Pfukelani kha mafhungo

Pfukelani kha zwi re ngomu

“Imani No Khwaṱha Lutendoni”

“Imani No Khwaṱha Lutendoni”

“Imani no khwaṱha lutendoni, . . . ni vhe na maanḓa.”—1 VHAKORINTA 16:13.

NYIMBO: 60, 64

1. (a) Ho itea mini kha Petro musi hu na ḓumbu lwanzheni lwa Galilea? (Sedzani tshifanyiso tsha u thoma.) (b) Ndi ngani Petro o thoma u mbwandamela?

NGA vhuṅwe vhusiku, muapostola Petro na vhaṅwe vhafunziwa vho konḓelwa u pfuka Lwanzhe lwa Galilea musi hu na ḓumbu. Nga u ṱavhanya, vho vhona Yesu a tshi khou tshimbila lwanzheni. Petro o vhidzelela Yesu nahone a mu vhudzisa arali a tshi nga ya khae a tshi khou tshimbila nṱha ha maḓi. Musi Yesu a tshi mu vhudza uri a ḓe, Petro o tsa kha tshikepe nahone a thoma u tshimbila a tshi ya khae. Fhedzi nga u ṱavhanya, Petro o thoma u mbwandamela. Ndi ngani? Ngauri o vhona ḓumbu na magabelo nahone a dzhenwa nga nyofho. Petro a ṱavha mukosi a tshi ṱoḓa thuso nahone Yesu a ṱavhanya a mu fara, a ri: “U khou timatima’ni iwe ane wa vha na lutendo luṱuku?”Mateo 14:24-32.

2. Ndi mini zwine ra ḓo zwi ṱolisisa zwino?

2 Kha ri ṱolisise zwithu zwiraru nga ha lutendo zwine ra nga zwi guda kha tshenzhelo ya Petro: (1) nḓila ye Petro a thoma u fulufhela ngayo uri Yehova a nga mu thusa, (2) ndi ngani Petro o  thoma u sa vha na lutendo, nahone (3) ndi mini zwe zwa thusa Petro uri a dovhe a vhe na lutendo. U ṱolisisa dzenedzi mbuno zwi nga ri thusa u vhona nḓila ine ra nga ‘ima ro khwaṱha lutendoni.’—1 Vhakorinta 16:13.

U VHA NA LUTENDO LWA URI MUDZIMU U ḒO RI THUSA

3. Ndi ngani Petro o tsa tshikepeni, nahone ro ita hani zwithu zwi fanaho?

Petro o vha e na lutendo lwo khwaṱhaho. Ndi ngani ri tshi ralo? Musi Yesu a tshi mu vhidzelela, Petro o tsa kha tshikepe nahone a tshimbila nṱha ha maḓi. O fulufhela uri maanḓa a Mudzimu a ḓo mu ṋea vhukoni vhu fanaho na he Yesu a vha e naho. Nga hu fanaho, musi Yesu a tshi ri ramba uri ri mu tevhele, ri ḓiṋekedzela kha Yehova nahone ra lovhedzwa. Ndi ngani? Nga nṱhani ha lutendo lwashu kha Yehova na Yesu, na ngauri ri fulufhela uri vha ḓo ri thusa.—Yohane 14:1; vhalani 1 Petro 2:21.

Lutendo lwa Petro lwo mu ṋea vhukoni ha u tshimbila nṱha ha maḓi, zwithu zwine zwa vhonala zwi sa konadzei kha muthu

4, 5. Ndi ngani lutendo lu lwa ndeme?

4 Lutendo ndi lwa ndeme. Lutendo lwa Petro lwo mu ṋea vhukoni ha u tshimbila nṱha ha maḓi, zwithu zwine zwa vhonala zwi sa konadzei kha muthu. Lutendo lu nga dovha lwa ri thusa u ita zwithu zwine zwa vhonala zwi sa konadzei. (Mateo 21:21, 22) Vhaṅwe vhashu ro shandula mavhonele na vhuḓifari hashu lwe zwa ita uri vhathu vhe vha vha vha tshi ri ḓivha vha si tsha ri ḓivha. Ro ita dzenedzo tshanduko ngauri ri funa Yehova, nahone o ri thusa u dzi ita. (Vhalani Vhakolosa 3:5-10.) Lutendo lwo ri ṱuṱuwedza u ḓiṋekedzela kha Yehova, nahone ro vha khonani dzawe, zwithu zwe ra vha ri sa ḓo vhuya ra kona u zwi ita nga nnḓa ha thuso yawe.—Vhaefesa 2:8.

5 Lutendo lwashu lu ri ita uri ri khwaṱhe. Sa tsumbo, lu ri thusa u lwa na mvutshelo dza Diabolo, swina ḽashu ḽi re na maanḓa. (Vhaefesa 6:16) Zwiṅwe hafhu, ngauri ri fulufhela Yehova, a ro ngo fanela u vhilaela vhukuma musi ri na thaidzo. Yehova o ri fulufhedzisa uri u ḓo ri ṋea zwine ra zwi shaya arali ri na lutendo khae na u vhea Muvhuso wawe u thoma. (Mateo 6:30-34) Nahone zwi fhiraho zwenezwo, Yehova u ḓo ri ṋea tshifhiwa tshavhuḓi tsha vhutshilo vhu sa fheli nga nṱhani ha lutendo lwashu.—Yohane 3:16.

U SA LIVHISA ṰHOGOMELO ZWI NGA ITA URI RI XELELWE NGA LUTENDO LWASHU

6, 7. (a) Ri nga vhambedza muya na magabelo zwe zwa tshuwisa Petro na mini? (b) Ndi ngani ri tshi fanela u pfesesa uri zwi a konadzea u xelelwa nga lutendo lwashu?

6 Musi Petro a tshi khou tshimbila Lwanzheni lwa Galilea, o dzhenwa nga nyofho. Ndi ngani? Nga nṱhani ha muya na magabelo. Zwenezwo zwi nga vhambedzwa na milingo minzhi ine Vhakriste vha sedzana nayo ṋamusi. Naho dzenedzo thaidzo dzi tshi konḓa vhukuma, ri nga khwaṱhiswa nga thuso ya Yehova. Fhedzi humbulani zwe zwa itea kha Petro. Ho ngo mbwandamela nga nṱhani ha u rwiwa nga muya na magabelo. Nṱhani hazwo, Bivhili i ri: “A tshi vhona maḓumbu, a ofha.” (Mateo 14:30) Petro o litsha u sedza Yesu nahone a livhisa ṱhogomelo kha ḓumbu ḽi re na maanḓa. Nga zwenezwo, lutendo lwawe lwa thoma u thenga-thenga. Nga hu fanaho, arali ra livhisa ṱhogomelo kha thaidzo dzashu,  ri nga thoma u timatima uri Yehova u ḓo ri thusa.

Arali ra livhisa ṱhogomelo kha zwithu zwo khakheaho, lutendo lwashu lu nga ṱavhanya u thenga-thenga

7 Ri fanela u pfesesa uri zwi a konadzea u xelelwa nga lutendo lwashu. Ndi ngani? Ngauri Bivhili i ri u xelelwa nga lutendo ndi “tshivhi tshine tsha ri piringedza nga hu leluwaho.” (Vhaheberu 12:1) U fana na Petro, arali ra livhisa ṱhogomelo kha zwithu zwo khakheaho, lutendo lwashu lu nga ṱavhanya u thenga-thenga. Nga zwenezwo, ri nga ḓivha hani uri lutendo lwashu lu khomboni? Mbudziso dzi tevhelaho dzi ḓo ri thusa u ḓiṱolisisa.

8. Mafulufhedziso a Mudzimu a nga vhonala hani e si a vhukuma kha riṋe u fhira mathomoni?

8 Naa mafulufhedziso a Mudzimu ndi a vhukuma kha nṋe zwino u fana na mathomoni? Sa tsumbo, Mudzimu o fulufhedzisa u fhelisa shango ḽa Sathane. Naho zwo ralo, naa ri khakhiswa nga mifuda minzhi yo fhamba-fhambanaho ya vhuḓimvumvusi vhune ha bveledzwa nga shango ḽawe? Arali zwo ralo, ri nga thoma u timatima uri vhufhelo vhu tsini. (Habakuku 2:3) Humbulani nga ha iṅwe tsumbo. Yehova o ri ṋea tshirengululi nahone o fulufhedzisa u hangwela vhukhakhi hashu. Fhedzi arali ra dzula ri tshi livhisa ṱhogomelo kha vhukhakhi hashu ha tshifhingani tsho fhiraho, ri nga thoma u timatima uri Yehova o ri hangwela zwa vhukuma. (Mishumo 3:19) Nga zwenezwo, ri nga xelelwa nga dakalo tshumeloni ya Mudzimu nahone ra litsha u huwelela kha vhaṅwe.

9. Hu nga itea mini arali ra livhisa vhutshilo hashu kha zwithu zwine ra zwi takalela?

9 Naa ndi kha ḓiṋea Yehova zwoṱhe zwi re maanḓani anga? Musi ri tshi shumela Yehova vhukuma, zwi ḓo ri thusa u livhisa ṱhogomelo kha fulufhelo ḽashu ḽa tshifhingani tshi ḓaho. Naho zwo ralo, hu pfi mini arali ro thoma u livhisa ṱhogomelo kha zwine ra zwi takalela? Sa tsumbo, ri nga ṱanganedza mushumo une wa holela zwavhuḓi, fhedzi u tshi ri ita uri ri sa ite zwinzhi tshumeloni ya Yehova. Zwenezwi zwi nga ita uri lutendo lwashu lu thenga-thenge nahone ra vha “vhabva,” ri tshi itela Yehova zwiṱuku u fhira zwine ra nga zwi kona.—Vhaheberu 6:10-12.

Vhafunziwa vha Yesu vho dovha vha guda uri lutendo lu a ṱoḓea u itela u hangwela vhaṅwe

10. Ri sumbedza hani lutendo kha Yehova musi ri tshi hangwela vhaṅwe?

10 Naa zwi a nkonḓela u hangwela? Musi vhaṅwe vha tshi ri khukhulisa kana u ri vhaisa, naa ri a lingea u vha sinyutshela kana ra litsha u amba navho? Arali zwo ralo, ri ḓo vha ri tshi khou livhisa ṱhogomelo vhukuma kha maḓipfele ashu. Ri sumbedza lutendo lwashu kha Yehova musi ri tshi hangwela vhaṅwe. Nga nḓila-ḓe? Musi muthu a tshi ri khakhela, u vha a tshi khou ri koloda. Musi ri tshi khakhela Yehova, ri vha ri tshi khou mu koloda. (Luka 11:4) Nga u ralo, musi ri tshi hangwela vhaṅwe, ri vha ri tshi khou fulufhedzea kha Yehova. Ri fulufhela uri a fhaṱutshedze mavhonele ashu, nahone phaṱutshedzo dzawe ndi dza ndeme  vhukuma u fhira u lifhisa muthu zwe a ri ita zwone. Vhafunziwa vha Yesu vho guda uri lutendo lu a ṱoḓea u itela u hangwela vhaṅwe. Musi Yesu a tshi vha vhudza uri vha hangwele na vhe vha vha khakhela lunzhi-lunzhi, vhafunziwa vhawe vho mu humbela vha ri: “Ri ṋee lutendo lwo engedzeaho.”—Luka 17:1-5.

11. Ndi ngani ri tshi nga kundelwa u guda kha nyeletshedzo?

11 Naa ndi a khukhulisea musi ndi tshi ṋewa nyeletshedzo? Ṱoḓani nḓila ine na nga guda kha nyeletshedzo nṱhani ha u ṱoḓa vhukhakhi kha nyeletshedzo kana vhushayanungo kha muthu we a ni ṋea yone. (Mirero 19:20) Ni songo litsha u wana tshibuli tsha u guda u humbula nga ho engedzeaho u fana na Yehova!

12. Hu ḓo vha ho khakhea mini arali tshifhinga tshoṱhe muthu a gungula nga ha vhane vha ranga phanḓa?

12 Naa ndi a gungula nga ha vhane vha khou ranga phanḓa tshivhidzoni? Musi Vhaisiraele vha tshi livhisa ṱhogomelo kha muvhigo u si wavhuḓi wa ṱholi dza fumi, vho gungulela Mushe na Aroni. Nga zwenezwo, Yehova o vhudzisa Mushe a ri: “Avha vhathu vha ḓo litsha lini u nnyadza?” (Numeri 14:2-4, 11) Vhukuma, Yehova o vha a tshi zwi ḓivha uri Vhaisiraele vho vha vha sa fulufhedzei khae ngauri vho gungulela Mushe na Aroni, vhanna vhe a vha nanga. Nga hu fanaho, arali tshifhinga tshoṱhe ra gungula nga ha vhane Yehova a vha shumisa u ranga phanḓa vhathu vhawe ṋamusi, zwenezwi zwi nga sumbedza uri lutendo lwashu kha Mudzimu lu khou thenga-thenga.

13. Ndi ngani ri songo fanela u kulea nungo arali ra vhona uri lutendo lwashu lwo fhungudzea?

13 Nga murahu ha u ṱolisisa dzenedzi mbudziso, ni songo kulea nungo arali ni tshi vhona uri lutendo lwaṋu lu khou thenga-thenga. Humbulani uri na muapostola Petro o dzhenwa nga nyofho nahone a thoma u timatima. Nahone nga zwiṅwe zwifhinga, Yesu o eletshedza vhaapostola vhoṱhe nga ha u vha na “lutendo luṱuku.” (Mateo  16:8) Naho zwo ralo, ri nga guda ngudo ya ndeme kha tshenzhelo ya Petro. Ṱhogomelani zwe a ita musi a tshi thoma u timatima na u mbwandamela lwanzheni.

LIVHISANI ṰHOGOMELO KHA YESU U ITELA U KHWAṰHISA LUTENDO LWAṊU

14, 15. (a) Ndi mini zwe Petro a zwi ita musi a tshi thoma u mbwandamela? (b) Ri nga “livhisa ṱhogomelo” kha Yesu nga nḓila-ḓe?

14 Ndi mini zwe Petro a zwi ita musi a tshi thoma u mbwandamela? Petro o vha a tshi kona u bambela, ngauralo, o vha a tshi nga dzhia phetho ya u bambela a tshi ya tshikepeni. (Yohane 21:7) Fhedzi ndi ngani a songo ita ngauralo? Ngauri ho ngo ḓitika nga ene muṋe musi a tshi ṱoḓa thuso. O dovha a livhisa ṱhogomelo kha Yesu na u ṱanganedza thuso yawe. Arali ra ṱhogomela uri lutendo lwashu lu khou thenga-thenga, ri fanela u edzisa Petro. Zwenezwo ri nga zwi ita hani?

15 U fana na Petro a tshi dovha a livhisa ṱhogomela kha Yesu musi a tshi ṱoḓa thuso, na riṋe ri fanela u “livhisa ṱhogomelo” kha Yesu. (Vhalani Vhaheberu 12:2, 3.) Fhedzi a ri koni u mu vhona nga maṱo ashu u fana na nḓila ye Petro a mu vhona ngayo. Nga u ralo, ri nga “livhisa ṱhogomelo” kha Yesu nga nḓila-ḓe? Ri nga guda zwithu zwe a zwi funza na u zwi ita nahone nga zwenezwo ra mu edzisa nga vhuronwane. Musi ri tshi ita ngauralo, ri ḓo wana thuso ine ra i ṱoḓa u itela u khwaṱhisa lutendo lwashu. Kha ri ṱolisise dziṅwe nḓila dzine ra nga edzisa ngadzo Yesu.

Musi ri tshi livhisa ṱhogomelo kha tsumbo ya Yesu na u mu edzisa nga vhuronwane, ri nga vha na lutendo lwo khwaṱhaho (Sedzani phara 15)

16. Bivhili i nga ri thusa hani u khwaṱhisa lutendo lwashu?

16 Khwaṱhisani fulufhelo ḽaṋu kha Bivhili. Yesu o vha e na vhungoho ha uri Bivhili ndi Ipfi ḽa Mudzimu na uri ḽi ri ṋea nyeletshedzo ya khwine vhukuma. (Yohane 17:17) U itela u edzisa Yesu, ri fanela u vhala Bivhili ḓuvha ḽiṅwe na ḽiṅwe, u i guda na u elekanya nga ha ngudo dzine ra dzi guda. Ri fanela u dovha ra ṱoḓa phindulo dza mbudziso dzine ra nga vha nadzo. Sa tsumbo, naa ni a tenda vhukuma uri ri khou tshila maḓuvhani a vhufhelo? Khwaṱhisani lutendo lwaṋu nga ha uri vhufhelo vhu tsini nga u guda vhuporofita ha Bivhili vhune ha sumbedza uri ri khou tshila maḓuvhani a vhufhelo. Naa ni khou ṱoḓa u khwaṱhisa lutendo lwaṋu nga mafulufhedziso a Mudzimu a tshifhingani tshi ḓaho? Nga zwenezwo, gudani vhuporofita ha Bivhili he ha ḓadzea. Naa zwa vhukuma ni a tenda uri Bivhili i a shuma ṋamusi? Ni nga vhala nga ha vhahashu vhe vha shandula vhutshilo havho ha vha khwine vha tshi thuswa nga Bivhili. * (Sedzani ṱhaluso i re magumoni a siaṱari.)—1 Vhathesalonika 2:13.

17. Ndi ngani Yesu o kona u konḓelela milingo mihulwane vhukuma, nahone ni nga mu edzisa hani?

17 Livhisani ṱhogomelo kha phaṱhutshedzo dze Yehova a dzi fulufhedzisa. Yesu o livhisa ṱhogomelo kha phaṱhutshedzo dzawe dza tshifhingani tshi ḓaho nahone zwenezwo zwo mu thusa u konḓelela milingo mihulwane vhukuma. (Vhaheberu 12:2) Ho ngo vhuya a thithiswa nga zwithu zwa shango. (Mateo 4:8-10) Ri nga edzisa hani tsumbo ya Yesu? Elekanyani nga ha mafulufhedziso avhuḓi e Yehova a a fulufhedzisa. Edzani u humbula ni shangoni ḽiswa. Ṅwalani kana olani zwine na ḓo zwi ita Paradisoni. Kana itani mutevhe wa vhathu vhane vha ḓo vuswa vhane na ṱoḓa u amba navho na zwine na ḓo vha vhudza zwone. Dzhiani zwenezwo zwi mafulufhedziso a Mudzimu, kha inwi muṋe, hu si kha vhathu nga u tou angaredza.

18. Thabelo i nga ni thusa hani u khwaṱhisa lutendo lwaṋu?

 18 Rabelelani u wana lutendo lwo engedzeaho. Yesu o gudisa vhafunziwa vhawe uri vha humbele Yehova muya mukhethwa. (Luka 11:9, 13) Musi ni tshi humbela muya mukhethwa, rabelelani u wana lutendo lwo engedzeaho. Ndi ḽiṅwe sia ḽa zwiaṋwiwa zwa muya mukhethwa. Ni nga bvela khagala kha thabelo dzaṋu. Sa tsumbo, arali na ṱhogomela uri zwi a ni konḓela u hangwela vhaṅwe, humbelani Yehova uri a khwaṱhise lutendo lwaṋu na u ni thusa u vha a hangwelaho.

19. Ri nga khetha hani khonani dzavhuḓi?

19 Khethani khonani dzine dza vha na lutendo lwo khwaṱhaho. Yesu o khetha khonani dzawe dza tsini nga vhuronwane. Khonani dzawe dza tsini ho vha hu vhaapostola, vhe vha vha vha tshi fulufhedzea na u mu thetshelesa. (Vhalani Yohane 15:14, 15.) Edzisani Yesu nahone ni khethe khonani dzaṋu nga vhuronwane. Vha fanela u vha vhathu vha re na lutendo lwo khwaṱhaho vhane vha thetshelesa Yesu. Khonani dza vhukuma dzi fanela u fulufhelana, naho dzi tshi fanela u ṋea kana u ṱanganedza nyeletshedzo.—Mirero 27:9.

20. Ndi mini zwine zwa ḓo itea musi ri tshi thusa vhaṅwe u khwaṱhisa lutendo lwavho?

20 Thusani vhaṅwe u khwaṱhisa lutendo lwavho. Yesu o thusa vhaapostola vhawe u khwaṱhisa lutendo lwavho nga zwe a zwi amba na u zwi ita. (Marko 11:20-24) Ri fanela u edzisa tsumbo ya Yesu. Musi ri tshi ita ngauralo ri ḓo khwaṱhisa lutendo lwashu na lwa vhaṅwe. (Mirero 11:25) Ni nga thusa hani vhathu vha tsimuni yaṋu? Musi ni tshi gudisa vhaṅwe Bivhili, ombedzelani vhuṱanzi ha uri Mudzimu u hone, u a ri ṱhogomela na uri Bivhili ndi Ipfi ḽa Mudzimu. Ni nga thusa hani vhahaṋu uri lutendo lwavho lu dzule lwo khwaṱha? Arali na ṱhogomela muṅwe muthu a tshi khou gungula nga vhahashu vhane vha ranga phanḓa ni songo ṱavhanya u mu iledza. Shumisani vhuṱali u itela u mu thusa uri a dovhe a vhe na lutendo. (Yuda 22, 23) Arali ni tshi kha ḓi vha tshikoloni nahone mudededzi waṋu a amba nga ha pfunzo ya uri zwithu zwo sokou bvelela, ivhani na tshivhindi nahone ni imelele lutendo lwaṋu nga ha tsiko. Nḓila ine mudededzi waṋu na vhane na dzhena navho kilasini vha nga aravha ngayo i nga ni mangadza vhukuma.

21. Yehova o fulufhedzisa mini muṅwe na muṅwe washu?

21 Yehova na Yesu vho thusa Petro u kunda u timatima na nyofho. Nga murahu vhutshiloni hawe, Petro o vha tsumbo yavhuḓi ya lutendo kha vhaṅwe. Nga nḓila i fanaho, Yehova u thusa muṅwe na muṅwe washu u itela uri a ime o khwaṱha lutendoni. (Vhalani 1 Petro 5:9, 10.) Zwi ṱoḓa vhuḓidini u khwaṱhisa lutendo, fhedzi Yehova u ḓo ri lambedza musi ri tshi ita honoho vhuḓidini.

^ par. 16 Sa tsumbo, sedzani mutevhe wa zwiṱoho “Bivhili I Shandula Vhutshilo” kha magazini wa tsimuni wa Tshiingamo.