Pfukelani kha mafhungo

Pfukelani kha zwi re ngomu

 SENDELANI TSINI NA MUDZIMU

“U Lambedza Vhane Vha Mu Ṱoḓa Zwi Tshi Bva Mbiluni”

“U Lambedza Vhane Vha Mu Ṱoḓa Zwi Tshi Bva Mbiluni”

Naa Yehova u dzhiela nṱha vhuḓidini ha vhagwadameli vhawe ha u mu takadza? Vhaṅwe vha nga kha ḓi ri hai, vha tshi amba uri Mudzimu ha na dzangalelo kha riṋe. Fhedzi u amba nga u ralo zwi nyadzisa Mudzimu vhukuma. Ipfi ḽawe ḽine ḽa vha Bivhili, ḽi bvisela ngoho khagala. Ḽi ri khwaṱhisedza uri Yehova u dzhiela nṱha vhuḓidini ha vhagwadameli vhawe vha re na lutendo. Ṱhogomelani maipfi a muapostola Paulo a wanalaho kha Vhaheberu 11:6.

Ri fanela u ita mini u itela u takadza Yehova? Paulo o ri: “U nga si kone u takadza Mudzimu arali u si na lutendo.” Ṱhogomelani uri Paulo ho ngo amba uri zwi a konḓa u takadza Mudzimu arali u si na lutendo. Fhedzi, onoyo muapostola o amba uri zwi nga si konadzee u ita nga u ralo. Nga maṅwe maipfi, lutendo ndi lwa ndeme u itela u takadza Mudzimu.

Ndi lutendo lwa mufuda-ḓe lune lwa takadza Yehova? Lutendo lwashu kha Mudzimu lu fanela u katela zwithu zwivhili. Tsha u thoma, ri “fanela u tenda uri u hone.” Ri nga takadza hani Mudzimu arali ri tshi timatima uri u hone? Zwiṅwe hafhu, lutendo lwa vhukuma lu katela zwi fhiraho zwenezwo, ngauri na madimoni a a tenda uri Yehova u hone. (Yakobo 2:19) Lutendo lwashu lwa uri Mudzimu ndi wa vhukuma, lu fanela u ri sudzulusela u dzhia vhukando, zwine zwa amba u tshila nga nḓila ine ya mu takadza.—Yakobo 2:20, 26.

Tsha vhuvhili, ri “fanela u tenda uri” Mudzimu ndi ‘mulambedzi.’ Muthu ane a vha na lutendo lwo khwaṱhaho u na vhungoho ha uri vhuḓidini hawe ha u tshila nga nḓila ine ya takadza Mudzimu a vhu nga vhi ha fhedzi. (1 Vhakorinta 15:58) Ri nga takadza hani Yehova arali ri tshi timatima vhukoni hawe kana lutamo lwawe lwa u ri lambedza? (Yakobo 1:17; 1 Petro 5:7) Muthu ane a phetha nga ḽa uri Mudzimu ha ri londi, ha livhuhi nahone ha na mafunda, ha ḓivhi Mudzimu ane ha ambiwa nga hae Bivhilini.

Yehova u lambedza vhafhio? Paulo u ri: “Vhane vha mu ṱoḓa zwi tshi bva mbiluni.” Iṅwe bugu ya ndaedzi ya vhaṱalutshedzeli vha Bivhili i amba uri ipfi ḽa Lugerika ḽine ḽa amba u “ṱoḓa zwi tshi bva mbiluni,” a ḽi ambi u “bva wa ṱoḓa,” fhedzi ḽi ambela kha u ita vhuḓidini ha u “gwadamela” Mudzimu. Iṅwe i ṱalusa uri ḽeneḽi ḽiiti ḽa Lugerika ḽi ambela kha u ḓiimisela na u ita vhuḓidini ho engedzeaho. Vhukuma, Yehova u lambedza vhane lutendo lwavho lwa vha sudzulusela u mu gwadamela nga u fhisea na nga mbilu yavho yoṱhe.—Mateo 22:37.

Ri nga takadza hani Yehova arali ri tshi timatima vhukoni kana lutamo lwawe lwa u ri lambedza?

Yehova u lambedza hani vhagwadameli vha fulufhedzeaho? O vha fulufhedzisa malamba tshifhingani tshi ḓaho, vhutshilo vhu sa fheli Paradisoni i re kha ḽifhasi—zwine zwa sumbedza uri u na mafunda na lufuno. (Nzumbululo 21:3, 4) Na zwino, vhane vha ṱoḓa Yehova zwi tshi bva mbiluni vha wana phaṱhutshedzo khulwane. Nga thuso ya muya mukhethwa wawe na vhuṱali vhu wanalaho Ipfini ḽawe, vha tshila vhutshilo vhu re na malamba na vhu fushaho.—Psalme ya 144:15; Mateo 5:3.

Vhukuma, Yehova ndi Mudzimu ane a livhuha na u takalela tshumelo ine vhagwadameli vhawe vho ḓiṋekedzaho vha i ita nga u fulufhedzea. Naa u ḓivha zwenezwo zwi ni sudzulusela u ṱoḓa u sendela tsini nae? Arali zwo ralo, ndi ngani ni sa gudi zwo engedzeaho nga ha nḓila ine na nga ṱahulela na u sumbedza ngayo lutendo lune lwa ḓo ita uri Yehova a ni lambedze?

Ndima dza Bivhili dzine na nga dzi vhala

Tito 1-3; Filemoni 1-25; Vhaheberu 1-13Yakobo 1-5