vhutsilu u humbula uri ḓuvha ḽa Yehova ḽi tshee kule?
15 Vhufhelo ha ano maitele vhu ḓo ḓa nga tshifhinga tsho teaho, u ya nga nzudzanyo ya Mudzimu. A vhu nga lengi. (Habakuku 2:3) Humbulani uri u lozwiwa ha Yerusalema nga 70. C.E. ho ḓa nga u ṱavhanya, musi Vhayuda vha songo zwi lavhelela, musi vha tshi humbula uri khombo yo fhira. Nahone hu pfi mini nga Babele ḽa kale? Ḽo vha ḽi na maanḓa, ḽi tshi ḓifulufhela, nahone ḽo tangiwa nga mbondo khulwane. Fhedzi ḽo wa nga vhusiku vhuthihi. Ngauralo, ano maitele mavhi a zwithu a ḓo fhela nga u ṱavhanya. Musi tshenetsho tshifhinga tshi tshi swika, u nga ri ḽi nga ri wana ri vhathihi vhurabelini ha ngoho, ro lindela ḓuvha ḽa Yehova.
Mvusuluso
• Ndi ngani zwi zwa ndeme u dzula ri tshi humbula ḓuvha ḽa Yehova? Nahone ri nga zwi itisa hani zwenezwo?
• Ri kwamea hani nga u khethekanywa ha vhathu hune ha khou itea?
• Ndi zwifhio zwine zwa kha ḓi ḓo itea musi ḓuvha ḽa Yehova ḽi sa athu thoma? Ngauralo, ri fanela u vha ri tshi khou ita mini?
[Mbudziso Dza Pfunzo]
[Zwifanyiso kha siaṱari 180, 181]
Maḓuvha a vhufhelo a ḓo fhela nga u ṱavhanya musi hu tshi lozwiwa maitele a Sathane
