Pfukelani kha mafhungo

Pfukelani kha zwi re ngomu

 MBUDZISO DZA VHAVHALI VHASHU . . .

Ndi Mini Zwo Khakheaho Nga Mikhuvha Ya Khirisimusi?

Ndi Mini Zwo Khakheaho Nga Mikhuvha Ya Khirisimusi?

Ndi kale Khirisimusi i tshi dzhiiwa sa vhuṱambo ha Vhakriste ha u pembelela u bebwa ha Yesu. Naho zwo ralo, vhunzhi ha mikhuvha ine ya itwa kha honohu vhuṱambo i ita uri ri ḓivhudzise uri zwo ḓa hani uri zwi tshimbidzane na u bebwa ha Yesu.

Hu na lungano nga ha Santa Claus. Santa wa musalauno ane a vha na tshifhaṱuwo tsho takalaho, madebvu matshena, marama matswuku, o ambara zwiambaro zwitswuku u ḓivhiwa sa mukunguwedzi wa Khirisimusi yo thomiwaho nga khamphani ya North American beverage nga 1931. Nga vho-1950 vhaṅwe vhathu vha Brazil vho lingedza u dzhiela Santa Claus vhudzulo nga u dzhenisa Grandpa Indian a ḓivheaho vhukuma. Mvelelo dzo vha dzifhio? Santa Claus ho ngo kunda Grandpa Indian fhedzi, fhedzi Muphurofesa Carlos E. Fantinati o ri: “Santa Claus o dovha a kunda ṅwana Yesu nahone a vha muimeleli wa vhuṱambo ha dzi 25 December. Naa dzingano dzi ngaho Santa Claus ndi dzone thaidzo dzi dzoṱhe dza Khirisimusi? U itela u wana phindulo, kha ri ṱhogomele vhubvo ha Vhukriste.

Encyclopedia Britannica yo ri: “Tshifhinga tsha maḓana mavhili a u thoma a Vhukriste ho vha hu tshi hanedzwa vhukuma u pembelela maḓuvha a mabebo a vhathu vhe vha fela lutendo u katela na Yesu.” Ndi ngani? Vhakriste vho vha vha tshi dzhia vhuṱambo ha mabebo sa mukhuvha wa vhuhedeni, zwithu zwine zwa fanela u iledzwa. Zwi re zwone ndi uri ḓuvha ḽa mabebo a Yesu a ḽo ngo bulwa Bivhilini.

Kereke ya Katolika ndi yone yo thomaho Khirisimusi, hu sa londwi vhukando ho dzhiiwaho nga Vhakriste vha u thoma ha u lwisana na mukhuvha wa u pembelela maḓuvha a mabebo ḓanani ḽa vhuṋa ḽa miṅwaha C.E. Kereke yo vha i tshi ṱoḓa u ḓivhea nga u bvisa tshithithisi tshayo tshihulwane, tshine tsha vha vhuṱambo vhu re na bvumo ha vhurereli ha Vharoma ha vhuhedeni na vhune ha itwa vhuriha. Ṅwaha muṅwe na muṅwe u bva nga ḽa 17 December u swika nga ḽa 1 January, Christmas in America, yo ṅwalwaho nga Penne L. Restad, yo ri: “Vharoma vhanzhi vho vha vha tshi ita vhuṱambo, u tamba mitambo, u pembelela na u tshimbila vhoṱhe nahone vha tshi ṱanganela kha vhuṅwe vhuṱambo nahone vha tshi badela tshelede vha tshi itela u sumbedza mafunda.” Nahone nga dzi 25 December Vharoma vho vha vha tshi pembelela u bebwa ha Ḓuvha ḽi sa Kundwi. Musi hu tshi thomiwa Khirisimusi nga ḽeneḽo ḓuvha, kereke yo ita uri Vharoma vhanzhi vha pembelele mabebo a Yesu nṱhani ha u pembelela u bebwa ha ḓuvha. Santa Claus, a Biography, yo ṅwalwaho nga Gerry Bowler yo amba uri Vharoma “vho vha vha tshi kha ḓi takalela u khavhisa nga nḓila ya vhuṱambo ha vhuriha, nahone nḓila ine ha khavhiswa ngayo a i athu u shanduka.”

Vhukuma, thaidzo khulwane nga u pembelela Khirisimusi ndi uri vhubvo hayo a vhu ṱanganedzei. The Battle for Christmas, yo ṅwalwaho nga Stephen Nissenbaum i amba uri Khirisimusi ndi “vhuṱambo ha vhuhedeni vhune ha vhonala vhu tshi nga ndi ha Vhakriste.” Nga zwenezwo, Khirisimusi a i hulisi Mudzimu na Murwa wawe Yesu Kristo. Naa yeneyi ndi thaidzo ṱhukhu? Bivhili yo vhudzisa uri: “Ngauri u luga na vhutshinyi zwi na vhushaka-ḓe? Kana tshedza na swiswi zwi ṱangana’fhi?” (2 Vhakorinta 6:14) U fana na tsinde ḽa muri ḽine ḽa aluwa ḽo kombama, Khirisimusi yo ṱanga-ṱangana lune a i “koni u lugiswa.”—Muhuweleli 1:15.