Pfukelani kha mafhungo

Pfukelani kha zwi re ngomu

 THERO I RE KHA GWATI | NDI AFHIO MAVHONELE A MUDZIMU NGA HA NNDWA?

Mavhonele A Mudzimu Nga Ha Nndwa Tshifhingani Tsho Fhiraho

Mavhonele A Mudzimu Nga Ha Nndwa Tshifhingani Tsho Fhiraho

Vhathu vho vha vha tshi khou tsikeledzwa. Vho rabela Mudzimu lunzhi-lunzhi uri a vha vhofholole, fhedzi a zwo ngo konadzea nga u ṱavhanya. Vhenevho vhathu vho vha vhe Vhaisiraele vhane vha vha vhathu vha Mudzimu vha tshifhingani tsha kale. Lushaka lwa Egipita lwo vha lu lwone lune lwa tsikeledza. (Ekisodo 1:13, 14) Lwa miṅwaha minzhi, Vhaisiraele vho lindela Mudzimu a tshi fhelisa Vhaegipita vha tsikeledzaho. Mafheleloni, tshifhinga tsha Mudzimu tsha u dzhia vhukando tsha swika. (Ekisodo 3:7-10) Bivhili i amba uri Mudzimu ndi ene o thomaho nndwa na Vhaegipita. O ṱarafa Vhaegipita nga ṱhamu dzi vhavhaho nahone a fhelisa khosi ya Egipita na mmbi yayo Lwanzheni Lutswuku. (Psalme ya 136:15) Yehova Mudzimu o sumbedza u vha “muhali ndwani” a tshi itela vhathu vhawe.—Ekisodo 15:3, 4.

Uri Mudzimu ndi ene o thomaho u lwa na Vhaegipita zwi sumbedza uri ha lwisani na nndwa dzoṱhe. Kha zwiṅwe zwiitea, o vhudza vhathu vhawe vha Isiraele uri vha thome nndwa. Sa tsumbo, o vha vhudza uri vha ye u lwa na Vha-Kanana vhe vha vha vha tshi khou ṋaṋa u ita vhuvhi. (Doiteronomio 9:5; 20:17, 18) O vhudza Davida Khosi ya Isiraele uri a ye u lwa na Vhafilisita. Mudzimu o dovha a ṋea Davida maano a u lwa ane a ḓo ita uri a kunde.—2 Samuele 5:17-25.

Eneo mafhungo a Bivhili a dzumbulula uri musi hu tshi vha na vhuvhi nahone Vhaisiraele vha tshi tsikeledzwa, Mudzimu o tenda uri hu vhe na nndwa u itela u tsireledza vhathu vhawe na u tsireledza vhurabeli ha ngoho. Fhedzi ṱhogomelani mbuno tharu dzi tevhelaho nga ha nḓila ye Mudzimu a thoma ngayo nndwa.

  1. NDI MUDZIMU WE A DZHIA PHETHO YA URI NDI NNYI ANE A ḒO YA NNDWANI. Kha tshiṅwe tshiitea, Mudzimu o vhudza Vhaisiraele uri: “U lwa navho’ henefho a si mushumo waṋu.” Tshiitisi tsho vha tshi tshifhio? Mudzimu o vha a tshi ḓo vha lwela. (2 Koronika 20:17; 32:7, 8) O zwi ita lunzhi u fana na kha tshiitea tshe tsha ambiwa mathomoni a yeneyi thero. Nga zwiṅwe zwifhinga, Mudzimu o vhudza vhathu vhawe vha Isiraele ḽa kale uri vha lwe nndwa ye a i tendela, ine ya katela u tsireledza na u imelela Shango ḽavho ḽo Fulufhedziswaho.—Doiteronomio 7:1, 2; Yoshua 10:40.

  2. NDI MUDZIMU WE A DZHIA PHETHO YA URI YENEYO NNDWA I ḒO VHA HONE LINI. Vhashumeli vha Mudzimu vho vha vha tshi fanela u lindela tshifhinga tsho vheiwaho nga Mudzimu vha sa fheli mbilu tsha u lwa na vhathu vho vha tangaho vhane vha vha tsikeledza na u ita zwivhi. U swika tshenetsho tshifhinga tshi tshi swika, vho vha vha songo fanela u ḓidzhenisa kha nndwa. Musi vha tshi ḓidzhenisa kha nndwa, Mudzimu  ho ngo tsha vha takalela. Zwi re zwone ndi uri, Bivhili i sumbedza uri musi Vhaisiraele vha tshi ḓidzhenisa kha nndwa ye Mudzimu a si i tendele, kanzhi ho vha hu tshi vha na masiandoitwa a si avhuḓi. *

  3. Naho Mudzimu o lwa na Vha-Kanana, o tshidza vhaṅwe vha ngaho sa Rahaba na muṱa wawe

    MUDZIMU HA TAKALELI VHATHU VHA TSHI FA, U KATELA NA VHATHU VHAVHI. Yehova Mudzimu ndi ene Muṋei wa vhutshilo nahone ndi Musiki wa vhathu. (Psalme ya 36:9) Nga zwenezwo, ha takaleli u vhona vhathu vha tshi fa. Zwi ṱungufhadzaho ndi uri hu na vhathu vhane vha vhamba maano a u tsikeledza na u vhulaha vhaṅwe. (Psalme ya 37:12, 14) U itela u thivhela honoho vhuvhi, nga zwiṅwe zwifhinga, Mudzimu o vha a tshi tendela uri hu lwiwe na vhathu vhavhi. Naho zwo ralo, miṅwahani minzhi musi a tshi tendela Vhaisiraele uri vha ye nndwani, o vha a tshi ‘khathutshela’ nahone a sa ‘fheleli mbilu’ vhathu vhe vha vha vha tshi tsikeledza Vhaisiraele. (Psalme ya 86:15) Sa tsumbo, o vhudza Vhaisiraele uri musi vha sa athu u ya u lwa muḓini, vho vha vha tshi fanela u “amba zwa mulalo nawo,” u itela u ṋea vhadzulapo tshibuli tsha u shandula nḓila dzavho na u iledza nndwa. (Doiteronomio 20:10-13) Nga yeneyi nḓila, Mudzimu o sumbedza uri ha “takaleli lufu lwa mu-ita-zwivhi; tshine [a] takalela ndi u huma hawe ó laṱa nḓila mmbi yawe, a hanya.”—Hesekiele 33:11, 14-16. *

U bva mathomoni, ro vhona uri tshifhingani tsha kale, Mudzimu o vha a tshi dzhia nndwa sa nḓila yo teaho ya u fhelisa mifuda yo fhamba-fhambanaho ya u tsikeledza na vhuvhi. Fhedzi ndi Mudzimu we a vha a tshi amba uri nndwa i fanela u vha hone lini na uri ndi nnyi we a vha a tshi fanela u ya nndwani, hu si vhathu. Naa Mudzimu o vha a tshi takalela nndwa u itela u shulula malofha? A zwo ngo ralo. U vhenga vhutshinyi. (Psalme ya 11:5) Naa mavhonele a Mudzimu nga ha nndwa o shanduka musi Murwa wawe Yesu Kristo a tshi thoma vhuḓinḓa hawe ḓanani ḽa u thoma ḽa miṅwaha?

^ phar. 7 Sa tsumbo, kha tshiṅwe tshiitea, Vhaisiraele vho kundwa musi vha tshi ya u lwa na Vha-Amaleke na Vha-Kanana musi Mudzimu o vha vhudza uri vha songo ya u lwa. (Numeri 14:41-45) Nga murahu ha miṅwaha minzhi, Khosi i fulufhedzeaho Yosia yo ya nndwani i songo tendelwaho nga Mudzimu nahone zwenezwo zwa ita uri i vhulahwe.—2 Koronika 35:20-24.

^ phar. 8 Vhaisiraele a vho ngo thoma vha amba zwa mulalo musi vha tshi ya u lwa na Vha-Kanana. Ndi ngani? Ngauri Vha-Kanana vho vha vho ṋewa miṅwaha ya 400 uri vha lugise nḓila dzavho mmbi. Musi Vhaisiraele vha tshi ya u lwa navho, tshigwada tsha Vha-Kanana tsho vha tsho no vha tshivhi nga ho kalulaho. (Genesi 15:13-16) Nga zwenezwo, vho vha vha tshi ḓo fheliswa lwa tshoṱhe. Naho zwo ralo, Vha-Kanana vhe vha shandula nḓila dzavho vho tshidzwa.—Yoshua 6:25; 9:3-27.