Pfukelani kha mafhungo

Pfukelani kha zwi re ngomu

Thusani Vhaṅwe U Shumisa Vhukoni Havho Nga Vhuḓalo

Thusani Vhaṅwe U Shumisa Vhukoni Havho Nga Vhuḓalo

“Ndi ḓo U dededza nga maṱo anga.”—PS. 32:8.

1, 2. Yehova u dzhia hani vhashumeli vhawe vha kha ḽifhasi?

MUSI vhabebi vha tshi khou ṱalela vhana vhavho vha tshi khou tamba, kanzhi vha mangadzwa nga vhukoni vhune vhana vhavho vhaṱuku vha vha naho. Naa na inwi ni nga vha no no zwi vhona? Muṅwe ṅwana a nga vhonala e na vhukoni ha zwa mitambo, ngeno ṅwana wa hawe a tshi vhonala e na vhutsila ha u ola kana miṅwe mishumo ya zwanḓa. Fhedzi hu sa londwi vhukoni vhune vhana vhavho vha vha naho, vhabebi vha a takala musi vha tshi ṱhogomela vhukoni ha vhana vhavho.

2 Na Yehova u na dzangalelo kha vhana vhawe vha kha ḽifhasi. U dzhia vhashumeli vhawe vha musalauno sa “madzanga a dzoṱhe dzitshakha.” (Hag. 2:7) Ndi vha ndeme zwihuluhulu nga nṱhani ha lutendo lwavho na u ḓiimisela havho. Naho zwo ralo, ni nga vha no no zwi ṱhogomela kha Dziṱhanzi nga riṋe ṋamusi, hu na vhutsila ho fhamba-fhambanaho. Vhaṅwe vhahashu vha tshinnani vha na vhukoni ha u ṋea nyambo ya khagala, ngeno vhaṅwe vhe na vhukoni ha u dzudzanya mafhungo. Vhahashu vha tshisadzini vhanzhi vha na vhukoni ha u guda dziṅwe nyambo u nahone vha dzi shumisa vhuḓinḓani, ngeno vhaṅwe vhe tsumbo dzavhuḓi dza u tikedza vhane vha ṱoḓa ṱhuṱhuwedzo kana u ṱhogomela vha lwalaho. (Vharoma 16:1, 12) Ri livhuha lungafhani u vha tshivhidzoni na vhenevho Vhakriste vhoṱhe!

3. Ndi mbudziso dzifhio dzine ra ḓo dzi ṱolisisa kha ino thero?

 3 Naho zwo ralo, vhaṅwe vhatendi nga riṋe u katela na vhaswa kana vhahashu vhane vha kha ḓi bva u lovhedzwa vha nga vha vha sa athu u vhibva muyani. Ri nga vha thusa hani uri vha shumise vhukoni havho nga vhuḓalo? Ndi ngani ri sa lweli u vhona zwivhuya khavho, ri vha dzhie nga nḓila ine Yehova a vha dzhia ngayo?

YEHOVA U VHONA ZWIVHUYA KHA VHASHUMELI VHAWE

4, 5. Mafhungo a re kha Vhahaṱuli 6:11-16 a sumbedza hani uri Yehova u vhona vhukoni ha vhashumeli vhawe?

4 Mafhungo manzhi a Bivhilini a zwi vhea khagala uri Yehova ha vhoni zwivhuya kha vhashumeli vhawe fhedzi, fhedzi u vhona na vhukoni havho. Sa tsumbo, musi Gideoni a tshi nangwa uri a vhofholole vhathu vha Mudzimu kha Vhamidiani vhe vha vha vha tshi vha tsikeledza, a nga ḓi vha o mangala musi muruṅwa a tshi ri: “Yehova u na iwe, Muhali!” Zwi tou vha khagala uri nga tshenetsho tshifhinga Gideoni o vha a sa ḓipfi sa “muhali.” O tenda uri o vha a tshi timatima na uri ha wa ndeme. Samusi ri tshi ḓo pfa nga ha nyambedzano yavho, vhukuma Yehova o vha e na mavhonele avhuḓi nga ha vhashumeli vhawe, fhedzi Gideoni o vha a sa ḓipfi nga yeneyo nḓila.—Vhalani Vhahaṱuli 6:11-16.

5 Yehova o fulufhela Gideoni uri a vhofholole Vhaisiraele ngauri o vha o no ṱhogomela vhukoni hawe. Sa tsumbo, muruṅwa wa Yehova o ṱhogomela nḓila ye Gideoni a fhula ngayo goroi nga maanḓa awe oṱhe. Huna zwiṅwe zwithu zwe muruṅwa a zwi ṱhogomela khae. Zwifhingani zwa Bivhili, kanzhi vhalimi vho vha vha tshi fhula goroi fhethu ho vuleaho u itela uri muya u vhudzule makanda. Zwi mangadzaho ndi uri Gideoni o vha a tshi khou fhula mavhele tshiphirini u itela uri Vhamidiani vha si zwi vhone. Zwenezwo zwo vha zwi vhuṱali vhukuma! Ndi ngazwo phanḓa ha Yehova, Gideoni o vha e sa tou vha mulimi a re na vhulondi—fhedzi o vha e munna wa vhuṱali. Vhukuma, Yehova o vhona vhukoni hawe nahone a shuma nae.

6, 7. (a) Mavhonele a Yehova nga ha muporofita Amosi o vha o fhambana hani na a vhaṅwe Vhaisiraele? (b) Ndi mini zwine zwa sumbedza uri Amosi o vha e si tsilu?

6 Nga hu fanaho, ri a kona u zwi vhona kha mafhungo a muporofita Amosi uri Yehova o ṱhogomela vhukoni ha mushumeli wawe, ngeno vhaṅwe vho vha vha tshi vhonala u nga ha na vhukoni. Amosi o ḓiṱalusa sa mulisa wa dzinngu na mulimi wa mahuyu a ḓaka—zwithu zwe zwa vha zwi tshi dzhiiwa sa zwiḽiwa zwa vhashai. Musi Yehova a tshi ṋanga Amosi uri a kaidze tshaka dza fumi dza muvhuso wa Isiraele dze dza vha dzi tshi gwadamela midzimu ya zwifanyiso, vhaṅwe Vhaisiraele vha nga vha vho humbula uri u khou ita phetho i si yavhuḓi.—Vhalani Amosi 7:14, 15.

7 Amosi u bva miḓini i re kule na kule, fhedzi nḓivho ye a vha e nayo ya mikhuvha na vhavhusi vha tshifhingani tshawe yo ṋea vhuṱanzi ha uri o vha e si tsilu. O vha a tshi ḓivha zwavhuḓi nga ha vhuimo ha Vhaisiraele nahone a nga vha o vha e na nḓivho nga ha tshaka dzi re tsini ngauri o vha a tshi shumisana na vhaendedzi vha endaho. (Amosi 1:6, 9, 11, 13; 2:8; 6:4-6) Vhaṅwe vhagudi vha Bivhili ṋamusi vha khoḓa Amosi nga nṱhani ha uri o vha e muṅwali makone. Onoyo muporofita ho ngo khetha maipfi o leluwaho na a re na tshileme fhedzi, fhedzi o vha a tshi kona u vhambedza na u shumisa maipfi zwavhuḓi. Vhukuma, musi Amosi a tshi fhindula tshifhe Amatsia nga tshivhindi, zwenezwo zwo khwaṱhisedza uri Yehova o khetha muthu o teaho nahone u ḓo shumisa vhukoni hawe he ha vha hu sa vhonali mathomoni.—Amosi 7:12, 13, 16, 17.

8. (a) Ndi khwaṱhisedzo ifhio ye Yehova a i ṋea Davida? (b) Ndi ngani maipfi a re kha Psalme ya 32:8 a tshi khwaṱhisa vha sa ḓifulufheli kana vha sina vhutsila?

8 Vhukuma, Yehova u ṱhogomela vhukoni  ha mushumeli muṅwe na muṅwe wawe. O khwaṱhisedza Khosi Davida uri u ḓo dzula a tshi mu dededza “nga maṱo” awe. (Vhalani Psalme ya 32:8.) Naa ni a kona u zwi vhona uri ndi ngani zwenezwo zwi tshi ri khuthadza? Naho ri sa ḓifulufheli, Yehova a nga ri thusa uri ri ite zwi fhiraho zwine ra nga kona nahone ri swikelele zwipikwa zwe ra vha ri sa humbuli uri ri nga zwi swikelela. U fana na mugudisi wavhuḓi a tshi nga gudisa mugudiswa a si na tshenzhelo tshifhinga tshoṱhe, Yehova o ḓiimisela u ri gudisa u itela uri ri ite mvelaphanḓa ya lwa muya. Yehova a nga dovha a shumisa vhatendi nga riṋe u itela u ri thusa uri ri shumise vhukoni hashu nga vhuḓalo. Nga nḓila-ḓe?

SEDZANI ZWIVHUYA KHA VHAṄWE

9. Ri nga shumisa hani nyeletshedzo ya Paulo ya u “vha na” dzangalelo kha vhaṅwe?

9 Paulo o ṱuṱuwedza Vhakriste vhoṱhe uri vha vhe na “dzangalelo” kha vhatendi ngavho. (Vhalani Vhafilipi 2:3, 4.) Nyeletshedzo ya Paulo i sumbedza uri ri fanela u ṱhogomela vhukoni ha vhaṅwe nahone ri vha khoḓe. Ri ḓipfa hani musi muṅwe a tshi vha na dzangalelo kha mvelaphanḓa ye ra i ita? Kanzhi zwi ita uri ri ite mvelaphanḓa yo engedzeaho na u ita uri ri ite zwa khwine. Nga hu fanaho, musi ri tshi khoḓa zwine vhatendi nga riṋe vha zwi ita, zwi ḓo vha thusa uri vha ṱuṱuwedzee na u aluwa nga lwa muya.

10. Ndi vhafhio vhane vha ṱoḓa ri tshi vha ṱhogomela nga ho khetheaho?

10 Ndi vhafhio vhane vha ṱoḓa ri tshi vha ṱhogomela nga ho khetheaho? Vhukuma, roṱhe ri a ṱoḓa u ṱhogomelwa nga ho khetheaho tshifhinga tshoṱhe. Zwiṅwe hafhu, vhaswa kana vhahashu vhane vha kha ḓi tou bva u lovhedzwa vha fanela u ḓipfa vhe na tshipiḓa kha mishumo ya tshivhidzo. Zwenezwi zwi ḓo vha thusa uri vha ḓipfe vhe vhaṅwe vhashu. Kha ḽiṅwe sia, ane a kundelwa u dzhiela nṱha mushumo wa vhenevho vhahashu, a nga ita uri vha kulee nungo nahone vha si tsha ṱoḓa u ita vhuḓifhinduleli ho engedzeaho, zwithu zwine Ipfi ḽa Mudzimu ḽa vha ṱuṱuwedza u zwi ita.—1 Tim. 3:1.

11. (a) Muhulwane o thusa hani muṱhannga uri a kunde ṱhoni? (b) Ni guda mini kha tshenzhelo ya Julien?

11 Ludovic ane a vha muhulwane we na ene a khoḓwa musi a tshee muswa, o amba uri: “Musi ndi tshi sumbedza dzangalelo ḽa vhukuma kha wahashu, u ita mvelaphanḓa nga u ṱavhanya.” Musi a tshi amba nga ha Julien, muṱhannga we a vha e na ṱhoni, Ludovic o ri: “Nga zwiṅwe zwifhinga Julien o vha e muthu a si na vhulondi, o vha a tshi ita zwithu nga nḓila i songo ḓoweleaho. Fhedzi ndo vha ndi tshi zwi ṱhogomela uri o vha e na vhuthu vhukuma nahone a tshi ṱoḓa u thusa vhaṅwe tshivhidzoni. Nga zwenezwo, nṱhani ha u mu sasaladza, ndo livhisa ṱhogomelo kha zwithu zwavhuḓi zwine a zwi ita na u mu ṱuṱuwedza.” Nga u ya ha tshifhinga, Julien o vha mushumeli nahone zwino ndi muvulanḓila wa tshifhinga tshoṱhe.

VHA THUSENI URI VHA SHUMISE VHUKONI HAVHO NGA VHUḒALO

12. Ndi pfaneleo dzifhio dzo teaho dzine dza nga thusa muthu uri a shumise vhukoni hawe nga vhuḓalo? Ṋeani tsumbo.

12 Zwi a pfesesea uri arali ra nga thusa vhaṅwe uri vha shumise vhukoni havho nga vhuḓalo, ri fanela u vha na vhusedzi. Samusi zwo sumbedzwa kha tshenzhelo ya Julien, ri fanela u sedza zwivhuya kha vhaṅwe u itela uri ri ṱhogomele pfaneleo na vhukoni vhune vha nga ita mvelaphanḓa khaho. Zwenezwi zwi fana na zwe Yesu a zwi vhona kha muapostola Petro. Naho nga zwiṅwe zwifhinga Petro o vha a tshi timatima, Yesu o dzula o amba uri u ḓo mu khwaṱhisa sa tombo.—Yoh. 1:42.

13, 14. (a) Baranaba o dzhia hani Marko? (b) Muṅwe wahashu ane a kha ḓi vha muswa o vhuyelwa hani nga thuso i fanaho na ya Marko? (Sedzani tshifanyiso tsha u thoma.)

13 Baranaba o sumbedza zwi fanaho na kha Yohane we a vha e na tshifani tsha Roma tshine tsha pfi Marko. (Mish. 12:25) Musi Paulo na Baranaba vhe lwendoni lwavho lwa  u thoma lwa vhurumiwa, Marko o shuma sa ‘muthusi,’ khamusi a tshi ṱhogomela zwishaiwa zwavho zwa ṋama. Naho zwo ralo, musi vha tshi swika Pamfilia, Marko o ṱutshela khonani dzawe. Vho vha vha tshi fanela u tshimbila vha si nae u bva devhula u swika fhethu hune ha vha na khombo. (Mish. 13:5, 13) Naho zwo ralo, Baranaba ho ngo livhisa ṱhogomelo kha vhushayanungo ha Marko, nṱhani hazwo, nga u ya ha tshifhinga o wana tshibuli tsha u mu ṱuṱuwedza. (Mish. 15:37-39) Zwenezwo zwo thusa onoyo mushumeli muswa uri a vhe mushumeli wa Yehova o vhibvaho. Zwi takadzaho ndi uri Marko o vha e Roma na Paulo musi e dzhele nahone vho vha vhe vhoṱhe musi a tshi isa dzi ndumeliso kha tshivhidzo tsha Vhukriste tsha Kolosa nahone muapostola o amba zwavhuḓi nga hae. (Vhakol. 4:10) Edzani u humbula nḓila ye Baranaba a vha o takala ngayo musi Paulo a tshi humbela thuso ya Marko.—2 Tim. 4:11.

14 Alexandre ane a kha ḓi tou bva u vheiwa sa muhulwane, u humbula nḓila ye muṅwe wahashu a mu thusa ngayo nahone a ri: “Musi ndi tshee muswa, u rabela khagala zwo vha zwi tshi nkonḓela vhukuma. Muhulwane o ntsumbedza uri ndi fanela u ḓilugiselela hani na u dzika. O nṋea tshibuli tsha u rabela tshifhinga tshoṱhe miṱanganoni ya tshumelo ya tsimu. Nga u ya ha tshifhinga ndo ḓifulufhela.”

15. Paulo o sumbedza hani uri u dzhiela vhahawe nṱha?

15 Musi ri tshi ṱhogomela pfaneleo dzavhuḓi kha muṅwe Mukriste, naa ri a mu khoḓa? Kha Vharoma ndima ya 16, Paulo o khoḓa vhatendi ngae vha fhiraho 20 nga nṱhani ha pfaneleo dze a dzi dzhiela nṱha. (Vharoma 16:3-7, 13) Sa tsumbo, Paulo o tenda uri Androniko na Yunia vho shumela Kristo tshifhinga tshilapfu u mu fhira nahone a ombedzela u konḓelela havho ha Vhukriste. Paulo o dovha a amba zwivhuya nga ha mme a Rufo, khamusi o vha a tshi khou amba nga ha nḓila ya lufuno ye a mu fara ngayo.

Frédéric (kha tsha monde) o ṱuṱuwedza Rico uri a dzule o ḓiimisela u shumela Yehova (Sedzani phara 16)

16. Ho vha na mbuyelo dzifhio musi hu tshi khoḓwa mutukana muṱuku?

16 Hu nga vha na mbuyelo dzavhuḓi arali ri tshi khoḓa vhaṅwe zwi tshi bva mbiluni. Ṱhogomelani tsumbo ya Rico, mutukana muṱuku wa ngei Fura, we a vha o kulea nungo ngauri khotsi awe vho vha vha sa tendi kha zwine a tenda zwone nahone vha tshi hana uri a lovhedzwe. Rico o vha a tshi humbula uri u fanela u lindela u swikela miṅwaha i re mulayoni u itela u shumela Yehova nga vhuḓalo. O dovha a pfa vhuṱungu ngauri o vha a tshi holedzwa tshikoloni. Frédéric muhulwane wa tshivhidzo we a humbelwa uri a gude na onoyo mutukana o amba uri: “Ndo khoḓa Rico ngauri honoho u hanedzwa ho sumbedza uri u na tshivhindi tsha u amba nga ha lutendo lwawe.” Eneo maipfi a ṱuṱuwedzaho o khwaṱhisa Rico uri a ḓiimisela uri a dzule e tsumbo yavhuḓi na u mu thusa uri a sendele tsini na khotsi awe. Rico o lovhedzwa e na miṅwaha ya 12.

Jérôme (kha tsha u ḽa) o thusa Ryan uri a fanelee u vha murumiwa (Sedzani phara 17)

17. (a) Ri nga thusa hani vhahashu uri vha ite mvelaphanḓa? (b) Muṅwe murumiwa o sumbedza hani u vha na dzangalelo kha vhahashu vha tshinnani vhane vha kha ḓi vha vhaswa, nahone ho vha na mvelelo dzifhio?

17 Tshifhinga tshoṱhe musi ri tshi khoḓa mushumo wo itwaho zwavhuḓi, ri vha ri tshi  khou ṱuṱuwedza vhahashu uri vha shumele Yehova nga vhuḓalo. Sylvie, * we a vha a tshi shuma Bethele ya ngei Fura lwa miṅwaha minzhi, o amba uri vhahashu vha tshisadzini vha nga khoḓa vhahashu vha tshinnani. O ṱhogomela uri vhafumakadzi vha ṱhogomela zwithu zwoṱhe zwine vhahashu vha zwi ita kana vhuḓidini havho. Nga zwenezwo, “Maipfi avho a ṱuṱuwedzaho a nga tshimbidzana na zwine vhahashu vha re na tshenzhelo vha zwi amba.” O dovha a ri: “Kha nṋe ndi ndugelo u khoḓa vhahashu.” (Mir. 3:27) Jérôme murumiwa wa ngei Fura kha ḽa Guiana, o thusa vhaswa vhanzhi vha tshinnani uri vha fanelee u ita tshumelo ya vhurumiwa. O ri: “Ndo ṱhogomela uri musi ndi tshi khoḓa vhahashu vha tshinnani vhane vha kha ḓi vha vhaswa musi vha tshi ita vhuḓidini vhuḓinḓani kana u ṋea phindulo i bvaho mbiluni, vha a ṱuṱuwedzea. Nga zwenezwo, vhukoni havho vhu a engedzea.”

18. Ndi ngani zwi tshi vhuyedza u shuma na vhahashu vha re vhaswa?

18 Ri nga dovha ra ṱuṱuwedza vhatendi nga riṋe u ita mvelaphanḓa ya lwa muya nga u shuma navho. Muhulwane a nga humbela wahashu ane a kha ḓi vha muswa ane a vha na vhukoni ha u shumisa khomphyutha uri a phurinthe zwidodombedzwa kha jw.org zwine zwa nga ṱuṱuwedza vhaaluwa vhane vha si vhe na khomphyutha. Kana arali hu na mishumo ine na i ita Holoni ya Muvhuso, zwi nga vha zwavhuḓi u humbela wahashu ane a vha muswa uri a shume na inwi. Vhuḓidini ho raloho vhu ḓo ni ṋea tshibuli tsha u ṱhogomela vhenevho vhaswa na u vha khoḓa na u thetshelesa mavhonele avho.—Mir. 15:23.

DZUDZANYELANI VHUMATSHELO

19, 20. Ndi ngani ri tshi fanela u thusa vhaṅwe uri vha ite mvelaphanḓa?

19 Musi Yehova a tshi vhea Yoshua uri a range phanḓa Vhaisiraele, o dovha a laedza Mushe uri a mu ṱuṱuwedze na u mu khwaṱhisa. (Vhalani Doiteronomio 3:28.) Vhunzhi ha vhathu vha khou ṱanganela na riṋe zwivhidzoni shangoni ḽoṱhe. Vhakriste vhoṱhe vha re na tshenzhelo—hu si vhahulwane fhedzi—vha nga thusa vhahashu vhaswa na vhaswa ngohoni u shumisa vhukoni havho nga vhuḓalo. Nga zwenezwo, vhanzhi vha ḓo vha vhavulanḓila vha tshifhinga tsho ḓalaho nahone vha ḓo ‘kona u funza vhaṅwe.’—2 Tim. 2:2.

20 Hu sa londwi uri ri tshivhidzoni tshihulwane kana ri kha tshigwada tshine tsha khou ita mvelaphanḓa uri tshi vhe tshivhidzo, kha ri dzudzanyele vhumatshelo. Tsha ndeme ndi u edzisa Yehova ane a dzula a tshi vhona zwivhuya kha vhashumeli vhawe.

^ par. 17 Madzina o shandulwa.