NDI ḓivha tshithu tshavhuḓi. Ni nga takalela u tshi pfa?— Sedzani tshanḓa tshaṋu. Khothani minwe yaṋu. Dzhiani tshiṅwe tshithu. Tshanḓa tshaṋu tshi nga ita zwithu zwinzhi, nahone tshi nga zwi ita nga nḓila yavhuḓi. Ni a ḓivha uri ndi nnyi o itaho tshanḓa?—

Ndi We a ita milomo yashu, ṋingo yashu, na maṱo ashu. Ndi Mudzimu, Khotsi a Mufunzi Muhulu. A thi ri ri a takala nge Mudzimu o ri ṋea maṱo?— Ri kona u vhona zwithu zwinzhi ngao. Ri kona u vhona maluvha. Ri kona u vhona hatsi vhudala na lutombo. Ri nga vhona na mafhondo a re na nḓala a tshi khou ḽa samusi zwo sumbedzwa kha hetshi tshifanyiso. Vhukuma, zwi a takadza u vhona zwithu zwine zwa fana na hezwi a thi ri?—

Fhedzi ndi nnyi we a ita zwenezwi zwithu? Naa zwo itwa nga muthu wa ṋama? Hai. Vhathu vha nga fhaṱa dzinnḓu. Fhedzi a hu na muthu ane a nga ita uri hatsi vhu mele. Vhathu vha nga si kone u ita mafhondo, maluvha, kana zwiṅwe zwithu zwi tshilaho. No vha ni tshi zwi ḓivha zwenezwo?—

Mudzimu ndi ene we a ita zwenezwi zwithu zwoṱhe. Mudzimu o ita maṱaḓulu na ḽifhasi. O ita na vhathu. O sika munna na musadzi vha u thoma. Hezwi ndi zwe Yesu, Mufunzi Muhulu, a zwi funza vhathu.—Mateo 19:4-6.

 Yesu o vha a tshi zwi ḓivha hani uri Mudzimu o sika munna na musadzi? Naa Yesu o zwi vhona Mudzimu a tshi zwi ita?— Ee, o zwi vhona. Yesu o vha e na Mudzimu musi Mudzimu a sika munna na musadzi. Yesu ndi ene muthu wa u thoma we a itwa nga Mudzimu. Yesu o vha e muruṅwa, nahone o tshila ṱaḓulu na Khotsi awe.

Bivhili i ri vhudza uri Mudzimu o ri: “Kha ri ite vhathu.” (Genesi 1:26) Ni a zwi ḓivha uri Mudzimu o vha a tshi khou amba na nnyi?— O vha a tshi khou amba na Murwa wawe. O vha a tshi khou amba na we nga murahu a ḓa kha ḽifhasi nahone a irwa dzina ḽa Yesu.

Naa zwenezwo a zwi takadzi? Edzani u humbula nga zwenezwo! Musi ri tshi thetshelesa Yesu, ri khou funzwa nga we a vha e na Mudzimu musi Mudzimu a tshi ita ḽifhasi na zwiṅwe zwithu zwoṱhe. Yesu o guda zwithu zwinzhi nga u shuma na Khotsi awe ṱaḓulu. Ndi ngazwo Yesu e Mufunzi Muhulu!

Naa ni humbula uri Mudzimu o vha e na vhumvumvu musi a tshee  e eṱhe, a sa athu sika Murwa wawe?— Hai, o vha e si na vhumvumvu. Arali o vha a si na vhumvumvu, ndi ngani o ita zwiṅwe zwithu zwi tshilaho?— O zwi ita ngauri ndi Mudzimu wa lufuno. O vha a tshi ṱoḓa uri vhaṅwe vha tshile nahone vha ḓiphine nga vhutshilo. Ri fanela u livhuha Mudzimu nge a ri ṋea vhutshilo.

Zwoṱhe zwe Mudzimu a zwi ita zwi sumbedza lufuno lwawe. Mudzimu o ita ḓuvha. Ḓuvha ḽi ri ṋea tshedza na vhududo. Zwithu zwoṱhe zwo vha zwi tshi ḓo rothola nahone ho vha hu sa ḓo vha na vhutshilo kha ḽifhasi arali ho vha hu si na ḓuvha. Naa a ni takaleli uri Mudzimu o ita ḓuvha?—

Mudzimu u dovha a ita uri mvula i ṋe. Nga zwiṅwe zwifhinga ni nga kha ḓi sa takalela mvula ngauri a ni koni u ya na tamba nnḓa musi i tshi khou ṋa. Fhedzi mvula i ita uri maluvha a hule. Nga zwenezwo musi ri tshi vhona maluvha o nakaho, ndi nnyi ane ra fanela u mu livhuha?— Mudzimu. Nahone ndi nnyi ane ra fanela u mu livhuha musi ri tshi ḽa mitshelo na miroho i ḓifhaho?— Ri fanela u livhuha Mudzimu ngauri ḓuvha na mvula yawe zwi ita uri zwithu zwi kone u mela.

Kha ri ri muthu u a ni vhudzisa a ri, ‘Naa Mudzimu o sika vhathu na zwipuka?’ Ni nga ri mini?— Zwo luga arali na ri: “Ee, Mudzimu o sika muthu na zwipuka.” Fhedzi hu pfi mini arali muṅwe muthu a sa tendi uri vhukuma Mudzimu o sika vhathu? Hu pfi mini arali muthu a amba uri vhathu vha bva kha zwipuka? Bivhili a i funzi zwenezwo zwithu. I amba uri Mudzimu o sika zwithu zwoṱhe.—Genesi 1:26-31.

Fhedzi muṅwe muthu a nga ni vhudza uri ha tendi kha Mudzimu. Ni nga mu fhindulisa hani?— Mu sumbedzani nnḓu. Mu vhudziseni ni ri: “Ndi nnyi o fhaṱaho yeneyo nnḓu?” Muthu muṅwe na muṅwe u a zwi ḓivha uri hu na we a i fhaṱa. Vhukuma yeneyo nnḓu a yo ngo tou ḓiita!—Vha-Heberu 3:4.

Nga zwenezwo ni ṱuwe na onoyo muthu ni ye ngadeni nahone ni mu sumbedze maluvha. Mu vhudziseni ni ri: “O itwa nga  nnyi?” Ho ngo itwa nga muthu. Samusi na nnḓu i songo tou ḓiita, na ḽeneḽi luvha a ḽo ngo tou ḓiita. Huna we a ḽi ita. Ḽo itwa nga Mudzimu.

Humbelani onoyo muthu uri a thetshelese tshiimbo tsha tshiṋoni. Nga zwenezwo ni mu vhudzise ni ri: “Ndi nnyi we a ita zwiṋoni nahone a zwi funza u imba?” Ndi Mudzimu. Ndi Mudzimu we a ita maṱaḓulu na ḽifhasi na zwithu zwoṱhe zwi tshilaho! Ndi Ene ane a ṋea vhutshilo.

Naho zwo ralo, muṅwe muthu a nga ni vhudza uri u tenda zwine a zwi vhona nga maṱo. A nga kha ḓi ri: ‘A thi tendi tshithu tshine nda sa kone u tshi vhona.’ Vhaṅwe vhathu vha amba uri a vha tendi kha Mudzimu ngauri a vha koni u mu vhona.

Ndi ngoho uri ri nga si kone u vhona Mudzimu. Bivhili i ri: ‘A hu na muthu ane a nga vhona Mudzimu.’ A hu na munna, musadzi, kana ṅwana kha ḽifhasi ane a nga vhona Mudzimu. Nga zwenezwo, a zwo ngo fanela uri muthu a lingedze u ola tshifanyiso tsha Mudzimu. Mudzimu u a ri vhudza uri ri songo lingedza u ita tshifanyiso tshawe. Nga zwenezwo-ha, Mudzimu a nga si takale arali ra vha na zwithu zwo raloho.—Ekisodo 20:4, 5; 33:20; Yohane 1:18.

Fhedzi samusi ni sa koni u vhona Mudzimu, ni zwi ḓivha hani uri ngangoho Mudzimu u hone? Edzani u humbula nga hezwi. Ni a kona u vhona muya?— Hai. A huna muthu ane a nga kona u vhona muya. Fhedzi ni nga vhona zwithu zwine muya wa zwi ita. Ni nga vhona maluvha a tshi dzinginyea musi muya u tshi vhudzula matavhi a muri. Zwenezwo zwi ita uri ni tende uri hu na muya.

Hafhu, ni vhona na zwithu zwe zwa itwa nga Mudzimu. Musi ni tshi vhona maluvha kana tshiṋoni tshi tshilaho, ni vha ni tshi khou vhona tshithu tsho itwaho nga Mudzimu. Zwenezwo zwi ita uri ni tende uri ngangoho hu na Mudzimu.

Muṅwe muthu a nga vhudzisa a ri, ‘Ndi nnyi we a ita ḓuvha na ḽifhasi?’ Bivhili i ri: “U rangani Mudzimu o sika ḽiṱaḓulu na ḽifhasi.”  (Genesi 1:1) Ee, ndi Mudzimu we a ita zwithu zwoṱhe zwi mangadzaho! Ni ḓipfa hani nga zwenezwo?—

Naa u tshila a zwi takadzi? Ri kona u pfa zwiimbo zwavhuḓi zwa zwiṋoni. Ri kona u vhona maluvha na zwiṅwe zwithu zwe zwa itwa nga Mudzimu. Nahone ri nga ḽa zwiḽiwa zwe Mudzimu a ri ṋea.

Ri fanela u livhuha Mudzimu nge a ri ṋea zwenezwi zwithu zwoṱhe. Tsha ndeme vhukuma, ri fanela u mu livhuha nge a ri ṋea vhutshilo. Arali ngangoho ri tshi livhuha zwe Mudzimu a ri itela zwone, ri ḓo ita tshiṅwe tshithu. Tshenetsho tshithu ndi mini?— Ri ḓo thetshelesa Mudzimu, nahone ri ḓo ita zwine a ri vhudza zwone Bivhilini. Nga yeneyo nḓila ri nga sumbedza uri ri funa We a ita zwithu zwoṱhe.