Pfukelani kha mafhungo

Pfukelani kha zwi re ngomu

Lufu Swina Ḽa U Fhedza, Lu Ḓo Fheliswa

Lufu Swina Ḽa U Fhedza, Lu Ḓo Fheliswa

“Lufu ndi swina ḽa u fhedza ḽine a ḓo ḽi fhelisa.”—1 VHAKOR. 15:26.

1, 2. Mathomoni, Adamu na Eva vho vha vha tshi tshila nga fhasi ha vhuimo vhufhio, nahone hu takuwa mbudziso dzifhio?

MUSI Adamu na Eva vha tshi sikwa, vho vha vhe si na swina na ḽithihi. Vho vha vhe vhathu vho fhelelaho vhane vha tshila paradisoni. Vho ḓiphina nga vhushaka ha tsini na Musiki wavho sa murwa na ṅwananyana wawe. (Gen. 2:7-9; Luka 3:38) Zwilavhelelwa zwavho vhutshiloni zwo vha zwo ḓisendeka kha mushumo we Mudzimu a vha ṋea wone. (Vhalani Genesi 1:28.) U ‘ḓadza shango, na u ḽi kunda’ zwo vha zwi tshi ḓo ḓadzea nga u ya ha tshifhinga. U itela uri Adamu na Eva vha bvele phanḓa vha tshi ‘vhusa zwithu zwoṱhe zwi tshilaho kha ḽifhasi,’ vho vha vha tshi fanela u tshila tshoṱhe, zwo vha zwi sa vhuyi zwa ṱoḓea uri Adamu a xelelwe nga vhuṱoho hawe nga u fa.

2 Nga zwenezwo-ha, ndi ngani vhuimo ho shanduka nga u rali zwino? Zwo ḓa hani uri hu vhe na maswina manzhi nga u rali ane a ita uri vhathu vha si takale, nahone swina ḽihulwane vhukuma kha eneo hu lufu? Ndi mini zwine Mudzimu a ḓo zwi ita u itela u fhelisa eneo maswina? Phindulo dza dzenedzi mbudziso na  dzine dza tshimbidzana nadzo dzi wanala Bivhilini. Kha ri ṱolisise zwiṅwe zwithu zwa ndeme zwa zwenezwo.

TSEVHO YA LUFUNO

3, 4. (a) Ndi ndaela ifhio ye Mudzimu a i ṋea Adamu na Eva? (b) Zwo vha zwi zwa ndeme lungafhani u thetshelesa yeneyo ndaela?

3 Naho Adamu na Eva vho vha vhe na tshilavhelelwa tsha u tshila tshoṱhe, ho vha hu na zwe vha vha vha tshi fanela u zwi ita uri vha si fe. Vho vha vha tshi fanela u fema, u nwa, u eḓela na u ḽa. Zwa ndeme vhukuma ndi uri vhutshilo havho ho vha ho ḓitika nga vhushaka havho na Muṋei wavho wa Vhutshilo. (Doit. 8:3) U ṱanganedza vhulivhisi ha Mudzimu zwo vha zwi zwa ndeme u itela uri vha bvele phanḓa vha tshi ḓiphina nga vhutshilo lini na lini. Yehova o zwi vhea zwa vha khagala kha Adamu, Eva a sa athu sikwa. Nga nḓila-ḓe? “Yehova Mudzimu a laya muthu a ri: Miri yoṱhe ya tsimu i ḽe zwau, Hone uḽa muri wa u ṱalukanya vhuḓi na vhuvhi U sóngo u ḽa; ngauri ḓuvha ḽine wa ḓo ḽa wonoyo, U ḓo vha wa u fa.”—Gen. 2:16, 17.

4 “Muri wa u ṱalukanya vhuḓi na vhuvhi” wo vha u tshi fanyisela uri Mudzimu u na ndugelo ya u khetha uri ndi zwifhio zwo lugaho na zwi songo lugaho. Vhukuma, Adamu o vha a tshi ḓivha zwo lugaho na zwi songo lugaho; o sikwa nga tshifanyiso tsha Mudzimu nahone o vha e na luvalo. Muri wo vha u tshi sumbedza uri Adamu na Eva vha ḓo dzula vha tshi ṱoḓa vhulivhisi ha Yehova. Arali vha ḽa wonoyo muri vho vha vha tshi ḓo vha vha tshi khou ṱoḓa u ḓilanga, zwe zwa vha zwi tshi ḓo ḓisa khombo khulwane khavho na kha vhana vhe vha vha vha tshi ḓo vha beba. Ndaela ya Mudzimu na khaṱulo yayo yo sumbedza vhungoho ha zwenezwo.

NḒILA YE LUFU LWA THOMA NGAYO KHA VHATHU

5. Adamu na Eva vho xedzwa hani uri vha si thetshelese?

5 Musi Eva o no sikwa, Adamu o mu vhudza nga ha ndaela ya Mudzimu. Eva o vha a tshi i ḓivha zwavhuḓi, nahone o kona u dovholola eneo maipfi o tou ralo. (Gen. 3:1-3) O ita zwenezwo kha muṅwe we a shumisa ṋowa a tshi amba nae, ine ya vha tshivhumbiwa tsho thanyaho. We a shumisa ṋowa ho vha hu Sathane Diabolo, murwa wa Mudzimu wa muya we a ṱahulela lutamo lwa u ḓilanga na u vha na maanḓa. (Vhambedzani Yakobo 1:14, 15.) O pomoka Mudzimu mazwifhi a tshi itela u swikelela vhutshinyi hawe. O khwaṱhisedza Eva uri arali a ṱoḓa u ḓilanga, ha nga fi, fhedzi u ḓo nga Mudzimu. (Gen. 3:4, 5) Eva o tenda zwe a amba, a tenda u ḓilanga nga u ḽa muri nahone a kwengweledza Adamu uri na ene a ḽe. (Gen. 3:6, 17) Diabolo o zwifha. (Vhalani 1 Timotheo 2:14.) Naho zwo ralo, Adamu a ‘pfa zwe musadzi wawe a amba.’ Naho ṋowa yo vha i tshi vhonala sa khonani, fhedzi Sathane Diabolo o vha e swina ḽa tshiṱuhu ḽe ḽa vha ḽi tshi ḓivha masiandoitwa a zwe ḽa zwi vhudza Eva.

6, 7. Yehova o haṱula hani vhaitazwivhi?

6 Nga nṱhani ha zwiitisi zwavho, Adamu na Eva vho shandukela we a vha ṋea vhutshilo na zwoṱhe zwe vha vha vhe nazwo. Vhukuma, Yehova o vha a tshi khou vhona zwoṱhe zwe zwa itea. (1 Koron. 28:9; vhalani Mirero 15:3.) O tendela vhenevho vhathu vhararu vha tshi sumbedza nḓila ine vha ḓipfa ngayo nga hae. Vhukuma, sa Khotsi, Yehova o pfa vhuṱungu vhuhulu. (Vhambedzani Genesi 6:6.) Nga zwenezwo, o vha a tshi fanela u vha Muhaṱuli, a tshi tikedza na u ita zwe a zwi amba nga ha masiandoitwa.

7 Mudzimu o vhudza Adamu uri: “Ḓuvha ḽine wa ḓo ḽa [mutshelo wa muri wa u ṱalukanya vhuḓi na vhuvhi] U ḓo vha wa u fa.” Adamu a nga vha o humbula uri ḽeneḽi “ḓuvha” ḽi na awara dza 24. Nga murahu ha u pfuka ndaela ya Mudzimu, o vha o lavhelela uri Yehova u ḓo dzhia vhukando ḽi sa athu kovhela. “Nga madekwana” a ḽeneḽo ḓuvha,  Yehova o amba na vhenevho vhavhingani. (Gen. 3:8) O vha vhudzisa mbudziso zwa tou nga vha tsengoni nahone a thetshelesa zwe Adamu na Eva vha zwi amba. (Gen. 3:9-13) Nga murahu, a kona u haṱula vhenevho vhaitazwivhi. (Gen. 3:14-19) Arali o vha o haṱula Adamu na Eva nga tshenetsho tshifhinga, ndivho yawe nga ha vho na vhana vhavho yo vha i sa ḓo ḓadzea. (Yes. 55:11) Naho o amba uri khaṱulo yavho ndi lufu nahone mvelelo dza tshivhi dzo thoma nga tshenetsho tshifhinga, o tendela Adamu na Eva vha tshi vha na vhana vhe vha vha vha tshi ḓo vhuyelwa nga dziṅwe ndugiselelo dze a vha a tshi ḓo dzi ita. Nga zwenezwo, u ya nga mavhonele a Mudzimu, Adamu na Eva vho fa nga ḽeneḽo ḓuvha ḽe vha ita ngaḽo tshivhi, nahone vho fa hu sa athu fhela “ḓuvha” ḽi re na miṅwaha ya 1 000.—2 Pet. 3:8.

8, 9. Vhana vha Adamu vho kwamiwa hani nga tshivhi tshawe? (Sedzani tshifanyiso tsha u thoma.)

8 Naa vhana vha Adamu na Eva vho vha vha tshi ḓo kwamiwa nga zwe zwa itwa nga vhabebi vhavho? Ee. Vharoma 5:12 i ri: “Tshivhi tsho dzhena shangoni nga muthu muthihi nahone tshivhi tsha ḓisa lufu, lufu lwa ṱanganya vhathu vhoṱhe, ngauri vhoṱhe vho tshinya.” Muthu wa u thoma u fa ho vha hu Abele a fulufhedzeaho. (Gen. 4:8) Nga murahu ha zwenezwo, vhaṅwe vhana vha Adamu vha aluwa nahone vha fa. Naa vho mamela tshivhi u katela na lufu? Muapostola Paulo o amba a ri: “U sa thetshelesa ha muthu muthihi ho ita uri vhanzhi vha vhe vhaitazwivhi.” (Vharoma 5:19) Tshivhi na lufu zwe zwa mamelwa kha Adamu zwo vha maswina a tshiṱuhu a vhathu, ane vhathu vha songo fhelelaho vha si kone u a shavha. Ri nga si kone u ṱalusa nga nḓila yo fhelelaho zwoṱhe zwe zwa katelwa kha u fhiriselwa ha ifa ḽi si ḽavhuḓi kha muṱa wa Adamu na kha vhaṅwe vhana vhawe, fhedzi zwenezwo zwithu zwo itea.

9 Ndi ngazwo zwo tea uri Bivhili i ṱaluse tshivhi na lufu zwe ra zwi mamela sa “sila ḽo tsiraho tshakha dzoṱhe, na nguvho ye ya fukedza vha-nnḓa vhoṱhe.” (Yes. 25:7) Ḽeneḽi sila ḽi fukedza muṅwe na muṅwe. Nga zwenezwo, ngoho ndi ya uri ri “fa nga mulandu wa Adamu.” (1 Vhakor. 15:22) Mbudziso ine nga ho ḓoweleaho ya vhudziswa ndi ye ya vhudziswa nga Paulo ine ya ri: “Ndi nnyi ane a ḓo mponyokisa kha wonoyu muvhili une wa ita uri ndi fe?” Naa u hone? *Vharoma 7:24.

TSHIVHI NA LUFU ZWA ADAMU ZWI ḒO FHELISWA

10. (a) Ndi dzifhio dziṅwe ndimana dza Bivhili dzine dza sumbedza uri Yehova u ḓo fhelisa lufu lwo bveledzwaho nga Adamu? (b) Dzenedzo ndimana dzi dzumbulula mini nga ha Yehova na Murwa wawe?

10 Vhukuma Yehova o vha a tshi ḓo vha o vhofholola Paulo. Nga murahu ha u amba nga ha “sila” Yesaya o ṅwala u ri: “Lufu u ḓo lu lozwa tshoṱhe; Muṋe wa vhoṱhe Yehova u ḓo fhuluṱa maṱodzi kha zwoṱhe zwifhaṱuwo.” (Yes. 25:8) Sa khotsi ane a bvisa tshithu tshine tsha ita uri vhana vhawe vha pfe vhuṱungu nahone a vha phumula miṱodzi, Yehova u takalela u fhelisa lufu lwo bveledzwaho nga Adamu! U na mushumisani kha zwenezwi. Bugu ya 1 Vhakorinta 15:22 i ri: “Samusi roṱhe ri tshi fa nga mulandu wa Adamu, roṱhe ri ḓo vuswa nga nṱhani ha Kristo.” Nga hu fanaho, musi Paulo o no vhudzisa uri: “Ndi nnyi ane a ḓo mponyokisa?” o bvela phanḓa a ri: “Ndi livhuha Mudzimu nge a shumisa Yesu Kristo Murena washu!” (Vharoma 7:25) Lufuno lwe lwa sudzulusela Yehova uri a sike vhathu a lwo ngo fhela musi Adamu na Eva vha  tshi vha mashandukwa. Nahone we a shela mulenzhe na Yehova kha mushumo wa u ita uri vhavhingani vha u thoma vha vhe hone, ho ngo litsha u funa vhana vhavho. (Mir. 8:30, 31) Fhedzi honoho u ponyokiswa ho vha hu tshi ḓo khunyeledzwa hani?

11. Ndi ndugiselelo ifhio ye Yehova a i ita u itela u thusa vhathu?

11 U sa fhelela ha vhathu na lufu zwi katela tshivhi tshe tsha itwa nga Adamu na khaṱulokwayo ya Yehova yo lugaho. (Vharoma 5:12, 16) Ri a vhala: “Tshivhi tsha muthu muthihi tsho ita uri vhathu vha mifuda yoṱhe vha laṱwe.” (Vharoma 5:18) Yehova o vha a tshi ḓo ita mini u itela u haṱula vhathu a sa khou tshinya zwilinganyo zwawe? Ri wana phindulo kha maipfi a Yesu ane a ri: “Murwa-muthu . . . o ṋekedza vhutshilo hawe uri vhu vhe tshirengululi a tshi itela vhanzhi.” (Mat. 20:28) We a vha e murwa wa Yehova wa tanzhe o zwi vhea khagala uri samusi o bebwa kha ḽifhasi sa muthu o fhelelaho, u ḓo ḓiṋekedza sa “tshirengululi.” Tshenetshi tshirengululi tshi ḓo ita hani uri hu vhe na khaṱulokwayo?—1 Tim. 2:5, 6.

12. Ndi tshirengululi tshifhio tshi fanaho tshe tsha ita uri hu vhe na khaṱulokwayo?

12 Samusi Yesu e munna o fhelelaho, o vha e na zwilavhelelwa zwi fanaho na zwa Adamu, a sa athu ita tshivhi. Ndivho ya Yehova yo vha i ya uri ḽifhasi ḽi ḓale nga vhana vha Adamu vho fhelelaho. Nga zwenezwo, nga nṱhani ha uri o vha a tshi funa Khotsi awe na vhaḓuhulu vha Adamu, Yesu o ṋekedza vhutshilo hawe kha ḽifhasi sa tshiṱhavhelo. Vhukuma, Yesu o ṋekedza vhutshilo ho fhelelaho vhu fanaho na he Adamu a vhu xedza. Nga murahu ha zwenezwo, Yehova a vusela Murwa wawe vhutshiloni ha lwa muya. (1 Pet. 3:18) Yehova o vha a tshi nga ṱanganedza tshiṱhavhelo tsha onoyo munna o fhelelaho ane a vha Yesu, sa tshirengululi u itela u rengulula muṱa wa Adamu na u u ṋea zwilavhelelwa zwa vhutshilo zwe Adamu a zwi xedza. Nga maṅwe maipfi Yesu o dzhia vhuimo ha Adamu. Paulo o ri: “Ho itwa na u ṅwalwa u pfi: ‘Adamu muthu wa u thoma o vha muthu a tshilaho.’ Adamu wa u fhedza o vha muthu a ṋeaho vhutshilo.”—1 Vhakor. 15:45.

Abele, muthu wa u thoma u fa, u ḓo vhuyelwa nga tshirengululi tsha Yesu (Sedzani phara 13)

13. “Adamu wa u fhedza” u ḓo thusa hani vhafu?

13 Hu ḓo swika tshifhinga tshine “Adamu wa u fhedza” a ḓo ‘ṋea vhutshilo’ a tshi itela vhathu vhoṱhe nga u tou angaredza. Vhunzhi ha vhana vha Adamu vha ḓo vuswa. Ndi ngani? Ngauri vho no vhuya vha tshila nahone vha fa. Vha ḓo ṱoḓa u vuswa, vha tshila kha ḽifhasi.—Yoh. 5:28, 29.

14. Ndi ndugiselelo ifhio ya Yehova ine ya ḓo thusa u fhelisa u sa fhelela he Adamu a hu fhirisela kha vhana vhawe?

14 Vhathu vha ḓo vhofhololwa hani kha u lwisana havho na u sa fhelela he vha hu mamela? Yehova o vhea Muvhuso wawe wa ṱaḓulu wo vhumbwaho nga “Adamu wa u fhedza” na vhane a ḓo vhusa navho vho khethwaho kha vhathu. (Vhalani Nzumbululo 5:9, 10.) Vhane vha ḓo vhusa na Yesu ngei ṱaḓulu vha ḓo vha vho tshenzhela zwine u sa fhelela zwa amba zwone. Lwa miṅwaha ya tshigidi, vhuvhusi havho vhu ḓo tikedza vhathu vhane vha vha kha ḽifhasi, na u vha thusa uri vha kunde u sa fhelela hune vha kundelwa u hu kunda nga vhone vhaṋe.—Nzumb. 20:6.

15, 16. (a) Bivhili i amba mini musi i tshi ri ‘lufu ndi swina ḽa u fhedza’ nahone ḽi ḓo fheliswa lini? (b) U ya nga 1 Vhakorinta 15:28, ndi mini zwine Yesu a ḓo zwi ita?

15 Mafheloni a vhuvhusi ha Muvhuso ha miṅwaha ya tshigidi, vhathu vha thetshelesaho vha ḓo vhofhololwa kha maswina oṱhe e a ḓiswa nga u sa thetshelesa ha Adamu. Bivhili i ri: “Samusi roṱhe ri tshi fa nga mulandu wa Adamu, roṱhe ri ḓo vuswa nga nṱhani ha Kristo. Fhedzi muṅwe na muṅwe u na vhuimo hawe: Kristo ndi tshiranzhe, ha tevhela vhane vha vha vha Kristo [vhavhusi nae] tshifhingani tsha u vha hone hawe. Ngauralo, mafheleloni u ḓo humisela muvhuso  ha Mudzimu, ane a vha Khotsi awe. Zwenezwi zwi ḓo itea musi o no fhelisa mivhuso yoṱhe na vhavhusi. Ngauri u fanela u vhusa sa khosi u swika Mudzimu a tshi vhea maswina fhasi ha milenzhe yawe. Lufu ndi swina ḽa u fhedza ḽine a ḓo ḽi fhelisa.” (1 Vhakor. 15:22-26) Ee, lufu lwe lwa mamelwa kha Adamu lu ḓo fheliswa. “Sila” ḽe ḽa fukedza vhathu vhoṱhe ḽi ḓo vha ḽo bviswa lwa tshoṱhe.—Yes. 25:7, 8.

16 Muapostola Paulo o khunyeledza maipfi awe o hevhedzwaho nga u ri: “Musi zwithu zwoṱhe zwo no vhewa nga fhasi ha milenzhe yawe, Murwa u ḓo dovha a ḓivhea nga fhasi ha we a vhea zwithu zwoṱhe nga fhasi hawe, uri Mudzimu a vhe zwithu zwoṱhe kha vhoṱhe.” (1 Vhakor. 15:28) Ndivho ya vhuvhusi ha Murwa i ḓo vha yo no ḓadzea. Nga murahu, o fushea vhukuma, u ḓo humisela muvhuso kha Yehova nahone a mu kumedzela vhathu vho fhelelaho.

17. Sathane u ḓo itwa mini mafheleloni?

17 Hu pfi mini nga Sathane, we a thoma maṱhupho oṱhe ane vhathu vha sedzana nao? Nzumbululo 20:7-15 i a fhindula. Musi a tshi linga lwa u fhedza vhathu vhoṱhe vho fhelelaho, Sathane u ḓo tendelwa uri a lingedze u vha khelusa. Diabolo na vhane vha mu tevhela vha ḓo fheliswa lwa tshoṱhe kha “lufu lwa vhuvhili.” (Nzumb. 21:8) Holu lufu lu nga si vhuye lwa fheliswa ngauri vhane vha fa lwa vhuvhili a vha tsha ḓo dovha vha tshila. Naho zwo ralo, “lufu lwa vhuvhili” a si swina ḽa vhathu vhane vha funa Musiki wavho na u mu shumela.

18. Ndaela ye Mudzimu a i ṋea Adamu i ḓo ḓadzea hani?

18 Vhathu vho fhelelaho vha ḓo ima phanḓa ha Yehova vho fanelea nga vhuḓalo uri vha ṋewe vhutshilo vhu sa fheli, vha si tsheena maswina. Mushumo we wa ṋewa Adamu u ḓo vha wo no khunyeledzwa e siho. Ḽifhasi ḽi ḓo ḓala nga vhana vhawe, vhane vha ḓo takalela u ḽi ṱhogomela na u ḓiphina nga vhunzhi ha zwithu zwaḽo zwi tshilaho. U nga ri ri nga bvela phanḓa ri tshi dzhiela nṱha nḓila ya Yehova ya lufuno ya u fhelisa swina, ḽine ḽa vha lufu!

^ par. 9 Musi Insight on the Scriptures i tshi amba nga ha vhuḓidini ha vhorasaintsi ha u ṱalusa tshiitisi tsha vhulala na lufu, i ri: “Vha nyadza mbuno ya uri Musiki nga dzawe ndi ene we a haṱulela vhathu vha u thoma lufu, yeneyo khaṱulo o i ita ya shuma nga nḓila ine muthu a si i pfesese nga vhuḓalo.”—Vol. 2, siaṱ. 247.