Pfukelani kha mafhungo

Pfukelani kha zwi re ngomu

 NYAMBEDZANO NA MUHURA

Ndi Ngani Ri Tshi Humbula Lufu Lwa Yesu?

Ndi Ngani Ri Tshi Humbula Lufu Lwa Yesu?

Hu tevhela nyambedzano yo ḓoweleaho ine muṅwe wa Ṱhanzi dza Yehova a nga vha nayo na muhura. Kha ri ri muṅwe wa Ṱhanzi ane a pfi Megan o ya hayani ha muṅwe mufumakadzi ane a pfi Shirley.

“DZULANI NI TSHI ITA ZWENEZWI U ITELA U NKHUMBULA”

Megan: Aa, Shirley. Zwo vha zwi zwavhuḓi vhukuma u ni vhona Tshihumbudzoni tsha lufu lwa Yesu Kristo vhege yo fhiraho. * Tshihumbudzo tsho vha tshi hani?

Shirley: Ndo takalela u vha hone, fhedzi ngoho ndi ya uri a tho ngo kona u pfesesa nga vhuḓalo zwoṱhe zwe zwa ambiwa. Ndo no pfa vhathu vha tshi pembelela u bebwa ha Yesu nga Khirisimusi na u vuswa hawe nga Easter, fhedzi a thi athu u vhuya nda pfa muṅwe muthu a tshi humbula lufu lwawe.

Megan: Ndi ngoho, shangoni ḽoṱhe zwo ḓowelea uri hu pembelwa Khirisimusi na Easter. Fhedzi Ṱhanzi dza Yehova dzi vhona zwi zwa ndeme u humbula lufu lwa Yesu. Arali ni na mimunithi i si gathi, ndi nga takalela u ni sumbedza zwiitisi zwa zwenezwi.

Shirley: Ee, ndi nayo.

Megan: Zwi re zwone ndi uri Ṱhanzi dza Yehova dzi humbula lufu lwa Yesu ngauri o laedza vhatevheli vhawe uri vha ite nga u ralo. Ṱhogomelani zwe zwa itea vhusikuni ha musi Yesu a sa athu u fa. Ni a humbula nga ha zwiḽiwa zwo khetheaho zwe a zwi ḽa na vhatevheli vhawe vha fulufhedzeaho?

Shirley: Ni khou amba nga ha Tshilalelo tsha u Fhedza?

Megan: Ee. Tshi dovha tsha vhidzwa Tshilalelo Tsha Murena. Kha tshenetsho tshilalelo, Yesu o ṋea vhatevheli vhawe ndaela dzi pfalaho. Ndi khou humbela uri ni vhale maipfi o ṅwalwaho kha Luka 22:19.

Shirley: Zwo luga. “A dovha a dzhia na tshinkwa, a livhuha, a tshi ṅwata, a vha ṋea a ri: ‘Tshi imela muvhili wanga, une wa ḓo ṋekedzwa u itela inwi. Dzulani ni tshi ita zwenezwi u itela u nkhumbula.’”

Megan: Ndo livhuha. Ṱhogomelani ndaela ya Yesu kha mutaladzi wa u fhedza wa yeneyo ndimana: “Dzulani ni tshi ita zwenezwi u itela u nkhumbula.” Nahone musi a sa athu u vha ṋea ndaela ine vhatevheli vhawe vha fanela u i humbula, Yesu o zwi vhea zwa vha khagala uri vha fanela u humbula mini nga hae. O amba uri vhutshilo hawe vhu ḓo ṋekedzwa a tshi itela vhatevheli vhawe. Yesu o amba zwi fanaho kha maipfi o ṅwalwaho kha Mateo 20:28. Yeneyo ndimana i ri: “Murwa-muthu ho ngo ḓela u shumelwa, fhedzi o ḓela u shumela vhaṅwe na u ṋekedza vhutshilo hawe uri vhu vhe tshirengululi a tshi itela vhanzhi.” Nga u tou pfufhifhadza, ndi ngazwo Ṱhanzi dza Yehova dzi tshi ṱangana ṅwaha muṅwe na muṅwe u itela u humbula lufu lwa Yesu—u humbula tshiṱhavhelo tshi rengululaho tshe Yesu a tshi ṋekedza. Lufu lwawe lu nga amba vhutshilo kha vhathu vhoṱhe.

NDI NGANI TSHIRENGULULI TSHO VHA TSHI TSHI ṰOḒEA?

Shirley: Ndo no pfa vhathu vha tshi amba uri Yesu o fa u itela uri ri wane vhutshilo. U amba ngoho, a thi koni u pfesesa nḓila ine zwenezwi zwa shuma ngayo.

 Megan: A si inwi ni noṱhe, Shirley. Mafhungo a tshiṱhavhelo tshi rengululaho tsha Yesu ho ngo leluwa. Fhedzi a dovha a vha ngoho yavhuḓi vhukuma i re Ipfini ḽa Mudzimu. Tshoo! ni kha ḓi vha na tshifhinga?

Shirley: Ee, ndi na mimunithi i si gathi.

Megan: Ndi zwavhuḓi. Ndi kha ḓi tou bva u vhala nga ha tshirengululi, nahone ndi ḓo lingedza u ni ṱalutshedza nga nḓila yo leluwaho.

Shirley: Zwo luga.

Megan: U itela u pfesesa tshirengululi, ri fanela u thoma ra pfesesa zwe zwa itwa nga Adamu na Eva musi vha tshi ita tshivhi tsimuni ya Edeni. Uri ri pfesese eneo mafhungo nga vhuḓalo, kha ri vhale roṱhe Vharoma 6:23. Ndi khou humbela uri ni lu vhale.

Shirley: Zwo luga. Lu ri: “Malamba a tshivhi ndi lufu, fhedzi tshifhiwa tshine ra ṋewa nga Mudzimu ndi u tshila tshoṱhe nga Kristo Yesu Murena washu.”

Megan: Ndo livhuha. Kha ri ṱolisise enea maipfi. Tsha u thoma, ṱhogomelani nḓila ine yeneyo ndimana ya thoma ngayo: “Malamba a tshivhi ndi lufu.” Ndi mulayo wo leluwaho we Mudzimu a u vhea mathomoni kha ḓivhazwakale ya vhathu—malamba kana mulifho wa tshivhi ndi lufu. Ndi ngoho uri mathomoni ho vha hu si na muthu ane a vha na tshivhi. Adamu na Eva vho sikwa vho fhelela, nahone vhana vhavho vhoṱhe vho vha vha tshi ḓo bebwa vho fhelela. Nga zwenezwo, ho vha hu tshi ḓo vha hu si na tshiitisi tsha uri vhathu vha fe. Adamu na Eva u katela na vhana vhavho vhoṱhe vho vha vhe na tshilavhelelwa tsha u tshila tshoṱhe vho takala. Fhedzi samusi ri tshi zwi ḓivha, zwithu a zwo ngo tshimbila zwavhuḓi, a si zwone kani?

Shirley: Ee. Adamu na Eva vho ḽa mutshelo wo dzivhiswaho.

Megan: Ndi ngoho. Nahone musi vha tshi ita nga u ralo—Adamu na Eva vho khetha u sa thetshelesa Mudzimu—vho ita tshivhi. Zwi re zwone ndi uri vho khetha u sa fhelela, vha vha vhaitazwivhi. Yeneyo phetho yo vha na masiandoitwa a si avhuḓi hu si kha Adamu na Eva fhedzi, fhedzi na kha vhana vhavho vhoṱhe.

Shirley: Ni khou ṱoḓa uri mini ni tshi ralo?

Megan: I rini ndi ni ṋee tsumbo. Naa ni a funa u baka?

Shirley: Ee! Ndi a zwi funa.

Megan: Kha ri ri ni na pani yavhuḓi ntswa ya u baka vhurotho. Nahone musi ni sa athu u i shumisa, ya mbo ḓi wa ya bodea. Zwino, hu ḓo itea mini kha vhurotho vhune na ḓo vhu baka nga yeneyo pani? Naa vhu nga si bve ho bodea?

Shirley: Ee, vhu ḓo bva ho bodea.

Megan: Nga nḓila i fanaho, musi Adamu na Eva vha tshi khetha u sa thetshelesa Mudzimu, vho tou nga pani yo “bodeaho” nga nṱhani ha tshivhi nahone vha si tsha fhelela. Ngauri vho vha vhaitazwivhi vha sa athu u vha na vhana, vhana vhavho vhoṱhe vho bebwa vhe na u “bodea” hu fanaho na pani. Vhoṱhe vho bebwa vhe na tshivhi. Bivhilini, ipfi “tshivhi” a ḽi ambeli kha zwine muthu a zwi ita fhedzi, fhedzi ḽi ambela na kha vhuimo he ra vhu mamela. Naho nṋe na inwi ri songo ita zwithu zwo khakheaho—ro vha ri sa athu u bebwa musi Adamu na Eva vha tshi ita tshivhi—na riṋe zwo ri kwama na vhana vhavho vhoṱhe na vhashu, zwa ita uri ri si tsha fhelela nahone ra vha na tshivhi zwine zwa ita uri ri fe. Samusi ro zwi vhala kha Vharoma 6:23, malamba a tshivhi ndi lufu.

Shirley: Fhedzi zwenezwo a zwi pfali. Ndi ngani vhathu vhoṱhe vha tshi fanela u pfa vhuṱungu u ya nga hu sa fheli nga nṱhani ha tshivhi tsha Adamu na Eva?

Megan: Ni khou amba ngoho—zwi vhonala zwi sa pfali. Fhedzi hu na zwinzhi u fhira zwenezwo. Kha khaṱulo yawe yo fhelelaho, Mudzimu o dzhia phetho ya uri Adamu na Eva vha ḓo fa nga nṱhani ha zwivhi zwavho, fhedzi riṋe sa vhana vhavho o ita uri ri vhe na fulufhelo. Mudzimu o ri itela nḓila ya u bva kha honohu vhuleme. Ndi ngazwo hu na tshiṱhavhelo tshi rengululaho tsha Yesu. Kha ri dovhe ri sedze Vharoma 6:23. Nga murahu ha u amba uri “malamba a tshivhi ndi lufu,” ndimana i ri: “Fhedzi tshifhiwa tshine ra ṋewa nga Mudzimu ndi u tshila tshoṱhe nga Kristo Yesu Murena washu.” Nga zwenezwo,  ndi lufu lwa Yesu lune lwa ri vulela nḓila ya u ponyoka tshivhi na lufu. *

TSHIRENGULULI—TSHIFHIWA TSHIHULWANE TSHA MUDZIMU

Megan: Hu na maṅwe mafhungo ane a vha hone kha ino ndimana ane nda nga takalela uri ni livhise ṱhogomelo khao.

Shirley: Ndi afhio eneo?

Megan: Ṱhogomelani uri ndimana i ri: “Tshifhiwa tshine ra ṋewa nga Mudzimu ndi u tshila tshoṱhe nga Kristo Yesu Murena washu.” Nga zwenezwo, arali hu Yesu we a tambula nahone a ri fela, a ṋekedza vhutshilo hawe a tshi itela riṋe, ndi ngani ndimana i tshi amba nga ha tshirengululi sa “tshifhiwa tshine ra ṋewa nga Mudzimu”? Ndi ngani hu si “tshifhiwa tshine ra ṋewa nga Yesu”? *

Shirley: Hmm. A thi ḓivhi.

Megan: Mudzimu o sika Adamu na Eva, nahone ndi vhone vhe vha ita tshivhi nga u sa thetshelesa ngei tsimuni ya Edeni. A nga vha o pfa vhuṱungu vhukuma musi vhana vhawe vhavhili vha u thoma vha ṋama vha tshi mu shandukela. Fhedzi Yehova o ṱavhanya a amba uri thandululo i ḓo vha ifhio. * Ndivho yawe yo vha i ya uri muṅwe wa zwivhumbwa zwawe zwa muya a ḓe kha ḽifhasi, a tshile sa muthu o fhelelaho, nahone mafheleloni a ṋekedze vhutshilo hawe sa tshiṱhavhelo tshi rengululaho. Nga zwenezwo, ndugiselelo yoṱhe ya tshirengululi yo vha i tshifhiwa tshi bvaho ha Mudzimu. Hu dovha ha vha na nḓila ine ya sumbedza uri tshirengululi ndi tshifhiwa tsha Mudzimu. No no vhuya na humbula nga ha nḓila ine Mudzimu a nga vha o ḓipfa ngayo musi Yesu a tshi vhulahwa?

Shirley: Hai, a thi athu u vhuya nda humbula nga hazwo.

Megan: Ndi khou vhona zwiṅwe zwitambiswa hafha muṱani. Ni nga vha ni na vhana.

Shirley: Ee, ndi na vhana vhavhili—mutukana na musidzana.

Megan: Sa mubebi, humbulani nga ha nḓila ye Khotsi a Yesu wa ṱaḓulu, Yehova Mudzimu, a nga vha o ḓipfa ngayo nga ḓuvha ḽe Yesu a fa ngaḽo. O ḓipfa hani musi a tshi vhona Murwa wawe ane a mu funa a tshi farwa, u holedzwa na u rwiwa nga mavili? Nahone Khotsi o ḓipfa hani musi Murwa wawe a tshi ombelwa kha danda nahone a siiwa henefho uri a fe nga zwiṱuku nga zwiṱuku, lufu lu vhavhaho?

Shirley: A nga vha o pfa vhuṱungu vhukuma. Ndo vha ndi sa athu u vhuya nda humbula nga hazwo!

Megan: Vhukuma, a zwi konadzei uri ri ḓivhe nḓila ye Mudzimu a ḓipfa ngayo zwa vhukuma nga ḽeneḽo ḓuvha. Fhedzi ri a zwi ḓivha uri u na maḓipfele, nahone ri a ḓivha uri ndi ngani o tendela zwenezwo zwoṱhe zwi tshi itea. Ro ṱalutshedzwa zwavhuḓi kha luṅwalo lwo ḓoweleaho lwa Yohane 3:16. Ndi khou humbela uri ni lu vhale.

Shirley: Zwo luga. Lu ri: “Mudzimu o funa shango zwihuluhulu a vhuya a kumedza Murwa wawe mubebwa e eṱhe, uri muṅwe na muṅwe ane a vha na lutendo khae a si fheliswe, fhedzi a wane vhutshilo vhu sa fheli.”

Tshiṱhavhelo tshi rengululaho ndi lufuno luhulwane vhukuma

Megan: Ndo livhuha. Dovhani ni sedze mathomoni a yeneyo ndimana. I ri: “Mudzimu o funa shango.” Yeneyo ndi khoṋololo—ine ya vha lufuno. Lufuno lwo sudzulusela Mudzimu uri a rumele Murwa wawe kha ḽifhasi uri a ri fele. Vhukuma, tshiṱhavhelo tshi rengululaho ndi lufuno luhulwane vhukuma. Nahone ndi ngazwo Ṱhanzi dza Yehova dzi tshi kuvhangana ṅwaha muṅwe na muṅwe u itela u humbula lufu lwa Yesu. Naa yeneyi mvusuluso yo ni thusa?

Shirley: Ee, yo nthusa. Ndo livhuha nge na ḓiṋea tshifhinga tsha u haseledza na nṋe.

Naa hu na thero i bvaho Bivhilini ine ya ni vhilaedzisa? Naa ni ṱoḓa u ḓivha nga ha zwiṅwe zwine Ṱhanzi dza Yehova dza zwi tenda kana maṅwe maitele adzo a vhurereli? Arali zwo ralo, ni songo timatima u vhudzisa muṅwe wa Ṱhanzi dza Yehova. U ḓo takalela u haseledza na inwi eneo mafhungo.

^ par. 5 Luthihi nga ṅwaha, Ṱhanzi dza Yehova dzi a ṱangana u itela u humbula lufu lwa Yesu na u ḓiṋekedzela hawe. Ṋaṅwaha, tshihumbudzo tshi ḓo vha hone nga Ḽavhuṱanu ḽa 3 April.

^ par. 32 Thero i tevhelaho ya wonoyu magazini i ḓo ṱolisisa nḓila ine tshiṱhavhelo tshi rengululaho tsha Yesu tsha ḓo ita ngayo uri ri ponyoke kha tshivhi, na zwine ra fanela u zwi ita u itela u vhuyelwa nga tshirengululi.

^ par. 36 U ya nga Bivhili, Mudzimu na Yesu ndi vhathu vhavhili vho fhambanaho. U itela u wana mafhungo o engedzeaho, sedzani ndima 4 ya bugu Bivhili I Funza Mini Zwa Vhukuma? yo gandiswaho nga Ṱhanzi dza Yehova.