Pfukelani kha mafhungo

Pfukelani kha zwi re ngomu

 THERO I RE KHA GWATI | NAA MUDZIMU RI A MU ṰOḒA?

Zwine Zwa Ita Uri Ri Ṱoḓe Mudzimu

Zwine Zwa Ita Uri Ri Ṱoḓe Mudzimu

Vhaḓivhi vha mutakalo wa ngelelo vha ri u itela uri vhathu vha takale, a vho ngo fanela u ṱhogomela ṱhoḓea dzavho dza ṋama fhedzi. Zwenezwo ri zwi vhona ngauri vhathu vha ṱoḓa u ita zwiṅwe zwithu zwine zwa vha na ndivho, u swikelela zwipikwa zwavho, kana u shumela muṅwe muthu a re na vhuimo ha nṱha u fhira havho. U itela u fusha yeneyi ṱhoḓea, vhaṅwe vha fhedza tshifhinga tshavho tsha u awela kha mupo, vhutsila, muzika na zwiṅwe-vho. Naho zwo ralo, vhanzhi a vha fushei nga u tovhola zwenezwo zwithu.

Mudzimu u ṱoḓa vhathu vha tshi takala zwino na nga hu sa fheli

A zwi mangadzi vhavhali vha Bivhili uri vhathu vha na ṱhoḓea ine vha bebwa vhe nayo ya u ṱoḓa u fusha ṱhoḓea dzavho dza lwa muya. Ndima dza u thoma dza bugu ya Genesi dzi sumbedza uri musi Mudzimu o no sika vhavhingani vha u thoma, o vha a tshi amba navho tshifhinga tshoṱhe, a tshi vha ṋea tshibuli tsha uri vha vhe na vhushaka ha tsini nae. (Genesi 3:8-10) Mudzimu ho ngo sika vhathu uri vha tshile nga nnḓa ha thikhedzo yawe; vha na ṱhoḓea ya u amba na Musiki wavho. Bivhili i amba nga ha yeneyi ṱhoḓea tshifhinga tshoṱhe.

Sa tsumbo, Yesu o ri: “Hu takala vhane vha ṱhogomela uri vha ṱoḓa u ḓivha Mudzimu.” (Mateo 5:3) Nga eneo maipfi, ri nga phetha nga ḽa uri u itela uri ri takale na u fushea vhutshiloni, ri fanela u fusha ṱhoḓea yashu ya u ḓivha Mudzimu. Zwenezwo ri nga zwi itisa hani? Yesu o ṋea phindulo musi a tshi ri: “Muthu ha tshili nga tshinkwa fhedzi, fhedzi u tshila na nga maipfi oṱhe a bvaho mulomoni wa Yehova.” (Mateo 4:4) Maipfi a Mudzimu, zwine zwa amba uri mihumbulo na ndaela dza Mudzimu dzi wanalaho Bivhilini, a nga ita uri ri tshile vhutshilo vhu takadzaho na vhune ha vha na ndivho nga nḓila dzifhio? Kha ri ṱolisise nḓila tharu dza ndeme.

Ri Ṱoḓa Vhulivhisi Havhuḓi

Ṋamusi, hu na vhaḓivhi vhanzhi vhane vha dzula vho ḓiimisela u ṋea nyeletshedzo nga ha vhushaka, lufuno, vhutshilo ha muṱa, u tandulula dzikhuḓano, mutakalo, u katela na ndivho ya vhutshilo. Naho zwo ralo, a hu na muṅwe ane a fanelea u ṋea vhulivhisi havhuḓi, ho linganyiselwaho kha enea mafhungo oṱhe u fhira Musiki wa vhathu, Yehova Mudzimu.

U fana na bugwana ya ndaedzi, Bivhili i a livhisa vhutshiloni

Sa tsumbo: Musi ni tshi renga tshishumiswa tshiswa, sa khamera kana khomphyutha, ni lavhelela uri  tshi vhe na bugu ya ndaedzi, kana tshibugwana tshine tsha ṱalusa nḓila ine na nga tshi shumisa ngayo u itela uri tshi kone u ni vhuyedza. Bivhili i nga fanyiswa na yeneyo bugu ya ndaedzi. Ndi bugu ya vhutshilo ha vhathu ye Mudzimu, sa musiki washu a ri ṅwalela yone. Yeneyi “bugu ya ndaedzi” i ṱalutshedza zwine tshishumiswa tsha shuma zwone na nḓila ine tsha nga shumiswa ngayo uri tshi kone u ḓisa mvelelo dzavhuḓi.

U fana na bugu iṅwe na iṅwe ya ndaedzi yo ṅwalwaho zwavhuḓi, Bivhili i tsivhudza vhavhali nga ha nḓowelo dzine dza nga tshinya vhutshilo havho. Vhaṅwe vha nga ṋea nyeletshedzo ine ya vhonala i tshi leluwa u i tevhela, fhedzi naa a zwi pfali u humbula uri ri ḓo wana mvelelo dzavhuḓi nahone ra iledza thaidzo arali ra tevhela vhulivhisi ha Musiki?

“Nṋe Yehova Mudzimu wau ndi U funza zwi farisaho; ndi U tshimbidza kha yau nḓila, ine wa pfi U fare yone. Yawee! Ngavhe U pfe ndi tshi U laya, ndi misi mulalo wau u tshi nga mulambo; zwivhuya zwau ndi misi zwi tshi nga magabelo a lwanzhe.”—Yesaya 48:17, 18

Ri nga wana vhulivhisi na thuso ine ra i ṱoḓa Bivhilini

Naho Yehova Mudzimu a tshi ri ṋea vhulivhisi na ndaela, ha ri kombetshedzi uri ri zwi ṱanganedze. Nṱhani hazwo, ngauri u a ri funa nahone u ṱoḓa u ri thusa, u ri humbela nga lufuno musi a tshi ri: “Nṋe Yehova Mudzimu wau ndi U funza zwi farisaho; ndi U tshimbidza kha yau nḓila, ine wa pfi U fare yone. Yawee! Ngavhe U pfe ndi tshi U laya, ndi misi mulalo wau u tshi nga mulambo; zwivhuya zwau ndi misi zwi tshi nga magabelo a lwanzhe.” (Yesaya 48:17, 18) Nga maṅwe maipfi, arali ri tshi thetshelesa vhulivhisi ha Mudzimu, ri ḓo tshila zwavhuḓi. Nga maṅwe maipfi, u itela uri ri tshile zwavhuḓi nahone ri takale, ri ṱoḓa Mudzimu.

Ri Ṱoḓa Phindulo Dza Thaidzo Dza Vhutshilo

Vhaṅwe vha vhona u nga a vha ṱoḓi Mudzimu vhutshiloni havho, ngauri hu na zwithu zwinzhi zwine zwa vha ḓaḓisa vhutshiloni zwine zwa ita uri vha vhone u nga a hu na Mudzimu a re na lufuno. Sa tsumbo, vha nga kha ḓi vhudzisa uri: ‘Ndi ngani vhavhuya vha tshi shengela?’ ‘Ndi ngani vhana vha si na mulandu vha tshi bebwa vho holefhala?’ ‘Ndi ngani vhutshiloni hu si na khaṱulokwayo?’ Dzenedzo ndi mbudziso dza ndeme vhukuma, nahone u wana phindulo dzadzo dzi fushaho zwi nga kwama vhutshilo havho vhukuma. Fhedzi, nṱhani ha u ṱavhanya ra pomoka Mudzimu nga ha dzenedzo thaidzo, kha ri ṱhogomele uri Ipfi ḽa Mudzimu, Bivhili ḽi ri mini nga ha enea mafhungo.

Kha ndima ya vhuraru ya bugu ya Genesi, ri wana mafhungo a Sathane, we a shumisa ṋowa u lingedza u ita uri vhavhingani vha u thoma vha si thetshelese mulayo wa Yehova Mudzimu, wa uri vha songo ḽa mutshelo wa muri wa u ṱalukanya vhuḓi na vhuvhi. Sathane o vhudza Eva uri: “A ni nga fi. Mudzimu a tshi ralo u ḓivha zwauri musi nó ḽa wone, maṱo aṋu a ḓo bonyolowa, na ḓo nga Mudzimu, na ḓo ḓivha vhuḓi na vhuvhi.”—Genesi 2:16, 17; 3:4, 5.

Nga eneo maipfi, Sathane o vha a sa khou amba uri Mudzimu ndi muzwifhi fhedzi, fhedzi o vha a tshi khou amba na uri nḓila ine Mudzimu a vhusa ngayo a si ya khaṱulokwayo. Diabolo o vha a tshi khou amba uri arali vhathu vha mu thetshelesa, zwithu zwi ḓo vha tshimbilela zwavhuḓi. Eneo mafhungo o vha a tshi ḓo tandululwa hani? Yehova o khetha u tendela tshifhinga tshi tshi ṱanḓulukana u itela uri vhoṱhe vha vhone arali zwe a pomokwa zwone i ngoho kana e mazwifhi. Zwi re zwone ndi uri Mudzimu o vha a tshi khou ṋea Sathane na vhatevheli vhawe tshibuli tsha u sumbedza arali vhathu vha tshi nga kona u tshila zwavhuḓi nga nnḓa ha thikhedzo ya Mudzimu.

Ni humbula uri phindulo ya zwe zwa ambiwa nga  Sathane ndi ifhio? Naa vhathu vha nga tshila zwavhuḓi nahone vha ḓivhusa nga nḓila i bvelelaho vha si na Mudzimu? Tshengelo, u shayea ha khaṱulokwayo, malwadze na lufu u katela na vhuvemu, u tshinyala ha vhuḓifari, dzinndwa, u vhulahwa ha lushaka na maṅwe makhaulambilu e a ṱhupha vhathu vhanzhi miṅwahani ya maḓana, ndi vhuṱanzi ha uri musi vhathu vha tshi lingedza u ḓivhusa nga nnḓa ha thikhedzo ya Mudzimu a vha bveleli. Nṱhani ha u amba uri Mudzimu ndi ene ane a ḓisela vhathu makhaulambilu, Bivhili i bula zwiitisi zwa eneo makhaulambilu musi i tshi ri: “Muthu a tshi vhusa muthu muṅwe [u] a mu tshinya.”—Muhuweleli 8:9.

Nga zwenezwo, zwi tou vha khagala uri ri fanela u ya kha Mudzimu ri tshi khou ṱoḓa phindulo dza mbudziso dzi dinaho dzine vhathu vha vha nadzo, na u wana thandululo. Ndi mini zwine Mudzimu a ḓo zwi ita?

Ri Ṱoḓa Thuso Ya Mudzimu

Ndi kale vhathu vha tshi ṱulutshelwa u vhofhololwa kha vhulwadze, vhulala na lufu. Vho fhedza tshifhinga, vhuḓidini na thundu nnzhi vha tshi khou ṱoḓa mbofholowo, fhedzi a vho ngo i wana. Vhaṅwe vhathu vho tenda uri arali vha nwa mivango yo fhamba-fhambanaho, maḓi a muṅwe mufuda kana u dzula huṅwe fhethu, vha nga dzula vhe vhaswa. Zwoṱhe zwe vha vha vho fulufhela uri zwi ḓo itea, a zwo ngo itea.

Mudzimu u ṱoḓa vhathu vha tshi tshila zwavhuḓi nahone vho takala. Yeneyo yo vha i ndivho yawe u bva mathomoni musi a tshi sika vhathu, nahone ho ngo i hangwa. (Genesi 1:27, 28; Yesaya 45:18) Ri na khwaṱhisedzo ya Yehova Mudzimu ya uri u ḓo ita zwoṱhe zwe a ḓiimisela u zwi ita. (Yesaya 55:10, 11) Bivhili i ri vhudza nga ha fulufhedziso ḽa Mudzimu ḽa u vusulusa vhuimo ha Paradiso he ha xelela vhavhingani vha u thoma. Buguni ya u fhedzisela ya Bivhili, ri vhala uri: “[Yehova Mudzimu] u ḓo phumula miṱodzi yoṱhe maṱoni avho, lufu a lu tsha ḓo vha hone, na u ṱungufhala na u lila na vhuṱungu a zwi tsha ḓo vha hone. Zwithu zwa kale zwo fhira.” (Nzumbululo 21:4) Mudzimu u ḓo ḓisa hani honoho vhuimo havhuḓi, nahone ri nga vhuyelwa hani nga ḽeneḽo fulufhedziso?

Murwa wa Mudzimu, Yesu Kristo o gudisa vhatevheli vhawe u rabelela uri zwine Mudzimu a funa zwi itwe. Vhathu vhanzhi vho ḓowelana na yeneyo thabelo kana vha dzula vha tshi i rabela, nahone vhaṅwe vha i vhidza Thabelo ya Murena. I ri: “Khotsi ashu wa ṱaḓulu, dzina ḽau nga ḽi itwe ḽikhethwa. Muvhuso wau nga u ḓe. Zwine wa funa nga zwi itwe fhano kha ḽifhasi vhunga zwi tshi itwa ngei ṱaḓulu.” (Mateo 6:9, 10) Vhukuma, Yehova Mudzimu u ḓo shumisa Muvhuso wawe u fhelisa mvelelo dzi si dzavhuḓi dza mivhuso ya vhathu nahone a ḓisa shango ḽiswa ḽo lugaho ḽe a ḽi fulufhedzisa. * (Daniele 2:44; 2 Petro 3:13) Ndi mini zwine ra fanela u zwi ita u itela u vhuyelwa nga fulufhedziso ḽa Mudzimu?

Yesu Kristo o amba nga ha vhukando ho leluwaho vhune ra fanela u vhu dzhia, o ri: “Uri vha wane vhutshilo  vhu sa fheli, vha fanela uri vha ḓivhe iwe Mudzimu wa ngoho u woṱhe, vha ḓivhe na Yesu Kristo we wa mu ruma.” (Yohane 17:3) Vhukuma, nga thuso ya Mudzimu, vhutshilo vhu sa fheli shangoni ḽiswa ḽo fulufhedziswaho vhu ḓo vha hone. Tshenetsho tshilavhelelwa tshi nga ni ita uri ni kone u fhindula nga uri ee, mbudziso ine ya ri, Naa ri ṱoḓa Mudzimu?

Tshifhinga Tsha U Humbula Nga Ha Mudzimu

Miṅwaha ya 2 000 yo fhiraho, ngei khoroni ya Areopago kana Tshikwarani tsha Mars, kha ḽa Athene, muapostola Paulo o amba zwi tevhelaho nga ha Mudzimu kha Vhaathene vhe vha vha vha tshi tenda pfunzo dza maṱali: “Ndi ene ane a ṋea vhathu vhoṱhe vhutshilo na muya wa u fema na zwithu zwoṱhe. Ngauri ri tshi tshila, ri tshi tshimbila, ri tshi vha hone, ndi nga ene, vhunga vhaṅwe vharendi vho amba vha ri, ‘Na riṋe-vho ri vhana vhawe.’”—Mishumo 17:25, 28.

Zwe Paulo a zwi vhudza Vhaathene zwi kha ḓi vha ngoho. Musiki washu u ri ṋea muya une ra u fema, zwiḽiwa zwine ra zwi ḽa na maḓi ane ra a nwa. Ri nga si kone u tshila ri si na zwithu zwavhuḓi zwe Yehova a ri ṋea zwone u itela u ri kanzwa. Fhedzi ndi ngani Mudzimu a tshi bvela phanḓa a tshi ṋea vhathu vhoṱhe zwenezwo zwithu, hu sa londwi uri vha a humbula nga hae kana hai? Paulo o amba uri “vha ṱoḓe Mudzimu, na uri vha ite vhuḓidini ha uri vha mu wane, samusi e si kule na muṅwe na muṅwe washu.”—Mishumo 17:27.

Naa ni nga takalela u ḓivha Mudzimu khwine, zwine zwa amba u guda zwo engedzeaho nga ha ndivho dzawe na nyeletshedzo yawe ya u tshila zwavhuḓi zwino na nga hu sa fheli? Arali zwo ralo, ni a ṱuṱuwedzwa u amba na muthu we a ni ḓisela wonoyu magazini kana na kwamana na vhagandisi vhawo. Vha ḓo takalela u ni thusa.

^ par. 20 U itela u wana mafhungo o engedzeaho nga ha nḓila ine Muvhuso wa ḓo ita ngayo uri zwine Mudzimu a zwi funa zwi itwe kha ḽifhasi, sedzani ndima 8 ya bugu Bivhili I Funza Mini zwa Vhukuma? yo gandiswaho nga Ṱhanzi dza Yehova, ine ya wanala kha Inthanethe nahone ya nga kopiwa kha www.jw.org.