Pfukelani kha mafhungo

Pfukelani kha zwi re ngomu

Vhathu Vha Yehova “Vha Fanela U Furalela Zwi Songo Lugaho”

Vhathu Vha Yehova “Vha Fanela U Furalela Zwi Songo Lugaho”

“Vhoṱhe vhane vha vhidzelela dzina ḽa Yehova vha fanela u furalela zwi songo lugaho.”—2 TIM. 2:19.

1. Ndi mini zwo khetheaho kha vhurabeli hashu?

NAA no no vhuya na vhona dzina Yehova ḽo ṅwalwa kha zwifhaṱo zwa vhomuthumunzhi kana kha tshiṅwe tshithu muziamu? A zwi timatimisi uri zwenezwo zwo ni takadza. Hafhu dzina ḽa Mudzimu ḽo khethea kha vhurabeli hashu—ri Ṱhanzi dza Yehova! Shangoni ḽoṱhe, a hu na tshigwada tsha vhathu tshine tsha shumisa dzina ḽa Mudzimu u fana na riṋe. Naho zwo ralo, ri a zwi ḓivha uri ndugelo ya u vhidzwa nga dzina ḽa Mudzimu i ḓa na vhuḓifhinduleli.

2. Ndugelo yashu ya u vhidzwa nga dzina ḽa Mudzimu i ḓa na vhuḓifhinduleli vhufhio?

2 U sokou shumisa Yehova, ḽine ḽa vha dzina ḽa Mudzimu a zwi iti uri a ri takalele. Ri fanela u tshila u tendelana na zwilinganyo zwawe. Ndi ngazwo Bivhili i tshi ri humbudza uri vhathu vha Yehova vha fanela u “hana vhuvhi.” (Ps. 34:14) Muapostola Paulo o bula nga hu pfalaho enea maitele musi a tshi ṅwala uri: “Vhoṱhe vhane vha vhidzelela dzina ḽa Yehova vha fanela u furalela zwi songo lugaho.” (Vhalani 2 Timotheo 2:19.) Samusi ri Ṱhanzi dzawe, ri ḓivhelwa u vhidzelela dzina Yehova. Fhedzi ri fanela u furalela hani zwi songo lugaho?

 ‘SENDELANI KULE’ NA VHUVHI

3, 4. Ndi lufhio luṅwalo lwe vhagudi vha Bivhili vha konḓelwa u lu pfesesa lwa tshifhinga tshilapfu, nahone ndi ngani?

3 Ṱhogomelani vhubvo ha maipfi a Paulo a wanalaho kha Luṅwalo lwa 2 Timotheo 2:19. Heyi ndimana i ambela kha “mutheo wa Mudzimu wo khwaṱhaho” nahone i bula zwithu zwivhili zwo ṅwalwaho kha wonoyo mutheo. Tsha u thoma, maipfi ane a ri “Yehova u a ḓivha vha re vhawe,” zwi vhonala uri o redzwa kha Numeri 16:5. (Sedzani thero yo fhiraho.) Tsha vhuvhili, maipfi ane a ri “Vhoṱhe vhane vha vhidzelela dzina ḽa Yehova vha fanela u furalela zwi songo lugaho,” vhagudi vha Bivhili vho konḓelwa u a pfesesa lwa tshifhinga tshilapfu. Ndi ngani?

4 Maipfi a Paulo a sumbedza uri o vha a tshi khou redza huṅwe fhethu. Fhedzi zwi vhonala u nga a hu na ndimana ine ya tshimbidzana na zwe Paulo a zwi redza kha Maṅwalo a Luheberu. Nga zwenezwo, onoyo muapostola o vha a tshi khou ambela kha mini musi a tshi ri: “Vhoṱhe vhane vha vhidzelela dzina ḽa Yehova vha fanela u furalela zwi songo lugaho.” Musi Paulo a tshi kha ḓi tou bva u amba enea maipfi, o redza Numeri ndima ya 16, ine ya amba nga ha vhushandukwa ha Kora. Naa zwe a zwi amba lwa vhuvhili zwi nga vha zwo vha zwi tshi tshimbidzana na zwiitea zwa honoho vhushandukwa?

5-7. Ndi zwiitea zwifhio zwa misini ya Mushe zwine zwa ita uri ri pfesese vhubvo ha maipfi a Paulo o ṅwalwaho kha 2 Timotheo 2:19? (Sedzani tshifanyiso tsha u thoma.)

5 Bivhili i amba uri Dathani na Abiramu vharwa vha Eliaba vho ṱanganela na Kora vha vha vharangaphanḓa kha vhushandukwa he ha itelwa Mushe na Aroni. (Num. 16:1-5) Vho nyadza tshoṱhe Mushe nahone vha landula maanḓa e a ṋewa nga Mudzimu. Eneo mashandukwa o ḓi bvela phanḓa a tshi dzula na vhathu vha Yehova, a vhea khomboni vhumuya ha vhathu vha fulufhedzeaho. Yehova o ṋea ndaela i pfalaho musi ḓuvha ḽawe ḽi tshi swika ḽa u fhambanya vhagwadameli vhawe vha fulufhedzeaho na mashandukwa.

6 Lwonolwo luṅwalo lu ri: “Yehova a mbo amba na Mushe a ri: Vhudza tshivhidzo uri vha sendele kule na mishasha ya Kora na Dathani na Abiramu. Mushe a takuwa a ya ha Dathani na ha Abiramu a tevhelwa nga vhahulwane vha Vha-Isiraele. A amba na tshivhidzo a ri: Tsiruwani afho tsini ha dzithumba dza vhanna vhavhi avho; ni songo fara thundu yavho, uri ni sa ḓo lovha navho’ nga mulandu wa zwivhi zwavho. Vhathu vha ṱuwa afho tsini ha dzithumba dza Kora na Dathani na Abiramu.” (Num. 16:23-27) Nga zwenezwo, Yehova a vhulaha vhoṱhe vhe vha vha vhe mashandukwa. Kha ḽiṅwe sia, vhagwadameli vha fulufhedzeaho—vhe vha furalela zwi songo lugaho—vha tshidzwa.

7 Yehova u vhona zwi re mbiluni! U vhona vha fulufhedzeaho vhane vha vha vhawe. Naho zwo ralo, vhathu vhawe vha fulufhedzeaho vho vha vha tshi fanela u dzhia vhukando ha u ḓifhambanya na vha songo lugaho. Nga zwenezwo-ha, khamusi Paulo o vha a tshi khou ambela kha mafhungo a re kha Numeri 16:5, 23-27 musi a tshi ṅwala uri: “Vhoṱhe vhane vha vhidzelela dzina ḽa Yehova vha fanela u furalela zwi songo lugaho.” Yeneyo phetho i tshimbidzana na maipfi a Paulo ane a ri: “Yehova u a ḓivha vha re vhawe.”—2 Tim. 2:19.

“U ILEDZE KHANI DZA VHUTSILU NA U SHAYA NḒIVHO”

8. Ndi ngani u shumisa dzina Yehova kana u vha muraḓo wa tshivhidzo tsha Vhukriste zwi songo eḓana?

8 Musi Paulo a tshi amba nga ha zwiitea zwa misini ya Mushe, o vha a tshi khou humbudza Timotheo nga ha ṱhoḓea ya u dzhia vhukando u itela u tsireledza vhushaka hawe ha ndeme na Yehova. U sokou vha muraḓo wa tshivhidzo tsha Vhukriste zwo vha zwi songo eḓana, vhunga u sokou vhidzelela dzina ḽa Yehova zwo vha zwi songo eḓana misini ya Mushe. Vhagwadameli vha fulufhedzeaho vha fanela u dzhia vhukando u itela u furalela  zwi songo lugaho. Zwenezwi zwo vha zwi tshi amba mini kha Timotheo? Vhathu vha Yehova vha nga guda mini ṋamusi kha nyeletshedzo ya Paulo yo hevhedzwaho?

9. “Khani dza vhutsilu na u shaya nḓivho” zwo kwama hani tshivhidzo tsha Vhakriste vha u thoma?

9 Ipfi ḽa Mudzimu ḽi ri ṋea nyeletshedzo yo livhaho malugana na mifuda ya u sa luga ine Vhakriste vha fanela u i furalela kana u i landula. Sa tsumbo, kha vhubvo ha mafhungo a 2 Timotheo 2:19, ri wana uri Paulo u vhudza Timotheo uri a “songo lwa nga maipfi” nahone a “iledze zwiambo zwi si na mushumo.” (Vhalani 2 Timotheo 2:14, 16, 23.) Miṅwe miraḓo ya tshivhidzo yo vha i tshi khou ṱuṱuwedza pfunzo dza vhagunei. Zwiṅwe hafhu, zwi vhonala u nga vhaṅwe vho vha vha tshi khou phaḓaladza pfunzo dzine dza ita uri hu vhe na u pikisana. Naho zwenezwo zwo vha zwi sa bvi maṅwaloni nga ho livhaho, zwo vha zwi tshi ita uri hu vhe na u sa anḓana. Yo ita uri hu vhe na u ṱaṱisana na u pikisana nga maipfi, zwa ita uri vhumuya havho vhu vhe khomboni. Ndi ngazwo Paulo o ombedzela ndeme ya u “iledz[a] khani dza vhutsilu na u shaya nḓivho.”

10. Ri fanela u aravha hani musi ro sedzana na vhagunei?

10 Ṋamusi, a zwo ngo ḓowelea uri vhathu vha Yehova vha ṱanganele na vhagunei tshivhidzoni. Naho zwo ralo, musi ro sedzana na pfunzo dzi siho maṅwaloni, hu sa londwi uri dzi bva ngafhi, ri fanela u dzi landula tshoṱhe. Zwi ḓo vha zwi vhutsilu u ṱaṱa khani na vhagunei, hu sa londwi u tou ambedzana navho, u fhindula milaedza yavho kha Inthanethe kana nga iṅwe nḓila ya u davhidzana. Naho ndivho hu u ṱoḓa u thusa onoyo muthu, nyambedzano yeneyo i lwisana na vhulivhisi vhu bvaho Maṅwaloni vhune ra kha ḓi tou bva u vhu ṱolisisa. Nṱhani hazwo, sa vhathu vha Yehova, ri iledza tshoṱhe u ḓiṱanganya na vhagunei.

Iledzani u ṱaṱa khani na vhagunei (Sedzani phara 10)

11. Ndi mini zwine zwa nga ita uri hu vhe na “khani dza vhutsilu,” nahone vhahulwane vha Vhakriste vha nga vhea hani tsumbo yavhuḓi?

11 Hu na zwiṅwe zwithu nga nnḓa ha vhagunei, zwine zwa nga ita uri hu si vhe na mulalo tshivhidzoni. Sa tsumbo, mavhonele o fhamba-fhambanaho malugana na vhuḓimvumvusi a nga vusa “khani dza vhutsilu na u shaya nḓivho.” Vhukuma, musi vhathu vha tshi ṱuṱuwedza vhuḓimvumvusi vhune ha lwisana na zwilinganyo zwa Yehova zwa matshilele, vhahulwane vha Vhakriste a vho ngo fanela u tendela vhuḓifari ho raloho u itela u iledza dziphambano. (Ps. 11:5; Vhaef. 5:3-5) Zwiṅwe hafhu, vhahulwane vha tea u vha na vhulondi uri vha si ṱuṱuwedze mavhonele avho. Vha thetshelesa ṱhuṱhuwedzo i re Maṅwaloni ye ya ṋewa vhalavhelesi vha Vhakriste: “Lisani sambi ḽa Mudzimu ḽine na ḽi ṱhogomela, . . . ni songo nga ni khou vhusa vhane vha vha ifa ḽa Mudzimu, fhedzi ni vhe tsumbo kha sambi.”—1 Pet. 5:2, 3; vhalani 2 Vhakorinta 1:24.

12, 13. (a) Ṱhanzi dza Yehova dzi dzhia hani mafhungo a u khetha vhuḓimvumvusi, nahone ndi afhio maitele a Bivhili ane a shuma? (b) Maitele o haseledzwaho kha phara 12 a shuma hani kha mafhungo o fhamba-fhambanaho a muthu nga eṱhe?

12 Kha mafhungo a vhuḓimvumvusi, ndangulo yashu a i ri vhudzi dzifilimu, mitambo ya vidio, dzibugu kana dzinyimbo dzine ra fanela u dzi iledza. Ndi ngani? Bivhili i ṱuṱuwedza muthu muṅwe na muṅwe uri a gudise ‘maanḓa awe a u ṱalukanya uri a kone u khethekanya zwo lugaho na zwo khakheaho.’ (Vhaheb. 5:14) Maṅwalo a ri sumbedza maitele ane Mukriste a nga a ṱhogomela musi a tshi khetha vhuḓimvumvusi. Kha masia ashu oṱhe a vhutshilo, tshipikwa tshashu tshi fanela u vha tsha u dzula ri tshi “ita vhungoho ha uri ndi zwifhio zwine Murena a zwi ṱanganedza.” (Vhaef. 5:10) Bivhili i ri funza uri ṱhoho dza miṱa dzo hweswa vhuḓifhinduleli, nga zwenezwo, vha nga khetha u sa tendela miṅwe mifuda ya vhuḓimvumvusi miṱani yavho. *1 Vhakor. 11:3; Vhaef. 6:1-4.

13 Maitele a Bivhili o haseledzwaho afho  nṱha ha shumi kha vhuḓimvumvusi vhune ra vhu khetha fhedzi. Mavhonele nga ha maambarele na u ḓilugisa, mutakalo na zwiḽiwa na maṅwe mafhungo a muthu nga eṱhe na zwone zwi nga vusa khakhathi. Nga zwenezwo, arali hu sa khou pfukwa maitele a Maṅwalo, ndi zwa vhuṱali uri vhathu vha Yehova vha iledze u vusa khani nga ha eneo mafhungo, “ngauri mulanda wa Murena ho ngo fanela u lwa, u fanela u vha na vhulenda kha vhoṱhe.”—2 Tim. 2:24.

ILEDZANI VHUKONANI VHU SI HAVHUḒI!

14. Paulo o shumisa tshifanyiso tshifhio u itela u ombedzela ndeme ya u iledza vhukonani vhu si havhuḓi?

14 Vhane “vha vhidzelela dzina ḽa Yehova vha fanela u furalela zwi songo lugaho” nga nḓila-ḓe? Nga u iledza u vha na vhukonani ha tsini na vhathu vha songo lugaho. Tshi swayeaho ndi uri Paulo o tevhela tsumbo yawe ya “mutheo wa Mudzimu wo khwaṱhaho” kha zwiṅwe zwifanyiso zwawe. O ṅwala nga ha ‘nnḓu khulwane’ i si na ‘midzio ya musuku na ya tsimbi-tseṱha fhedzi, fhedzi ine ya dovha ya vha na ya thanda na ya vumba, miṅwe ya ndivho i ṱhonifheaho, fhedzi na miṅwe ya ndivho i sa ṱhonifhei.’ (2 Tim. 2:20, 21) Nga zwenezwo, a ṱuṱuwedza Vhakriste uri vha ‘ḓifhambanye,’ kana vha ḓisendedze kule na midzio ine ya vha na ndivho “i sa ṱhonifhei.”

15, 16. Ndi mini zwine ra zwi guda kha tshifanyiso tsha ‘nnḓu khulwane’?

15 Tshenetshi tshifanyiso tshi amba mini? Tshifanyiso tsha Paulo tshi vhambedza tshivhidzo tsha Vhukriste na ‘nnḓu khulwane,’ nahone muraḓo muṅwe na muṅwe wa tshivhidzo u vhambedzwa na “midzio,” kana zwishumiswa zwa nḓuni. Ngomu nḓuni, miṅwe midzio i nga tshinywa nga zwithu zwi re na khombo kana nga tshika. Ṋemuḓi u ḓo vhea zwenezwo zwishumiswa kule na midzio yo kunaho, zwi ngaho zwine zwa shumiswa u bika.

16 Nga hu fanaho, vhathu vha Yehova ṋamusi, vhane vha lwela u tshila vhutshilo ho kunaho, vha fanela u iledza u ḓikonanya na  vhathu tshivhidzoni vhane vha bvela phanḓa vha tshi nyadza maitele a Yehova. (Vhalani 1 Vhakorinta 15:33.) Arali zwenezwo zwi ngoho kha vhane vha vha ngomu tshivhidzoni, ri tea u iledza tshoṱhe u “konana” na vhathu vha re nnḓa ha tshivhidzo, vhane vhunzhi havho vha vha ‘vhafuni vha tshelede, vha sa thetshelesi vhabebi, vha sa fulufhedzei, vhadzia-zwitshele, vhadzia-khakhathi, vha sa funi zwivhuya, vhafheṱi, vhane vha funa miḓifho u fhira Mudzimu’!—2 Tim. 3:1-5.

YEHOVA U FHAṰUTSHEDZA U DZHIA HASHU VHUKANDO NGA U ṰAVHANYA

17. Vhaisiraele vha fulufhedzeaho vho lwisana hani na zwi songo lugaho?

17 Bivhili i amba nga ho livhaho nga nḓila ye Vhaisiraele vha dzhia ngayo vhukando nga u ṱavhanya musi vha tshi vhudzwa uri “vha sendele kule na mishasha ya Kora na Dathani na Abiramu.” Eneo mafhungo a amba uri ‘nga u ṱavhanya vha sendela kule.’ (Num. 16:24, 27) A vho ngo ima-ima kana u ita zwithu nga vhuya. Ndimana ya lwonolwo luṅwalo i sumbedza uri a vho ngo siedza tshithu musi vha tshi dzhia vhukando. Vho ‘ṱuwa afho tsini nahone vha bva.’ Vhathu vha fulufhedzeaho vho vha vha sa ṱoḓi u ḓidzhenisa khomboni. Vho vha vha tshi thetshelesa zwi tshi bva mbiluni. Vho imela Yehova nahone vha lwisana na zwi songo lugaho. Ndi ngudo dzifhio dzine ra nga dzi guda kha yeneyi tsumbo?

18. Paulo o vha a tshi khou amba mini musi a tshi ṱuṱuwedza Timotheo uri a “shavhe nyemulo dza vhuswa”?

18 Musi zwi tshi ḓa kha u tsireledza vhushaka hashu na Yehova, ri fanela u dzhia vhukando nga u ṱavhanya. Hezwi ndi zwe Paulo a vha a tshi khou amba zwone musi a tshi ṱuṱuwedza Timotheo uri a “shavhe nyemulo dza vhuswa.” (2 Tim. 2:22) Nga tshenetsho tshifhinga, Timotheo o vha o no aluwa, khamusi e miṅwahani ya vhu-30. Naho zwo ralo, na vhathu vhahulwane vha nga vha na “nyemulo dza vhuswa” dza vhutsilu. Musi Timotheo a tshi sedzana na dzenedzo nyemulo, o vha a tshi fanela u dzi ‘shavha.’ Nga maṅwe maipfi, Timotheo o vha a tshi fanela “u furalela zwi songo lugaho.” Yesu o amba zwi fanaho musi a tshi ri: “Arali ḽiṱo ḽau ḽi tshi u khakhisa, u ḽi nongole nahone u ḽi laṱe kule.” (Mat. 18:9) Ṋamusi, Vhakriste vhane vha tevhela yeneyi nyeletshedzo, vha dzhia vhukando nga u ṱavhanya arali vho sedzana na zwithu zwine zwa nga vhea vhumuya havho khomboni.

19. Vhaṅwe vho dzhia hani vhukando nga u ṱavhanya u itela u tsireledza vhumuya havho?

19 Vhaṅwe vhe vha vha vhe na thaidzo ya halwa musi vha sa athu u vha Dziṱhanzi, vho ita phetho ya u ṱutshela tshoṱhe u nwa halwa. Vhaṅwe vha iledza miṅwe mifuda ya vhuḓimvumvusi i songo khakheaho nga nṱhani ha uri i nga vha ṱuṱuwedza u ḓifara luvhi. (Ps. 101:3) Sa tsumbo, musi muṅwe wahashu wa tshinnani a sa athu u vha Ṱhanzi, o vha a tshi anzela u ya minzhangamoni ye ha vha hu tshi tshiniwa. Fhedzi nga murahu ha u guda ngoho, o iledza tshoṱhe u tshina na kha zwimima zwa Dziṱhanzi a tshi ofha uri a nga dzikusa lutamo lu songo kunaho kana mahumbulele a tshifhingani tsho fhiraho. Ndi ngoho uri Vhakriste a vho ngo thivhelwa tshoṱhe u nwa halwa, u tshina kana u ita zwiṅwe zwithu zwi songo khakheaho. Naho zwo ralo, roṱhe ri lavhelelwa u dzhia vhukando nga u ṱavhanya u itela u ḓitsireledza kha zwithu zwine zwa nga vhea vhumuya hashu khomboni.

20. Naho zwi tshi nga kha ḓi konḓa “u furalela zwi songo lugaho,” ndi mini zwine zwa ri ṱuṱuwedza na uri khuthadza?

20 Ndugelo ya u vhidzwa nga dzina ḽa Mudzimu i ḓa na vhuḓifhinduleli. Ri fanela “u furalela zwi songo lugaho” na u “hana vhuvhi.” (Ps. 34:14) Vhukuma, kanzhi a zwo ngo leluwa u ita nga u ralo. Fhedzi zwi a khuthadza vhukuma u ḓivha uri Yehova u ḓo dzula a tshi funa “vha re vhawe” na vhane vha farelela nḓila dzawe dzo lugaho.—2 Tim. 2:19; vhalani 2 Koronika 16:9a.

^ par. 12 Sedzani thero i re kha jw.org ine ya ri: “Naa Hu Na Dzimuvi, Dzibugu kana Nyimbo Dzine Na Dzi Thivhela?” kha tshiṱoho, NGA HA RIṊE > MBUDZISO DZINE DZA ANZELA U VHUDZISWA.