Pfukelani kha mafhungo

Pfukelani kha zwi re ngomu

 THERO I RE KHA GWATI | NAA MUDZIMU U NA DZANGALELO KHA INWI?

Mudzimu U Swikelela Kha Inwi

Mudzimu U Swikelela Kha Inwi

“A hu na muthu ane a nga ḓa kha nṋe arali a songo kokodzwa nga Khotsi we a nthuma.”—YOHANE 6:44.

ZWINE ZWA ITA URI VHAṄWE VHA TIMATIME: Vhathu vhanzhi vhane vha tenda kha Mudzimu vha vhona u nga u kule navho. Christina, mufumakadzi wa ngei Ireland ane a ya kerekeni vhege iṅwe na iṅwe o ri: “Ndo vha ndi tshi sokou mu dzhia sa Mudzimu o sikaho zwithu zwoṱhe. Fhedzi ndo vha ndi sa mu ḓivhi. Ndo vha ndi sa athu vhuya nda ḓipfa ndi tsini nae.”

ZWINE IPFI ḼA MUDZIMU ḼA FUNZA ZWONE: Musi ri tshi ḓipfa ro hanganea, Yehova ha litshi u ri thusa. Yesu o sumbedza nḓila ine Mudzimu a ri ṱhogomela ngayo nga heyi nḓila: “Arali muṅwe muthu e na nngu dza ḓana iṅwe yadzo ya xela, naa a nga si ḓo sia dza fuṱahe-ṱahe (99) thavhani nahone a ya a ṱoḓa yo xelaho?” Ngudo ndi ifhio? “Nga hu fanaho, na Khotsi anga wa ṱaḓulu ha funi hu tshi lovha na muṅwe wa vhenevha vhana.”—Mateo 18:12-14.

“Muṅwe [na muṅwe] wa vhenevha vhana ” ndi wa ndeme kha Mudzimu. Mudzimu u ‘ṱoḓa vho xelaho’ nga nḓila-ḓe? U ya nga luṅwalo lwo redzwaho mathomoni, Yehova u kokodzela vhathu khae.

Ndi vhafhio ṋamusi vhane vha ya miḓini na fhethu hu re khagala u itela u vhudza vhathu mulaedza u re Bivhilini nga ha Mudzimu?

Ṱhogomelani uri Mudzimu u dzhia hani vhukando ha u kokodzela vhathu vho lugaho khae. Ḓanani ḽa u thoma ḽa miṅwaha C.E., Mudzimu o ruma mufunziwa wa Mukriste ane a pfi Filipo uri a yo ṱangana na munna wa Muetiopia nahone a haseledze nae zwine vhuporofita ha Bivhili ha amba zwone, he a vha a tshi khou vhu vhala. (Mishumo 8:26-39) Nga murahu, Mudzimu o vhudza muapostola Petro uri a yo dalela haya ha muṅwe munna wa Muroma ane a pfi Koronelio, we a vha a tshi rabela na u ṱoḓa u gwadamela Mudzimu. (Mishumo 10:1-48) Mudzimu o dovha a livhisa muapostola Paulo na khonani dzawe mulamboni u re nnḓa ha muḓi wa Filipi. Henefho o ṱangana na mu ‘gwadameli wa Mudzimu’ ane a pfi Lidia, nahone “Yehova a vula tshoṱhe mbilu yawe uri a pfe.”—Mishumo 16:9-15.

Kha vhoṱhe, Yehova o ita vhungoho ha uri vhe vha vha vha tshi khou mu ṱoḓa vha wane tshibuli tsha u mu wana. Ndi vhafhio ṋamusi vhane vha ya miḓini na fhethu hu re khagala u ite u vhudza vhathu mulaedza u re Bivhilini nga ha Mudzimu? Vhathu vhanzhi vha fhindula nga uri ndi, “Ṱhanzi dza Yehova.” Ḓivhudziseni, ‘Naa Mudzimu a nga vha a tshi khou vha shumisa u itela u swikelela kha nṋe?’ Ri a ni ṱuṱuwedza uri ni rabele kha Mudzimu u itela uri a ni thuse uri ni aravhe kha vhuḓidini hawe ha u ni kokodzela khae. *

^ par. 8 U itela u wana mafhungo o engedzeaho, Sedzani vidio Ndi Ngani Ni Tshi Fanela U Guda Bivhili? kha www.jw.org/ve.