Pfukelani kha mafhungo

Pfukelani kha zwi re ngomu

 NGANEAVHUTSHILO

U Wana Zwa Khwine U Fhira Vhutshilo Ha Vhunzhili-nzhili

U Wana Zwa Khwine U Fhira Vhutshilo Ha Vhunzhili-nzhili

Vhuṅwe vhusiku nga 1984, ndo thoma u vha na bvumo nahone nda si tsha vha muswa o ḓoweleaho. Ndo vhewa sa Miss Hong Kong. Tshinepe tshanga tsho vha tshi kha magwati a dzimagazini na dzigurannḓa. Ndo vha ndi tshi imba, u tshina, u amba zwipitshi, ndi na mbekanyamushumo yanga ya thelevishini, ndi tshi ambara zwiambaro zwavhuḓi nahone ndi tshi dzula ndi na vhathu vha ndeme vha ngaho muvhusi wa Hong Kong.

Nga ṅwaha u tevhelaho, ndo thoma u tamba mimuvi nahone zwifhinga zwinzhi ndo vha ndi mutambi dendele. Vhoramafhungo vho vha vha tshi ṱoḓa mafhungo anga, vhafodi vha tshi ṱoḓa zwinepe zwanga nahone vhathu vho vha vha tshi ṱoḓa uri ndi vhe hone musi hu tshi vulwa zwifhaṱo, ndi tshi rambiwa zwiḽiwani zwa masiari na zwa madekwana. Vhathu vho vha vha tshi ṱoḓa u ḓivha nga ha vhutshilo hanga.

A tshi khou tamba muvi wa vhuvemu

Nga zwiṱuku nga zwiṱuku, ndo ṱhogomela uri zwenezwi zwoṱhe zwo vha zwi sa kungi nga nḓila ye nda vha ndo humbula ngayo. Ndo vha ndi tshi tamba mimuvi ya vhuvemu nahone zwenezwi zwo vha zwi khombo. Vhatambi vha Hong Kong vho vha vha sa iti mimuvi yavho sa vhathu vha Hollywood, nga zwenezwo, ndo vha ndi tshi fanela u fhufha goloi nga thuthuthu nahone zwenezwo zwo vha zwi khombo. Kha mimuvi minzhi ye khayo nda vha ndi mutambi dendele, yo vha i ya vhuḓifari vhu si havhuḓi na vhuvemu. Miṅwe yo vha i na zwithu zwa madimoni.

Nga 1995, ndo vhingwa nga mubveledzi wa mimuvi. Naho ndo vha ndi tshi vhonala u nga ndi na zwithu zwoṱhe zwine zwa ita uri ndi takale, zwithu zwi nga ho vhunzhili-nzhili, lupfumo na mufarisi a re na lufuno, ndo vha ndo tsikeledzea nahone ndi songo takala. Ndo dzhia phetho ya u litsha u tamba mimuvi.

U HUMBULA LUTENDO LWE NDA VHA NDI NALWO MUSI NDI TSHI KHA ḒI ALUWA

Ndo thoma u humbula nga ho dzikaho nga ha lutendo lwe nda vha ndi nalwo musi ndi tshi kha ḓi aluwa. Nṋe na mukomana wanga ro vha ri tshi ya u dalela muṱa wa Ṱhanzi dza Yehova Mugivhela muṅwe na muṅwe. Joe McGrath khotsi wa henefho, vho vha vha tshi guda Bivhili na riṋe na vhananyana vhavho vhararu. Muṱa wavho wo vha u na lufuno nahone Vho-Joe vho vha vha tshi ṱhonifha mufumakadzi wavho na vhana vhavho. Zwiṅwe hafhu, ndo ḓiphina nga u ya navho miṱanganoni ya Vhukriste. Nga zwiṅwe zwifhinga ro vha ri tshi ya maguvhanganoni mahulwane. Zwenezwo zwo vha zwi zwifhinga zwi takadzaho. Ndo vha ndi tshi ḓipfa ndo tsireledzea musi ndi na Dziṱhanzi.

Zwo fhambanaho na zwenezwo, muṱani wa hashu ho vha hu tshi dzula hu na dzikhakhathi. Matshilele a khotsi  anga o vha a tshi ita uri mme anga vha dzule vho ṱungufhala nahone vho tsikeledzea vhukuma. Musi ndi na miṅwaha ya fumi, Mme anga vho litsha u konana na Ṱhanzi dza Yehova. Naho ndi songo tsha ita mvelaphanḓa nga ho fhelelaho, ndo lovhedzwa ndi na miṅwaha ya 17. Fhedzi nga u ṱavhanya, ndo thoma u ḓifara nga nḓila i si ya Vhukriste nahone nda si tsha vha muraḓo wa tshivhidzo.

NDO DZHIA PHETHO YA U VHUYELELA

Nga u ṱavhanya nga murahu ha mbingano yanga, ndo dalelwa nga vhalavhelesi vhavhili vha tshivhidzo tsha Ṱhanzi dza Yehova dza hune nda dzula hone. Vho nṱalutshedza nḓila ine nda nga dovha nda vha na vhushaka na Yehova Mudzimu ngayo nahone vho dzudzanya uri hu ḓe murumiwa ane a pfi Cindy uri a nthuse. Nga tshenetsho tshifhinga, ndo vha ndi si tsheena lutendo, nga zwenezwo, ndo mu humbela uri a ntsumbedze uri Bivhili ndi Ipfi ḽa Mudzimu zwa vhukuma. O ntsumbedza tsumbo dza vhuporofita ha Bivhili he ha ḓadzea. Nga zwiṱuku nga zwiṱuku, ro vha khonani dza tsini nahone a nkhumbela uri ndi gude nae pfunzo dza mutheo dza Bivhili. Ndo tenda. Lwa u tou thoma, ndo dzhiela nṱha uri Yehova ndi Mudzimu ane a ṱoḓa ndi tshi takala.

Musi ndi tshi dovha nda ya miṱanganoni ya Vhukriste, ndo ṱhogomela uri ndi takalela u vha ndi na Dziṱhanzi u fhira u vha ndi na vhathu vhane vha vha kha bindu ḽa mimuvi. Fhedzi zwe nda zwi tshenzhela musi ndi tshee muṱuku zwo ita uri ndi si tsha fulufhela muthu nahone ndo vha ndi si tsha ḓitakalela. Muṅwe tshivhidzoni o nthusa musi a tshi ntsumbedza zwi tshi bva Bivhilini nḓila ya u sedzana na vhuleme nahone ndo dovha nda kona u vhumba vhukonani havhuḓi.

ZWA KHWINE ZWI FHIRAHO VHUNZHILI-NZHILI

Nga 1997 nṋe na mufarisi wanga ro pfulutshela Hollywood, California ngei U.S.A. Musi ndi henefho ndo kona u thusa vhathu vhanzhi uri vha vhuyelwe nga vhuṱali vhu re Ipfini ḽa Mudzimu. U gudisa Bivhili zwo ita uri ndi fushee u fhira vhunzhili-nzhili ha u tamba mimuvi na u vha mutambi dendele. Sa tsumbo, nga 2002, ndo ṱangana na khonani yanga ya kale Cheri a no bva Hong Kong. Ro tshenzhela zwithu zwi fanaho vhutshiloni nga nḓila nnzhi. Ndi ene we a vha e Miss Hong Kong hu sa athu u dzhena nṋe. Nga zwenezwo, ndi ene we a nthwela ṱari musi ndi tshi vhewa sa Miss Hong Kong. O vha e mutambi wa mimuvi nahone nga murahu a vha mubveledzi wayo, a tshi shuma na vhalanguli vha re na bvumo. Na ene o pfulutshela Hollywood.

Ndo pfela Cheri vhuṱungu musi ndi tshi pfa uri muthu we a vha a tshi ḓo mu vhinga o fa nga nṱhani ha vhulwadze ha mbilu he ha mu fara nga u ṱavhanya. Vhurereli hawe ha Vhubuddha a ho ngo kona u mu khuthadza. U fana na nṋe, vhutshilo hawe ho vha vhu ha vhunzhili-nzhili he vhaṅwe vha vha vha tshi vhu tama, fhedzi o vha o ṱungufhala nahone a sa koni u fulufhela muṅwe muthu. Ndo thoma u amba nae nga ha zwe nda zwi guda Bivhilini, fhedzi vhurereli hawe ha Vhubuddha ho ita uri zwi mu konḓele u zwi dzhiela nṱha.

Khonani yanga Cheri a tshi khou tamba muvi

Ḽiṅwe ḓuvha nga 2003, Cheri o nthwela luṱingo e ngei Vancouver ngei Canada he a vha a tshi khou ita hone muvi. O mmbudza o takala uri musi a tshi khou reila nahone a tshi khou ḓiphina nga u vhona shango, o mbo ḓi thoma u rabela nga u ṱavhanya a ri: “Mmbudze, Ndi nnyi Mudzimu wa ngoho? Dzina ḽau ndi nnyi?” Nga tshenetsho tshifhinga, o fhira tsini na Holo ya Muvhuso nahone a vhona dzina Yehova. O pfa uri ndi phindulo i bvaho ha Mudzimu nahone o vha a tshi ṱoḓa u ṱangana na Ṱhanzi dza Yehova nga u ṱavhanya. Ndo ita nzudzanyo nahone hu sa athu u fhela maḓuvha a si gathi, o ya muṱanganoni wa tshivhidzo tsha Lutshaina ngei Vancouver.

 Nga murahu, Cheri o mmbudza uri: “Vhenevha vhathu vha na dzangalelo kha nṋe. Ndi a kona u vha vhudza nḓila ine nda ḓipfa ngayo.” Ndo vha ndo takala u pfa zwenezwo ngauri Cheri o vha e si na khonani musi a tshi kha ḓi tamba mimuvi. Cheri o bvela phanḓa a tshi ya miṱanganoni. Nga 2005 o ita thendelano ya u bveledza mimuvi mivhili ngei Tshaina, nahone zwenezwo zwo ita uri a humele Hong Kong. Zwi takadzaho ndi uri nga 2006, Cheri o ṋekedzela vhutshilo hawe kha Yehova nahone a lovhedzwa ngei guvhanganoni ḽa Dziṱhanzi ngei Hong Kong. Naho o vha a tshi ṱoḓa u shumela Yehova nga ho engedzeaho, mushumo wawe wa mimuvi wo ita uri zwi mu konḓele vhukuma u ita nga u ralo nahone zwenezwo zwo ita uri a si takale.

DAKALO ḼA U THUSA VHAṄWE

Nga 2009, vhutshilo ha Cheri ho shanduka. O dzhia phetho ya u litsha zwa mimuvi u itela uri a shumele Yehova nga vhuḓalo. O vhumba vhukonani tshivhidzoni tsha Vhukriste. O vha muhuweleli wa mafhungo maḓifha a Muvhuso wa tshifhinga tsho ḓalaho nahone a ḓiphina nga u thusa vhathu u wana nḓila ya khwine ya vhutshilo.—Mateo 24:14.

Nga zwenezwo, Cheri o dzhia phetho ya u guda Lunepal u itela u tikedza tshigwada tsha Dziṱhanzi dza ngei Hong Kong dzine dza amba Lunepal. Vhunzhi ha vhathu vhane vha amba Lunepal a vha dzhielwi nṱha kana vha a nyadzwa ngauri a vha koni u amba zwavhuḓi Luisimane kana Lutshaina na ngauri mvelele yavho yo fhambana na ya vhaṅwe. Cheri o mmbudza nḓila ye a takala ngayo musi a tshi thusa vhenevho vhathu u pfesesa Bivhili. Sa tsumbo, ḽiṅwe ḓuvha e vhuḓinḓani ha nnḓu nga nnḓu, o ṱangana na muṅwe mufumakadzi ane a amba Lunepal we a vha a tshi ḓivhanyana nga ha Yesu, fhedzi a sa ḓivhi tshithu nga ha Yehova Mudzimu wa ngoho. Cheri o shumisa Bivhili u mu sumbedza uri Yesu o rabela Khotsi awe wa ṱaḓulu. Musi mufumakadzi a tshi ṱhogomela uri a nga rabela Mudzimu wa ngoho, ane dzina ḽawe ḽa vha Yehova, o mbo ḓi ṱanganedza mafhungo ngoho. Nga u ṱavhanya, munna wawe na ṅwananyana wawe na vhone vho guda Bivhili.—Psalme ya 83:18; Luka 22:41, 42.

Cheri ṋamusi

Musi ndi tshi vhona nḓila ine Cheri a takalela ngayo u huwelela lwa tshifhinga tsho ḓalaho, ndo ḓivhudzisa uri, ‘Ndi mini zwine zwa nthivhela u ita zwi fanaho?’ Nga tshenetsho tshifhinga, na nṋe ndo vha ndi tshi dzula Hong Kong. Ndo dzhia phetho ya u dzudzanya vhutshilo hanga u itela u huwelela ngoho i re Bivhilini nga ho engedzeaho. Ndo wana uri u thetshelesa vhathu na u vha thusa u pfesesa Ipfi ḽa Mudzimu zwi ita uri ndi takale vhukuma.

Ndo ṱhogomela uri u thusa vhathu u pfesesa Ipfi ḽa Mudzimu zwi ita uri ndi takale vhukuma

Sa tsumbo, ndo kona u guda Bivhili na muṅwe mufumakadzi wa Muvietnam we a vha a tshi dzula o ṱungufhala nahone kanzhi o vha a tshi lila. Zwino hu na zwine zwa mu takadza vhutshiloni nahone u takalela vhukuma vhukonani tshivhidzoni.

Nṋe na Cheri ro wana zwa khwine u fhira vhutshilo ha vhunzhili-nzhili. Naho u tamba mimuvi zwo vha zwi tshi takadza nahone zwi tshi ita uri ri vhe na bvumo, u gudisa vhathu nga ha Yehova Mudzimu zwi a fusha vhukuma ngauri zwi ḓisela ene vhugala. Vhukuma, ro tshenzhela ngoho ya maipfi a Yesu ane a ri: “U ṋea zwi ḓisa dakalo ḽihulu u fhira u ṋewa.”—Mishumo 20:35.