Pfukelani kha mafhungo

Pfukelani kha zwi re ngomu

 MBUDZISO DZA VHAVHALI VHASHU . . .

Ndi Nnyi O Itaho Mudzimu?

Ndi Nnyi O Itaho Mudzimu?

Edzani u humbula khotsi a tshi khou amba na murwa wawe ane a vha na miṅwaha ya sumbe. U ri: “Kale-kale, Mudzimu o sika ḽiṱaḓulu na zwoṱhe zwi re khaḽo nahone a ita ḓuvha, ṅwedzi na dziṋaledzi.” Mutukana u humbula nga zwenezwi lwa tshifhinganyana nahone a vhudzisa a ri, “Baba, ndi nnyi o itaho Mudzimu?”

Khotsi u fhindula a ri: “A huna o itaho Mudzimu. Ha na mathomo ha na magumo.” Yeneyo ṱhaluso i fusha ṅwana nga tshenetsho tshifhinga. Naho zwo ralo, samusi a tshi khou ḓi aluwa yeneyo mbudziso i bvela phanḓa i tshi mu dina. U wana zwi tshi konḓa u pfesesa uri zwi ḓa hani uri muthu a si vhe na mathomo. Fhethu hoṱhe hu na mathomo. U ḓivhudzisa uri: ‘Mudzimu u bva ngafhi?’

Bivhili i fhindula hani? Nga nḓila i fanaho na ye khotsi a fhindula ngayo kha tsumbo yashu. Mushe o ṅwala uri: “Murena [Yehova], . . . dzithavha dzi sa athu u bebwa, shango na ḽinnḓa zwi sa athu u dzwalwa, Iwe U ḓi vha Mudzimu tsha kale na kale na lini na lini.” (Psalme ya 90:1, 2) Zwi fanaho na zwenezwo, muporofita Yesaya o ri: “Naa a U zwi ḓivhi, a wo ngo zwi pfa zwauri Yehova ndi Mudzimu wa lini na lini, we a sika shango hune ḽa guma”! (Yesaya 40:28) Zwi ngaho zwenezwo, vhurifhi ha Yuda vhu amba uri Mudzimu ndi wa “kale na kale.”—Yuda 25.

Eneo maṅwalo a sumbedza uri Mudzimu ndi “Khosi ya lini na lini,” samusi muapostola Paulo o mu ṱalusa. (1 Timotheo 1:17) Zwenezwi zwi amba uri Mudzimu ha na mathomo ha na magumo, hu sa londwi uri ri humisela tshifhinga murahu lungafhani. Nahone u ḓo dzula e hone tshifhingani tshi ḓaho. (Nzumbululo 1:8) Nga zwenezwo, u vha hone hawe nga hu sa fheli ndi pfaneleo ya ndeme ya Ramaanḓaoṱhe.

Ndi ngani zwenezwi zwi tshi konḓa u zwi pfesesa? Ndi nga nṱhani ha uri vhutshilo hashu vhu pfufhi vhu ita uri ri dzhie tshifhinga nga nḓila i sa fani na ya Yehova. Ngauri Mudzimu ndi wa lini na lini, khae miṅwaha ya tshigidi i fana na ḓuvha ḽithihi. (2 Petro 3:8) Sa tsumbo: Naa nzie ine ya tshila miṅwaha i ṱoḓaho u vha 50, i nga pfesesa vhutshilo hashu vhune ha vha miṅwaha ya 70 kana 80? Na khathihi! Naho zwo ralo, Bivhili i ṱalusa uri ri fana na nzie musi ri tshi vhambedzwa na Musiki washu Muhulwane. Na nḓila ine ra humbula ngayo a i fani na yawe. (Yesaya 40:22; 55:8, 9) Nga zwenezwo, a zwi mangadzi uri hu na maṅwe masia a Yehova ane vhathu vha si kone u a pfesesa nga vhuḓalo.

Naho u vha hone ha Mudzimu lini na lini zwi tshi konḓa u zwi pfesesa, ri a kona u zwi vhona uri zwi a pfala. Arali hu na muthu o sikaho Mudzimu, onoyo muthu o vha a tshi ḓo vha Musiki. Naho zwo ralo, Bivhili i amba uri Yehova ndi ene o “sika[ho] zwithu zwoṱhe.” (Nzumbululo 4:11) Zwiṅwe hafhu, ri a zwi ḓivha uri fhethu hoṱhe ho vha hu siho. (Genesi 1:1, 2) Hu bva ngafhi? Ho vha hu tshi fanela u vha na Musiki u thoma. O vha hone hu sa athu u vha na zwivhumbiwa zwo ṱalifhaho, zwi fanaho na Murwa wawe mubebwa e eṱhe na vharuṅwa. (Yobo 38:4, 7; Vhakolosa 1:15) Zwi a pfala uri mathomoni o vha a tshi tshila e eṱhe. A zwi konadzei uri o sikwa; ho vha hu si na tshithu tshi tshilaho tshee tsha vha tshi tshi nga mu sika.

U vha hone hashu na fhethu hoṱhe zwi ṋea vhuṱanzi ha uri Mudzimu ndi wa lini na lini. We a ita uri fhethu hoṱhe hu dzinginyee, We a thoma milayo u itela u i vhusa, u fanela u vha o dzula e hone lini na lini. Ndi ngazwo a tshi kona u ita uri zwithu zwoṱhe zwi tshile.—Yobo 33:4.