Pfukelani kha mafhungo

Pfukelani kha zwi re ngomu

Mbudziso Dzi Bvaho Ha Vhavhali

Mbudziso Dzi Bvaho Ha Vhavhali

Naa zwe zwa vhonwa nga Davida kha Psalme ya 37:25 na zwe Yesu a zwi amba kha Mateo 6:33 zwi amba uri Yehova a nga si vhuye a tendela Mukriste a tshi shaya zwiḽiwa zwo eḓanaho?

Davida o ṅwala a ri “a thi athu u vhona muvhuya ó laṱiwa, a tho ngo vhona vhana vhawe vhó tshinyala.” Nga zwenezwo, o amba eneo mafhungo u ya nga zwe a zwi tshenzhela. O vha a tshi zwi ḓivha uri Mudzimu u a ṱhogomela tshifhinga tshoṱhe. (Ps. 37:25) Naho zwo ralo, maipfi a Davida ha ambi uri a hu na mugwadameli a sa athu vhuya a shaya kana ane anga si vhuye a shaya.

Ho vha na zwifhinga zwe Davida a sedzana na zwiimo zwi konḓaho. Tshiṅwe tshazwo tsho vha musi a tshi khou shavha Saulo. Davida o vha e si na zwiḽiwa zwo eḓanaho, a humbela zwinkwa uri a kone u ḽa na vhe a vha e navho. (1 Sam. 21:1-6) Nga tshenetsho tshifhinga Davida o humbela tshinkwa. Naho zwo ralo, kha honovho vhuimo vhu konḓaho, o vha a tshi zwi ḓivha uri Yehova ho ngo mu laṱa. Zwi re zwone ndi uri a hu na he ra vhuya ra vhala uri Davida o vha muhumbeli wa zwiḽiwa uri a kone u tshila.

Kha Mateo 6:33, ri wana khwaṱhisedzo ya Yesu ya uri Mudzimu u ḓo ṱhogomela zwishaiwa zwoṱhe zwa vhashumeli vhawe vha ṱoḓaho Muvhuso u thoma. Yesu o ri: “Dzulani ni tshi ṱoḓa Muvhuso wa Mudzimu na u luga hawe u thoma zwiṅwe zwithu zwoṱhe [u katela zwiḽiwa, zwinwiwa, na zwiambaro] ni ḓo engedzwa ngazwo.” Naho zwo ralo, Yesu o dovha a sumbedza uri nga ṅwambo wa u tovholwa, ‘vhahawe’ vha ḓo farwa nga nḓala. (Mat. 25:35, 37, 40) Zwenezwo zwo itea kha muapostola Paulo. Nga zwiṅwe zwifhinga o farwa nga nḓala na ḓora.—2 Vhakor. 11:27.

Yehova o ri vhudza uri ri ḓo tovholwa nga nḓila dzo fhamba-fhambanaho. A nga tendela ri tshi shaya uri ri kone u thusa kha u fhindula Diabolo we a mu pomoka. (Yobo 2:3-5) Sa tsumbo, vhaṅwe Vhakriste nga riṋe, vha fanaho na vhe vha i swa gambani dza tshengedzo dza Vhanazi, vho ḓiwana vhe khomboni nga ṅwambo wa u tovholwa. U dzima Dziṱhanzi zwiḽiwa ho vha tshiṅwe tsha zwishumiswa zwa Diabolo zwa u ita uri dzi si tsha fulufhedzea. Ṱhanzi dzi fulufhedzeaho dzo dzula dzi tshi thetshelesa Yehova; na ene a si dzi laṱe. O tenda dzi tshi lingwa nga yeneyi nḓila, samusi a tshi tendela Vhakriste vhoṱhe vha tshi sedzana na milingo yo fhamba-fhambanaho. Naho zwo ralo, a zwi timatimisi uri Yehova u tikedza vhoṱhe vha shengelaho a tshi itela dzina ḽawe. (1 Vhakor. 10:13) Ri nga dzula ri tshi humbula maipfi a Vhafilipi 1:29 ane a ri: “Ngauri a no ngo ṋewa ndugelo ya u vha na lutendo kha Kristo fhedzi, fhedzi no ṋewa na ndugelo ya u tambulela ene.”

Yehova u fulufhedzisa u dzula e na vhashumeli vhawe. Sa tsumbo, Yesaya 54:17, i ri: “Mafumo oṱhe a fúlelwaho u lwa na iwe ha nga koni tshithu.” Mafulufhedziso enea na maṅwe a nga ho enea a ri fulufhedzisa uri Mudzimu u ḓo tsireledza vhathu vhawe sa tshigwada. Naho zwo ralo, Mukriste muṅwe na muṅwe a nga sedzana na milingo, ine ya nga ita uri a fe.