Pfukelani kha mafhungo

Pfukelani kha zwi re ngomu

 THERO I RE KHA GWATI | NI NGA SENDELA TSINI NA MUDZIMU

Naa Ni A Ita Zwine Mudzimu A Zwi Ṱoḓa?

Naa Ni A Ita Zwine Mudzimu A Zwi Ṱoḓa?

“Zwoṱhe zwine na zwi ṱoḓa ni mbudze ndi ḓo takalela u zwi ita.” Ni nga timatima u vhudza zwenezwo muthu ni sa mu ḓivhi kana we na sokou mu ḓowela. Naho zwo ralo, khamusi ni nga vhudza eneo maipfi khonani yaṋu ya tsini. Nga lwa nzulele khonani dza tsini dzi na lutamo lwa u itelana zwithu arali muṅwe o humbela.

Bivhili i sumbedza uri tshifhinga tshoṱhe Yehova u ita zwine a ḓivha uri zwi ḓo takadza vhagwadameli vhawe. Sa tsumbo, Khosi Davida we a ḓiphina nga u vha na vhushaka havhuḓi na Mudzimu o amba uri: “Zwe Iwe Yehova Mudzimu washu wa ri itela ndi zwinzhi, ndi zwa maḓembe na vhuṱali. . . . thi nga fhidzi.” (Ps. 40:5) Zwi fhiraho zwenezwo, Yehova u dovha a itela vhathu vha sa athu u mu ḓivha zwithu zwavhuḓi, u ‘fusha dzimbilu dzavho nga zwiḽiwa na nga dakalo.’—Mish. 14:17.

Ri takalela u itela zwithu vhathu vhane ra vha funa na u vha ṱhonifha

Nga zwenezwo, samusi Yehova a tshi takalela u ita zwithu zwine zwa ḓisela vhathu dakalo, zwi a pfala vhukuma u lavhelela uri vhane vha ṱoḓa u vha khonani dza Mudzimu vha ḓo ita zwithu zwine zwa “takadz[a] mbilu” yawe. (Mirero 27:11) Fhedzi ndi mini zwine na nga zwi ita nga ho khetheaho u itela u takadza Mudzimu? Bivhili i a fhindula: “Ni songo hangwa u ita zwivhuya na u kovhela vhaṅwe, ngauri Mudzimu u takadzwa nga maanḓa nga zwiṱhavhelo zwo raloho.” (Vhaheberu 13:16) Naa zwenezwi zwi amba uri u ita zwivhuya na u kovhela vhaṅwe ndi zwone fhedzi zwine zwa ṱoḓea u itela u takadza Yehova?

Bivhili i ri: “U nga si kone u takadza Mudzimu arali u si na lutendo.” (Vhaheberu 11:6) Zwa ndeme vhukuma, “Abrahamu o tenda Mudzimu” nahone “a vho pfi ṱhama ya Mudzimu ngazwo.” (Yakobo 2:23) Yesu Kristo o dovha a ombedzela ṱhoḓea ya u vha na “lutendo kha Mudzimu” arali ri tshi ṱoḓa u ḓiphina nga phaṱhutshedzo dza Mudzimu. (Yohane 14:1) Ngauralo, ni nga vha hani na lutendo lune Mudzimu a lu lavhelela kha vhane a vha sendedza tsini nae? Ni nga thoma nga u guda Ipfi ḽa Mudzimu ḽine ḽa vha Bivhili tshifhinga tshoṱhe. Nga u ita nga u ralo, ni ḓo wana “nḓivho yo teaho ya zwine a zwi funa” na u guda “u mu takadza nga vhuḓalo.” Nga zwenezwo, musi ni tshi khou bvela phanḓa na u engedza nḓivho yo teaho nga ha Yehova na u shumisa zwe na zwi guda nga ha ṱhoḓea dzawe dzo lugaho, lutendo lwaṋu khae lu ḓo khwaṱha nahone ni ḓo sendela tsini nae u fhira naho hu lini.—Vhakolosa 1:9, 10.