Vharoma 4:1-25
4 Arali zwo ralo, ri ḓo ri mini nga Abrahamu makhulukuku washu nga lwa ṋama?
2 Sa tsumbo, arali Abrahamu ho pfi o luga nga nṱhani ha mishumo yawe, o vha a tshi ḓo vha na tshiitisi tsha u zuwa; fhedzi hu si u zuwela Mudzimu.
3 Maṅwalo a ri mini? A ri: “Abrahamu o vha na lutendo kha Yehova, nahone a dzhiiwa sa o lugaho.”
4 Mushumi a tshi wana malamba a si nga nṱhani ha vhuthu vhuhulu, u khou ṋewa zwo mu fanelaho.
5 Kha ḽiṅwe sia, muthu a sa shumiho, fhedzi a tshi vha na lutendo kha ane a amba uri muthu a sa ofhiho Mudzimu o luga, lutendo lwawe lu mu ita uri a pfi o luga.
6 U fana na musi Davida a tshi amba nga ha muthu o takalaho ane Mudzimu a mu dzhia o luga hu si nga nṱhani ha mishumo yawe a ri:
7 “Hu takala vhe vha hangwelwa vhutshinyi havho na vhe zwivhi zwavho zwa fukedzwa;
8 hu takala muthu ane Yehova a sa ḓo vhuya a humbula zwivhi zwawe.”
9 Naa honohu u takala, ndi ha vhathu vho fumbaho kana hu takala na vhathu vha songo fumbaho? Huufha ri tshi ri: “Lutendo lwa Abrahamu lwo mu ita uri a dzhiiwe sa o lugaho.”
10 Ho pfi o luga nga fhasi ha vhuimo vhufhio? Musi o no fumba kana a sa athu fumba? Musi a sa athu fumba, hu si musi o no fumba.
11 Mudzimu o mu vhudza uri a fumbe. Lwonolwu lwo vha lu luswayo lwa u sumbedza uri o luga nga nṱhani ha lutendo lwe a vha e nalwo musi a sa athu fumba. Ngauralo, a mbo ḓi vha khotsi a vhoṱhe vha re na lutendo naho vha sa athu fumba, nahone Mudzimu u dzhia vhenevho vhathu vho luga;
12 uri a vhe khotsi kha vho fumbaho, hu si kha vhane vha tevhedza zwa u fumba ṋamani fhedzi, fhedzi na vhane vha tevhela tsumbo ya lutendo lwe khotsi ashu Abrahamu a vha e nalwo musi a sa athu fumba.
13 Ngauri musi hu tshi fulufhedziswa Abrahamu kana mbeu yawe uri shango ḽi ḓo vha ifa ḽavho, ho vha hu si nga nṱhani ha mulayo, fhedzi ho vha hu nga nṱhani ha u luga nge a vha na lutendo.
14 Ngauri arali vhane vha tevhedza mulayo vhe maḽaifa, lutendo a lu tsheena mushumo, na zwe a fulufhedzisa a zwi tsha amba tshithu.
15 Zwi re zwone ndi uri mulayo u ḓisa mbiti, fhedzi hune ha si vhe na mulayo, a hu na u pfuka mulayo.
16 Zwi bva kha lutendo uri ri wane vhuthu vhuhulu, uri zwoṱhe zwe zwa fulufhedziswa mbeu yawe zwi ḓadzee, hu si kha vhane vha tevhedza mulayo fhedzi, fhedzi na kha vhane vha tevhedza lutendo lwa Abrahamu, ane a vha khotsi ashu roṱhe.
17 (Samusi ho ṅwalwa ha pfi: “Ndo u ita uri u vhe khotsi a tshaka nnzhi.”) Zwo vha zwo tou ralo phanḓa ha Mudzimu, we Abrahamu a mu tenda, ane a ita uri vho faho vha tshile, a vhidzaho zwi siho zwa nga zwi hone.
18 Abrahamu o tenda nga u fulufhela zwi sa fulufhelei zwa u pfi u ḓo vha khotsi a tshaka nnzhi samusi zwo dzula zwo ambiwa ha pfi: “Mbeu yau i ḓo anda nga u ralo.”
19 Naho lutendo lwawe lu songo fhungudzea, o humbula nga ha muvhili wawe, we wa vha u tshi nga wo fa, samusi o vha e na miṅwaha i ṱoḓaho u vha ḓana, khathihi na u humbula nga ha u fa ha mbumbelo ya Sara.
20 Ho ngo vhuya a timatima fulufhedziso ḽa Mudzimu nga u sa vha na lutendo, fhedzi lutendo lwawe lwo mbo ḓi khwaṱha, a ṋea Mudzimu vhugala
21 nahone a vha na lutendo lwo khwaṱhaho lwa uri Mudzimu u ḓo ita zwe a zwi fulufhedzisa.
22 Nga zwenezwo, “o dzhiiwa sa o lugaho.”
23 Naho zwo ralo, maipfi ane a ri, “o dzhiiwa sa o lugaho” ho ngo ṅwalelwa ene fhedzi,
24 fhedzi o ṅwalelwa na riṋe vhane ra ḓo pfi ro luga, ngauri ri a tenda zwauri o vusa Yesu Murena washu vhafuni.
25 O vhulahwa hu tshi itelwa vhutshinyi hashu nahone o vuswa uri riṋe ri kone u pfi vho lugaho.
