Pfukelani kha mafhungo

Pfukelani kha zwi re ngomu

 U TSHILA SA VHAKRISTE

Tevhedzani Zwilinganyo Zwa Yehova Zwa Vhuḓifari

Tevhedzani Zwilinganyo Zwa Yehova Zwa Vhuḓifari

Yehova Mudzimu u vhetshela vhathu zwilinganyo zwa vhuḓifari. Sa tsumbo, o vhea mulayo wa uri mbingano ndi mbofho ya lwa tshoṱhe vhukati ha munna na mufumakadzi. (Mat 19:4-6, 9) U sasaladza mifuda yoṱhe ya u ḓifara luvhi nga zwa vhudzekani. (1Ko 6:9, 10) U ṋea maitele malugana na nḓila ine vhathu vhawe vha tea u ambara na u ḓilugisa ngayo u itela u vha fhambanya na vhaṅwe vhathu.—Doi 22:5; 1Ti 2:9, 10.

Ṋamusi, vhunzhi ha vhathu a vha tendelani na zwilinganyo zwa Yehova. (Rom 1:18-32) Vha ṱuṱuwedzwa nga mavhonele a vhomuthumunzhi nga ha nḓila ine vha fanela u ambara na u ḓilugisa na u ḓifara ngayo. Vhunzhi havho vha ṱongisa vhuḓifari havho vhu nengisaho na u sasaladza vhane vha tshila nga zwilinganyo zwo fhambanaho na zwavho.—1Pe 4:3, 4.

Samusi ri Ṱhanzi dza Yehova, ri fanela u tevhedza zwilinganyo zwa Mudzimu zwa vhuḓifari nga tshivhindi. (Rom 12:9) Nga nḓila-ḓe? Ri fanela u vhudza vhaṅwe nga vhuṱali nga ha zwine a zwi takalela. Fhedzi na riṋe ri fanela u ḓifara zwavhuḓi vhukuma. Sa tsumbo, musi ri tshi khetha zwitaela zwa u ambara na u ḓilugisa, ri nga ḓivhudzisa uri: ‘Naa zwine nda zwi khetha zwi tendelana na zwilinganyo zwa Yehova kana zwa shango? Naa nḓila ine nda ambara na u ḓilugisa ngayo i nṱalula sa Mukriste a ofhaho Mudzimu?’ Kana musi ri tshi khetha mbekanyamushumo kana muvi une ra ḓo u ṱalela, ri nga ḓivhudzisa uri: ‘Naa Yehova a nga takalela zwine nda khou zwi ṱalela? Zwine nda khou zwi ṱalela zwi tikedza zwilinganyo zwa nnyi zwa vhuḓifari? Naa zwine nda khetha u ḓimvumvusa ngazwo zwi nga tshinya luvalo lwanga? (Ps 101:3) Naa zwi nga khukhulisa vha muṱani wanga kana vhaṅwe?’—1Ko 10:31-33.

Ndi ngani zwi zwa ndeme nga u rali uri ri tevhedze zwilinganyo zwa Yehova zwa vhuḓifari? Hu si kale, Kristo Yesu u ḓo fhelisa dzitshaka na vhuvhi hoṱhe. (Hes 9:4-7) Hu ḓo ponyoka fhedzi vhane vha ita zwi funwaho nga Mudzimu. (1Yo 2:15-17) Nga zwenezwo, kha ri tikedze zwilinganyo zwa Yehova zwa vhuḓifari u itela uri vhane vha vhona vhuḓifari hashu havhuḓi vha rende Mudzimu.—1Pe 2:11, 12.

Nḓila ine nda ambara na u ḓilugisa ngayo i sumbedza mini nga ha vhuḓifari hanga?

ṰALELANI VIDIO BECOME JEHOVAH’S FRIEND—ONE MAN, ONE WOMAN NAHONE NGA MURAHU NI HASELEDZE MBUDZISO DZI TEVHELAHO:

  • Ndi ngani zwi vhuṱali u tshila u tendelana na zwilinganyo zwa Yehova?

  • Ndi ngani vhabebi vha tshi fanela u gudisa vhana vhavho musi vha tshee vhaṱuku zwilinganyo zwa Yehova zwa vhuḓifari?

  • Vhaswa na vhalala vha nga thusa hani vhaṅwe vhathu uri vha vhuyelwe nga vhuḓi ha Mudzimu?