Pfukelani kha mafhungo

Pfukelani kha zwi re ngomu

 THERO I RE KHA GWATI | NDI AFHIO MAVHONELE A MUDZIMU NGA HA NNDWA?

Mavhonele A Mudzimu Nga Ha Nndwa Ṋamusi

Mavhonele A Mudzimu Nga Ha Nndwa Ṋamusi

Vhathu ṋamusi vha khou tsikeledzwa. Vhathu vhanzhi vha lilela Mudzimu uri a vha vhofholole nahone vha a ḓivhudzisa arali a tshi ḓo vha vhofholola. Naa Mudzimu u a vha pfa vha tshi lila? Nahone hu pfi mini nga vhane vha lwa u itela u fhelisa u tsikeledzwa? Naa Mudzimu u a tikedza vhuḓidini havho nahone u vhona u lwa havho ho tea?

Haramagedo i ḓo vha nndwa ya u fhelisa nndwa dzoṱhe

Tsha u thoma, khuthadzwani nga ngoho i tevhelaho: Mudzimu u a vhona u shengela ha vhathu shangoni ḽoṱhe ṋamusi nahone o ḓiimisela u ita zwiṅwe zwithu nga hazwo. (Psalme ya 72:13, 14) Ipfini ḽawe ḽine ḽa vha Bivhili, Mudzimu o fulufhedzisa uri ‘vhane vha khou tambula, u ḓo vha vhofholola.’ Lini? “Musi hu tshi dzumbululwa Murena Yesu a tshi bva ṱaḓulu e na vharuṅwa vhawe vha maanḓa . . . a tshi ḓa u lifhedza vhane vha si ḓivhe Mudzimu na vhane vha si thetshelese mafhungo maḓifha a ambaho nga ha Murena washu Yesu.” (2 Vhathesalonika 1:7, 8) Honoho u dzumbululwa ha Yesu hu ḓo vha hone tshifhingani tshi ḓaho tshine Bivhili ya tshi vhidza ‘nndwa ya ḓuvha ḽihulu ḽa Mudzimu Ramaanḓaoṱhe,’ tshine tsha dovha tsha vhidzwa Haramagedo.—Nzumbululo 16:14, 16.

Kha yeneyo nndwa ya tshifhingani tshi ḓaho, Mudzimu ha nga shumisi vhathu, fhedzi u ḓo shumisa Murwa wawe Yesu Kristo, u katela na zwiṅwe zwivhumbwa zwa muya zwi re na maanḓa uri vha lwe na vhavhi. Mmbi dza ṱaḓulu dzi ḓo fhelisa u tsikeledzwa hoṱhe.—Yesaya 11:4; Nzumbululo 19:11-16.

Na ṋamusi, mavhonele a Mudzimu nga ha nndwa ha athu u shanduka. U kha ḓi dzhia nndwa sa nḓila i re mulayoni ya u fhelisa u tsikeledzwa na vhuvhi. Samusi zwo ḓi tou ralo u bva kale, ndi Mudzimu ane a dzhia phetho ya uri yeneyo nndwa i ḓo vha hone lini, na uri ndi nnyi ane a fanela u ya nndwani. Samusi ro zwi vhona, Mudzimu o no dzhia phetho ya uri nndwa ine ya ḓo fhelisa  vhavhi na u lifhedzela vhane vha tsikeledzwa ndi nndwa ya tshifhingani tshi ḓaho nahone i ḓo lwiwa nga Murwa wawe Yesu Kristo. Zwenezwi zwi amba uri nndwa dzine dza khou lwiwa kha ḽifhasi ṋamusi, a dzo ngo tendelwa nga Mudzimu, hu sa londwi uri hu nga vha hu na zwiitisi zwifhio zwi pfalaho.

Sa tsumbo: Edzani u humbula vhana vha mme vha tshi khou thoma u lwa musi khotsi avho vhe siho. Vha litshanyana u lwa nahone vha thoma u rwela khotsi avho luṱingo. Muṅwe u pomoka muṅwe uri o thoma nndwa, ngeno muṅwe a tshi amba uri o tou mu levhela. Vhoṱhe vha ya kha khotsi avho vha tshi fulufhela uri u ḓo vha tikedza. Naho zwo ralo, musi vho no pfa zwoṱhe zwe vha amba, khotsi u vha vhudza uri vha litshe u lwa nahone u vha vhudza uri vha mu lindele a tshi vhuya hayani u itela u lugisa mafhungo. Vhenevho vhana vha lindela lwa tshifhinganyana. Fhedzi nga u ṱavhanya vha dovha vha lwa. Musi khotsi vha tshi vhuya hayani, a vha takadzwi nga zwe vhana vhawe vha zwi ita nahone vha vha kaidza nge vha si mu thetshelese.

Ṋamusi, tshaka dzine dza lwa dzi anzela u ṱoḓa thikhedzo ya Mudzimu. Fhedzi Mudzimu ha dzhii sia kha nndwa dza ṋamusi. Nṱhani hazwo, Ipfini ḽawe ḽine ḽa vha Bivhili, o amba a ri: “Ni songo lifhedza vhuvhi nga vhuvhi” nahone “Ni songo ḓilifhedzela.” (Vharoma 12:17, 19) Zwiṅwe hafhu, o ḓivhadza uri vhathu vha fanela u “lindel[a] Ene” uri a dzhie vhukando, nahone u ḓo vhu dzhia nga Haramagedo. (Psalme ya 37:7) Musi tshaka dzi tshi kundelwa u lindela Mudzimu a tshi dzhia vhukando nahone dza ṱoḓa u ḓilwela, o dzhia nndwa dzo raloho sa vhuvemu nahone ha takaleli zwenezwo zwithu. Nga zwenezwo, nga Haramagedo Mudzimu u ḓo sumbedza mbiti dzawe nahone a fhelisa nndwa dza dzitshaka lwa tshoṱhe nga u “dzivhisa dzinndwa migumoni ya ḽifhasi.” (Psalme ya 46:9; Yesaya 34:2) Vhukuma, Haramagedo i ḓo fhelisa dzinndwa dzoṱhe.

U fhela ha nndwa ndi dziṅwe dza phaṱhutshedzo nnzhi dza Muvhuso wa Mudzimu. Yesu o amba nga ha wonoyo Muvhuso kha thabelo i ḓivheaho: “Muvhuso wau nga u ḓe. Zwine wa funa nga zwi itwe fhano kha ḽifhasi vhunga zwi tshi itwa ngei ṱaḓulu.” (Mateo 6:10) Muvhuso wa Mudzimu a u nga fhelisi nndwa fhedzi, fhedzi u ḓo fhelisa zwine zwa ita uri hu vhe na nndwa, zwine zwa vha vhuvhi. * (Psalme ya 37:9, 10, 14, 15) Ndi ngazwo vhatevheli vha Yesu vho vha vho lavhelela nga maṱo matswuku phaṱhutshedzo dza Muvhuso wa Mudzimu.—2 Petro 3:13.

Naho zwo ralo, ri fanela u lindela tshifhinga tshingafhani uri Muvhuso wa Mudzimu u fhelise tshengelo, u tsikeledzwa na vhuvhi hoṱhe? U ḓadzea ha vhuporofita ha Bivhili zwi sumbedza uri ri khou tshila “maḓuvhani a vhufhelo” ha ano maitele a zwithu. (2 Timotheo 3:1-5) * Hu si kale, Muvhuso wa Mudzimu u ḓo fhelisa eneo maḓuvha a vhufhelo nga nndwa ya Haramagedo.

Samusi zwo sumbedzwa mathomoni, vhane vha ḓo fheliswa kha yeneyi nndwa ya u fhedza ndi vhane vha ḓo hana u “thetsheles[a] mafhungo maḓifha a ambaho nga ha Murena washu Yesu.” (2 Vhathesalonika 1:8) Fhedzi humbulani uri Mudzimu ha takaleli lufu lwa muthu na muthihi, u katela na muitazwivhi. (Hesekiele 33:11) Ngauri “ha ṱoḓi muthu naho e ufhio a tshi lozwiwa” kha yeneyi nndwa ya u fhedza, zwino u khou ita vhungoho ha uri mafhungo maḓifha nga ha Murena washu Yesu a khou “ḓivhadzwa ḽifhasini ḽoṱhe uri zwi vhe vhuṱanzi kha tshaka dzoṱhe” vhufhelo vhu sa athu u swika. (2 Petro 3:8, 9; Mateo 24:14; 1 Timotheo 2:3, 4) Vhukuma, nga nṱhani ha mushumo wa u huwelela une wa itwa nga Ṱhanzi dza Yehova, ṋamusi vhathu vha na tshibuli tsha u ḓivha Mudzimu, u thetshelesa mafhungo maḓifha nga ha Yesu na u lavhelela ḓuvha ḽine ha si tsha ḓo vha na nndwa.

^ phar. 9 Muvhuso wa Mudzimu u ḓo dovha wa fhelisa lufu lune lwa vha swina ḽa vhathu. Samusi zwo sumbedzwa kha thero ine ya vha kha siaṱari 16, Mudzimu u ḓo vusa vhathu vhanzhi, u katela na vhanzhi vhe vha fa nndwani kha ḓivhazwakale.

^ phar. 10 U itela u wana zwo engedzeaho nga ha maḓuvha a vhufhelo, sedzani ndima 9 ya bugu Bivhili I Funza Mini Zwa Vhukuma? yo gandiswaho nga Ṱhanzi dza Yehova.