NAA zwi a ni lelutshela u shumela Yehova?— Mufunzi Muhulu ho ngo amba uri zwi ḓo leluwa. Vhusikuni ha musi Yesu a sa athu vhulahwa, o vhudza vhaapostola vhawe a ri: “Arali shango ḽi tshi ni vhénga, ni ḓivhe zwauri ḽo ranga u vhénga nṋe.”—Yohane 15:18.

Petro o vha o zuwa a ri a nga si vhuye a ṱutshela Yesu, fhedzi Yesu o vhudza Petro uri u ḓo mu landula luraru nga honoho vhusiku. Nahone zwa ralo, Petro a mu landula! (Mateo 26:31-35, 69-75) Zwo ḓa hani uri a mu landule?— Zwo itea nga ṅwambo wa uri Petro o tshuwa, na vhaṅwe vhaapostola vho vha vho tshuwa.

Naa ni a ḓivha uri ndi ngani vhaapostola vho tshuwa?— Vho kundwa u ita tshiṅwe tshithu tsha ndeme vhukuma. U ḓivha tshenetsho tshithu zwi ḓo ri thusa uri ri shumele Yehova, hu sa londwi zwine muthu a nga zwi amba kana a ri ita zwone. Ri fanela u thoma nga u vusulusa zwe zwa itea vhusikuni ha u fhedza he Yesu a vhu fhedza na vhaapostola vhawe.

Vho thoma nga u pembelela Paseka vhoṱhe. Hovhu ho vha vhu vhuṱambo ha zwiḽiwa zwo khetheaho ṅwaha muṅwe na muṅwe u itela u humbudza vhathu vha Mudzimu nga u vhofhololwa havho vhupulini ngei Egipita. Nga murahu ha zwenezwo, Yesu a dovha a ita vhuṅwe vhuṱambo ha zwiḽiwa zwo khetheaho navho. Ri ḓo vhu haseledza kha ndima i tevhelaho nahone ra ṱalutshedza nḓila ine honoho vhuṱambo ha ri thusa ngayo u humbula Yesu. Nga murahu ha honoho vhuṱambo na nga murahu ha ṱhuṱhuwedzo ya vhaapostola vhawe, Yesu a vha ranga phanḓa a ya tsimuni ya Getsemane. Henefho ndi  fhethu he vha vha vha tshi hu funesa, he vha vha vha tshi anzela u ya hone.

Yesu a mbo ḓi ṱutshela thungonyana henefho tsimuni u itela u rabela. A dovha a vhudza Petro, Yakobo, na Yohane uri vha rabele. Fhedzi vha eḓela. Yesu o ṱuwa luraru lwoṱhe e eṱhe u itela u rabela, nahone a vhuya luraru a wana Petro na vhaṅwe vho eḓela! (Mateo 26:36-47) Ni a ḓivha uri ndi ngani vho vha vho fanela u dzula vho fhaṱuwa nahone vha rabele?— Kha ri ambe nga zwenezwi zwithu.

Yudasi Iskariote o vha e hone kha Paseka kathihi na Yesu na vhaṅwe vhaapostola nga phanḓanyana nga eneo madekwana. Humbulani uri Yudasi o vha e mbava. Zwino o vha o no vha mufheṱi. O vha a tshi ḓivha fhethu ngei tsimuni ya Getsemane he Yesu a vha a tshi anzela u kuvhangana hone na vhaapostola vhawe. Ndi izwi-ha Yudasi a tshi mbo ḓi ḓa na maswole uri a fare Yesu. Musi vha tshi swika, Yesu a vha vhudzisa a ri: “Ni ṱoḓa nnyi?”

Maswole a fhindula a ri: “Yesu.” Yesu o vha a sa ofhi, nga zwenezwo a fhindula a ri: “Ndi nṋe.” Maswole a mangadzwa nga tshivhindi tsha Yesu lwe a tsetsela murahu nahone a wela fhasi. Nga murahu ha zwenezwo Yesu a ri: ‘Arali ni tshi ṱoḓa nṋe, litshani vhaapostola vhanga vha ṱuwe.’—Yohane 18:1-9.

Musi maswole a tshi fara Yesu nahone a mu vhofha, vhaapostola vha tshuwa nahone vha shavha. Fhedzi Petro na Yohane vho vha vha tshi ṱoḓa u vhona zwine zwa ḓo itea, vha mbo ḓi tevhela vhe kule. Yesu a fheleledza o iswa hayani ha tshifhe muhulu ane a pfi Kayafa. Samusi tshifhe muhulu o vha a tshi ḓivha Yohane, mulindi a mu tendela kathihi na Petro uri vha dzhene muṱani.

Vhotshifhe vho vha vho no kuvhangana hayani ha Kayafa u itela tsengo. Vho vha vha tshi ṱoḓa uri Yesu a vhulahwe. Ndi izwi-ha vha tshi ḓa na vhathu uri vha ambe mazwifhi nga hae. Vhathu vha rwa Yesu nga mavili nahone vha mu vhanda. Petro o vha e nga tsini musi zwenezwi zwoṱhe zwi tshi khou itea.

 Musidzana wa mulindi, we a tendela Petro na Yohane uri vha dzhene, a tshi vhona Petro a mbo ḓi mu fanyisa. A ri: “Na iwe wo vha U na Yesu.” Fhedzi Petro a hana a amba uri Yesu ha mu ḓivhi. Nga murahu ha tshifhinga muṅwe musidzana a mbo ḓi fanyisa Petro nahone a amba na vho imaho nga tsini a ri: “Munna uyu o vha e na Yesu.” Petro a dovha a hanedza a amba uri ha mu ḓivhi. Nga murahu ha tshifhinga, vhaṅwe vhathu vha vhona Petro nahone vha mu vhudza vha ri: “Nangoho, U muṅwe wa vhone.” Lwa vhuraru, Petro o hanedza, a ri: “Muthu uyo a thi mu ḓivhi.” Petro a ita na u ana a amba uri u khou amba ngoho, Yesu a rembuluwa a mu sedza.—Mateo 26:57-75; Luka 22:54-62; Yohane 18:15-27.

Ni a zwi ḓivha uri ndi ngani Petro o zwifha?— Ndi ngauri o vha o tshuwa. Fhedzi ndi ngani o vha o tshuwa? Ndi mini zwe a kundwa u zwi ita uri a vhe na tshivhindi? Humbulani nga hazwo. Yesu o ita mini u itela uri a vhe na tshivhindi?— O rabela Mudzimu, nahone Mudzimu a mu thusa uri a vhe na tshivhindi. Nahone humbulani uri Yesu o vhudza Petro luraru uri a rabele na uri a dzule o fhaṱuwa. Fhedzi ha itea mini?—

 Luraru lwoṱhe, Petro o eḓela. Ho ngo rabela, nahone ho ngo dzula o fhaṱuwa. O vha a songo ḓilugiselela musi Yesu a tshi farwa. Nga murahu tsengoni, musi vha tshi rwa Yesu nahone vha vhamba maano a u mu vhulaha, Petro a tshuwa. Naho zwo ralo, awara dzi si gathi nga phanḓa ha zwenezwo, Yesu o vhudza vhaapostola vhawe uri vha lavhelele mini?— Yesu o vha vhudza uri samusi shango ḽo mu vhenga, na vhone ḽi ḓo vha vhenga.

Kha ri humbule nga ha tshiṅwe tshithu tshine tsha nga itea kha riṋe, tshine tsha fana na tshee tsha itea kha Petro. Kha ri ri ni kilasini musi vhaṅwe vha tshi thoma u amba zwithu zwi si  zwavhuḓi nga ha vhathu vhane vha sa loshe fulaga kana vhane vha sa pembelele Khirisimusi. Ni ḓo ita mini arali muṅwe a ni vhudzisa a ri: “Naa ndi ngoho uri a ni loshi fulaga?” Kana vhaṅwe vha ri: “Ri pfa hu tshi pfi a ni pembeleli Khirisimusi!” Naa ni ḓo ofha u amba ngoho?— Naa ni ḓo zwifha sa Petro?—

Nga murahu, Petro o ḓisola vhukuma nge a hanedza uri u ḓivha Yesu. Musi o no ṱhogomela zwe a zwi ita, o bvela nnḓa nahone a lila. Ee, o humela kha Yesu. (Luka 22:32) Humbulani nga ha eneo mafhungo. Ndi mini tshine tsha nga ri thusa uri ri sa tshuwe lune ra nga vhuya ra amba zwe Petro a zwi amba?— Humbulani uri Petro ho ngo rabela nahone ho ngo dzula o fhaṱuwa. Ni nga ri ndi mini tshine ra fanela u tshi ita uri ri vhe vhatevheli vha Mufunzi Muhulu?—

Vhukuma ri tea u rabela Yehova uri a ri thuse. Musi Yesu a tshi rabela, ni a ḓivha uri Mudzimu o mu itela mini?— O rumela muruṅwa uri a mu khwaṱhise. (Luka 22:43) Naa vharuṅwa vha Mudzimu vha nga ri thusa?— Bivhili i ri: “Muruṅwa wa Yehova u dzula a tshi linda vhané vha mu ofha; u ḓo vha lwela.” (Psalme ya 34:7) Fhedzi u itela uri Mudzimu a ri thuse, a ro ngo fanela u sokou rabela. Ni a ḓivha uri ndi mini tshiṅwe tshithu tshine ra fanela u tshi ita?— Yesu o vhudza vhatevheli vhawe uri vha dzule vho fhaṱuwa. Ni humbula uri ri nga zwi itisa hani zwenezwo?—

Zwine zwa nga thusa ndi u thetshelesa nga vhuronwane zwine zwa ambiwa miṱanganoni yashu ya Vhukriste na u ita zwine ra zwi vhala Bivhilini. Fhedzi ri tea u rabela Yehova tshifhinga tshoṱhe na u mu humbela uri a ri thuse u mu shumela. Arali ra ita nga u ralo, ri ḓo thuswa uri ri sa ofhe. Nga zwenezwo ri ḓo takalela u vha na tshibuli tsha u vhudza vhaṅwe nga ha Mufunzi Muhulu na Khotsi awe.