Pfukelani kha mafhungo

Pfukelani kha zwi re ngomu

 THERO I RE KHA GWATI | NI NGA SENDELA TSINI NA MUDZIMU

Naa Ni A Davhidzana Na Mudzimu?

Naa Ni A Davhidzana Na Mudzimu?

Kanzhi khonani dza tsini dzi a davhidzana musi dzi tshi vhonana kana dza shumisa luṱingo, e-mail, vidio, kana u ṅwalelana marifhi arali zwiimo zwi tshi vha tendela. Nga zwenezwo, u itela u sendela tsini na Mudzimu, ri fanela u davhidzana nae tshifhinga tshoṱhe. Zwenezwo ri nga zwi ita nga nḓila-ḓe?

Ri nga amba na Yehova nga thabelo. Naho zwo ralo, u rabela kha Mudzimu a zwi fani na nyambedzano yo ḓoweleaho ine ra nga vha nayo na thangana dzashu dza murole. Ri fanela u ṱhogomela uri musi ri tshi rabela, ri khou amba na Musiki washu, wa Ṱaḓulu-ṱaḓulu wa fhethu hoṱhe. Zwenezwi zwi fanela uri sudzulusela uri ri rabele nga ṱhonifho. U itela uri thabelo dzashu dzi ṱanganedzee kha Mudzimu, ri fanela u swikelela dziṅwe ṱhoḓea. Hu tevhela ṱhoḓea tharu.

Ya u thoma, thabelo i fanela u livhiswa kha Yehova Mudzimu—hu si kha Yesu, “mukhethwa,” kana tshifanyiso. (Ekisodo 20:4, 5) Bivhili i zwi vhea khagala uri: “Zwoṱhe zwine na zwi ṱoḓa ni humbele Mudzimu nga thabelo khathihi na u livhuha.” (Vhafilipi 4:6) Ya vhuvhili, ni fanela u rabela dzinani ḽa Murwa wa Mudzimu, Yesu Kristo. Yesu o ṱalutshedza uri: “A hu na ane a nga ḓa ha Khotsi a songo fhira kha nṋe.” (Yohane 14:6) Ya vhuraru, thabelo dzashu dzi fanela u tendelana na zwine Mudzimu a zwi funa. Bivhili i ri: “Naho tshi tshini tshine ra nga tshi humbela tshi tshimbidzanaho na zwine a zwi funa, u a ri pfa.” *1 Yohane 5:14.

Kanzhi khonani dza tsini dzi takalela u davhidzana nga hune zwa nga konadzea ngaho

Vhukuma, vhushaka ha tsini vhu a ṱavhanya u fhela arali hu tshi amba muthu muthihi. U fana na musi khonani dzi tshi takalela u davhidzana, ri fanela u tendela Mudzimu a tshi amba na riṋe nahone ri fanela u thetshelesa musi a tshi amba. Naa ni a ḓivha nḓila ine Mudzimu a amba ngayo na riṋe?

Ṋamusi, Yehova Mudzimu u amba na riṋe a tshi shumisa Ipfi ḽawe, ḽine ḽa vha Bivhili. (2 Timotheo 3:16, 17) Ndi ngani ri tshi amba nga u ralo? Sa tsumbo: Kha ri ri no wana vhurifhi vhu bvaho kha khonani yaṋu ya tsini. Nga murahu ha u vhu vhala, ni nga takala nahone na vhudza vhaṅwe na ri, “Ndo ṅwalelwa nga khonani yanga!” Naho zwo ralo, a ho ngo shumiswa maipfi musi hu tshi davhidzanwa, fhedzi ho shumiswa vhurifhi. Nga nḓila i fanaho, musi ni tshi vhala Bivhili, ni vha ni tshi khou tendela Yehova a tshi amba na inwi. Nga zwenezwo, Gina we a bulwa mathomoni o ri: “Ndi humbula uri arali ndi tshi ṱoḓa Mudzimu a tshi ndzhia sa khonani yawe, ndi fanela u ṱolisisa vhurifhi he a ri ṅwalela hone—Bivhili.” O dovha a ri: “U vhala Bivhili ḓuvha ḽiṅwe na ḽiṅwe zwo ntsendedza tsini na Mudzimu.” Naa ni tendela Yehova a tshi amba na inwi ḓuvha ḽiṅwe na ḽiṅwe nga u vhala Ipfi ḽawe, ḽine ḽa vha Bivhili tshifhinga tshoṱhe? Arali ni tshi ita nga u ralo zwi ḓo ni thusa u ḓipfa ni tsini na Mudzimu.

^ par. 5 U itela u wana mafhungo o engedzeaho nga ha nḓila ine ra nga sendela ngayo tsini na Mudzimu nga thabelo, sedzani ndima 17 kha bugu Bivhili I Funza Mini Zwa Vhukuma? yo gandiswaho nga Ṱhanzi dza Yehova.