Pfukelani kha mafhungo

Pfukelani kha zwi re ngomu

 MBUDZISO DZA VHAVHALI VHASHU . . .

Ndi Ngani Mudzimu A Tshi Tendela Vha Re Na Nungo Vha Tshi Tsikeledza Vha Si Na Nungo?

Ndi Ngani Mudzimu A Tshi Tendela Vha Re Na Nungo Vha Tshi Tsikeledza Vha Si Na Nungo?

Bivhili i amba nga ha zwiimo zwi ṱungufhadzaho zwa vhathu vha re na nungo vha tshi tsikeledza vha si na nungo. Hezwi zwi ri humbudza mafhungo a Nabothe. * Khosi Ahaba wa ḓanani ḽa vhufumi ḽa miṅwaha B.C.E., o tendela mufumakadzi wawe Isabele a tshi vhulaha Nabothe na vharwa vhawe u itela uri a kone u dzhia tsimu yawe ya miṱokola. (1 Dzikhosi 21:1-16; 2 Dzikhosi 9:26) Ndi ngani Mudzimu o tendela uri vhathu vha shumise maanḓa avho nga nḓila mmbi nga u ralo?

‘Mudzimu ha zwivhi.’—Tito 1:2

Kha ri livhise ṱhogomelo kha tshiitisi tshithihi tsha ndeme: Mudzimu ha zwifhi. (Tito 1:2) Zwenezwo zwi tshimbidzana hani na zwiito zwivhi zwa u tsikeledza vhaṅwe? Mathomoni Mudzimu o sevha vhathu uri arali vha mu shandukela vha ḓo sedzana na mvelelo i vhavhaho ine ya vha lufu. Eneo maipfi a Mudzimu o ḓadzea ngauri vhathu vho sedzana na lufu u bva tshee ha vha na vhushandukwa tsimuni ya Edeni. Zwi re zwone ndi uri muthu wa u thoma o fa nge a tsikeledzwa nga muṅwe—musi Kaini a tshi vhulaha murathu wawe Abele.—Genesi 2:16, 17; 4:8.

Malugana na ḓivhazwakale ya vhathu u bva tsheetsho, Ipfi ḽa Mudzimu ḽo zwi nweledza nga heyi nḓila: “Muthu a tshi vhusa muthu muṅwe [u] a mu tshinya.” (Muhuweleli 8:9) Naa eneo maipfi ndi ngoho? Yehova Mudzimu o sevha vhathu vhawe, lushaka lwa Vhaisiraele, uri vha ḓo tsikeledzwa nga mahosi avho, zwenezwo zwi ḓo ita uri vha mu lilele. (1 Samuele 8:11-18) Na Salomo Khosi yo ṱalifhaho o tsikeledza vhukuma vhathu vhe a vha vhusa. (1 Dzikhosi 11:43; 12:3, 4) Na mahosi mavhi, a ngaho Ahaba,o vha e na tshiṱuhu vhukuma. Ṱhogomelani zwi tevhelaho: Arali Mudzimu a thivhele u tsikeledzwa hoṱhe, naa zwo vha zwi sa ḓo sumbedza uri zwe a zwi amba ndi mazwifhi?

“Muthu a tshi vhusa muthu muṅwe [u] a mu tshinya.”—Muhuweleli 8:9

Zwiṅwe hafhu, ni songo hangwa uri Sathane u amba uri vhathu vha shumela Mudzimu nga zwiitisi zwa tseḓa. (Yobo 1:9, 10; 2:4) Arali Mudzimu a tsireledza vhashumeli vhawe vhoṱhe uri vha si tsikeledzwe nga nḓila naho i ifhio, naa zwenezwo a zwi nga ḓo tikedza mazwifhi a Sathane? Arali Mudzimu a thivhela vhathu vhoṱhe uri vha si tsikeledzwe nga nḓila naho i ifhio, naa zwenezwo zwo vha zwi sa ḓo mu ita muzwifhi muhulwane? Arali vhathu vha tsireledzwa nga yeneyo nḓila, vhanzhi vha nga vhona u nga vha nga ḓivhusa nga nḓila i bvelelaho vha si na Mudzimu. Fhedzi Ipfi ḽa Mudzimu ḽi amba zwo fhambanaho tshoṱhe na zwenezwo—uri vhathu vha nga si kone u ḓivhusa. (Yeremia 10:23) Ri ṱoḓa uri Muvhuso wa Mudzimu u ḓe; ndi hone hu tshi ḓo fhela u sa vha na khaṱulokwayo.

Nga zwenezwo-ha, naa zwenezwo zwi amba uri Mudzimu a nga si ite tshithu nga u tsikeledzwa? Hai. Ṱhogomelani zwithu zwivhili zwine a zwi ita: Tsha u thoma, u amba nga zwine u tshiṱuhu tsha vha zwone. Sa tsumbo, Ipfi ḽawe ḽi amba nga ha zwidodombedzwa zwoṱhe zwa nḓila ye Isabele a lukela ngayo Nabothe maano. Bivhili i dovha ya sumbedza uri zwenezwo zwithu zwivhi zwi ṱuṱuwedzwa nga muvhusi a re na maanḓa ane a dzumba zwine a vha zwone. (Yohane 14:30; 2 Vhakorinta 11:14) Bivhili i mu vhidza Sathane Diabolo. Mudzimu u ri thusa uri ri sendele kule ha vhuvhi, nga u bvukulula vhuvhi na u tsikeledzwa u katela na hune zwa bva hone. Nga zwenezwo, u tsireledza vhumatshelo hashu u ya nga hu sa fheli.

Tsha vhuvhili, Mudzimu u ri ṋea fulufhelo ḽo khwaṱhaho ḽa uri u tsikeledzwa hu ḓo fhela. Nḓila ye a bvukulula, a haṱula na u shengedza ngayo Ahaba na Isabele—na vhanzhi vha ngaho vhenevho—i ri ṋea fulufhelo kha mafulufhedziso awe a uri ḽiṅwe ḓuvha u ḓo ṱarafa vhaitazwivhi vhoṱhe. (Psalme ya 52:1-5) Mudzimu u dovha a ṋea fulufhelo ḽa uri hu si kale u ḓo fhelisa mvelelo dzoṱhe dza vhuvhi kha vhane vha mu funa. * Nabothe a fulufhedzeaho na vharwa vhawe vha ḓo vuswa vha tshila paradisoni kha ḽifhasi lwa tshoṱhe hu si tsheena u shayea ha khaṱulokwayo.—Psalme ya 37:34.

^ par. 3 Sedzani thero ine ya ri “Edzisani Lutendo Lwavho” kha wonoyu magazini.

^ par. 8 Sedzani ndima ya 11 ya bugu Bivhili I Funza Mini zwa Vhukuma? yo gandiswaho nga Ṱhanzi dza Yehova.