Pfukelani kha mafhungo

Pfukelani kha zwi re ngomu

 U TSHILA SA VHAKRISTE

Thoma U Ye U Ite Mulalo Na Wahau—Nga Nḓila-Ḓe?

Thoma U Ye U Ite Mulalo Na Wahau—Nga Nḓila-Ḓe?

Ḓivhoneni nga maṱo a muhumbulo ni tshi khou dzula Galilea zwifhingani zwa Yesu. No swika Yerusalema u pembela Vhuṱambo ha Mishasha. Wonoyo muḓi wo ḓala nga vhaṅwe vhagwadameli vha Yehova vhe vha ḓa u dala vha tshi bva tsini na kule. Ni khou ṱoḓa u ṋekedza Yehova tshiṱhavhelo. Na mbo dzhena nḓilani ni tshi khou kokodza mbudzi yaṋu nga thambo no livha thembeleni, na nḓilani ho ḓala vhukuma. Musi ni tshi swika, na wana na hone thembeleni ho ḓala nga vhaṅwe vhane vha ṱoḓa u ṋekedza zwiṱhavhelo. Zwino ndi tshifhinga tshaṋu tsha uri ni ṋee tshifhe mbudzi yaṋu. Nga tshenetsho tshifhinga, na humbula uri wahaṋu we na mu khakhela a nga vha e hone vhukati ha ḽeneḽo gogo kana henefho muḓini. Yesu o ṱalutshedza zwine na fanela u ita. (Vhalani Mateo 5:24.) Ni nga ita hani mulalo na wahaṋu we na mu khakhela sa zwe Yesu a sumbedzisa? Kha izwo zwoṱhe zwi re afho fhasi vheani luswayo kha phindulo ine ya vha yone.

NI FANELA . . .

  • u amba na wahaṋu fhedzi arali ni tshi humbula uri u na tshiitisi tshi pfalaho tsha u khukhulisea

  • u lingedza u khakhulula mahumbulele a wahaṋu arali ni tshi ḓivha uri u na mbilu ṱhukhu kana na ene u na mulandu

  • u thetshelesa wahaṋu musi a tshi amba nḓila ine a ḓipfa ngayo, naho ni sa zwi pfesesi ni humbele pfarelo zwi tshi bva mbiluni nge na mu vhaisa ni songo ḓiimisela

WAHAṊU U FANELA . . .

  • u tshimbila a tshi amba nga ha nḓila ye na mu khakhela ngayo u itela u wana vhane vha nga ima nae tshivhidzoni

  • u ni sinyutshela, a ni vhudze nga ha nḓila ye na mu kwatisa ngayo nahone a ṱoḓa uri ni tende uri ni na mulandu

  • u vhona nḓila ye na ḓiṱukufhadza ngayo na tshivhindi tsha u ḓa khae nahone a ni hangwele zwi tshi bva mbiluni

Naho ṋamusi ri si tsha ṋekedza zwiṱhavhelo zwa zwifuwo, Yesu o vha a tshi khou amba mini musi a tshi ri u ita mulalo na vhahashu na u ita uri vhurabeli hashu vhu ṱanganedzwe nga Mudzimu zwi a tshimbidzana?