Pfukelani kha mafhungo

Pfukelani kha zwi re ngomu

Ri Fanela U Rabela Nga Ha Mini?

Ri Fanela U Rabela Nga Ha Mini?

THABELO ya Yesu ya tsumbo i ḓivhiwa sa thabelo yo ḓoweleaho na ine ya dovhololwa vhukuma nga Vhakriste vhoṱhe. Hu sa londwi uri zwenezwi ndi ngoho kana a si ngoho, yeneyo thabelo nga zwiṅwe zwifhinga i vhidzwa uri ndi Thabelo ya Murena kana ya Khotsi ashu wa Ṱaḓulu—nahone ndi thabelo ine vhathu vhanzhi vha si pfesese zwine ya amba zwone. Vhathu vhanzhi vha dovholola maipfi a thabelo yeneyo ḓuvha ḽiṅwe na ḽiṅwe, khamusi lunzhi-lunzhi nga ḓuvha vha sa vhuyi vha humbula zwine ya amba zwone. Fhedzi Yesu o vha a sa khou ṱoḓa yeneyo thabelo i tshi shumiswa nga yeneyo nḓila. Ri zwi ḓivha hani?

Musi a sa athu vha vhudza yeneyo thabelo, Yesu o ri: “Ni tshi rabela ni songo sokou amba-amba” tshithu tshithihi ni tshi dovholola. (Mateo 6:7) Naa Yesu o dovha a ḓipikisa nga u dzudzanya maipfi e vhathu vha vha vha tshi fanela u a rwelwa ngomani na u a dovholola musi vha tshi rabela? Na khathihi! Nṱhani hazwo, Yesu o vha a tshi khou ri funza nga ha zwithu zwine ra nga zwi rabelela, nahone o vha a tshi khou ri sumbedza nḓila ine ra nga dzudzanya ngayo zwithu zwine zwa ḓa u thoma musi ri tshi rabela. Kha ri ṱhogomele nga vhuronwane zwe a zwi amba. Thabelo yeneyo i wanala kha Mateo 6:9-13.

“Khotsi-ashu wa ṱaḓulu! dzina ḽau ḽi khethwe.”

Yesu o humbudza vhatevheli vhawe uri thabelo dzoṱhe dzi fanela u livhiswa kha Khotsi awe, Yehova. Fhedzi naa ni a zwi ḓivha uri ndi ngani dzina ḽa Mudzimu ḽi ḽa ndeme na uri ndi ngani ḽi tshi fanela uri ḽi khethwe, zwine zwa amba uri ḽi itwe ḽikhethwa?

U bva mathomoni a ḓivhazwakale ya vhathu, dzina ḽa Mudzimu ḽine ḽa vha ḽikhethwa ḽo pomokwa mazwifhi. Sathane ane a vha swina ḽa Mudzimu o amba uri Yehova ndi muzwifhi, ndi Muvhusi a re na tseḓa a si na ndugelo ya u vhusa zwivhumbiwa Zwawe. (Genesi 3:1-6) Vhathu vhanzhi vho dzhia sia ḽa Sathane, nahone vha funza vhathu uri Mudzimu ha na lufuno, u na tshiṱuhu, ndi muvhi, nahone vha hanedza uri ndi ene Musiki. Vhaṅwe vho ita na u vutshela ḽeneḽo dzina Yehova nga u ḽi bvisa kha ṱhalutshedzelo dzavho dza Bivhili na u thivhela uri ḽi songo shumiswa.

Bivhili i sumbedza uri Mudzimu u ḓo khakhulula honoho u sa vha hone ha vhulamukanyi. (Hesekiele 39:7) Musi a tshi ita zwenezwo, u ḓo ḓadzisa ṱhoḓea dzaṋu dzoṱhe na u piringulula vhuleme haṋu hoṱhe. Nga nḓila-ḓe? Ni ḓo wana phindulo kha maipfi a tevhelaho a thabelo ya Yesu.

“Muvhuso wau u ḓe.”

Ṋamusi, vhafunzi vha vhurereli a vha pfesesi na luthihi zwine Muvhuso wa Mudzimu wa vha zwone. Fhedzi samusi vhathetshelesi vha Yesu vho vha vha tshi zwi ḓivha, vhaporofita vha Mudzimu vho dzula vho amba uri Messia, Mutshidzi o nangwaho nga Mudzimu, o vha a tshi ḓo vhusa Muvhusoni we wa vha u tshi ḓo shandula shango. (Yesaya 9:5, 6; Daniele 2:44) Wo vha u tshi ḓo ita uri dzina ḽa Mudzimu ḽi itwe ḽikhethwa nga u bvukulula mazwifhi a Sathane nahone wa fhelisa Sathane  na mishumo yawe yoṱhe. Muvhuso wa Mudzimu u ḓo fhelisa nndwa, malwadze, nḓala u katela na lufu. (Psalme ya 46:9; 72:12-16; Yesaya 25:8; 33:24) Musi ni tshi rabelela Muvhuso wa Mudzimu uri u ḓe, ni vha ni tshi khou rabelela uri mafulufhedziso eneo oṱhe a Mudzimu a ḓadzee.

“Zwiné wa funa nga zwi itwe fhano fhasi vhunga zwi tshi itwa ngei ṱaḓulu.”

Maipfi a Yesu a sumbedza uri zwine Mudzimu a funa zwi tshi itwa zwi ḓo ḓadzea fhano kha ḽifhasi u fana na musi zwi tshi itwa ngei ṱaḓulu, hune Mudzimu a dzula hone. Zwine Mudzimu a funa zwo itea ngei ṱaḓulu musi Murwa wa Mudzimu a tshi lwa na Sathane na madimoni awe nahone a vha posela kha ḽifhasi. (Ndzumbululo 12:9-12) Khumbelo yeneyi ya vhuraru kha thabelo ya tsumbo i a fana na khumbelo mbili dza u thoma ngauri dzi ri thusa uri ri dzule ro livhisa ṱhogomelo kha mafhungo a ndeme vhukuma—a uri hu itwe zwine Mudzimu a funa zwi tshi itwa, hu si zwine riṋe ra zwi funa. Zwine Mudzimu a zwi funa ndi zwone zwine tshifhinga tshoṱhe zwa ḓisela tsiko yoṱhe zwithu zwavhuḓi vhukuma. Nga zwenezwo, naho Yesu o vha e muthu o fhelelaho, musi a tshi amba na Khotsi awe o ri: “Hone, hu songo itwa zwiné nṋe nda zwi funa, hu itwe zwi funwaho nga iwe.”—Luka 22:42.

“U ri fhe ṋamusi vhuswa hashu ho ri linganaho.”

Yesu o dovha a sumbedza uri ri nga rabelela na ṱhoḓea dzashu dza lwa ṋama. A hu na tsho khakheaho nga u rabelela uri Mudzimu a ṱhogomele ṱhoḓea dzashu dza ḓuvha ḽiṅwe na ḽiṅwe. Zwi re zwone ndi uri, u rabelela ṱhoḓea dzashu dza ḓuvha na ḓuvha zwi ri humbudza uri Yehova ndi ene “muṋei wa vhutshilo na u fema na zwoṱhe.” (Mishumo 17:25) Bivhili i sumbedza uri ndi mubebi a re na lufuno ane a takadzwa nga u ṋea vhana vhawe zwine vha zwi ṱoḓa. Naho zwo ralo, u fana na mubebi wavhuḓi, a nga si vha fhe zwithu zwine zwa sa ḓo vha vhuyedza.

“U ri hangwele milandu yashu.”

Naa hu na zwine na zwi koloda Mudzimu? Naa ni a ṱoḓa uri a ni hangwele? Vhathu vhanzhi ṋamusi a vha pfesesi uri tshivhi ndi mini na uri tshivhi tsho khakhea vhukuma. Fhedzi Bivhili i funza uri tshivhi ndi tshone tshiitisi tsha vhuvhi hoṱhe, ngauri ndi tshone tshithu tshihulwane tsho itaho uri vhathu vha fe. Samusi ro bebiwa ri na tshivhi, roṱhe ri a ita zwivhi lunzhi-lunzhi, nahone fulufhelo ḽashu ḽa u wana vhutshilo vhu sa fheli ḽi ḓitika nga uri Mudzimu a ri hangwele. (Vha-Roma 3:23; 5:12; 6:23) Zwi a ri vhofholola u ḓivha uri Bivhili i amba uri “Iwe [Yehova], U wa vhuḓi na vhulenda; vhoṱhe vhané vha U lilela U vha ita nga vhuthu vhuhulu.”—Psalme ya 86:5.

“U ri phuluse vhuvhini.”

Naa ni a ṱhogomela uri zwo ṱavhanyiswa lungafhani uri ri wane tsireledzo i bvaho ha Mudzimu? Vhathu vhanzhi a vha tendi uri ‘muvhi’ ane a vha Sathane u hone zwa vhukuma. Fhedzi Yesu o funza uri Sathane u hone zwa vhukuma, nahone o ita na u mu vhidza uri ndi “muvhusi wa shango ḽino.” (Yohane 12:31; 16:11) Sathane o tshinya ḽino shango ḽine ḽa langiwa ngae, nahone o ḓiimisela u tshinya na inwi, u itela uri ni si kone u vha na vhushaka ha tsini-tsini na Khotsi aṋu, Yehova. (1 Petro 5:8) Naho zwo ralo, Yehova u na maanḓa ane a fhira a Sathane, nahone u takalela u tsireledza vhane vha Mu funa.

Dzenedzo mbuno dzi si gathi dze ra dzi haseledza dza thabelo ya Yesu ya tsumbo a dzi kateli zwithu zwoṱhe zwine na nga rabela nga hazwo. Humbulani zwine 1 Yohane 5:14 ya zwi amba nga ha Mudzimu musi i tshi ri: “Arali ri tshi humbela tshithu tshiné Ene a funa tshi tshi vha hone, u a ri pfa.” (Maḽeḓeretsendama ndi ashu.) Nga zwenezwo, ni songo vhilaela uri milingo yaṋu a si minzhi lune na nga si rabele Mudzimu nga hayo.—1 Petro 5:7.

Naho zwo ralo, hu pfi mini nga ha tshifhinga tsha u rabela na fhethu? Naa ndi zwa ndeme uri ri rabela lini na uri ngafhi?