Pfukelani kha mafhungo

Pfukelani kha zwi re ngomu

 NYAMBEDZANO NA MUHURA

Naa Ṱhanzi Dza Yehova Dzi A Tenda Kha Yesu?

Naa Ṱhanzi Dza Yehova Dzi A Tenda Kha Yesu?

Hu tevhela nyambedzano yo ḓoweleaho ine muṅwe wa Ṱhanzi dza Yehova a nga vha nayo na muhura. Kha ri ri muṅwe wa Ṱhanzi ane a pfi Anthony o ya hayani ha muṅwe munna ane a pfi Tim.

U TENDA KHA YESU NDI ZWA NDEME

Anthony: Ndaa! Tim. Ndi takalela u dovha nda ni vhona.

Tim: Na nṋe ndi takalela u ni vhona.

Anthony: Ndo ni ḓisela khandiso ntswa dza Tshiingamo na Awake! Ndi vhona u nga ni ḓo takalela u vhala thero dzi re kha dzenedzi magazini.

Tim: Ndo livhuha. Ngoho ndi ya uri ndo takala no ḓa ṋamusi ngauri ndi khou ṱoḓa u ni vhudzisa zwiṅwe zwithu.

Anthony: Ho luga, ni nga vhudzisa.

Tim: Ḽiṅwe ḓuvha ndo vha ndi tshi khou amba na mushumisani na nṋe. Ndo mu vhudza nga ha zwibammbiri zwe na nṋea zwone na nḓila ine zwa takadza ngayo. Fhedzi o ri ndi songo zwi vhala ngauri Ṱhanzi dza Yehova a dzi tendi kha Yesu. Naa zwenezwo ndi ngoho? Ndo vhudza mushumisani na nṋe uri ndi ḓo ni vhudzisa musi ni tshi ḓa u ndalela.

Anthony: Ndi a livhuha nge na mmbudzisa. Ndi zwavhuḓi ngauri ni khou vhudzisa kha muṋe wa mafhungo. Ndi ifhio nḓila ya khwine ya u kona u ḓivha zwine muthu a tenda khazwo arali ni songo zwi pfa kha ene muṋe wa mafhungo?

Tim: Ndi zwe nda vha ndo zwi humbula.

Anthony: Ngoho ndi ya uri Ṱhanzi dza Yehova dzi a tenda kha Yesu. Zwi re zwone ndi uri ri a zwi ḓivha uri u vha na lutendo kha Yesu ndi zwa ndeme u itela u tshidzwa.

Tim: Ndo vha ndi tshi humbula nga u ralo, fhedzi musi mushumisani na nṋe a tshi mmbudza uri a ni tendi kha Yesu, zwo ita uri ndi ṱoḓe u ḓivha. Nṋe na inwi a ro ngo vhuya ra amba nga hazwo.

Anthony: Naa ndi nga ni sumbedza ndimana dza Bivhili dzine dza ombedzela ndeme ya u vha na lutendo kha Yesu? Dzenedzi ndi ndimana dzine Ṱhanzi dza Yehova dza anzela u dzi shumisa vhuḓinḓani hadzo.

Tim: Zwo luga.

Anthony: Kha ri thome nga maipfi a Yesu a wanalaho kha Yohane 14:6. Eneo maipfi ndi e Yesu a amba na muṅwe wa vhaapostola vhawe. I ri: “Yesu a amba nae a ri: ‘Ndi nṋe nḓila na ngoho na vhutshilo. A hu na ane a nga ḓa ha Khotsi a songo fhira kha nṋe.’” U ya nga yeneyi ndimana ndi ifhio nḓila i yoṱhe ya u amba na Khotsi?

Tim: Ndi nga Yesu.

Anthony: Ndi ngoho. Nahone Ṱhanzi dza Yehova dzi tenda kha zwenezwo. Ndi khou humbela u ni vhudzisa: Kha zwine na zwi ḓivha nga ha zwine Mudzimu a zwi ṱoḓa, musi muthu a tshi rabela, u fanela u rabela dzinani ḽa nnyi?

Tim: Dzinani ḽa Yesu.

Anthony: Ndi ngoho. Ndi ngazwo ndi tshi rabela thabelo iṅwe na iṅwe dzinani ḽa Yesu. Na Ṱhanzi dza Yehova dzoṱhe dzi ita nga u ralo.

Tim: Ndi zwavhuḓi u ḓivha zwenezwo.

Anthony: Luṅwe luṅwalo lune ra nga lu ṱolisisa ndi lwa Yohane 3:16. Yeneyo ndimana ndi ya ndeme vhukuma lune ya vhidzwa Evangeli yo ṱukufhadzwaho. Nga maṅwe maipfi heyi ndimana i nweledza zwoṱhe zwe zwa ṅwalwa nga ha vhutshilo ha Yesu musi a tshi kha ḓi vha kha ḽifhasi na vhuḓinḓa hawe. Khamusi ni nga takalela u vhala lwonolu luṅwalo.

Tim: Zwo luga. Lu ri: “Ngauri Mudzimu o funa shango zwihuluhulu a vhuya a kumedza Murwa wawe mubebwa e eṱhe, uri muṅwe na muṅwe ane a  vha na lutendo khae a si fheliswe, fhedzi a wane vhutshilo vhu sa fheli.”

Anthony: Ndo livhuha. Naa ni a i ḓivha yeneyi ndimana?

Tim: Ee, ndo no i pfa lunzhi, nahone kanzhi ndi i vhona yo ṅwalwa kha tswayo na bodo dza badani.

Anthony: Ndi ndimana i ḓivheaho vhukuma. Musi ni tshi i lavhelesa zwavhuḓi, ṱhogomelani zwe Yesu a zwi amba. O amba uri lufuno lwa Mudzimu lwo ita uri zwi konadzee u ḓiphina nga vhutshilo vhu sa fheli—fhedzi ri fanela u ita mini?

Tim: Ri fanela u vha na lutendo.

Anthony: Ee. Zwihuluhulu u vha na lutendo kha Murwa wawe mubebwa e eṱhe ane a vha Yesu Kristo. Nahone yeneyo mbuno—i sumbedza uri u vha na lutendo kha Yesu zwi ita uri ri wane vhutshilo vhu sa fheli—nahone zwi kha siaṱari ḽa vhuvhili ḽa wonoyu magazini we nda ni ḓisela wone. Malugana na ndivho ya Tshiingamo, tshi amba uri wonoyu magazini u ri ṱuṱuwedza uri ri “tende Yesu Kristo, we a fa u itela uri ri wane vhutshilo vhu sa fheli, ane zwino a khou vhusa sa Khosi ya Muvhuso wa Mudzimu.”

Tim: Khezwo. Magazini waṋu u sumbedza uri Ṱhanzi dza Yehova dzi tenda kha Yesu.

Anthony: Ndi ngoho.

Tim: Fhedzi ndi ngani vhathu vha tshi amba uri a ni tendi kha Yesu?

Anthony: Khamusi hu na zwiitisi zwinzhi zwa uri ndi ngani vha tshi amba nga u ralo. Kha ḽiṅwe sia, vhathu vha sokou zwi amba nga u pfa vhaṅwe. Kana vha nga vha vho funzwa eneo mazwifhi nga vhafunzi vhavho.

Tim: Ndi khou sokou humbulela—uri khamusi vhaṅwe vhathu vha amba uri a ni tendi kha Yesu ngauri ni ḓivhidza Ṱhanzi dza Yehova, hu si Ṱhanzi dza Yesu.

Anthony: Tshenetsho tshi nga vha tshi tshiṅwe tsha tshiitisi.

Tim: Ndi ngani ni tshi amba nga ha Yehova nga maanḓa?

“NDO VHA ḒIVHADZA DZINA ḼAU”

Anthony: Tsha u thoma, ri tenda uri ndi zwa ndeme u shumisa dzina ḽa Mudzimu ḽine ḽa vha Yehova—u fana na zwe Murwa wawe Yesu a zwi ita. Ṱhogomelani zwe Yesu a zwi amba musi a tshi khou rabela kha Khotsi awe. Zwo ṅwalwa kha Yohane 17:26. Ndi khou humbela uri ni vhale yeneyi ndimana.

Tim: Zwo luga. I ri: “Ndo vha ḓivhadza dzina ḽau nahone ndi ḓo ḓi ḽi ḓivhadza, uri vha vhe na lufuno lwe wa mpfuna ngalwo nahone ndi vhe na vhuthihi navho.”

Anthony: Ndo livhuha. Ṱhogomelani uri Yesu o amba uri o ita uri dzina ḽa Mudzimu ḽi ḓivhiwe. Ni vhona u nga ndi ngani o ita nga u ralo?

Tim: Hmm. A thi na vhuṱanzi.

U vha na lutendo kha Yesu ndi zwa ndeme u itela u tshidzwa

Anthony: Khamusi ri nga sedza luṅwe luṅwalo lune lwa bvisela khagala enea mafhungo. Lwonolo luṅwalo ndi Mishumo 2:21. I vhalea nga hei nḓila: “Muṅwe na muṅwe ane a vhidzelela dzina ḽa Yehova u ḓo tshidzwa.” Zwino ndi na vhuṱanzi ha uri ni a tenda uri arali u vhidzelela dzina Yehova hu zwone zwine zwa ita uri ri tshidzwe, a zwi timatimisi uri Yesu o vha a tshi zwi ḓivha zwenezwo.

Tim: Ee, ndi zwa vhukuma.

Anthony: Nga zwenezwo, u tshidzwa ha vhatevheli vhawe ndi tshiṅwe tsha tshiitisi tsha ndeme tshe tsha ita uri Yesu a vha ḓivhadze na u vha vhudza uri vha shumise dzina ḽa Mudzimu. Nahone ndi tshiṅwe tsha tshiitisi tshine tsha ita uri ri ambe nga ha Yehova nga maanḓa. Ri vhona zwi zwa ndeme u ḓivhadza dzina ḽa Mudzimu na u thusa vhaṅwe uri vha ḽi vhidzelele.

Tim: Naho vhathu vha sa ḓivhi dzina ḽa Mudzimu kana u ḽi shumisa nga ho livhaho, fhedzi vha a ḓivha ane vha khou amba nga hae musi vha tshi amba nga ha Mudzimu.

Anthony: Zwenezwi zwi nga kha ḓi vha zwi ngoho. Naho zwo ralo, nga u ri vhudza dzina ḽawe, Mudzimu o ita uri zwi leluwe uri ri sendele tsini nae.

Tim: Ni khou ṱoḓa uri mini ni tshi ralo?

Anthony: Humbulani nga heyi nḓila: Zwo vha zwi sa ṱoḓei uri ri ḓivhe dzina ḽa Mushe. Ro vha ri tshi nga  sokou mu ḓivha sa munna we a fhandekanya Lwanzhe Lutswuku kana munna we a ṋewa Milayo ya Fumi. U fana na Noaxe—ndi ngani ro vha ri tshi fanela u ḓivha dzina ḽawe? O vha a tshi ḓo vha o ṱaluswa sa munna o fhaṱaho gungwa na we a tshidza muṱa wawe na zwipuka. Nga zwenezwo, na Yesu Kristo o vha a tshi ḓo sokou ḓivhiwa sa munna o ḓaho a tshi bva ṱaḓulu na we a fela zwivhi zwashu. A si zwone kani?

Tim: Ndi humbula nga u ralo.

Anthony: Fhedzi Mudzimu o ita vhungoho ha uri ri ḓivhe dzina ḽa muṅwe na muṅwe wa vhenevho vhathu. U ḓivha madzina avho zwi ita uri mafhungo avho a vhe a ngoho kha riṋe. Naho ri sa athu u vhuya ra ṱangana na Mushe, Noaxe kana Yesu, fhedzi u ḓivha madzina avho zwi ita uri vha vhe vha vhukuma kha riṋe.

Tim: Ndo vha ndi sa zwi vhoni nga yeneyo nḓila, fhedzi zwi a pfala!

Anthony: Tshenetsho ndi tshiṅwe tsha tshiitisi tsha uri Ṱhanzi dza Yehova dzi shumise dzina ḽa Mudzimu. Ri ṱoḓa u thusa vhathu uri vha vhe na lutendo kha Yehova Mudzimu nahone vha mu dzhie sa Muthu wa vhukuma ane vha nga kona u sendela tsini nae. Zwiṅwe hafhu, ri ombedzela zwine Yesu a zwi ita u itela uri ri tshidzwe. Khamusi ri nga vhala luṅwalo luthihi lune lwa ombedzela ndeme ya enea mafhungo.

Tim: Zwo luga.

Anthony: Mathomoni ro vhala Yohane 14:6. Humbulani uri Yesu o amba uri ndi ene “nḓila na ngoho na vhutshilo.” Kha ri vhale ndimana dzi si gathi dzo fhiraho nahone ri ṱhogomele maipfi a re kha Yohane 14:1. Ndi khou humbela uri ni vhale zwe Yesu a zwi amba mafheleloni a yeneyo ndimana.

Tim: Zwo luga. I ri: “Ivhani na lutendo kha Mudzimu, ni dovhe ni vhe na lutendo kha nṋe.”

Anthony: Ndo livhuha. Nga zwenezwo, u itela uri ni vhone arali ni na lutendo lwa vhukuma, naa ni fanela u khetha u vha na lutendo kha Yehova kana kha Yesu?

Tim: Hai. Yesu o ri ri vhe na lutendo kha vhoṱhe.

Anthony: Khezwo. Ndi na vhungoho ha uri ni a tenda uri a zwo ngo eḓana u sokou amba uri ri na lutendo kha Mudzimu na kha Yesu. Vhukuma, ri fanela u tshila nga nḓila ine ya sumbedza uri ri na lutendo khavho.

Tim: Ndi ngoho.

Anthony: Fhedzi muthu u sumbedza hani uri u na lutendo zwa vhukuma kha Mudzimu na kha Yesu? Khamusi ri nga haseledza yeneyo mbudziso tshifhingani tshi ḓaho. *

Tim: Ndi nga zwi takalela.

Naa hu na thero i bvaho Bivhilini ine ya ni vhilaedzisa? Naa ni ṱoḓa u ḓivha nga ha zwiṅwe zwine Ṱhanzi dza Yehova dza zwi tenda kana maṅwe maitele adzo a vhurereli? Arali zwo ralo, ni songo timatima u vhudzisa muṅwe wa Ṱhanzi dza Yehova. U ḓo takalela u haseledza na inwi eneo mafhungo.

^ par. 60 U itela u wana mafhungo o engedzeaho, sedzani ndima 12 ya bugu Bivhili I Funza Mini zwa Vhukuma? yo gandiswaho nga Ṱhanzi dza Yehova.