Pfukelani kha mafhungo

Pfukelani kha zwi re ngomu

Zwi Itaho Uri Ri Humbule Tshilalelo Tsha Murena

Zwi Itaho Uri Ri Humbule Tshilalelo Tsha Murena

“Dzulani ni tshi ita zwenezwi u itela u nkhumbula.”—1 VHAKOR. 11:24.

1, 2. Ndi mini zwe Yesu a zwi ita nga madekwana a ḽa 14 Nisan, 33 C.E.? (Sedzani tshifanyiso tsha u thoma.)

HO VHA hu nga madekwana, fhedzi ṅwedzi wo vhonetshela Yerusalema. Ndi madekwana a ḽa 14 Nisan, 33 C.E. Yesu na vhaapostola vhawe vho no pembelela Paseka vha tshi khou humbula u vhofhololwa ha Vhaisiraele vhupulini ha Egipita maḓanani a miṅwaha a vhu-15 o fhiraho. Musi Yesu e na vhaapostola vhawe vha 11 vha fulufhedzeaho, o thoma tshilalelo tsho khetheaho—tshine tsha ḓo vha humbudza nga ha lufu lune a ḓo sedzana nalwo nga ḽeneḽo ḓuvha. *Mat. 26:1, 2.

2 Yesu o livhuha nahone a ṋekedza vhaapostola vhawe tshinkwa tshi si na mbiliso, a ri: “Dzhiani ni ḽe.” A dzhia tshinwelo tsha waini a dovha a livhuha nahone a ri: “Inwani ngatsho noṱhe.” (Mat. 26:26, 27) Yesu ho ngo vha ṋekedza zwiṅwe zwiḽiwa, fhedzi o vha e na zwinzhi zwine a nga vhudza vhatevheli vhawe vha fulufhedzeaho nga ha honoho vhusiku vhu swayeaho.

3. Ndi mbudziso dzifhio dzine dza ḓo haseledzwa kha ino thero?

 3 Nga zwenezwo, Yesu o thoma Tshihumbudzo tsha lufu lwawe, tshine tsha dovha tsha vhidzwa “tshilalelo tsha Murena.” (1 Vhakor. 11:20) Malugana natsho, vhaṅwe vha nga vhudzisa uri: Ndi ngani ri tshi fanela u humbula lufu lwa Yesu? Tshinkwa na waini zwi imela mini? Ri nga lugiselela hani Tshilalelo? Ndi vhafhio vhane vha fanela u ḽa? Nahone Vhakriste vha aravha hani zwe Maṅwalo a zwi amba nga ha fulufhelo ḽavho?

ZWI ITAHO URI RI HUMBULE LUFU LWA YESU

4. Ndi mini zwe lufu lwa Yesu lwa ita uri zwi konadzee kha riṋe?

4 Sa vhaḓuhulu vha Adamu, ro mamela tshivhi na lufu. (Vharoma 5:12) A hu na muthu a songo fhelelaho ane a nga ṋekedzela vhutshilo hawe kana ha vhaṅwe sa tshirengululi kha Mudzimu. (Ps. 49:6-9) Naho zwo ralo, nga lufu lwawe, Yesu o ṋekedza tshirengululi tshi ṱanganedzeaho—muvhili wawe wo fhelelaho na u shululwa ha malofha. Nga u sumbedza ndeme ya tshirengululi kha Mudzimu, Yesu o ita uri zwi konadzee uri ri phuluswe kha tshivhi na lufu nahone ri wane tshifhiwa tsha vhutshilo vhu sa fheli.—Vharoma 6:23; 1 Vhakor. 15:21, 22.

5. (a) Ri zwi ḓivha hani uri Mudzimu na Kristo vha funa vhathu? (b) Ndi ngani ri tshi fanela u vha hone tshihumbudzoni tsha lufu lwa Yesu?

5 Ndugiselelo ya tshirengululi i sumbedza uri Mudzimu u funa vhathu. (Yoh. 3:16) Tshiṱhavhelo tsha Yesu tshi sumbedza uri na ene u a ri funa. Musi Yesu a sa athu u vha muthu wa ṋama sa “muḓinḓa” wa Mudzimu, o vha a “tshi takalela vhana vha vhathu”! (Mir. 8:30, 31) U livhuha Mudzimu na Murwa wawe zwi fanela u ri sudzulusela u ya tshihumbudzoni tsha lufu lwa Yesu, zwine zwa sumbedza uri ri tevhela maipfi ane a ri: “Dzulani ni tshi ita zwenezwi u itela u nkhumbula.”—1 Vhakor. 11:23-25.

ZWINE ZWIGA ZWA IMELA ZWONE

6. Ri fanela u dzhia hani tshinkwa na waini zwa Tshihumbudzo?

6 Musi Yesu a tshi thoma Tshihumbudzo, ho ngo shandula nga lwa vhuṱolo tshinkwa na waini uri zwi vhe muvhili na malofha awe a vhukuma. Nṱhani hazwo, o amba zwi tevhelaho nga ha tshinkwa: “Tshi imela muvhili wanga.” Malugana na waini o ri: “[I] imela ‘malofha anga a mulanga,’ ane a ḓo shululelwa vhanzhi.” (Marko 14:22-24) Nga zwenezwo, zwi tou vha khagala uri tshinkwa na waini zwo vha zwi tshi fanela u dzhiiwa sa zwiga.

7. Tshinkwa tshine tsha shumiswa nga Tshihumbudzo tshi imela mini?

7 Kha tshiitea tsha ndeme nga 33 C.E., Yesu o shumisa tshinkwa tshi si na mbiliso tshe tsha vha tsho sala nga tshilalelo tsha Paseka. (Ek. 12:8) U ya nga Maṅwalo, nga zwiṅwe zwifhinga mbiliso i imela vhutshinyi kana vhuvhi. (Mat. 16:6, 11, 12; Luka 12:1) Nga zwenezwo, u shumisa ha Yesu tshinkwa tshi si na mbiliso zwo vha zwi tshi swayea ngauri zwo vha zwi tshi imela muvhili wawe u si na tshivhi. (Vhaheb. 7:26) Nga zwenezwo, tshinkwa tsho raloho, tshi shumiswa nga Tshihumbudzo.

8. Tshinwelo tsha waini ya Tshihumbudzo tshi imela mini?

8 Waini ye ya shumiswa nga Yesu nga ḽa 14 Nisan, 33 C.E., i imela malofha awe, samusi zwo tou ralo na ṋamusi kha tshinwelo tsha waini tsha Tshihumbudzo. Malofha a Yesu o shululwa ngei Golgotha, nnḓa ha Yerusalema uri ri “hangwelwe zwivhi.” (Mat. 26:28; 27:33) Ngauri tshinkwa na waini zwa Tshihumbudzo zwi imela tshiṱhavhelo tsha Yesu tshi sa vhambedzwi na tshithu tshe tsha ṋekedzwa hu tshi itelwa vhathu vhane vha thetshelesa, zwi ita uri ri dzhiele nṱha yeneyo ndugiselelo, nga zwenezwo, zwo tea uri ri lugiselele Tshilalelo tsha Murena tsha ṅwaha muṅwe na muṅwe.

 DZIṄWE NḒILA DZA U LUGISELELA

9. (a) Ndi ngani zwi zwa ndeme u tshimbidzana na muvhalo wa Bivhili wa Tshihumbudzo? (b) Ni ḓipfa hani nga tshirengululi?

9 Ri nga elekanya nga zwe Yesu a zwi ita musi a sa athu u fa, nga u tshimbidzana na mbekanyo ya muvhalo wa Bivhili wa Tshihumbudzo une wa wanala kha bugu U Ṱolisisa Maṅwalo Ḓuvha Ḽiṅwe na Ḽiṅwe. Nga hu fanaho, zwenezwi zwi ḓo ri thusa u lugiselela mbilu dzashu u itela Tshilalelo tsha Murena. * Muṅwe wahashu wa tshisadzini o ri: “Ro lavhelela Tshihumbudzo nga maṱo matswuku. Tshi vha tsho khetheaho ṅwaha muṅwe na muṅwe. Ndi kha ḓi humbula ndo ima vhiḓani . . . ndo lavhelesa bogisi ḽa khotsi anga nahone zwa ita uri ndi dzhiele nṱha tshiṱhavhelo zwi tshi bva mbiluni. . . . Ee, ndo vha ndi tshi ḓivha maṅwalo oṱhe na u a ṱalutshedza! Fhedzi musi ndi tshi pfa vhuṱungu ha lufu, ndo pfa ndo takala nga zwine tshenetsho tshirengululi tsha ndeme tsha ḓo ri itela zwone.” I ngoho, musi ri tshi lugiselela Tshihumbudzo, ri ita zwavhuḓi ri tshi elekanya nga ha nḓila ye tshiṱhavhelo tsha Yesu tsha ri vhofholola ngayo vhupulini ha tshivhi na lufu.

Shumisani zwishumiswa zwe na ṋewa u lugiselela mbilu yaṋu u itela Tshihumbudzo (Sedzani phara 9)

10. U lugiselela Tshihumbudzo zwi nga kwama hani vhuḓinḓa hashu?

10 Iṅwe nḓila ine ra nga lugiselela ngayo Tshihumbudzo ndi u engedza tshifhinga tshashu vhuḓinḓani, khamusi u vha muvulanḓila wa u thusa nga tshifhinga tsha Tshihumbudzo. Samusi ri tshi ramba vhagudi vha Bivhili na vhaṅwe Tshilaleloni tsha Murena, ri ḓo takala musi ri tshi amba nga ha Mudzimu na Murwa wawe na phaṱhutshedzo dzine dza ḓo waniwa nga vhane vha takadza Yehova na u mu renda.—Ps. 148:12, 13.

11. Vhaṅwe Vhakorinta vho ḽa hani zwiga zwa Tshilalelo nga nḓila i songo teaho?

11 Musi ni tshi lugiselela Tshilalelo tsha Murena, ṱhogomelani zwe muapostola Paulo a zwi ṅwalela tshivhidzo tsha Vhakriste ngei Korinta. (Vhalani 1 Vhakorinta 11:27-34.) Paulo o sumbedza uri muṅwe na muṅwe ane a ḽa tshinkwa na u nwa kha tshinwelo a songo fanelea u “na mulandu malugana na muvhili na malofha zwa Murena,” Yesu Kristo. Nga zwenezwo, muḓodzwa u fanela uri a “ḓiṱolisise uri a vhone arali a tshi fanelea” nga murahu a kone u ḽa zwiga. Zwa sa ralo, “u ḽa na u nwela u haṱulwa arali a sa ṱalukanyi zwine muvhili wa imela zwone.” Vhakorinta vhanzhi vho vha vhe ‘si na nungo, vha tshi lwala, nahone vhanzhi vha tshi fa nga lwa muya’ nga nṱhani ha u sa ḓifara zwavhuḓi. Khamusi  vhaṅwe vho ḽesa na u nwesa hu sa athu u thoma kana nga tshifhinga tsha Tshihumbudzo, zwa ita uri vha si fhaṱuwe muhumbuloni na nga lwa muya. U ḽa zwiga nga nḓila i songo teaho zwo ita uri Mudzimu a sa vha ṱanganedze.

12. (a) Paulo o vhambedza Tshihumbudzo na mini, nahone ndi mini zwe a sevha vhane vha ḽa? (b) Ndi mini zwine zwa fanela u itwa nga ane a ḽa arali o ita tshivhi tshihulwane?

12 Paulo o vhambedza Tshihumbudzo na u ḽa zwiḽiwa na vhaṅwe nahone a sevha vhane vha ḽa uri: “Ni nga si kone u nwa tshinwelo tsha Yehova na tsha madimoni; ni nga si kone u ḽa ‘ṱafulani ḽa Yehova’ na ṱafulani ḽa madimoni.” (1 Vhakor. 10:16-21) Arali muthu ane a ḽa zwiga zwa Tshilalelo tsha Murena a ita tshivhi tshi hulwane, u fanela u humbela thuso ya lwa muya. (Vhalani Yakobo 5:14-16.) Arali onoyo muḓodzwa o aṋwa “mitshelo yo fanelaho u rembuluwa,” u vha a sa khou nyadza tshiṱhavhelo tsha Yesu nga u ḽa zwiga zwa Tshihumbudzo.—Luka 3:8.

13. Ndi ngani zwi tshi nga vhuyedza u rabela nga ha fulufhelo ḽe ra ṋewa nga Mudzimu?

13 Musi ri tshi lugiselela Tshihumbudzo, ri ḓo wana zwi tshi vhuyedza u rabela nga ha fulufhelo ḽashu ḽi bvaho ha Mudzimu. A huna mushumeli wa Yehova o ḓiṋekedzelaho na mutevheli a fulufhedzeaho wa Murwa wawe ane a nga ṱoḓa u sa ṱhonifha tshiṱhavhelo tsha Yesu nga u ḽa zwiga zwa Tshihumbudzo arali onoyo muthu e si na vhuṱanzi ho fhelelaho ha u vha Mukriste o ḓodzwaho. Nga zwenezwo, muthu a nga zwi ḓivha hani uri u a fanelea kana ha fanelei u ḽa zwiga?

NDI NNYI ANE A FANELA U ḼA?

14. Mulanga muswa u shuma hani kha vhane vha ḽa zwiga zwa Tshihumbudzo?

14 Vhane vha tea u ḽa zwiga zwa Tshilalelo nga ho fanelaho vha na vhungoho ho fhelelaho ha uri vha tshipiḓa tsha mulanga muswa. Malugana na waini, Yesu o ri: “Tshinwelo itshi tshi imela mulanga muswa nga mutheo wa malofha anga.” (1 Vhakor. 11:25) Musi Mudzimu a tshi shumisa muporofita Yeremia, o amba hu tshee nga phanḓa uri u ḓo vhofha mulanga wa Mulayo u sa fani na we wa vhofhiwa na Vhaisiraele. (Vhalani Yeremia 31:31-34.) Mudzimu o vhofha mulanga muswa na Vhaisiraele vha lwa muya. (Vhagal. 6:15, 16) Wonoyu mulanga wo khwaṱhisedzwa nga tshiṱhavhelo tsha Kristo nahone wa itwa uri u shume nga u shululwa ha malofha awe. (Luka 22:20) Yesu ndi Mupfumedzanyi wa mulanga muswa na vhaḓodzwa vha fulufhedzeaho vhane vha vha tshipiḓa tsha vhane vha ḓo wana ifa ḽa ṱaḓulu.—Vhaheb. 8:6; 9:15.

15. Ndi vhafhio vhane vha vha tshipiḓa tsha mulanga wa Muvhuso, nahone vha na ndugelo ifhio arali vha dzula vha tshi fulufhedzea?

15 Vhane vha fanela u ḽa zwiga zwa Tshihumbudzo vha a ḓivha uri vha tshipiḓa tsha mulanga wa Muvhuso. (Vhalani Luka 12:32.) Vhe vha vha vhatevheli vha Yesu vho ḓodzwaho, vha ima nae nga u fulufhedzea na u pfa vhuṱungu nae, vha ḓo vhusa nae ṱaḓulu. (Vhafil. 3:10) Vhaḓodzwa vha fulufhedzeaho vha ḓo vhusa na Kristo sa mahosi a ṱaḓulu lini na lini ngauri vha tshipiḓa tsha mulanga wa Muvhuso. (Nzumb. 22:5) Vhenevho vha ḽa nga ho faneleaho zwiga zwa Tshilalelo tsha Murena.

16. Ṱalutshedzani nga u tou pfufhifhadza zwine Vharoma 8:15-17 ya amba zwone.

16 Vhane vha vha na vhungoho ha uri vha na muya wa u vha vhana vha Mudzimu vha fanela u ḽa zwiga zwa Tshihumbudzo. (Vhalani Vharoma 8:15-17.) Ṱhogomelani uri Paulo o shumisa ipfi ḽa Luaramiki ḽine ḽa ri “Aba,” zwine zwa amba “Khotsi!” Ṅwana a nga shumisa ḽeneḽi ipfi musi a tshi amba na khotsi awe, ngauri ndi ipfi ḽa u hulisa, ḽi katelaho u funa ḽine ḽa ri “baba” na ipfi ḽi sumbedzaho ṱhonifho ḽine ḽa ri “khotsi.” Vhe vha wana ‘muya wa uri vha vhe vhana vhawe,’ vha vhana vha Mudzimu vha muya. Muya wa Mudzimu  u ṱanziela na wavho, zwine zwa vha khwaṱhisedza uri vha vhana vha Yehova vho ḓodzwaho. Zwenezwi a zwi ambi uri a vha ṱoḓi u tshila kha ḽifhasi. Vha na vhungoho ha uri vha ḓo vhusa na Yesu Muvhusoni wa ṱaḓulu arali vha dzula vha tshi fulufhedzea u swika vha tshi fa. Ṋamusi, hu na masalela a vha 144 000 fhedzi, vhane vha tevhedza nayo dza Kristo, we a “ḓodzwa nga [Yehova] mukhethwa.” (1 Yoh. 2:20; Nzumb. 14:1) Ndi nga muya wawe musi vha tshi huwelela uri, “Aba, Khotsi!” Ndi vhushaka havhuḓi lungafhani vhune vha vha naho na Mudzimu!

U TENDELANA NA MAFULUFHEDZISO AṊU A MAṄWALO

17. Ndi ḽifhio fulufhelo ḽa vhaḓodzwa nahone vha ḽi dzhia hani?

17 Arali ni muḓodzwa wa Mukriste, u amba nga ha fulufhelo ḽaṋu ḽa ṱaḓulu zwi ḓo vha zwithu zwa ndeme kha thabelo yaṋu ya muthu nga eṱhe. Musi Bivhili i tshi amba nga ha u ‘fulufhedziswa u vhingwa’ nga Mukwasha wa ṱaḓulu ane a vha Yesu Kristo, zwenezwo ni zwi livhisa kha inwi nahone ni lavhelela u vha tshipiḓa tsha u vha “muselwa” wa Kristo. (2 Vhakor. 11:2; Yoh. 3:27-29; Nzumb. 21:2, 9-14) Musi Mudzimu a tshi amba Ipfini ḽawe uri u funa vhana vhawe vha muya, ni aravha nga uri: “Hu khou ambiwa nṋe.” Nahone musi Ipfi ḽa Yehova ḽi tshi ṋea ndaela vhana vhawe vha vhaḓodzwa, muya mukhethwa u ni sudzulusela u thetshelesa nahone na amba mbiluni yaṋu na ri: “Zwenezwo zwi shuma kha nṋe.” Muya waṋu na wa Mudzimu u ṱanziela uri ni na fulufhelo ḽa u tshila ṱaḓulu.

18. Vha “dziṅwe nngu” vha na fulufhelo ḽifhio, nahone ni ḓipfa hani nga zwenezwo?

18 Kha ḽiṅwe sia, arali ni tshipiḓa tsha “gogo ḽihulu” ḽa vha “dziṅwe nngu,” Mudzimu o ni ṋea fulufhelo ḽa u tshila kha ḽifhasi. (Nzumb. 7:9; Yoh. 10:16) Ni ṱoḓa u tshila tshoṱhe Paradisoni, nahone ni wana dakalo nga u elekanya nga ha zwine Bivhili ya zwi amba nga ha vhutshilo ha kha ḽifhasi ha tshifhingani tshi ḓaho. No lavhelela nga maṱo matswuku u ḓiphina nga muḓalo wa mulalo na muṱa waṋu na vhaṅwe vho lugaho. Ni ṱulutshela u vhona tshifhinga tshine u ṱahela ha zwiḽiwa, vhushai, tshengelo, malwadze na lufu zwa ḓo vha zwi si tsheeho kha vhathu. (Ps. 37:10, 11, 29; 67:6; 72:7, 16; Yes. 33:24) Ni ṱulutshela u ṱanganedza vho vuswaho vhafuni vhe na tshilavhelelwa tsha u tshila tshoṱhe kha ḽifhasi. (Yoh. 5:28, 29) Ni livhuha lungafhani uri Yehova o ni fhaṱutshedza nga fulufhelo ḽa u tshila kha ḽifhasi! Naho ni sa ḽi zwiga, fhedzi u ya haṋu Tshihumbudzoni zwi sumbedza uri ni dzhiela nṱha tshiṱhavhelo tsha tshirengululi tsha Yesu Kristo.

NAA NI ḒO VHA HONE?

19, 20. (a) Fulufhelo ḽaṋu ḽe na ṋewa nga Mudzimu ḽi nga vha hani ḽa vhukuma? (b) Ndi ngani ni tshi ḓo ya Tshilaleloni tsha Murena?

19 Hu sa londwi uri ni na fulufhelo ḽa u tshila kha ḽifhasi kana ṱaḓulu, fulufhelo ḽaṋu ḽi ḓo vha ḽa vhukuma arali ni tshi sumbedza u vha na lutendo kha Yehova Mudzimu, Yesu Kristo na tshirengululi. Nga u ya Tshihumbudzoni, ni ḓo vha na tshibuli tsha u elekanya nga ha fulufhelo ḽaṋu na nga ha ndeme ya lufu lwa Yesu. Nga zwenezwo, itani uri zwi vhe tshipikwa tshaṋu u vha tshipiḓa tsha vha dzimilioni vhane vha ḓo ya Tshilaleloni tsha Murena nga madekwana a ḽa 3 April, 2015 nga Ḽavhuṱanu, Holoni dza Muvhuso na huṅwe fhethu shangoni ḽoṱhe.

20 U ya Tshihumbudzoni zwi ḓo ita uri ni livhuhe zwi tshi bva mbiluni tshiṱhavhelo tsha tshirengululi tsha Yesu. U thetshelesa nga vhuronwane nyambo zwi ḓo sumbedza uri ni funa vhahaṋu nga u vhudza vhaṅwe nga ha zwe na zwi guda nga ha lufuno lwa Yehova na ndivho yawe khulwane nga ha vhathu. (Mat. 22:34-40) Itani zwoṱhe zwine na nga kona uri ni vhe hone Tshilaleloni tsha Murena.

^ par. 1 Ḓuvha ḽa Vhaheberu ḽi thoma nga madekwana ḽa fhela nga madekwana a ḓuvha ḽi tevhelaho.

^ par. 9 Sedzani Appendix (Ṱhumetshedzo) B12 kha New World Translation.