Hesekiele 37:1-28
37 Tshanḓa tsha Yehova tsho vha tshi kha nṋe, Yehova o nkhwala nga muya wawe a mmbea govhani+ ḽo ḓalaho marambo.
2 O ita uri ndi pfukekanye eneo marambo, o vha e manzhi ngei govhani, o vha o oma.+
3 A mmbudzisa a ri: “Murwa muthu, naa aya marambo a nga dovha a tshila?” Nṋe nda fhindula nda ri: “Zwi ḓivhiwa nga iwe Yehova Murena Muvhusahoṱhe.”+
4 Nga zwenezwo, a amba na nṋe a ri: “Porofitela enea marambo, u ambe nao u ri, ‘Inwi marambo o omaho, ipfani zwine Yehova a amba:
5 “‘Zwe Yehova Murena Muvhusahoṱhe a zwi vhudza enea marambo ndi hezwi: “Ndi ḓo ita uri mufemo u dzhene kha inwi uri ni tshile.+
6 Ndi ḓo ita uri ni vhe na misipha na ṋama, na u vha na lukanda, nda ni dzhenisa mufemo, na kona u tshila; ndi hone ni tshi ḓo ḓivha uri ndi nṋe Yehova.”’”
7 Nṋe nda porofita samusi ndo vhudzwa uri ndi ite zwenezwo. Musi ndi tshi kha ḓi porofita, ha pfala phosho ya marambo a tshi khou ṱangana.
8 Ngauralo, nda vhona misipha na ṋama zwi tshi ya khao, a vha na lukanda. Fhedzi o vha e si na mufemo.
9 A amba na nṋe a ri: “Porofitela muya. Iwe murwa muthu, porofita, u ambe na muya u ri, ‘Yehova Murena Muvhusahoṱhe u ri: “Iwe muya,* iḓa u tshi bva thungo dzoṱhe, u vhudzule kha vhenevha vhathu vho vhulawaho, uri vha dovhe vha tshile.”’”
10 Nda porofita samusi o nndaedza, mufemo* wa dzhena khavho, vha thoma u tshila, vha ima nga milenzhe,+ vho vha vhe vhanzhi-vhanzhi.
11 A amba na nṋe a ri: “Murwa muthu, haya marambo ndi a vha nnḓu yoṱhe ya Isiraele.+ Vha amba uri, ‘Marambo ashu o oma, a ri tshee na fhulufhelo.+ Ro laṱiwa tshoṱhe.’
12 Nga zwenezwo, porofita u ambe navho u ri, ‘Zwe Yehova Murena Muvhusahoṱhe a zwi amba ndi hezwi: “Inwi vhathu vhanga, ndi ḓo vula mavhiḓa aṋu+ nda ni vusa mavhiḓani aṋu, nda ni isa shangoni ḽa Isiraele.+
13 Ndi hone ni tshi ḓo ḓivha uri ndi nṋe Yehova musi ndi tshi vula mavhiḓa aṋu nda ni vusa, inwi vhathu vhanga.”’+
14 ‘Ndi ḓo dzhenisa muya wanga kha inwi na tshila,+ nda ni dzudza shangoni ḽaṋu; na kona u ḓivha uri nṋe Yehova ndo zwi amba na u zwi ita,’ u ralo Yehova.”
15 Yehova a dovha a amba na nṋe a ri:
16 “Iwe murwa muthu, dzhia thanda u i ṅwale uri, ‘Heyi ndi ya Yuda na vhathu vha Isiraele vhane vha vha nae.’*+ U dovhe u dzhie iṅwe u i ṅwale uri, ‘Heyi ndi ya Yosefa, ndi thanda ya Efuraimi na vhoṱhe vha nnḓu ya Isiraele vhane vha vha nae.’*+
17 U ṱanganyise dzenedzo thanda uri dzi kone u vha thanda nthihi tshanḓani tshau.+
18 Musi vhathu vhahau vha tshi ri, ‘Ri vhudze uri zwenezwi zwithu zwi amba mini,’
19 u vha vhudze uri, ‘Zwe Yehova Murena Muvhusahoṱhe a zwi amba ndi hezwi: “Ndi ḓo dzhia thanda ya Yosefa, ine ya vha tshanḓani tsha Efuraimi na tshaka dza Isiraele dzine dza vha nae, ndi ḓo dzi ṱanganyisa na thanda ya Yuda; nda ita uri dzenedzo thanda mbili dzi vhe thanda nthihi+ tshanḓani tshanga.”’
20 Thanda dzine wa ḓo ṅwala khadzo u dzi fare nga tshanḓa uri vha dzi vhone.
21 “U vha vhudze uri, ‘Yehova Murena Muvhusahoṱhe u ri: “Ndi ḓo dzhia Vhaisiraele vha re kha tshaka dze vha ya khadzo. Ndi ḓo vha kuvhanganya vha tshi bva thungo dzoṱhe, nda vha vhuisa kha shango ḽavho.+
22 Ndi ḓo vha ita lushaka luthihi kha ḽeneḽo shango+ ngei thavhani dza Isiraele, vhoṱhe vha ḓo vhuswa nga khosi nthihi,+ a vha tsha ḓo vha tshaka mbili; kana u dovha vha vha mivhuso mivhili.+
23 A vha tsha ḓo ḓitshikafhadza nga midzimu yavho ya zwifanyiso i nengisaho,* na nga mishumo yavho i nengisaho na nga vhukhakhi havho hoṱhe.+ Ndi ḓo vha tshidza kha vhutshinyi havho hoṱhe he vha vhu ita. Ndi ḓo vha kunakisa. Vha ḓo vha vhathu vhanga, nṋe nda vha Mudzimu wavho.+
24 “‘“Mushumeli wanga Davida u ḓo vha khosi yavho,+ vhoṱhe vha ḓo vha na mulisa muthihi.+ Vha ḓo tevhedza khaṱhulo dzanga na u thetshelesa milayo yanga nga vhuronwane.+
25 Vha ḓo dzula kha shango ḽe nda ḽi ṋea mushumeli wanga Yakobo, he vhomakhulukuku waṋu vha dzula hone,+ vha ḓo dzula khaḽo nga hu sa fheli,+ vhone na vhana* vhavho na vhana vha vhana vhavho;+ Davida mushumeli wanga u ḓo vha murangaphanḓa* wavho nga hu sa fheli.+
26 “‘“Ndi ḓo vhofha mulanga wa mulalo navho;+ u ḓo vha mulanga wa tshoṱhe. Ndi ḓo vha ṋea vhudzulo, nda ita uri vha vhe vhanzhi,+ nda vhea nnḓu yanga khethwa vhukati havho lwa tshoṱhe.
27 Dennde* ḽanga ḽi ḓo vha vhukati havho,* nṋe nda vha Mudzimu wavho, vhone vha vha vhathu vhanga.+
28 Ndi hone tshaka dzi tshi ḓo ḓivha uri nṋe Yehova, ndo khetha Vhaisiraele musi nnḓu yanga khethwa i tshi vha vhukati havho lwa tshoṱhe.”’”+
Ṱhaluso dzi re magumoni a siaṱari
^ Kana “mufemo.”
^ Kana “muya.”
^ Kana “vhane vha shumisana nae.”
^ Kana “vhane vha shumisana nae.”
^ Ipfi ḽine ḽa amba zwenezwi ḽa Tshihevheru ḽi tshimbidzana na ipfi “vhutoko” nahone ḽi shumiswa sa mubulo wa u goḓa.
^ Kana “mukololo.”
^ Thevhedz., “vharwa.”
^ Kana “Vhudzulo; Haya.”
^ Kana “Vha ḓo vha denndeni ḽanga.”
