Pfukelani kha mafhungo

Pfukelani kha zwi re ngomu

 BIVHILI I SHANDULA VHUTSHILO

Ndo Vha Ndi Tshi Humbula Uri Ndi Khou Ḓiphina Nga Vhutshilo

Ndo Vha Ndi Tshi Humbula Uri Ndi Khou Ḓiphina Nga Vhutshilo
  • ṄWAHA WA MABEBO: 1982

  • SHANGO: POLAND

  • ZWE A VHA A TSHI ZWI ITA: O VHA A TSHI ITA VHUVEMU, U SHUMISA ZWIDZIDZIVHADZI NA U TOVHOLA BUḒO ḼA NṰHA

VHUTSHILO HANGA HA TSHIFHINGANI TSHO FHIRAHO:

Ndo bebwa ḓoroboni ṱhukhu ya ngei Poland, hune ha si vhe kule na bodara ya Dzheremane. Ndo vha ndi tshi tshila vhutshilo vhu takadzaho, ndo tangwa nga mabulasi na maḓaka. Vhabebi vhanga vho nṱuṱuwedza uri ndi vhe muthu wavhuḓi, ndi shume zwavhuḓi tshikoloni nahone ndi tovhole buḓo ḽa nṱha.

Thaidzo dzanga dzo thoma musi ndi tshi ya yunivesithi u gudela vhuloyara ngei ḓoroboni ya Wrocław. Ngauri ndo vha ndi kule na vhabebi vhanga, ndo khetha khonani mmbi. Ndi kale ndi tshi takalela bola ya milenzhe, fhedzi nga nṱhani ha ṱhuṱhuwedzo ya khonani dzanga ntswa, ndo thoma u i fhisetshela. Ndo vha ndi tshi takalela tshigwada tsha Warsaw nahone nga mafhelo a vhege ndo vha ndi tshi tshi tevhela huṅwe na huṅwe hune tsha tamba hone. Musi ri kha dzenedzo nyendo, ro vha ri tshi nwa vhukuma, u shumisa zwidzidzivhadzi nga nḓila i si yavhuḓi nahone nga zwiṅwe zwifhinga ri tshi lwa na vhane vha tikedza tshiṅwe tshigwada. Ndo vha ndi tshi dzhia zwenezwi sa nḓila ya u iledza mutsiko wa ḓuvha ḽiṅwe na ḽiṅwe, naho ndo vha ndi tshi zwi ḓivha uri u farwa nga mapholisa zwi nga tshinya buḓo ḽanga ḽa u gudela vhuloyara.

Nṋe na khonani dzanga ro vha ri tshi takalela u dalela dzikilabu na dzidisko. Kanzhi musi ri henefho, ro vha ri tshi lwa zwiṱaraṱani. Zwifhinga zwinzhi ndo vha ndi tshi farwa nga mapholisa, fhedzi ndo vha ndi tshi kona u ponyoka milandu mihulwane nahone nga zwiṅwe zwifhinga ndi tshi bvisa tshanḓanguvhoni. Ndo vha ndi tshi vhona u nga ndi khou ḓiphina nga vhutshilo. Naho zwo ralo, ndo vha ndi tshi zwi ḓivha uri zwine nda khou zwi ita zwo khakhea. Swondaha iṅwe na iṅwe ndo vha ndi tshi ya kerekeni u itela u lingedza u vha na luvalo lwavhuḓi.

NḒILA YE BIVHILI YA SHANDULA NGAYO VHUTSHILO HANGA:

Nga 2004, Ṱhanzi dza Yehova mbili dzo humbela u haseledza na nṋe Bivhili nahone nda tenda. Musi ndi tshi guda zwo engedzeaho nga ha zwine u vha Mukriste wa ngoho zwa amba zwone, ndo thoma u rwiwa nga luvalo. Ndo vha ndi tshi zwi ḓivha uri ndi fanela u litsha u nwesa halwa, u shumisa zwidzidzivhadzi na u ḓikonanya na vhathu vha sa tshili nga zwilinganyo zwa Bivhili. Ndo dovha nda ṱhogomela uri ndi fanela u litsha u vha na mbiti na vhuvemu. Naho ndo ṱhogomela uri ndi fanela u shanduka, a tho ngo vhuya nda ita tshanduko na nthihi.

Ndo thoma u ḓisola musi ndi tshi vusa nndwa na vhathu vha malo. Ndi humbula ndo wela fhasi tshiṱaraṱani ndi tshi khou buḓulwa na u raiwa ṱhoho. Musi ndi tshi pfa u nga ndi tsini na u fa, ndo rabela nda ri:  “Yehova, ndi humbela pfarelo nga u sa dzhiela nṱha Ipfi ḽau. Arali nda tshila, ndi fulufhedzisa u guda Bivhili na Dziṱhanzi nahone nda shandula vhutshilo hanga.” Ndo mangadzwa nga uri ndo tshila. Ndo ita zwe nda zwi fulufhedzisa nahone nda guda Bivhili..

Ndo pfulutshela England nga 2006. Tshipikwa tshanga tsho vha tshi tsha u hola tshelede yo eḓanaho u itela u humela Poland na u wana digirii ya vhuloyara. Musi ndi tshi bvela phanḓa na u guda Bivhili, ndo kwamiwa nga luṅwe luṅwalo. Muapostola Paulo o ṅwala uri: “Ndo ṱutshela zwithu zwoṱhe ndi tshi itela nḓivho ya ndeme vhukuma ya Kristo Yesu Murena wanga. Nga nṱhani hawe, ndo ṱutshela zwithu zwoṱhe nahone nda zwi dzhia zwi mathukhwi, uri ndi wane Kristo.” (Vhafilipi 3:8) U fana na nṋe, muapostola Paulo o gudela vhuloyara nahone na ene o vha e muthu wa vhuvemu. (Mishumo 8:3) Naho zwo ralo, o ṱhogomela uri ho vha hu na nḓila ya khwine ya vhutshilo: o shumela Mudzimu na u ita zwoṱhe zwine a nga kona u edzisa Yesu. Musi ndi tshi elekanya nga ha tsumbo ya Yesu, ndo ṱhogomela uri buḓo ḽa nṱha na vhuḓifari ha vhuvemu zwo vha zwi si khoṋololo ya dakalo. Ndo ṱuṱuwedzwa nga uri arali Paulo o kona u shanduka, na nṋe ndi nga kona u shanduka. Nga zwenezwo, ndo dzhia phetho ya u dzula England na u hangwa nga ha u tovhola digirii ya vhuloyara.

Musi ndi tshi bvela phanḓa u guda nga ha Yehova, ndo kona u sendela tsini nae. Ndo kwamiwa nga fulufhedziso ḽawe ḽa u hangwela vhane vha ṱoḓa u ita tshanduko zwi tshi bva mbiluni. (Mishumo 2:38) Nahone musi ndi tshi elekanya nga ha 1 Yohane 4:16 ine ya amba uri “Mudzimu ndi lufuno,” ndo thoma u pfesesa uri ndi ngani Mudzimu a tshi vhenga vhuvemu.

Ndo vha ndi tshi ṱoḓa u vha tshipiḓa tsha vhushaka ha vhurathu na vhukomana vhune Dziṱhanzi dza ḓiphina ngaho

Ndo dovha nda takadzwa nga vhuḓifari ha Dziṱhanzi. Zwo vha zwi tshi tou vha khagala kha nṋe uri vha lingedza u tshila nga zwilinganyo zwo kunaho zwa Bivhili. Ndo vha ndi tshi ṱoḓa u vha tshipiḓa tsha vhushaka ha vhurathu na vhukomana vhune vha ḓiphina ngaho. Nga murahu ha u lwa nga nungo dzoṱhe na u ita tshanduko vhutshiloni hanga, ndo lovhedzwa sa muṅwe wa Ṱhanzi dza Yehova nga 2008.

Nṋe na Esther ri takalela u gudisa Bivhili vhathu vhane vha amba Lupolish

NḒILA YE NDA VHUYELWA NGAYO:

Bivhili yo ntshandula kha u vha na vhuhovheleli, vhuvemu, u shumisa luvhi zwidzidzivhadzi, u nwesa, mufhisetsheli wa mutambo wa bola nahone nda vha mushumeli wa Mudzimu ane a ḓiphina nga u gudisa vhaṅwe nga ha Bivhili. Ndi kha ḓi takalela u ṱalela bola, fhedzi ndo ḓiimisela u ḓimvumvusa nga wonoyo mutambo nga nḓila yavhuḓi.

Zwino ndi mbinganoni yavhuḓi na mufumakadzi ane a pfi Esther a gwadamelaho Yehova. Ri takalela u gudisa Bivhili vhathu vhane vha amba Lupolish ngei devhula vhukovhela ha England. Lwa u tou thoma vhutshiloni hanga, ndi ḓipfa ndo fushea vhukuma. Ndi na luvalo lwo kunaho na vhutshilo vhu re na ndivho.