Pfukelani kha mafhungo

Pfukelani kha zwi re ngomu

 ZWE RA ZWI VHULUNGA

“Hu Na Mushumo Munzhi Wa Khaṋo Une Wa Fanela U Itwa”

“Hu Na Mushumo Munzhi Wa Khaṋo Une Wa Fanela U Itwa”

George Young o swika ngei Rio de Janeiro nga March 1923

ṄWAHA ndi 1923. Holo ya khontsati ya ngei São Paulo hune ha itwa Matambwa na Muzika yo ḓala! Naa ni khou pfa ipfi ḽi pfalaho zwavhuḓi ḽa George Young? Mutaladzi muṅwe na muṅwe wa nyambo yawe u khou ḓologelwa nga Lubodogisi. Vhoṱhe vhathu vha 585 vho thetshelesa nga vhuronwane. Ndimana dza Bivhili dza Lubodogisi dzi khou sumbedzwa kha tshikirini. Musi nyambo i tshi fhela, vhathu vha phakhelwa tshibugwana Millions Now Living Will Never Die! nga Luisimane, Ludzheremane na Lutaliana. Nyambo ndi yavhuḓi! Mafhungo eneo a mbo ḓi phaḓalala. Nga murahu ha maḓuvha mavhili nga madekwana, vhathu vho ḓala holoni u itela u thetshelesa iṅwe nyambo. Fhedzi ndi mini zwe zwa ita uri hu vhe na zwenezwi zwiitea?

Nga 1867, Sarah Bellona Ferguson o pfuluwa na muṱa wawe United States vha ya Brazil. Nga 1899, Sarah o ṱhogomela uri o no wana ngoho nga murahu ha u vhala khandiso ya Bivhili ye khaladzi awe a ḓa nayo Brazil a tshi bva United States. Nga nṱhani ha uri o vha a tshi funa u vhala, o ita muṅwaliso wa Watch Tower nga Luisimane. O nyanyulea nga mafhungo a Bivhili, a ṅwalela Wahashu C. T. Russell vhurifhi a ḓiṱalusa sa “vhuṱanzi ha uri a hu na vha re kule lune zwa ita uri vha si swikelelwe.”

Can the Living Talk With the Dead? (Lubodogisi)

Sarah Ferguson o ita zwoṱhe zwine a nga kona u itela u vhudza vhaṅwe ngoho ya Bivhili, fhedzi kanzhi o vha a tshi vhilaela uri ndi nnyi ane a nga thusa ene na muṱa wawe, u katela na vhathu vha Brazil. Nga 1912, Bethele ya ngei Brooklyn yo mu vhudza uri hu na muthu ane a ḓo ḓa ngei São Paulo na zwibammbiri zwinzhi zwine zwa vha na tshiṱoho tshine tsha ri Where Are the Dead? nga Lubodogisi. Nga 1915, o amba uri zwo vha zwi tshi mu mangadza uri Vhagudi vha Bivhili vho lavhelela u ya ṱaḓulu hu si kale. A tshi sumbedza mavhonele awe o ṅwala uri: “Hu pfi mini nga vhathu vha Brazil na vhathu vhoṱhe vha Amerika Tshipembe? . . . Musi ni tshi ṱhogomela vhuhulwane ha shango ḽa Amerika Tshipembe, zwi a leluwa u vhona uri mushumo munzhi wa khaṋo u fanelwa u itwa.” Vhukuma, mushumo munzhi wa khaṋo u ḓo itwa!

 Nga 1920, vhatshimbidzi vha zwikepe vhane vha kha ḓi vha vhaswa vha malo vha ngei Brazil vho ya miṱanganoni ya tshivhidzo ngei Ḓoroboni ya New York ngeno zwikepe zwavho zwa nndwa zwi tshi khou lugiswa. Musi vha tshi humela ngei Rio de Janeiro, vho vhudza vhaṅwe nga ha fulufhelo ḽavho ḽiswa ḽe vha ḽi guda Bivhilini. Nga u ṱavhanya nga murahu ha zwenezwo, nga March 1923, George Young, we a vha e mu-pilgrim kana mulavhelesi a dalelaho o wana vhathu vhane vha vha na dzangalelo ngei Rio de Janeiro. O dzudzanya uri hu vhe na khandiso dzo vhalaho dza Lubodogisi. Nga u ṱavhanya Wahashu Young a ya ḓoroboni ya ngei São Paulo ye ya vha i na vhathu vha ṱoḓaho u vha 600 000. Ndi he a ṋekedza nyambo nahone a phaḓaladza zwibugwana Millions, samusi zwo ambiwa mathomoni a yeneyi thero. O amba a ri: “Ndo vha ndi ndoṱhe, ndo vha ndi tshi fanela u ḓitika tshoṱhe nga u zwi kunguwedza kha gurannda.” O dovha a ri: “Yo vha i khunguwedzo ya u thoma ya nyambo ya khagala hu tshi shumiswa I.B.S.A ngei Brazil.” *

Ndimana dza Bivhili dzo sumbedzwa kha tshikirini musi Wahashu Young a tshi khou ṋekedza nyambo

Musi Watch Tower ya ḽa 15 December, 1923, i tshi vhiga nga ha Brazil yo ri: “Musi ri tshi ṱhogomela uri mushumo wa henefho wo thoma u itwa nga ḽa 1 June na uri ho vha hu si na muthu ane a vha na khandiso nga tshenetsho tshifhinga, zwi a swayea vhukuma u vhona nḓila ye Murena a fhaṱutshedza ngayo mushumo wonoyo.” Muvhigo u bvela phanḓa nga uri nyambo dza khagala dza Wahashu Young dza ngei São Paulo dzo vha dzi mbili kha dza 21 dze dza ṋekedzwa u bva nga ḽa 1 June u swika nga ḽa 30 September, nahone dza thetsheleswa nga vhathu vha 3 600. Ngei Rio de Janeiro mulaedza wa Muvhuso wo vha u tshi khou phaḓalala nga zwiṱuku nga zwiṱuku. Nahone miṅwedzini i si gathi fhedzi, khandiso dzashu dzi fhiraho 7 000 dza Lubodogisi dzo vha dzo ṋewa vhathu! Zwiṅwe hafhu, ho vha ho no thoma u gandiswa thero ya Watch Tower ya Lubodogisi ya November-December 1923.

Sarah Bellona Ferguson, muthu wa u thoma wa u ita muṅwaliso wa Watch Tower nga Luisimane ngei Brazil

George Young o dalela Sarah Ferguson nahone The Watch Tower yo vhiga uri: “Wahashu wa tshisadzini o ḓa kamarani ya vhaeni nahone lwa tshifhinganyana o vha o fhelelwa nga maipfi. Musi a tshi khaḓa Wahashu Young, nahone a tshi mu sedza tshifhaṱuwo, mafheleloni a amba uri: ‘Naa zwa vhukuma ni Mu-pilgrim?’” Ene na vhaṅwe vha vhana vhawe vho lovhedzwa nga u ṱavhanya. Zwi re zwone ndi uri o vha o lindela lwa miṅwaha ya 25 uri a lovhedzwe! Watch Tower ya ḽa 1 August, 1924, yo amba uri ho lovhedzwa vhathu vha 50 ngei Brazil, vhunzhi havho vho vha vhe vhathu vha Rio de Janeiro.

Zwino, ho no fhira miṅwaha ya 90, ri fanela u ḓivhudzisa hezwi: “Hu pfi mini nga vhathu vha Brazil na vhathu vhoṱhe vha Amerika Tshipembe?” Ṱhanzi dza Yehova dzi fhiraho 760 000 dzi khou huwelela mafhungo maḓifha ngei Brazil. Na kha ḽa Amerika Tshipembe mulaedza wa Muvhuso u khou huwelelwa nga Lubodogisi, Lupania, na dziṅwe nyambo dzine dza ambiwa henefho. Nga 1915, Sarah Ferguson o vha a tshi khou amba ngoho musi a tshi ri, ‘Hu na mushumo munzhi wa khaṋo une wa fanela u itwa.’—Zwe ra zwi vhulunga ngei Brazil.

^ par. 6 I.B.S.A. i imela International Bible Students Association (Dzangano ḽa Vhagudi vha Bivhili vha Tshaka Dzoṱhe).