Pfukelani kha mafhungo

Pfukelani kha zwi re ngomu

 THERO I RE KHA GWATI | YESU U TSHIDZAKHA MINI?

Ndi Ngani Ri Tshi Fanela U Tshidzwa

Ndi Ngani Ri Tshi Fanela U Tshidzwa

“Muthu mu-bebwa-nga-musadzi, ndi wa maḓuvha a si gathi; ndi pfura-maṱhupho. U ṱharamuwa vhunga dzuvha, a mbo fhufhurea; u fhira vhunga dunzi, ha imi.”—Yobo 14:1, 2.

U bva kale, vhathu vha humbula nga ha nḓila ine zwa ḓo vha zwavhuḓi ngayo u tshila tshoṱhe vhe vhaswa nahone vhe na mutakalo wavhuḓi. Zwi ṱungufhadzaho ndi uri: Ri a fa. Maipfi a Yobo o ambiwaho mathomoni, miṅwahani ya zwigidi zwiraru zwo fhiraho, a kha ḓi vha a ngoho na ṋamusi.

Vhathu vhoṱhe vha na lutamo luhulwane lwa u tshila tshoṱhe. Bivhili i ri vhudza uri Mudzimu o vhea lutamo mbiluni dzashu lwa u tshila tshoṱhe na lutamo lwa u zwi ṱalukanya. (Muhuweleli 3:11) Nga zwenezwo, naa zwi a pfala kha inwi uri Mudzimu ane a vha na lufuno a nga vhea lutamo kha riṋe lune zwa sa konadzee u lu swikelela? Arali phindulo yaṋu i hai, ni khou amba ngoho. Ipfi ḽa Mudzimu ḽi amba uri lufu ndi swina nahone ḽi fulufhedzisa uri ‘ḽi ḓo fheliswa.’—1 Vhakorinta 15:26.

A zwi timatimisi uri lufu ndi swina. A huna muthu o takalaho muhumbuloni ane a nga lu ṱanganedza. Musi hu tshi vha na khombo ri a i tinya, u dzumbama kana ra shavha. Musi ri tshi lwala, ri ṱoḓa nḓila dzine dza nga ri ita uri ri vhe khwine. Ri ita zwoṱhe zwine ra nga kona u itela u iledza zwithu zwine zwa nga ita uri ri fe.

Naa hu na tshiṅwe tshiitisi tshine tsha ri ita uri ri tende uri ḽeneḽi swina ḽa kale ḽi ḓo vhuya ḽa fheliswa? Ee, tshi hone. Yehova Mudzimu ane a vha Musiki, ho ngo sika vhathu uri vha tshile miṅwaha i si gathi nahone nga murahu vha fe. U fa ha vhathu ho vha hu si ndivho yawe u bva mathomoni. O vha a tshi ṱoḓa uri vhathu vha tshile lwa tshoṱhe kha ḽifhasi nahone ndivho yawe o vha a tshi ḓo i khunyeledza.—Yesaya 55:11.

Nga zwenezwo, lufu lu ḓo fheliswa nga nḓila-ḓe? Kha ḓivhazwakale yoṱhe, vhathu vho lingedza u tandulula thaidzo dza lufu fhedzi vho kundelwa. Musalauno, ṱhoḓisiso i kha ḓi bvela phanḓa. Vhorasaintsi vho ita mishonga ine ya kona u thivhela maṅwe malwadze. Vho ṱolisisa nḓila ine zwithu zwi tshilaho zwa vhumbiwa ngayo. Fhethu hunzhi, vhathu nga u tou angaredza, vha tshila tshifhinga tshilapfu u fhira miṅwahani ya ḓana yo fhiraho. Naho zwo ralo, lufu a lu athu u kundwa. Samusi Bivhili i tshi amba uri: “Zwoṱhe zwi vhuyelela mavuni.”—Muhuweleli 3:20.

Zwi takadzaho ndi uri a ro ngo tea u ḓitika nga vhuṱali ha vhathu u itela u tandulula thaidzo ine ndi kale i hone. Yehova Mudzimu o no ri dzudzanyela uri ri tshidzwe kana ri phuluswe kha lufu, nahone muthu muhulwane kha yeneyo nzudzanyo ndi Yesu Kristo.