Pfukelani kha mafhungo

Pfukelani kha zwi re ngomu

 THERO I RE KHA GWATI | NAA ZWI A KONADZEA—U TSHILA NGA MURAHU HA U FA?

Naa Hu Na Fulufhelo Nga Vho Faho?

Naa Hu Na Fulufhelo Nga Vho Faho?

Naa vhafu vha nga dovha vha tshila?

PHINDULO I BVAHO BIVHILINI: “Hu ḓa tshifhinga tshine vhoṱhe vha re mavhiḓani vha ḓo pfa ipfi [ḽa Yesu] vha bva.”Yohane 5:28, 29.

Nga eneo maipfi, Yesu o dzula o amba nga ha tshifhinga tshine nga fhasi ha Muvhuso wawe, vha re mavhiḓani vha ḓo vuswa. Fernando we a bulwa kha thero yo fhiraho, o ri: “Ndo vha ndo mangala musi ndi tshi thoma u vhala Yohane 5:28, 29. Yo ita uri ndi vhe na fulufhelo nga ha vhumatshelo.”

Tshifhingani tsha kale, Yobo munna a fulufhedzeaho o vha o lavhelela uri musi a tshi fa, mafheleloni Mudzimu u ḓo mu vusa. Yobo o vhudzisa a ri: “Huno muthu a fa u a dovha a tshila naa?” Nga zwenezwo, o fhindula e na fulufhelo a ri: “Maḓuvha oṱhe ndi tshee ndo hwala hoyu muhwalo [ndi Mavhiḓani] ndi ḓo lindela ndi vhuye ndi rulwe. Ndi hone u tshi ḓo mmbidza nda aravha.”—Yobo 14:14, 15, Bivhili Khethwa.

Mvuwo ya Lazaro i ri ṋea fulufhelo ḽa tshifhingani tshi ḓaho

U vuswa ho vha hu si zwithu zwiswa kha Marita khaladzi a Lazaro. Musi Lazaro o no fa, Yesu o amba na Marita a ri: “Khaladzi au u ḓo vuwa.” Marita o fhindula a ri: “Ndi a zwi ḓivha zwa uri u ḓo vuwa musi vhafu vha tshi vuswa nga ḓuvha ḽa vhufhelo.” Nga zwenezwo, Yesu a amba nae a ri: “Ndi nṋe mvuwo na vhutshilo. Naho muthu ane a vha na lutendo kha nṋe a tshi fa, u ḓo dovha a tshila.” (Yohane 11:23-25) Nga u ṱavhanya, Yesu a vusa Lazaro! Eneo mafhungo a takadzaho a ri ṋea mavhala a nngwe a zwiitea zwihulwane zwa tshifhingani tshi ḓaho. Edzani u humbula hu tshi khou vuswa vhathu shangoni ḽoṱhe!

Naa vhaṅwe vha ḓo vuselwa ṱaḓulu?

PHINDULO I BVAHO BIVHILINI: Ipfi ḽa Mudzimu ḽi sumbedza uri mvuwo ya Yesu yo fhambana na dza malo dzo ṅwalwaho Bivhilini. Vhenevho vhathu vha malo vho vuselwa kha ḽifhasi. Fhedzi ri vhala zwi tevhelaho nga ha mvuwo ya Yesu: “Yesu Kristo u tshanḓani tsha u ḽa tsha Mudzimu, ngauri o ya ṱaḓulu.” (1 Petro 3:21, 22) Naa ndi Yesu fhedzi we a vuselwa ṱaḓulu? Yesu o dzula o vhudza vhaapostola vhawe uri: “Arali nda ya u ni lugisela vhudzulo, ndi ḓo dovha nda vhuya nda ni dzhia, uri hune nṋe nda vha hone na inwi ni vhe henefho.”—Yohane 14:3.

Kristo o ya ṱaḓulu u itela u lugiselela u swika ha vhafunziwa vhawe. Vhane vha ḓo vuselwa ṱaḓulu vha ḓo vha 144 000. (Nzumbululo 14:1, 3) Fhedzi ndi mini zwine vhenevho vhatevheli vha Yesu vha ḓo zwi ita ṱaḓulu?

 Vha ḓo vha vho farakanea vhukuma! Bivhili i ri: “Muṅwe na muṅwe ane a ḓo vuswa nga mvuwo ya u thoma u a takala nahone ndi mukhethwa; lufu lwa vhuvhili a lu na maanḓa kha vhenevha, fhedzi vha ḓo vha vhotshifhe vha Mudzimu na Kristo, nahone vha ḓo vhusa sa mahosi nae miṅwaha ya tshigidi.” (Nzumbululo 20:6) Vhane vha ḓo vuselwa ṱaḓulu vha ḓo vhusa ḽifhasi ḽoṱhe na Kristo sa mahosi na vhotshifhe.

Ndi vhafhio vhane vha ḓo vuswa musi ho no vuswa vhane vha khou ya ṱaḓulu?

PHINDULO I BVAHO BIVHILINI: U ya nga Bivhili muapostola Paulo o ri: “Fulufhelo ḽine nda vha naḽo kha Mudzimu, na vhenevha vhathu vha naḽo, ndi ḽa uri hu ḓo vha na mvuwo ya vho lugaho na vha songo lugaho.”Mishumo 24:15.

Ipfi ḽa Mudzimu ḽi ri khwaṱhisedza uri vhathu vhanzhi vhe vha fa vha ḓo dovha vha tshila

Ndi vhafhio vhane vha ḓo katelwa kha vhathu vhe Paulo a ri ndi “vho lugaho”? Ṱhogomelani tsumbo i tevhelaho. Musi Daniele munna a fulufhedzeaho e tsini na u fa, o vhudzwa uri: “U ḓo awela, wa kona u vuwa, wa ṱanganedza mukovhe wau vhufheloni ha maḓuvha.” (Daniele 12:13) Daniele u ḓo vuselwa ngafhi? Bivhili i ri: “Vha u ḓo vha vhaṋe vha shango ndi vhavhuya, ndi vhone vha u ḓo dzula khaḽo’ lini na lini.” (Psalme ya 37:29) Nahone Yesu o dzula o amba uri: “Hu takala vho vuḓaho, ngauri vha ḓo vha vhaṋe vha ḽifhasi.” (Mateo 5:5) Daniele na vhaṅwe vhanna na vhafumakadzi vha fulufhedzeaho vha ḓo vuswa uri vha tshile kha ḽifhasi lwa tshoṱhe.

Ndi vhafhio vhane vha ḓo katelwa kha vhathu vhe Paulo a ri ndi “vha songo lugaho”? Ndi vhathu vhanzhi-vhanzhi vhe vha fa na vhaṅwe vhe vha si wane tshibuli tsha u pfesesa na u shumisa ngoho i re Bivhilini. Musi vho no vuswa, vha ḓo kona u ḓivha na u ṱanganedza Yehova * na Yesu. (Yohane 17:3) Vhoṱhe vhane vha khetha u shumela Yehova Mudzimu vha ḓo vha na tshilavhelelwa tsha u tshila tshoṱhe.

Vhoṱhe vhane vha khetha u shumela Mudzimu vha ḓo vha na tshilavhelelwa tsha u tshila tshoṱhe vhe na mutakalo na dakalo ḽo fhelelaho

Vhuimo ha ḽifhasi vhu ḓo vha vhu hani?

PHINDULO I BVAHO BIVHILINI: Mudzimu “u ḓo phumula miṱodzi yoṱhe maṱoni avho, lufu a lu tsha ḓo vha hone, na u ṱungufhala na u lila na vhuṱungu a zwi tsha ḓo vha hone.” (Nzumbululo 21:4) “Vha ḓo fhaṱa dzinnḓu vha dzula khadzo’; vha ḓo sima miṱokola vha ḽa mitshelo yayo.”—Yesaya 65:21.

Edzani u humbula ni tshi khou tshila kha honoho vhuimo na vhafunwa vhaṋu vho vuswaho! Fhedzi ni nga ḓivhudzisa uri, Ni zwi ḓivha hani uri hu ḓo vha na mvuwo?

^ par. 15 Yehova ndi dzina ḽa Mudzimu sa zwe zwa ambiwa Bivhilini.