Pfukelani kha mafhungo

Pfukelani kha zwi re ngomu

 THERO I RE KHA GWATI | NAA LUFU NDI AMBADZIFHELE?

Lufu A Si Ambadzifhele!

Lufu A Si Ambadzifhele!

Bethania wo vha u muḓana une wa vha vhukule ha khilomithara tharu u bva Yerusalema. (Yohane 11:18) Vhege dzi si gathi Yesu a sa athu u fa ho vha na makhaulambilu. Lazaro muṅwe wa khonani dza tsini dza Yesu, o mbo ḓi lwala vhukuma zwi songo lavhelelwa nahone a fa.

Musi Yesu a tshi thoma u pfa eneo mafhungo, o vhudza vhafunziwa vhawe uri Lazaro o eḓela nahone u khou ṱoḓa u mu vusa. (Yohane 11:11) Fhedzi vhafunziwa vha Yesu a vho ngo ṱavhanya vho zwi pfesesa uri u khou ri mini, ngauralo Yesu o vha vhudza uri: “Lazaro o fa.”—Yohane 11:14.

Yesu o swika Bethania nga murahu ha maḓuvha maṋa musi Lazaro o no vhulungwa nahone a tshi khou ṱoḓa u khuthadza Marita, ane a vha khaladzi a mufu. Marita o ri: “Arali wo vha u fhano ndi musi khaladzi anga a songo fa.” (Yohane 11:17, 21) Yesu a fhindula a ri: “Ndi nṋe mvuwo na vhutshilo. Naho muthu ane a vha na lutendo kha nṋe a tshi fa, u ḓo dovha a tshila.”—Yohane 11:25.

“Lazaro, bvela nnḓa!”

U itela u sumbedza uri enea maipfi ndi ngoho, Yesu o ya vhiḓani a vhidzelela a ri: “Lazaro, bvela nnḓa!” (Yohane 11:43) Nahone zwe zwa mangadza vhaṱaleli, ndi musi munna o faho a tshi bvelela.

Yesu o vha o no ḓi vusa vhathu vhavhili tshifhingani tsho fhiraho. Kha tshiṅwe tshiitea o vusa ṅwananyana wa Yairo vhafuni. Musi Yesu a sa athu u mu vusa, o dovha a mu ṱalusa sa o eḓelaho.—Luka 8:52.

Ṱhogomelani uri malugana na lufu lwa Lazaro na ṅwananyana wa Yairo, Yesu o vhambedza lufu na u eḓela. Honoho u vhambedza ho tea. Ndi ngani? Musi wo eḓela a u pfi tshithu nahone u vha wo awela vhuṱungu na tshengelo. (Muhuweleli 9:5; sedzani bogisi ḽi tshimbidzanaho,  “Lufu Lu Tou Nga Khofhe Khulu.”) Vhafunziwa vha Yesu vha u thoma vho vha vha tshi pfesesa zwavhuḓi vhuimo ha vhafu. Encyclopedia of Religion and Ethics i ri: “Kha vhatevheli vha Yesu, lufu lwo vha lu tshi fana na u eḓela nahone  vhiḓa ḽi tshi fana na fhethu ha u awela . . . kha vhe vha fa vhe na lutendo.” *

Zwi a ri khuthadza u ḓivha uri vhafu vho eḓela mavhiḓani nahone a vha khou shengela. Ri a ḓivha uri hu itea mini musi ri tshi fa nahone a ro ngo fanela u ofha.

“ARALI MUTHU A FA, NAA U ḒO DOVHA A TSHILA?”

Fhedzi naho ri tshi takalela u eḓela nga madekwana, ndi nnyi ane a ṱoḓa u eḓela lwa tshoṱhe? Ndi fulufhelo ḽifhio ḽine ra vha naḽo ḽa uri vho eḓelaho mavhiḓani vha ḓo dovha vha tshila—u fana na Lazaro na ṅwananyana wa Yairo?

Musimulalushaka Yobo o vhudzisa yeneyo mbudziso musi e tsini na u fa. O ri: “Arali muthu a fa, naa u ḓo dovha a tshila?”—Yobo 14:14NW.

Musi a tshi khou amba na Mudzimu Ramaanḓaoṱhe, Yobo o fhindula mbudziso yawe a ri: “Ndi misi U tshi ḓo mbidza nda aravha; ndi misi U tshi ḓo ṱuvha tshivhumbiwa tsha zwanḓa zwau.” (Yobo 14:15) Yobo o vha e na vhungoho ha uri Yehova u ṱulutshelwa ḓuvha ḽine a ḓo vusa ngaḽo vhashumeli vhawe vha fulufhedzeaho. Naa Yobo o vha a tshi ṱulutshelwa zwithu zwi sa itei? Na khathihi.

Mvuwo ye ya itwa nga Yesu yo sumbedza zwavhuḓi uri Mudzimu o ṋea Yesu maanḓa a u kunda lufu. Zwi re zwone ndi uri Bivhili i ri Yesu u na “khoṋo dza lufu.” (Nzumbululo 1:18) Nga zwenezwo, Yesu u ḓo hoṋolola gethe dza mavhiḓa, samusi o amba uri tombo ḽe ḽa vha ḽi vhiḓani ḽa Lazaro ḽi phiguluswe.

Bivhili i amba nga ha mvuwo tshifhinga tshoṱhe. Muruṅwa o khwaṱhisedza muporofita Daniele a ri: “U ḓo awela, wa kona u vuwa, wa ṱanganedza mukovhe wau vhufheloni ha maḓuvha.” (Daniele 12:13) Yesu o vhudza Vhasadukei vhane vha vha vharangaphanḓa vha Vhayuda vhe vha hanedza fulufhedziso ḽa mvuwo a ri: “No khakha, ngauri a ni ḓivhi Maṅwalo na maanḓa a Mudzimu.” (Mateo 22:23, 29) Muapostola Paulo o ri: “Fulufhelo ḽine nda vha naḽo kha Mudzimu . . . ndi ḽa uri hu ḓo vha na mvuwo ya vho lugaho na vha songo lugaho.”—Mishumo 24:15.

VHAFU VHA ḒO VUWA LINI?

Mvuwo ya vho lugaho na vha songo lugaho i ḓo itea lini? Muruṅwa o vhudza Daniele o lugaho uri u ḓo vuwa “vhufheloni ha maḓuvha.” Nga hu fanaho, Marita o vha a tshi tenda uri khaladzi awe Lazaro u ḓo “vuswa nga ḓuvha ḽa vhufhelo.”—Yohane 11:24.

Bivhili i ṱumanya “ḓuvha ḽa vhufhelo” na Muvhuso wa Kristo. Paulo o ṅwala uri: “Ngauri [Kristo] u fanela u vhusa sa khosi u swika Mudzimu a tshi vhea maswina fhasi ha milenzhe yawe. Lufu ndi swina ḽa u fhedza ḽine a ḓo ḽi fhelisa.” (1 Vhakorinta 15:25, 26) Tshenetshi ndi tshiitisi tshihulwane tsha uri ndi ngani ri tshi fanela u rabelela Muvhuso wa Mudzimu uri u ḓe na uri zwine Mudzimu a zwi funa zwi itwe kha ḽifhasi. *

Yobo o vha a tshi ḓivha zwavhuḓi uri zwine Mudzimu a zwi funa ndi u vusa vho faho. Musi ḓuvha ḽeneḽo ḽi tshi swika, a hu tsha ḓo vha na lufu. Nahone a hu tsha ḓo vha na muthu ane a ḓo ri, ‘Naa lufu ndi ambadzifhele?’

^ par. 8 Ipfi ḽa Luisimane ḽine ḽa ri “vhiḓa” ḽi bva kha ipfi ḽa Lugerika ḽine ḽa amba “fhethu ha u eḓela.”

^ par. 18 U itela u guda zwinzhi nga ha Muvhuso wa Mudzimu, sedzani ndima 8 ya bugu Bivhili I Funza Mini Zwa Vhukuma? yo gandiswaho nga Ṱhanzi Dza Yehova. I dovha ya wanala kha www.jw.org/ve.